ПРИВІТ ОТ ОТДІЛОВ Л.С. В ЮНКЕРС, Н.Й.

Отділ основаный 22 февраля 1932 року, в тот день отбылся основательный митинг и был выбраный первый уряд, до котрого вошли: Иван Малютич предс., Теодор Глюз рек. секр. Григорий Лукачин ф. секр., Владимир Гончарик кассир. Первый уряд почал сейчас активну роботу, был организованый драмкружок, предприятия отділа выходили успішно, што взбудило зависть у старых патриотов, котры почали вести свою пропаганду против Л.С. Но то отділу не лем не пошкодило, а помогло. Скоро был основаный и женотділ Л.С. ч. 4., котрый был на помочы мужотділу. Послі был основаный Русско-Лемковский Хор при отділах, котрый тішится успіхами в своих выступлениях. Нашы отділы Л.С. працували разом с русскыми емигрантами из России, о отділом И.Р.О, основали вспольный Русско-Лемковский клуб. В 1936 року у нас родилася мысль купити разом кусок поля для пикников. Всі три отділы зложили по 1000 дол. для той ціли и был покупленый кусок парку в сусідстві с Тибитс парком, где тепер стоит наш Центр. Член Т. Пыртей пришол на помоч организации и дал нам пожичку, так што мы купили землю без банкового моргичу. Літом мы устроювали доходны автингы на свойой землі и почали будову дому. На 6-ом съізді Л.С. постановил перебрати тот маєток для будовы Карпаторусского Американского Центра и выбрал комитет будовы и так почалася Народна Будова. В 1938 року был основаный отділ молодежы Л.С. ч. 9. и отділ дітей.

Нашы отділы Л.С. в Юнкерс витают всіх членов организации Л.С. в Десяту Рочницу Л.С. головных урядников, Карпаторусский Ам. Центр, його правление и членов. Мы увірены, што всі надале будеме стояти в своих карпаторусскых робочых организациях и разом з другыми народами будеме боротися за народну правду и за свободу нашого поневоленого карпаторусского народа на його родной землі.