І.

Въ Ярембинѣ, ци Шляхтовѣ,
Тамъ коло Липника
Тамъ на Спишу подъ Татрами,
Где бѣда велика
Породила баба лемка,
Шестого Павлика...
Баба тота была бѣдна,
Мѣсяцъ повдовѣла;
Моцъ робила, мало спала,
А найменьше ѣла...
Пять дѣтокъ ей охабилъ
Ей небощикъ Грицко,
Стару хижу и кусъ дроту...
Было тото вшитко...

И въ той хижѣ подъ Татрами,
По смерти старого,
Уродился шестый Петро
На свѣта дорогу...
Уродился, окрестили,
Попа заплатили,
Потомъ бабу выводили
«Отъ нечистой силы»....
Але никто не подумалъ
О ихъ бѣдной долѣ,
Ци одѣты и ци сыты,
Ци дашто не болитъ?
Жила вдова... Ба не жила,

Але животѣла
И на свои, на голодны
Дѣточки смотрѣла...
А дѣточки посовѣли,
Почали вмерати:
«То на вшитко воля Божа!»
Плаче бѣдна мати...

Не долго и наша вдова
По свѣту ходила,
Кашель, колька ю мучила
Ажъ ю задусила...
Другого дня Петра съ хижи
«Рихтаръ» гетъ выгонилъ,
Бо хижу взялъ превеелбный
Панъ за похороны...
А для Петра осталася
Лемъ стара гунянка,
Палица, дюрава торба
И дроту вязанка.
Тельо всего му остало
Во спадку по нянью...
(Бо и няньо его ходилъ
Въ свѣтъ по дротованью)...

Пустился нашъ Петро Павликъ
До свѣта за очи:
«Дайце гарчки друтовацъ!»
Кричитъ, што лемъ мочи...
Але планный то заробокъ,
Нѣтъ хлѣба лемъ вода,
Бо засъ на бляшаны горчки
Пришла теперь мода...
Купилъ Петро Павликъ нютовъ,
Почалъ нютовати,
Научился помаленки
И котлы латати...
Ходилъ, кричалъ гетъ по свѣту,
По мѣстахъ и селахъ,
А хлѣба все мало было,
Ничъ ся му не вело:
Ту злы люде го ганьбили,
Тамъ псами гуцкали,
«Дайце гарчки друтовацъ!»
Дѣтиска кричали...

Ишли лѣта за лѣтами,
Зимы за зимами,
А у Петра тота гунька,
Што ужъ о ней знаме...
Тота гунька, тай кошеля
До дегтью змочена,
Тай торбина тота съ дюромъ
Была его жена...
Видѣлъ Павликъ въ свѣтѣ людей
Богатыхъ и сытыхъ,
Видѣлъ въ шолкахъ, златѣ, перлахъ,
Роскошно одѣтыхъ...
Повѣдали ему люде,
Же то Божа воля,
Же для однихъ лемъ богатство,
Для другихъ недоля...
Почалъ Павликъ молитися,
До церкви ходити,
О роботу и о хлѣбецъ
Боженька просити.
Пару лѣтъ такъ просилъ Бога,
Молилъ, билъ поклоны,
А не было видно добра
Съ ніякой стороны...

А тѣмъ, што ся не молили,
Сыпалося съ неба:
Сыпалося больше всего,
Якъ имъ было треба...
Взбурилася въ Петрѣ душа:
Почалъ проклинами!
Престалъ въ церковь ужъ ходити,
Бога призывати...
Проклялъ Бога, проклялъ святыхъ,
Проклялъ всѣ народы!
Загубилъ нашъ Петро душу,
Бо скочилъ до воды...
И предстала Петра душа
На другій день зрана
Предъ пекольнымъ, предъ престоломъ
Антихриста пана...

II.

Звернулъ на Петра Антихристъ
Свои страшны очи,
Што свѣтили, якъ двѣ ватры.
Середъ чорной ночи:
— «Скади душа ту приходитъ?»
Просится зъ нѣмецка:
— «Кальвинъ, лютеръ, ци ты душа
Католицко-грецка?
«Петро Павликъ мое мено,
Похожу зо Спиша;
Бѣдовалъ я цѣле житья,
На конецъ согрѣшилъ...
Вѣра моя христіянска
Греко-католицка,
Не даяка протестантска
Або шизматицка»...
То я тебе ту не можу
До пекла пустити!
Бо въ тебе не буде грошей
За вступъ заплатити...
Тоты греко-католицки
Душички всѣ голы...
Коли брати такихъ бѣдныхъ,
За што куплю смолы?
Зъ вашого бѣдного краю
Нѣтъ для насъ потѣхи
Не можъ брати жадну душу,
За ніяки грѣхи.
Кедъ бы такъ не ваши попы
Греко-католицки,
То ніякой пользы зъ лемковъ,
Ніякой душички...
Бо што намъ изъ такой души,
Якъ отъ ты небоже?!
Безъ одежи и безъ грошей,
Лемъ кости и кожа?...
Ваши попы, то намъ милы,
Приносятъ намъ дары:
Души тяжки, сало, гроши,
Зелены доллары...
Съ такой тяжкой, тлустой души,
Можъ дашто втопити...
А съ тебе ту ніяка корысть...
Вертай на свѣтъ жити...
— «Найчорнѣйшій Антихристе,
Пане превелебный!
Не женте мя назадъ на свѣтъ,
Бо тотъ свѣтъ ганебный!
Нема пляцу для бѣдного
Голову склонити,
Ани хлѣба, ни роботы,
Съ чого буду жити?
А и зима тамъ велика,
Нѣтъ кута теплого
Для такого, якъ я, пане,
Павлика бѣдного...»
Росплакала ся горенко
Павликова душа...
Розмягчился и Антихристъ,
Ужъ варгами рушатъ...
«Бѣда, якъ такъ, человѣче!
Што я ти поможу?
Ту задармо тя ховати
И въ пеклѣ не можу...
А роботы ту для тебе,
Для слабенькой души,
Нѣтъ ніякой въ нашомъ «стейтѣ»,
И внетъ ся не рушитъ...
И што знашь ты за роботу?
Што ты можешь знати?
Якъ всѣ лемки въ горахъ своихъ,
На бѣду плакати...
Превелебный, най чорнѣйшій!
Я не повересло!
Бо я лемко съ Орябины,
Мамъ въ рукахъ ремесло!
Я знамъ гарчки друтовати,
Тай котлы латати,
Знамъ «клампфнерку», заливати,
Знамъ и нютовати...
Чомъ же заразъ есъ не гварилъ?,
Можешь ся придати,
Бо намъ котлы ужъ почали
Добри протѣкати...
Возъ знарядя, и ковало,
Ту машь бляху, нюты,
Зошмарь гуньку, пообзерай
Всѣ пекольны куты...
А где видишь, же протѣкатъ
Смола зъ дакотрого,
Доразъ дюру бляхомъ заткай!
Тельо дѣла твого!»

ІІІ.

Обрадовался нашъ Павликъ,
Же досталъ роботы,
Ажъ подскочилъ отъ радости,
Отъ велькой охоты...
Доразъ почалъ першій котелъ
Молоткомъ пукати...
Ажъ тамъ въ котлѣ ктоси почалъ
Тяженько вздыхати...
Слухатъ Павликъ, ся помалы
На пальцахъ подноситъ:
«Што тамъ въ смолѣ за душичка?»
По тихи ся проситъ...
Смотритъ въ котелъ, а душичка
Высунула главу,
Острижену, причесану,
Съ переду лысаву...
Гамба чисто выголена,
Лица папуляты...
«Тажъ то нашъ панъ Превелебный!
О, Пречиста Мати!
Та якъ, вы ту, святый божій,
До котла упали?
Вы насъ вшиткихъ такъ на небо
За живота вели,
Што я думалъ, же на рукахъ
Васъ несли ангели
И просто васъ попри святомъ
Петрѣ посадили...
За што васъ ту, Превелебный,
Въ томъ котлѣ мучили?
«Ой, не такій я былъ святый,
Якъ видѣли люде...
Грѣшилъ тяжко и не думалъ,
Што то съ того буде:
Служилъ вѣрно я мадьярамъ
Не свому народу,
Хоцъ я самъ похожу родомъ
Изъ русского роду...
Але гроши мѣ платили,
Золоты дукаты,
Изъ народа позволили,
Сколько хочу брати...
А чѣмъ больше гроши идутъ,
То все больше хочу
И не могъ ся спротивити
Лакомства немочи...
Тягъ безъ сердца изъ народа
Каждый рокъ коблины,
За погребы, кресты, службы,
Всяки роковины...
Не уважалъ я на тото,
Ци то зъ богатого,
Ци я беру ужъ послѣдне,
Съ Павлика бѣдного...
Коли кто не хотѣлъ дати,
Лемъ ся уперъ дармо,
То я доразъ прикликовалъ
Мадьярскихъ жандармовъ
Або коли дакто хотѣлъ
Учитись по русски,
То я доразъ до жупана,
Же въ селѣ сутъ «муски».
А якъ урядъ русску церковь
Хотѣлъ скасовати,
То я першій по мадьярски
Починалъ спѣвати...
И за тоты мои грѣхи
Терплю страшны больи...
А было мѣ добре житья
На землѣ даколи»...
А я тому свято вѣрилъ,
Же вы святый, божій,
Неразъ чекалъ пару годинъ
Въ зимѣ на морозѣ,
Жебы вашу святу ручку
Могъ поцѣловати...
Але достъ ужъ того буде,
Тра котелъ латати...

ІѴ.

Залаталъ нашъ Павликъ котелъ
Иде до другого:
Нашолъ въ котлѣ учителя
Зъ села сусѣднього,
Што не хотѣлъ русски дѣти
По-русски учити
А почалъ ихъ по мадьярски
Въ школѣ туманити...
А коли словацке право
На Спишу настало,
То учитель словакъ векшій,
Якъ прешовскій Гало...
Съ учителемъ Павликъ не вюлъ
Ніяку розмову,
Лемъ молоткомъ добри пукнулъ
Въ лысаву голову...

*

*

*

Иде дальше: Тамъ нотарошъ
Корчится отъ болю...
Хлипатъ смолу, стогне, рычитъ
И проклинатъ долю...

*

*

*

Недалеко кричитъ жупаны
«Басомъ теремтете!»
Така чорна его душа!
(Зъ мадьярска «фекете»).

*

*

*

Та и рихтаръ съ того села
Выставилъ голову!
Хлипатъ смолу за всѣ кривды,
Хижу Павликову...

*

*

*

А тамъ цѣлый кутъ заняли
Мадьярски Арпады,
А коло нихъ польски крульи
Разомъ до громады...

*

*

*

Ту Гасбурги кричатъ «ретункъ»
Въ котлахъ ся купаютъ,
Тамъ на землѣ уживали,
Ту смолу хлипаютъ...

*

*

*

А найбольшій кутъ заняли
Найбольши изъ пановъ,
Бо на землѣ «святы отцы»,
Паны зъ Ватикану...
А коло нихъ кардиналы
И всяки бискупы,
Пили шампанъ, теперь смолу
Хлипаютъ до купы...

Ѵ.

Полаталъ нашъ Павликъ котлы,
Чорты посмотрѣли,
Здали рапортъ Антихристу,
Павлика хвалили...
Предсталъ Павликъ предъ найстаршимъ,
Снялъ шапку и гваритъ:
Найчорнѣйшій Антихристе
И пекольный царе!
Ужъ всѣ котлы полатаны!
Радъ я съ того! Лемъ повѣчь,
Што ты хочешь въ дарѣ?
Ничъ не хочу, лемъ ты пустъ мя
Назадъ на свѣтъ жити!
Ужъ я теперь буду знати,
Кому угодити...
Речу правду всѣмъ народамъ,
Найперше на Спишу,
Буду ходилъ зъ села въ село
Ніяке не лишу....
«То не можу! Пропала бы
Чортова робота
И намъ въ пеклѣ ужъ треба бы
Замкнута ворота...
Ба и ты мѣ хлопъ придатный,
До нашихъ варстатовъ,
Бо намъ котловъ треба вельо
Для новыхъ магнатовъ:
Треба котла для «татичка»,
Та и Розсыпаля,
Тра доброго для Бенеша
Та и Заплеталя...
Придутъ новы епископы,
Придутъ каноники,
Придутъ всяки «демократы»
Зъ вашой «републики»...
А изъ Польши поприходять
Паны и магнаты
Тай и всяки кандидаты
Въ пыску «демократы»...
Треба котловъ выробити
Превелику массу,
Бо якъ придутъ, то ужъ поздно,
Ужъ не буде часу»...

*

*

*

И такъ Петро Павликъ осталъ
Въ пеклѣ на роботу;
А намъ нѣтъ кто правды речи,
Розвести турботу:
Ци есть пекло и для кого?
Ци для пановъ поповъ,
Ци для бѣдныхъ русекихъ людей,
Для робочихъ — хлоповъ?

Ваньо Гунянка.