Что было бы, коли бы всѣ лемки читали «Лемка»? Велике чудо было бы! Насъ лемковъ тутъ въ Америкѣ изъ галицкой и угорской стороны есть якихъ 200 тысячъ! Коли бы такъ 200 тысячъ людей читало «Лемка», то «Лемко» выходилъ бы каждый день, то разъ! «Лемко» малъ бы въ Нью Іоркѣ, або на Мейфильдъ такій «небошкрябъ», якъ Вулвортъ въ Нью Іоркѣ, цѣлу машинерію, где бы «Лемко» печатался 60 тысячъ на годину и то не такій листокъ, але было бы што въ обѣ руки взяти. Не бабралъ бы въ «Лемку» свои «глупости» Ваньо Гунянка, якъ пише Свентковскій изъ Карнеги до «Лемка», або одинъ попъ до «Свѣта», але нашли бы ся люде мудры, котры знаютъ якъ, что и где писати. «Лемка» читали бы въ Вашингтонѣ и въ Парижѣ и Москвѣ и Варшавѣ и въ Прагѣ и въ Гомстедѣ и вшитки бы слухали и повторяли, што напише «Лемко». Такъ поляки, якъ словаки и чехи доразъ забрали бы своихъ жандармовъ, учителей и урядниковъ изъ Лемковщины и Рада Амбасадоровъ и Лига Націй стерла бы границу межи лемками. Ганчина або Югаса выбрали бы сме яко члена Лиги Націй и тамъ бы доразъ порядокъ зробили съ границами и автономіей. Въ нашихъ горахъ задымили бы фабрики и т. д. Што то о томъ писати, штобы было, коли не читаютъ. . . А подумати лемъ, же штобы намъ изъ того пришло, якій бы мы изъ того «профитъ» мали, то жаль, же всѣ лемки «Лемка» не читаютъ. . . Такій жаль!

А чомъ не читаютъ всѣ? Изъ 200 тысячъ половина совсѣмъ не зна читати! То ужъ 100 тысячъ отпаде! Изъ той другой половины половина знае лемъ «мадьярски» або «словенски» буквы. . . Зновь 50 тысячъ отпало. Правда, 50 тысячъ изъ того знае ужъ и русски буквы, але 25 тысячъ изъ того читатъ лемъ церковне. «Псалтырь», «Житья Святыхъ», «Старый и Новый Законъ».

Остало насъ 25 тысячъ. Жебы лемъ тоты читали то и такъ бы можъ было велику роботу зробити. . . Але штожъ? 10 за Платономъ, 5 тысячъ за Адамомъ, а 5 тысячъ ростряслися: Одни «студенты библіи», други чекаютъ конца свѣта, третьи совсѣмъ свѣтомъ не интересуются.

Остало намъ 5 тысячъ. Изъ тѣхъ 5 тысячъ часть скупы. На «Лемка» одного долалра! За газету бы ктоси гроши давалъ, коли таку массу американцы въ «гербидж» выметуютъ. . . «Цѣлыми наручами берь и никто слова не повѣстъ». . .

Друга часть то лемки мудры «апсолютно», якъ сами бесѣдуютъ. Такій вамъ «апсолютно» мудрый бере въ руки «Таймсъ», або другу поважну газету, най люде смотрятъ. — Коли встрѣчу такого лемка, то посмотритъ на мене съ горы и гваритъ:

— Шкода вашого заходу! Ничъ съ того не буде, бо то народъ глупый!»

Остала намъ тысяча такихъ лемковъ ни «апсолютно» мудрыхъ, ни «апсолютно» дурныхъ, а съ томъ тысячкомъ ни взадъ ни впередъ. . .