Стефанъ Шкимба

Дороги Братья Лемки, Славна Родино и Честна Весѣльна Дружино:

Въ Мѣсяцу маю 1928 року — послухали Вы першого лемковско-русского рекорда ”Лемковске Весѣля“, котрый то рекордъ былъ наспѣваный и организованый нашими лемками.

Отъ того часу я получилъ много писемъ отъ Васъ, Братья Лемки, въ котрыхъ Вы проситеся, якъ то я до того дошолъ, што нашъ обычай, наша лемковска пѣсня, наше Весѣля, попало на рекордъ. Такъ я хочу разомъ всѣмъ Вамъ ту написати, якъ то до того дошло:

Коли появилися пѣсни другихъ народовъ и ихъ весѣля на рекордахъ, примѣромъ польске, словацке и украинске, мене то такъ засмутило, же чомъ нашого, лемковского нѣтъ, што я и спаня не малъ, бо мя грызло, коли то дакто изъ нашихъ лемковъ постаратся выдати якій нашъ рекордъ. Чекамъ я и чекамъ, але не дочекался ніякого лемка, котрый бы показалъ, што и мы мо жеме мати свой рекордъ.

Зашолъ я разъ на офисъ до компаній ”Окей“ и прошу, абы мѣ позволили одограти русскій рекордъ, а они мѣ на тото повѣдаютъ, же русскихъ рекордовъ есть больше, якъ костумеровъ. А я гварю, што русскихъ есть, але русско-лемковскихъ нѣтъ. А они звѣдуются, же што то лемки? То карпаторусскій народъ, реку, котрій мае свою бесѣду, свои спѣванки. А они гварятъ, же може то украински спѣванки и бесѣда. А я повѣдамъ, же нѣтъ, бо то русски, лемковски. И такъ я съ ними не дошолъ конца, ани они зомномъ. И ужъ иду зъ офису, а менаджеръ кричитъ за мномъ и гваритъ, што коли я думамъ, што таки рекорды будутъ мати отбытъ, то можу приготовити пѣсни и музыку. Я по весѣляхъ въ старомъ краю ходилъ, бо емъ гралъ, то доразъ припомнулъ пѣсни и глядалъ дружины. Зашолъ я до Петра Дудры и повѣдамъ, што мѣ треба музыкантовъ грати на рекорды. Г-нъ Дудра принялъ роботу и постарался о больше музыкантовъ. Теперь треба было свашокъ, жебы спѣвали Захожу до кумы Розаліи Быбель и гварю: ”Кумо, треба мѣ свашки“. Добре, гварятъ кума, але треба ищи одной свашки. Зайду до свахы Евки Долина, она добра спѣвачка. Приходиме до свахы Долинихы, гварю, же ся женю, треба мѣ свахы. — Не ворожте собѣ такъ, гваритъ сваха, бо часомъ можете повдовити, то все вамъ буде жаль, же сте такъ собѣ ворожили. — Но, свахо, я лемъ хочу, жебы сте спѣвали на рекорды — Обѣцяла и сваха Долина. Но, слава Богу, ужъ мамъ свою дружину. Але якъ ту спѣвати, коли святый постонько? Вшитко едно, най буде, што хоче! Скликалъ я дружину до гавзу, поставилъ кварту паленой на столѣ и гварю, пійте и спѣвайте, акъ на весѣлю въ краю. Якъ моя дружина ся розограла и розспѣвала, то народа собралося въ гавзѣ и коло гавзу велика сила, якъ на чудо. Стара сварится, штом безбожникъ, въ постѣ таке спѣваня и музыку робю, але я вытрималъ вшытко.

По такой пробѣ иду я на офисъ и повѣдамъ, же ужъ вшытко готово. Назначили часъ и кажутъ приходити грати. Скликалъ я раненько того дня до себе дружину, стара мала гусячого смальцу, зварила, выпили сме на смѣлость. Коли сме выходили зъ дому, сталъ я на порозѣ и повѣлъ весѣльне казаня. Идеме, реку, такъ далеко, што ищи николи нашъ лемко тамъ не былъ, мусиме заховатися, по американски. Сѣли мы на возъ и загнали коники, такъ же за пару минутъ были сме на офисѣ. Кажутъ намъ порозбератися изъ тяжкой одежи. Свашки знимаютъ кожухи, басѣста оперъ басы о стѣну, помагатъ свашкамъ ся розберати, а басы тымчасомъ бухъ на землю и голова отъ нихъ одорвалася. Правду, думамъ собѣ, бесѣдуютъ, же руснакови все вѣтеръ въ очи. Подходитъ до мене ”боссъ“ и гваритъ, же што будеме робити безъ басовъ. А я гварю, же може собѣ даякъ поможеме. Вытягъ я крытникъ, а басѣста нашолъ кусъ дроту и привязали мы голову до басъ.

Но, та ужъ сме готовы, гварю. Поставили насъ до ”майкрофону“ и кажутъ грати и спѣвати.

Граме мы и спѣваме близко три годины часу, а намъ повѣдаютъ, же ищи не добре, кажутъ дальше спѣвати и грати.

Свашкы ся подушыли, гудакы струны поторгали, я зголоднѣл, но але што роботи, будеме ищи разъ пробовати и то якъ можеме найлѣпше. Граме и спѣваме, старамеся якнайлѣпше, ажъ ту при самомъ концѣ еденъ музыкантъ кричитъ: ”Тота ужъ буде добра!“ Вшитко ся попсуло тото найлѣпше, бо треба было тихо быти. . . Ужъ больше намъ не позволили повторяти. Гварятъ, што коли буде дашто варталъ дакотрый першій, то выпустятъ, а якъ нѣтъ, то нѣтъ.

Мѣ волосы на головѣ стали! Тельо роботы клопоту, а якъ съ того ничъ не выйде, то лемъ наша ганьба.

О тыждень захожу на офисъ, правѣ принесли нашу рекорду изъ фабрики, заграли мѣ, просятся, ци добра: ”Орайтъ, реку, лемъ пусте на маркетъ!“

Такъ вышолъ першій рекордъ. Лемки почали интересоватися, то намъ додало охоты до дальшой роботы. Цѣлый рокъ сме грали и спѣвали ”Лемковске весѣля“! Але то ужъ было лекше, якъ съ першимъ рекордомъ, ужъ и басы цѣлы были и страху сме не мали.

1) Лемковски вечирки ч. 1—2, — 2) Лемковскій Кермешъ ч. 1—2, 3) Лемковскій Баль въ Нью Іорку ч. 1—2, 4) Лемковска Забава в корчмѣ ч. 1—2, 5) Циганске Весѣля ч. 1—2—3—4, 6) Забава у вдовы и вдова косити проситъ, 7) Милый ничъ не маме и Въ Америкѣ сыпана дражечка, 8) Святый вечеръ въ Карпатахъ.