Красна, Дня 1 августа, 1928.

Дорогій Свату!

Кажете мѣ што писати:
Мои сте Вы, бракъ темату,
Што робити, Боже Святый. . .
Жебы чловекъ былъ женатый,
Якъ Вы, Свату, дайме нато,
То бы было лекше съ бабомъ
Ци кончити, ци почати. . .
Хоцъ бы была немолода,
Най бы была кусъ зубаста,
Лемъ бы мала фантазію
И зачинку, то ужъ баста!
Адже знате, же безъ бабы
Не выдумамъ ничъ, Ей Богу,
А до казетъ то треба бы
Написати што нового. . .
Тото, што вчера было,
То днесь преця ужъ не нове:
Ни «выборы», ни «пожичка»,
Ни «мньейшосьцѣ народове». . .
А іегомосць все лемъ едно,
Ци въ недѣлю ци при святѣ:
О данинахъ и о пеклѣ,
Тай о святомъ Асафатѣ. . .
А хлопъ того слухатъ нерадъ,
Бо му ся давно сприкрило,
Еденъ по другомъ позератъ
И Гаврило и Кирило. . .
Але мы тыжъ добре знаме,
Для никого то ненове,
Же отъ вѣковъ орютъ нами
Іезуиты и панове.
Въ Америкѣ засъ «причеры»
Католики и бискупы,
Каждый изъ нихъ тягне «овцу»
Лемъ до своей, до халупы. . .

Въ насъ ся люде отмѣнили
И настали инши часы,
Што давно доброго было,
Вшитко пошло гетъ до фраса!
Наши хлопцѣ вмѣсто гуньокъ
Всяди носятъ суты,
Замѣстъ керпцѣвъ, «лакеръ шкоты»
Або польски буты. . .
О холошняхъ ани слыху,
Хлопцѣ носятъ «райтки»,
А дѣвчата подъ кабаты
Натѣгаютъ майтки. . .
Хоцъ тамъ стары ся не годятъ,
На молодыхъ дудрутъ,
Але дѣвки што разъ веце
Уживаютъ пудру. . .
И варги си натераютъ,
Краснымъ смаровиломъ,
И мыются въ теплой водѣ
И пахнячимъ мыломъ. . .
И не чудо! Польске панство
Высока культура
Хоцъ ся часомъ ѣсти хоче,
Хоцъ бѣда, то: «Гурра!»
«Моцарствове становиско»
«Потенга» и «квита». . .
А вшиткимъ додає духа
Польска оковита. . .
Одна школа, а пять корчемъ,
Таки въ насъ «стосунки»,
«Цо осьвята, то осьвята,
А трунки, то трунки». . .

А руснаки, якъ звычайно
Жрутся межи собомъ:
«Рундо» съ «Ундом» — «клерикалы»
Съ «Рундом» и «Сель-робомъ». . .
А я гварю, всѣ бортаки
Шкода же Руснаки. . .
Якъ бы были люде мудры,
Нешли бы на удры. . .
Вшитки бы си працували,
Якъ бы лемъ хотѣли,
Вшитки бы мы пришли вконецъ
Ку единой цѣли. . .
Ей, Руснаки, жебы знали,
Яка у насъ сила!
Што-жъ. . . Не знаютъ: ни Гаврило,
Незна и Кирило. . .
Бо розуму намъ бракуе,
Тай нема где взяти. . .
Але силу Руснакъ мае:
Терплячій, завзятый. . .
Не достали сме розуму
Отъ тата и дѣда;
Сами ся не хцеме вчити,
То насъ навчитъ бѣда. . .
Другій народъ впередъ иде,
Учится, оначитъ,
А Руснаки церкви ставятъ,
Библію тлумачатъ. . .

Вашъ Сватъ.