Тримати фармерамъ куры при другомъ фармерствѣ не оплачатся. Не выплачаются и «чекенфармы». Такъ куры завзялися, што знесе вамъ два, або три яйця на тыждень и давай ей пшеницю ѣсти. А въ зимѣ куры тратятъ сердце со всѣмъ, смѣются изъ бѣдного фармера. Цѣлу зиму ни одного яйця.

Пишутъ, што то раса така. Але я видѣлъ куру, котора, якъ фармеръ (айришъ) гварилъ, знесла му черезъ рокъ 365 яецъ и то въ звычайномъ року, не переступномъ. . . Якой тотъ фармеръ штуки уживалъ, то я вамъ повѣсти не можу, бо онъ говорилъ, же то така раса, котру онъ «выкрижовалъ». И всѣ куры отъ него роскупили.

Не знамъ якъ кому, але тота кура, што я отъ него купилъ изъ той его расы, то не знесла лемъ 36 яецъ, а едно, остатнье выпустила въ оболонѣ, за цѣлый рокъ и то преступный.

Раса не платитъ. Кажда кура еднака! Кура, тай кура! И прото я взялся на способъ, жебы съ куръ выдобыти больше яецъ. Я человѣкъ независтливый, най тамъ каждому несутся куры и я подѣлюся радо своимъ способомъ. Способъ тотъ «сюръ» и най каждый «чикенфармеръ» попробуе, а переконатся.

Я старый «чикенфармеръ» и знамъ курю натуру:

Кура сотвореня страшно глупе, але завистливе, скупе. . . Найбольше, якъ знате, знесе вамъ одно яйце денно. И зато я придумалъ, што треба для куры зробити зъ едного дня два. И запровадилъ я електрику до курника и коли дванаста година, засвѣтилъ пару лямпокъ, такъ было якъ день. И куры думали, што то ужъ рано и понеслися, а коли пришло рано, понеслися другій разъ.

То першій способъ, але не такій доходный.

Другій способъ далеко доходнѣйшій. Вы можете выдусити съ куры по пять и шесть яецъ денно. Чѣмъ кура дурнѣйша, то больше яецъ знесе. . .

Вы сте видѣли, што коли кура знесе яйце, то любится попризерати на него, побавитися.

И мусите гнѣзда для куръ такъ урядити, што коли кура знесе яйце, жебы гнѣздо зважилося, а яйце упало до подставленной баксы. Кура посмотритъ, а яйця нѣтъ. Подуматъ, же ищи не знеслася и знесе друге, третье и т. д. Коли ужъ видите, же вамъ достъ, же ужъ и на куру затяжко, то лиште одно яйце, най побавится.

Апотомъ кура такъ привыкне до того, што все буде по пару яецъ денно нести. . .

Такъ оплатится вамъ «чикенсфарма».