Отповісти на тот вопрос пару словами трудно. О том, який громадный переворот зробила газета “Лемко” меже нашым народом, як ту на емиграции, так само и в краю, было бы што писати цілы томы.

Одно, што мене, яко селянина роботника найгорше боліло, было то, што тоты, што нибы мали народ просвіщати, ище горше затемнювали, и потрафили затемнити го так, што тот селянин, роботник, який своим трудом утримувал всіх и вся, сам себе понижал и гнул карк з далека перед леда панком.

А днес, благодаря нашой организации и нашым учителям редакторам, газеті “Лемко”, народ зачынат пробуждатися, и што раз то больше находится меже нами такых, якы горды на своє происхождение и не понижают сами себе перед леда кым. Уж потрафят розріжнити честных от фальшивых и зарозумілых людей в организации. И благодаря тым людям мы можеме похвалитися тым прогрессом за 10 літ существования нашой организации и нашым Карпаторусскым Американскым Центром. Днес и тоты, што недавно величали себе рабами по запомоговых газетах, напевно сами себе встыдаются и не мают смілости вылазити зо своим рабством.

Но найбольшу признательность мусиме отдати нашым редакторам, Д. Вислоцкому и Д-ру С. Пыжу за их бескорыстну роботу для народной организации, без них мы, не в силах были того достигнути. И єсли бы массы народны порозуміли, яку велику жертву отдали тоты два люде для народа, то днес не было бы ани одного лемка-карпаторосса, який не належал бы до Лемко-Союза и Карпаторусского Ам. Центра.

На жаль находятся ище такы фальшивы люде, якы стараются ширити розмаиты фальшивы брехні, мают за ціль убити тых двох людей морально и одобрати у них охоту до дальшого труда для культурного поднесения нашого народа.

Одном из такых фальшивых брехней єст та, што будто Д. Вислоцкий и Д-р. Пыж лем зато сут при Лемко-Союзі, бо с того жиют и К. А. Центр побудували лем для себе. Таком бесідом меж нерозуміючими стараются убити у народа довірие до них.

И єсли ширят такы брехні тоты, што им на том залежит, штобы народ тримати в темноті, бо лем так го можут на дальше выкорыстувати, то єст зрозумілым. Но єсли вы почуєте такы слова от робочого и то такого, што представлят себе за дуже мудрого, то приходит червонітися зо встыду, што меже нами робочыма находятся такы выродкы. У такых выродков нияка народна ани робоча организация не добра, кромі такой, при котрой они могли бы корыстати, но сами на народну ціль николи цента не дали, и не вірят в то, штобы мы всі трудилися для организации бескорыстно. Бо то, што мы платиме нашым редакторам, ледво на житя для них выстарчат.

Ище в краю мні приходилося бесідувати зо студентами университета о заотсталости нашого народа, о том, як фальшиво нас учат по тых сельскых школах, як где была в селі школа. Але то вшытко было под секретом, штобы власти не довідалися, што они хлопу на селі такы справы выясняют, бо зато можут попасти в неласку у панов, а тым самым и позбавити себе куска хліба. А неодного отец затратил великы грошы, штобы сынови дати лекший кусок хліба, и потом такий выученый сын ишол против интересов навет свого власного родича.

Посвятити себе для народа, означало то само, што идти самому на голодову смерть, бо хлоп того не порозуміє, и нето, жебы был му вдячный зато, а напротив, стане його ворогом. Так объясняли мні студенты в краю. В той час я не хотіл им вірити, а днес я переконался, як трудно вытягнути чоловіка с той темноты.

Приіхавши до Америкы, приходжу ку церкви, стоит на корнері группа людей и о чым то дискуссуют. Подхожу ближе, слухам, дакотры з них домагалися, штобы при церкви открыти читальню и школу для старшых. Нато отзыватся оден досит высокого роста з великым брюхом мужчина: “Нашто хлопа розуму учити”? Позднійше я довідался, што он был цілым босом в парафии, а сам ледво знал своє имя подписати, но взялся до бизнесу и може мал пару долларов больше от другых, то рахувал себе за дуже дуже мудрого. Як мож было сподіватися даякой просвіты от попа або дяка, як такий бос в парафии был против того, штобы кто хлопа учил розуму.

И здавалося, же мы лемкы карпатороссы уж так пропадеме и сліда по нас не остане. Но нашлися и меже нами такы интеллигенты, якы не стратили віры в свой народ, из котрого вышли, и посвятили себе для народа.

Не настрашили Гунянку Талергофом, ани засудом на смерть в старой Австрии, не настрашили го и тепер тоты злы люде, якы все штоси против него змышляют.

Не зломили духа Талергофом в молодом студенті, а позднійше Д-ру прав Симеону Пыжу, не подійствовало на него и то, што такы нашы бизнесмены, што не хотіли, штобы хлопа розуму учити, одобрали його кусок хліба, думаючи тым заставити го писати так, як им выгодно.

И я вірю, што меже нашым карпаторусскым народом найдеся уж тысячы настолько сознательных людей, якы потрафлят оцінити их труд для народа, и отдати им належну честь. А можут учинити то найліпше тым, што будут и надальше ширити идею нашой организации, нашу литературу помеж тых, до якых не дошла ище наша литература, и тым причинятся до культурного поднесения, а так само и освобождения свого народа.

Я тішуся, што я дочекался того часу, што наш карпаторусский народ зачинат отрясати с себе ту всяку дрянь, яка не давала му жити свободно.

Єсли бы у нашого народа до світовой войны была така организация, як Л.С., котра бы мала за ціль об’єдинити весь карпаторусский народ, и наш народ мал такых лидеров, якых маме днес при Лемко-Союзі, то наш народ не находил бы ся днес в чужой неволі, а был бы злученый з великым Русскым Народом и тішил бы ся таков свободов, як и всі народы великой и могучой страны, Совітского Союза.

Длячого я стою членом Л.С.? Длятого, што як неорганизованый народ, так и неорганизованы роботникы не мают ниякой силы. В Пассайку на митингу штрайкуючых роботников єден ученый профессор показал нам ясно на пальцах на рукі, што значит организация. Єден палец не має праві ниякой силы, двома, трома, штырома уж дашто годен поднести, але як зложит пят пальцов в єдну пясть, то уж може и ударити. Чоловік єден, без организации, не значит нигде нич. Лемко-Союз, то наша народна организация и наша народна школа, и коли бы я не стоял в той организации, то я бы себе не чул добри на світі. Коли в Пассайку основали отділ, то я дораз стал и буду стояти аж до самой смерти, бо я хочу через народну организацию помочи своим братям в краю освободитися от фашизма, а ту в Америкі, штобы наш карпаторусский народ уважали так, як и другы организованы народности уважают.

ДЛЯЧОГО Я ПРЕДПЛАЧАМ “ЛЕМКА”? Я предплачам “Лемка” от первой місячной книжечкы, котра вышла спочатком 1928 року, и я не опустил єдно число той газеты. Я предплачам и читам, бо то перва наша карпаторусска газета, на котру нашы фальшивы патриоты не наложили свою цензуру. “Лемко” нагнал до читаня примусовых предплатников запомоговых газет и научил их читати. “Лемко” научил читати такых, што николи не читали. “Лемко” научил людей, што николи не писали, писати, бо редакторы “Лемка” принимали всяку допис, хоц и кривульками написану, лем як была в ней мудрость. Запомоговы редакторы печатают лем дописи “тайпованы”, зато без ниякой мудрости. Запомоговы газеты пишут за тальянскых рыцаров, а “Лемко” пише за народне житя в Америкі и старом краю. Зато примусовы предплатникы запомоговых газет их не читают, и котры знали даколи читати, то при тых газетах забыли читати, а добровольны предплатникы “Лемка” от початку до самого конца, як бы косом косил свою газету читают.

“Лемко” вылічил своих читателей от большевицкого страху, бо “Лемко” нам выяснил, што тото неправда, што большевикы нам маєткы заберут, коли примусовы предплатникы запомоговых газет, бідны роботникы майнеры, спати от страху не можут, што им большевикы маєткы заберут, и што Америку заберут. А “Лемко” все писал, што большевикы никому краю не хотят брати, бо мают свого дост. И показалося, што большевикы не взяли никому за 20 літ ани инч землі, а фашисты в Германии за пару літ забрали народам цілы державы и берут край за крайом дальше.

Нашым лемковскым співанкам ніт конца. Но покаль мы не читали “Лемка”, то мы ся своих народных співанок ганьбили меж чужима людми, як зме ся ганьбили и свойой народности и бесіды, як ся ище ганьблят примусовы предплатникы запомоговых газет. Мы співали всхидно-галицкы, бо мы думали, што нашы лем в кичурці мож співати. А “Лемко” нас научил, што нашы співанкы такы шумны, як и другых людей, што их мож співати не лем в кичурці, але и на весілях, крестинах и концертах. “Лемко” учил, што нам треба ставити на сцену свои представления з нашого народного житя. Но и нашлися люде, што нам написали такы штукы, и мы видиме, што наше ліпше, як друге, бо як нам представляли попри церквах, та дякы и єгомосці мусіли просити людей, штобы сиділи тихо на представлению, а лемкы як зачнут по свому грати, то люде без просьбы тихо сидят и уха напинают, штобы кажде слово чути. А то значит, што “Лемко”, то перва наша карпаторусска газета, котра дає нашому народу правдиву просвіту, культуру, и длятого я точно высылам предплату за “Лемка”, штобы собі не зробити кривду, и буду предплачати тоту газету, хоцбы мі пришло сухий хліб без масла істи.

Тых нашых людей, котры не читают “Лемка”, я дуже жалую, бо они сами себе ошукуют, як тоты газдове в старом краю, котрым плугы в яр стоят, а они по судах ся волочат.

Дорога Редакция “Лемка”:

Я пишу пару слов, штобы высказати, длячого я состою членом Лемко-Союза, и длячого читаю и люблю газету “Лемко”.

1. Отже, прежде всего, я горджуся тым, што я можу стояти членом нашой найдорожшой культурно-просвітительной карпаторусской народной организации, першой между нашым народом тут в Америкі и Канаді, а и в старом краю на нашой Родині, по обох сторонах Карпат.

2. От щирого сердца я мушу высказати велику признательность нашым товаришам, найперше тов. Дмитрию Вислоцкому, котрый тому вшиткому дал початок, и так само д-ру С. Пыжу, бо они оба помогли привести нашу организацию на таку высоку степень розвития и заинтересовати цілый світ нашом организациом и нашым карпаторусскым народом на Лемковині, самым отсталым и занедбаным. Длятого я стою членом той организации, и каждый єй прогресс между нашым народом доставляє мені велику душевну радость. И я буду стояти членом в нашой организации и буду робити про добро нашых членов и членкинь, як и всего нашого поневоленого народа, зо всіх сил, якы в мене сут.

3. А што ся тычит газеты “Лемко”, то я нашу газету люблю и ціню єй найвысше от вшыткых другых, и хоц бы пришлося два разы больше предплату платити, то я готов дати, бо скилько єст нашых карпаторусскых газет, запомоговых и даже церковных, то они ани десяту часть не зробили того для нашого народа, што газета “Лемко”. Газета “Лемко” пише в интересі нашого бідного народа в Америкі и в старом краю.

4. Так само ціню дуже высоко и горджуся тым, што нашы члены и членкині так заинтересованы нашом газетом и пишут такы интересны статі в газеті “Лемко”.

5. А и в том заслуга нашых передовых членов Л.С., што мы маме Карпаторусский Американский Центр, котрый буде грати велику роль между нашым народом.

Коротко повісти, што предплачам и читам “Лемка” зато, бо я го люблю, то не выстарчат. Я мушу повісти, чом я го люблю. И не лем я го люблю, а любит го и моя жена. Любиме “Лемка” зато, бо он любит нас, бо коли бы нас не любил, то бы з нами не интересувался и не опікувался з нами, лем тельо, кельо бы му было потребно нас, як робят тоты другы карпаторусскы газеты, котрым мы потребны лем нато, штобы зме им под насильством платили, а они ни права ни наукы нам не дают, ниякого знания. Ище не то. Штобы мы даяк иншом дорогом не узріли правду, то они нам кладут чорны окуляры на очы, штобы зме нич не виділи, як они з нас корыстают, а нас половом кормят. А преця родна мати не може таком пустотом кормити свои діти, лем мачоха. Итак, для нас газета “Лемко”, то родна мама, бо она любит нас, учит жити, кормит знанием, хоронит нас от вызыскувачов и шпекулянтов, зато она любит нас, а мы єй. Она розуміє, што нам потребно. Но мы, котры єй читаме, не всі єй ще розумієме, бо коли бы мы розуміли так єй житя, як она розуміє наше, то мы бы всі постаралися за ню на час заплатити и не выкорыстувати єй житя для себе, бо она з нами того не робит.

Газета “Лемко” не лем наша мати, але и наш чудотворный лікар, якого мы дотепер не знали. Мы видиме, што при єй помочы хромы просто ходят, сліпы прозрівают, німы говорят, глухы слышат. Мы, до сего часу не виділи єден другого, не виділи свого народа, мы не виділи правды, мы не слышали свойой матери Родной Землі и нашых братов и сестер в краю, котрых запер в темницу звыроднілый фашизм. Мы не знали, што то фашизм, што он найбольший наш враг. Газета “Лемко” научила нас познавати нашых врагов.

Членом Л.С. я стою, бо я розумію, што сила каждого народа в його организации, а нам треба силы, штобы мы помогли освободитися нашым братям и сестрам в краю из фашистской неволі. А мы маме приміры, што Лемко-Союз выховал такых борцев за свободу, котры готовы за ню житя положити. Не лем за свободу свого власного народа, а взагалі за свободу народов. Доказом нашы испанскы герои.

Длячого я стою членом Лемко-Союза? Длятого, бо организация Лемко-Союз єст найліпша з меж всіх нашых организаций. Хоц организация Л.С. нема хорой и посмертной запомогы, але зато Лемко-Союз має другу запомогу для всіх своих членов, и то найліпшу з меже всіх. Л.С. має таку запомогу, што члены познают зло и добро. А як чоловік уж може познати, што єст для него зло, а што добре, то он николи не даст себе ошукати ниякому пройдисвіту. Он не буде шапку знимати перед своим ворогом, не буде тримати свойого гнобителя на своих робочых плечах, не буде боятися, што по смерти достанеся до вічного огня, лем прото, што он ту на земли бідує. Такой организации, с таком запомогом, яку дає Лемко-Союз, я давно глядал. Такой организации треба для цілого нашого народа, бо наш народ з меже всіх народов найгорше затемненый и настрашеный фальшивом панском науком.

Длячого я предплачам газету “Лемко”? Я газету “Лемко” предплачам длятого, бо она мене учит правду, робит з мене свідомого чоловіка, показує мі як жиют культурны люде, а як некультурны, показує мі, кто єст моим добрым и щирым приятелем, а кто єст моим ворогом. При помочи газеты “Лемко” и єй добрых редакторов и я научился читати и писати, при помочи газеты “Лемко” я можу видіти майже цілый світ и всьо што на віті происходит.

Газета “Лемко” єст первым моим учителем, длятого я предплачам єй с охотом и буду єй предплачати и помагати, штобы “Лемко” мог выходити каждого дня, бо такой газеты с таком науком треба для нашого народа, штобы чым скорше вывести наш народ на справедливу дорогу.

Стою членом Л.С. и предплачам газету “Лемко”, бо я люблю народну правду и любов. Наш карпаторусский народ поневоленый чужими, а своими страшно ошукуваный, а от той неволі и ошуканства може освободитися лем через организацию и просвіту. Ціле своє житя я чекал на тоту организацию и просвіту для нашого народа и я дочекался, што у нас нашлися люде, котры дали добрый початок тому и взяли на себе руководство, а тыма людми сут нашы товаришы, нашого хлопского роду, Вислоцкий и Пыж. Наша организация свойом науком соєдинят весь карпаторусский народ, так з угорской як и галицкой стороны и творит з нас культурный народ. Я собі припоминам, як наш Гунянка писал, што для розвития нашой культурной роботы, штобы мы могли назватися культурными людми, то нам треба мати на культурну роботу найменьше сто тысяч долларов народного капиталу, народного маєтку. Так у нас уж єст 50 тысяч народного маєтку, робме так, штобы у нас было якнайскорше 100 тысяч. Честь и слава всім тым нашым членам, котры причинилися до нашой Народной Будовы, честь и слава Головному Правлению Л.С. и К. Р. А. Центра, витаю всіх гостей на нашом народном празднику 28 мая!

Я зато люблю нашу организацию и газету “Лемко”, бо они ділают просто из каменя хліб.

На вопрос “Чого я членом организации Лемко-Союза”, можна бы много подати взглядов, длятого и я позволю собі коротко выразити свои чувства на тот важный вопрос для членов Л.С. и читателей газеты “Лемко”.

Я стою членом Л.С. зато, што я уважам свою народно-робочу карпаторусску организацию яко наше народне “правительство”, через котре мы, яко народ организованый и культурный, можеме добитися народной свободы и самоуправления.

Народ без свойой культурно-просвітительной и политичной огранизации яко руководителя, подобный до корабля на морі без машины и без капитана. Такий корабль не мат свого направления, плыне там, где вітер поверне, а в часі бурі, розобєтся на скалах або пропадет под фалями моря. Так подобно мусит пропасти и народ без свойой народно-политичной организации.

Газета “Лемко”, то наша народна школа, наш єдиный карпаторусский душевный руководитель.

Через газету “Лемко” мы ділимеся своими мыслями, чувством, идеями, свободно выражаме нашы думкы и жалі. Через газету “Лемко” мы всі розумієме себе народно, учимеся розуміти идеи, значение и ціли народной организации и выконувати нашы организацийны обовязкы добровольно, старанно и честно. Одным словом газета “Лемко” подносит народ выше на полі культурно-просвітительном, а тым провадит нас всіх по правдивой дорогі до нашой народной свободы. Зато обовязком єст каждого из нас быти членом свойой народно-политичной организации, предплачати и читати свою газету “Лемко”, и старатися о розвой свойой организации и поширение культуры и просвіты меже нашым народом, а плодом нашой взаимной роботы буде наша Карпаторусска Свобода.

Як долго я не читал “Лемка”, то я никого больше не виділ, лем самого себе, хоц я знал читати. Судьбом другых людей я не интересовался, не интересовался судьбом робочых и робочым рухом, ани судьбом свого власного народа, из котрого я вышол. Бо то, што я читал, то было невыразне читаня, я с того нич никому не мог вытолкувати, бо я и сам того не розуміл. Аж отколи я почал читати “Лемка”, то я почал розуміти житя людске и я стал другым чоловіком. Сам собі не можу вірити, што за такий короткий час я мог столько научитися из газеты. Газета “Лемко” научила мене интересуватися світом и зробила з мене поступового робочого чоловіка. Днес я моуже встати и говорити до народа о людском житю и о борьбі за лучше житя.

Складаю сердечну подяку газеті “Лемко” за єй науку для мене.

Люблю роботу и науку Лемко-Союза и газету “Лемко” для нашого народа, зато я членом и читателем. Я старый емигрант майнер робил в майнах з родичом нашого редактора Вислоцкого пред 45 роками. Пересылаю сердечний привіт всім гостям на нашом великом торжестві 28 мая, яко член К. Р. А. Центра.

Коли я жил в краю, на Лемковині, в селі Черемха, то я дост виділ нужды и кривды от пануючых поляков, котры называли нас “ты сьмєрдзонцы русінє”, а нашы духовникы мали нас, простый народ, занич. Коли появилася наша организация Л.С. и газета “Лемко”, то они давали таку науку, што всі люде и народи ровны, всі мают єднаке право до житя на світі, до свободы и культуры, што таке саме право має мати руснак, як и поляк, што робочий чоловік найціннійший на світі. А то народна правда. Длятого я стою членом Л.С. и предплачам газету “Лемко”.

Стою членкиньом Л.С. найперше длятого, бо я люблю свой народ и сочувствую йому в його нужді. А лем тота єдна наша организация стоит щиро за наш бідний народ, старатся вырвати го с той нужды и выбороти му свободу, право на житя и розвитя. Газету “Лемко” я читала ище в краю, а и ту в Америкі от першого нумера. И мі так здаєся, што и житя не было бы миле, коли бы той газеты не было. Як то гварят, што чоловік жиє не лем хлібом, але и словом божым. А газета “Лемко” єст словом божым, бо пише правду, як добрый учитель. “Лемко” отворил нам очы, котрыма мы видиме, кто наш приятель, а кто ворог. Ознакомят нас с географичным, национальным и политичным положением нашого народа, єдным словом, тота газета поставила нас наровні с культурныма людми. А то лем завдякы тому, што наш родный край, наша Лемковина выдала нам такых людей, а то нашых редакторов. Дмитрия Вислоцкого и д-ра Симеона Пыжа, котры не встыдаются свого народа, лем працуют всіми силами для него, у них правда и честь выше всего на світі. Мы, лемкы, гордимеся своими учителями и лем гробова дошка розлучит нас от них.

Газету “Лемко” я предплачам и читам, бо мі єй дуже легко читати, раз што пишеся на мойой родной бесіді, а друге, не поміщат всякых байок, лем чисту народну правду из нашого народного житя. Лем така газета може поднести народ культурно и освідомити го национально, зорганизувати народ до борьбы за своє народне право. И так и з нами. Як долго мы такой газеты не мали, то мы не мали и народной организации, бо мы не розуміли, яке велике значение має для народа народна организация.

Што и наш народ дождался свойой народной газеты, литературы и народной организации, то мы завдячаме двом нашым людям с хлопского робочого роду, тов. Вислоцкому и д-ру Пыжу. И то дуже добри розуміют врагы нашого карпато-русского народа и потому так накидаются на тых двох людей и ширят розмаиты клеветы на них. Но тепер уж они спозднили, бо наша организация выховали уж много сознательных людей, котры розуміют правду и ширят єй дальше. За тых десят літ Л.С. научил нас народной любви, вылічил многых из зависти, личной гордости и зарозумілости и открыл наш народ світу. Бо о нас донедавна никто на світі не знал, а кто знал, то лем тото о нас знал, што мы народ темный, нездалый до организации и просвіты. Лемко-Союз доказал, што то неправда, што мы были лем страшно ошуканым и занедбаным народом, але мы так способны до наукы, як и другы народы.

Длятого так организация Л.С., як газета “Лемко” дуже для мене дорогы и я чуюся дуже счастлива, што належу до Л.С. и читам “Лемка”. При них я ся так чую, як в краю меж своими родными.

За мого житя на емиграции, в Нью Йорку, започаткували нашы “патриоты” не одну карпато-русску организацию, не одну организацию бизнесову, не одну газету почали выдавати. Но всі тоты организации и газеты в коротком часі замерали, бо они не были народны, они не знали, або не хотіли учити народ и говорити народу правду. Перва наша карпаторусска организация и газета, котры сут народны, то Лемко-Союз и “Лемко”. И длятого тота наша организация и газета, первы на нашой емиграции, не лем пережили десят літ, але за тоты десят літ они возросли и розвилися.

Л.С. доказал найлучше, што он народна организация, и што он дає таку науку нашому народу, яка йому потребна для житя. Наша организация и наша газета за минувшых десят літ научила наш народ больше, як всі другы карпаторусскы организации взяты разом, она зробила перелом, побідила темноту, открыла очы на фальшивых патриотов. В десятом року существования нашой организации мы открыєме нашу Народну Будову, наш культурный центр. Дошла до того наша организация через свою честну народну культурно-просвітительну роботу. Тоты нашы стары патриоты ниякых рахунков не подавали, Л.С. то перва наша народна организация, котра не лем дає нам всі рахункы, но учит своих членов рахувати и контролювати себе. Каждый из нас видит, нашто його пожертвованый доллар иде. Я бы чул себе покривдженый, коли бы я не стоял в первой нашой честной народной, культурно-просвітительной организации, я думам, што кто не стоит єй членом, то он не може называтися культурным карпатороссом.

Як Лемко-Союз — перва наша карпаторусска организация, так “Лемко” перва наша карпаторусска народна газета. Я думам, што грамотный член Л.С., котрый не предплачат “Лемка”, не може быти добрым членом организации, он не розуміє организации, не знає сам, длячого стоит єй членом, або стоит членом, штобы пошкодити организации. Каждый член Л.С. повинен читати орган организации и точно вносити предплату.

Зато стою членом Л.С., бо вижу, што тота наша организаци иде и нас веде по правильной дорозі, а то по такой, што всіх нас лемков и весь наш карпаторусский народ по єдной и другой стороні Карпат, без взгляду на тоты границы, якыми поділили нашу землю и наш народ паны, штобы нас всіх соєдинити и при помочы Великого Русского Народа высвободити с пекельной неволі. И так, як Л.С., так и я вірю, што мы, организовано, розорвеме оковы, в котры закута наша Карпатска Русь и освободиме єй. Лемко-Союз не отрыватся от свого историчного пня, от Русского Народа, и длятого он николи не пропаде, ани мы при нем.

А што до газеты “Лемко”, то ани слов не мож найти, штобы єй высказати похвалу и признательность, яку она огромну культурно-просвітительну роботу зробила среди нашого занедбаного народа, а то зато, што пише и учит выразно и с чувством. Кто “Лемка” зачне читати, а не тумануватый, то уж го николи не перестане, никто го от него не отстрашит ани не отгварит, бо правду каждый справедливый чоловік любит. Слава нашым редакторам за таку газету!

Я предплачам газету “Лемко” з власной охоты и любви до русского народа. Я вірю, што скоро русский народ соєдинится в єдной державі и стане сильным и могучым народом и освободителем поневоленых.

Желаю нашым діятелям здоровья и много літ прожити.

Найперше, я стою членом Л.С. длятого, бо я познал в той организации правду, котра была скрыта пред нами от самого початку нашой емиграции аж по тот день, покаль народилася наша организация и газета “Лемко”. Я в той организации нашол правдивых пионеров, котры стоят на стражі нашого народа и выконуют свою культурно-просвітительну роботу честно и справедливо. У нашого карпаторусского народа ище такых людей не было.

Наша организация пробудила нашу емиграцию из 50 літного сна до народного житя, из того тяжкого сна, до котрого приколысали наш народ його фальшивы проводникы свойом фальшивом науком.

Лемко-Союз учит нас глядати правды и народной справедливости, учит нас єдинства, любви єден до другого, а не так, як попередны нашы лидеры, што найперше поділили нас на дробны партии и засіяли меж нами ненависть, покрестили нас всякыма именами, так што єден другого почал ненавидіти, и где лем нашы люде зышлися, ци на предприятию, ци в церкви, ци на забаві, то без биткы не обышлося. А с того корыстали адвокаты и наш народ уходил за малокультурный.

А посмотме мы на тот сам народ, котрый стоит коло Лемко-Союза. То тот сам народ, котрый даколи ворогувал, а тепер тот народ уж жиє в згоді и любви, так як єдна родина. А то народна организация зробила з нас такых культурных людей. Но и як не стояти членом в той организации?

Лемко-Союз научил нас познавати людей, отділяти добрых от злых, так што мы, члены Л.С. познаєме тепер скоро, кто наш приятель, а кто ворог, скоро познаєме, с кым маме до діла.

Мы мусиме признати, што мы, покаль не было нашой организации, то мы до своих жен относмлися, як даякы африкане, мы не признавали женам права приходити на митинг, не признавали зме женам ровного права. А так поступают лем малокультурны народы. Культурны народы признают ровность женщин з мужчинами. За тых десят літ Л.С. зробил то, што жены приходят разом з нами на митингы, а по дакотрых плейзах мают свои женотділы, и показуєся, што дакотры жены ліпшу культурну роботу робят от мужчин.

Здавалося, што наша молодеж ту в Америкі уж пропала для нас, бо она ганьбилася свого малокультурного карпаторусского народа, не хотіла признаватися до него. Дакотры нашы молоды американцы глядали русской культуры меж архиєреями, царями и князями — меж білом гвардийом. А днеска мы уж видиме, што тоты найрозумнійшы и найліпшы нашы діти вертают до нас до свого народа, через нашу народну организацию.

Лемко-Союз соєдинят всіх нас, тых ліпшых членов карпаторусского народа, в цілой Америкі и Канаді в єдну робочу родину, не для даякой материальной корысти, а для вспольной культурно-просвітительной роботы среди нашого народа. В той роботі Л.С. доказал, што он зробил больше за тых 10 літ, як всі другы карпаторусскы организации за 50 літ. Он нас пробудил и показал не лем нам в Америкі дорогу до просвіты и культуры, але и нашым старокрайовым братям, он и помог найбольше из всіх организаций, старому краю.

Лемко-Союз освітил нашому карпаторусскому народу тоту темну віками политичну дорогу до национальной и социальной свободы. Без Лемко-Союза мы бы были совсім страчены в сегодняшном світі.

И длятого я стою членом Л.С., и так думам, што членом такой организации должен стояти каждый сознательный член карпаторусского народа, а передовсім каждый лемко.

Мы празднуєме десятлітный юбилей той нашой организации и нашой газеты “Лемко”, и нам всім треба застановитися над том огромном культурном роботом, котру зробила для нашого народа тота наша организация, поровнати єй роботу з роботом нашых старых патриотов. Я застановился над тым, и признамся, што мі слезы стали в очах зо жалю, як наш народ страшно ошукували. Та коли бы мы жертвували так на культурну роботу той нашой народной организации, як мы жертвовали на их “роботу”, то мы виділи бы тоту роботу. Мы дуже мало жертвовали на роботу Л.С.юза против огромных жертв на другы діла и всякы будовы, до котрых сегодня права не маме. А посмотме, при Л.С. мы збудували прекрасный Народный Дом, котрого мы сами босове.

Сердечный привіт всім руководителям Л.С. и К. Р. А. Центра.

Я фармерка, одорвана от містецкого житя, от забав, мувис и другых веселостей. Коли я достала перший календар “Лемко” до читаня, то я была весела, што я можу читати книжку на свойом родном языку. То было для мене великым у довольством. И так рок за роком я плачу за календар и газету “Лемко” и сліжу за нашым народным рухом. И лем тилько мене тішит, што мы всі сходимеся в купу и радиме, як бы помочи той великой культурной роботі среди нашого народа, котру веде наша организация Лемко-Союз. Мене тішит, што меж нашым народом нашлися такы люде, што ведут тоту роботу на нашом материнском языку, бо лем так можна пробудити наш народ. Тішуся, што уж стоит К. Р. А. Центр, с котрого буде ширитися дальше просвіта для нашого народа.

Газету “Лемко” люблю читати найперше зато, бо она поступова газета, друге пишеся на простом народном языку, зрозумілом каждому, даже малограмотному. Люблю єй зато, бо она мене научила любити свой народ и быти гордом на своє. Газета “Лемко” учит нас народного сознания, учит нас, што в организации сила народа. Як уважати себе членом Лемко-Союза, а не читати “Лемка”? Лемко-Союз и газета “Лемко”, то єдно ціле. Не было газеты, не было и организации. Лемко-Союз, то плод наукы “Лемка”. Не знам другой организации у нашого народа, абы вела роботу так честно и культурно, як Л.С. Кто читат “Лемка”, а не состоит членом Л.С., тот ище в полности не порозуміл, што лем организованый народ може поступати вперед и боротися за ліпше будуще. В наукі, просвіті, организации наша сила. Ставайме всі членами Л.С. и читайме “Лемка”!

Длячого я стою в Лемко-Союзі? Длятого, бо тота организация заставила мене интересуватися своим народом, из котрого я вышла, она взбудила во мні віру в свой народ, в його ліпшу будучность и в ліпшу будучность всего бідного народа, бідной кляссы. Лемко-Союз репрезентує мой народ. Он єден розуміє житя, душу и потребу мого народа. Он розуміє народну борьбу и учит нас боротися за свой народ, за його свободу.

Длячого я предплачам добровольно газету “Лемко”? Предплачам “Лемка” зато, бо он єст органом организации, а як организация без органа была бы мертва, так и член, коли не предплачат и не читат органа организации, то он єст мертвый член. Такий член, котрый не читат газеты, не знає, где он стоит, ци он робит добри для организации и для свого народа, ци робит зле, ци орг. добри господарит и учит, ци на шкоду народу. А люблю газету “Лемко” зато, бо она найдемократичнійша из всіх газет, якы я даколи читала. В ней каждый читатель має можность выповісти на свойом языку свои мысли, спостереження, увагы, што його сердце чувствує. А тым самым она наша народна. И кто любит и шанує свой народ, тот любит, шанує и предплачат добровольно газету “Лемко”.

Я дуже счастливый, што я можу быти членом Лемко-Союза, и я гордый на то, што я член такой организации. Я тішуся, што я дочекался ту на емиграции такой нашой организации, котра заопіковалася нашым заотсталым карпаторусскым народом и учит го, робит го культурнійшым и прогрессивнійшым. Уж 40 літ минуло, отколи я приіхал с краю и я виділ ту всякых “патриотов”, ко-тры не просвіту, а темноту нам давали. Аж десят літ тому, мы дочекалися такых людей, што дали початок правдивой народной организации и просвіті. Они любят свой бідный робочий русский народ и стараются всіми силами нас объєдинити и просвітити. Коли я собі припомну тоту роботу нашых старых патриотов ище с пред войны, як они наш русский народ ту на чужині розбивали, ділили, сварили и сліпили, то мі дуже жаль. И я вижу, што коли бы не тота наша организация, то мы бы уж марно пропали, яко народ. Єсли наш карпаторусский народ знов поднюсся и дал о собі знати, што он хоче жити, то мы можеме завдячити лем Лемко-Союзу и роботі його руководителей. Всі, котры зме тото порозуміли, должны зме тепер стати членами нашого Карпаторусского Американского Центра.

“Лемка” я предплачам и читам, бо тота газета для мене на емиграции, як родна моя мати, она говорит до мене и учит мя на мойой материнской бесіді. Она мене просвітила и научила роспознавати добро от зла, демократию от фашизма. Она не крыє пред своими читателями правду, як другы газеты. Она не позволит нас обманювати.

Я стою в Л.С. длятого, бо я переконалася, што лем тота єдна наша организация стоит вірно при нашом бідном народі, стоит и бореся за справедливость для робочого народа, за демократию, против фашизма, она найліпше научит бідного чоловіка, кто його приятель, а кто ворог. Мы достаєме от Лемко-Союза велику науку, як помочи свому народу в краю и як помочи собі ту, як треба бідному чоловіку боротися за ліпший кусок хліба. Лемко-Союз учит нас любити єдного к другому, довірия меж собом, меж такыми самыми людми, учит нас щирости до себе, не скрывати нич єден пред другым. В нашой организации може каждый мати слово и выповісти свою критику и свои жалі. Я переконался в том и я чуюся задоволена, што я стою в той нашой великой родині, в Лемко-Союзі.

Длячого я стою членом Л.С. и предплачам “Лемка”? Длятого, бо я сам лемко, бо я вырос в прекрасных зеленых горах, на нашой Лемковині, при великой церкви, а маленькой школі. Світской наукы до житя не давали мі нич, лем до библии наганяли. Но и в библии была наука християнска, и я почал думати так по-християнскы, и пришол на тото, што тоты люде, што мі до рук библию пхали, сами так не жиют, як в библии писано, не жиют по християнскы, они мают библию лем для страшиня бідного народа.

Ходил я по світу, призерался, як люде жиют, належал єм до всякых организаций и парафий, но трудно мі было найти практичной християнской наукы, як жити. И якоси раз попал мі в рукы “Лемко”. Читам раз, другий, предплатил собі, бо я увиділ, што наука народна, што я нашол тото, чого єм глядал. И тепер мі уж легко на сердці.

Из той газеты я познал, што тоты люде, котры єй пишут, то они сами в тото вірят, што пишут, не так, як тоты, што проповідуют и пишут народу тото, в што сами не вірят, што лем шпекулюют на людской темноті. Я познал, што тота наша газета и организация веде своих членов до просвіты и культуры, до єдинства народного. Такой наукы я глядал и нашол. И я розумію, што я не годен грошми тоту науку заплатити, але я не можу встриматися, абы я в десяту рочницу не привитал тоту мою организацию и газету.

Дорогы краяне, покажме, што мы дармо “Лемка” не читали, але што мы ся з него научили любити свой народ и працувати для його ліпшой будучности. Лемко-Союз нас учит любити свой народ и учит нас любити Америку, тоту нову землю, где мы можеме свободно жити и учитися. Кто не любит свой народ, тот не може быти американскым патриотом, хоц он бы прикрывался в день и в ночы Американскым флагом. Такий чоловік, то лем ошуканец, он ани не розуміє, што то єст Американский флаг, он ани не розуміє, што котры любят народ, буде называти червеныма, хоц и на том флагу, котрым прикрыватся, єст червене. А што то означат червене на Американском флагу? Червене означат Американску революцию, борьбу американского народа, за свою свободу. Біле означат, чистота, ровне право для каждого, свобода слова, віры, прессы, а сине означат лояльность до свойой державы и готовность в кажду хвилю выступити в єй обороні. Коли робочий Американский народ порозуміє значение свого державного флага, тогды он не позволит, штобы тым його флагом прикрывалися його ошуканцы, штобы тым флагом прикрывали свою противнародну роботу и шпекуляцию.

Лемко-Союз учит нас любити свой народ и другы народы, учит нас братства и учит нас, як быти добрым и честным американскым патриотом и добрым солдатом в обороні свободной Америкы.

Уж 40 літ минуло, отколи я приіхал зо старого краю, и признамся, што я ту не интересувался ниякыми нашыми запомоговыми организациями, перва организация, котру я познал, яко свою, то народна организация Лемко-Союз. Из литературы и газеты Л.С. я познал, што и наш народ способный до народного житя, до культуры и прогресса и я вступил членом в Л.С. А тоту дорогу до культуры и прогресса показали нам нашы два люде, з нашого хлопского лемковского роду, котры не здрадили нас, а посвятилися для свого карпато-русского народа, т. є. Дмитрий Вислоцкий и Д-р Симеон Пыж, котры ділятся з нами свойом науком. Наш чоловік робочий, котрый стремит до просвіты и культуры, не може стояти поза Лемко-Союз, бо в другой карпаторусской организации он просвіты получати не може, там го кормят темнотом. Наш робочий чоловік не може скорыстати з ниякой другой газеты, выдаваной за примусову оплату ту на емиграции, лем з газеты “Лемко”, котру мы добровольно предплачаме и контролюєме сами.

Я ціле своє житя глядал народной правды и просвіты, и нашол аж в Лемко-Союзі и газеті “Лемко”, и длятого, як долго ище буду жити, не лем буду членом Л.С. и читателем “Лемка”, але и помочником в их честной народной культурно-просвітительной роботі.

Длячого я стою членом Л.С.? Но бо Л.С., то наша народна организация, а народна организация, то народна свобода за житя, то житя людей, а не запомога аж по смерти. Народ без народной организации, то народ мертвый, и поодинокы люде, што не стоят в народной организации, то люде мертвы. Всі знаме приповідку, як єден отец на смертной постели давал своим сынам ламати вязку прутов, но никотрый з них не мог зламати. Але коли розвязал вязку и дал по одному пруту, то легко поламали. То и нас так долго будут ламати, так долго будеме рабами, як долго не будеме въєдно, в єдной вязанкі, котром єст народна организация. Посмотме тепер на Европу, як германский империализм ламе поодинокы славянскы малы народы. А лем зато, што они не соєдинены. Но коли славянскы народы соєдинятся, то ніт такой силы в світі, штобы их зламала. Посмотме на Совітский Союз. Народы там соєдинены в єден союз, и ніт такой силы в світі, штобы тот их союз, их народну державу организацию зламала. Я стою членом Л.С., бо он мене учит борьбы за свободу мого поневоленого народа и борьбы за свободу всего человічества и показує мі правильну дорогу до житя. Дальше я вижу, што Л.С. не лем фразами учит, але и приміром, Л.С. будує, найліпшым доказом того наш Карпаторусский Ам. Центр.

Предплачам газету “Лемко” длятого, бо то перва наша карпаторусска народна газета, котру пишеме мы сами, народ, робочы и селяне о нашых ділах. Правда, мы калледжей не покончили, но зато нич, мы видиме, што наша хлопска газета и так мудрійша от тых примусовых, што пишут нашы паны, котры пошли на службу нашых угнетателей. Признамся, што я за молодых літ брал в рукы книжку и газету, но я не нашол в той книжкі и газеті нич такого, штобы мене заинтересовало, бо тоты книжкы и газеты не были писаны на нашой родной материнской бесіді, ани не писали правду о народном житю, не давали наукы до житя, вмісто учити нас, як боротися за свободу, то они хвалили нашых угнетателей. Так с того всього я уж занехал интересуватися даяков культуров, мі уж так здавалося, што наш карпаторусский народ уж так пропаде в темноті и неволі. Пришол я ту в Америку, взял знов в рукы даяку книжку або газету, тото само, што и в краю, ни по языку ни по духу не моє. Аж покойный Иван Буранич прислал мі ище старокрайовый календар “Лемко”, и то была перва книжка, котру я мог признати за свою. Я уж мало што не забыл читати до того часу. Но при том календарі я припомнул собі и от того часу я глядал такой книжкы и газеты. Таку литературу я доставал постоянно аж от Лемко-Союза. И чым больше я тоту литературу читам, тым больше наберам просвіты, стаю культурнійшым чоловіком, наберам любви до людей и свого поневоленого карпаторусского народа. Тепер я уж можу читати книжку и на великорусском языкі, а до того я пришол через газету “Лемко” и литературу Лемко-Союза. Но и скажте, як я мам не платити точно за газету “Лемко”? Най жиє Лемко-Союз и його наука! Най жиє газета “Лемко” и єй редакторы!

Стою членом Л.С., бо Л.С. был основаный лемками и для лемков, яко культурно-просвітительна организация, и длятого каждый лемко, котрый хоче быти культурным и просвіщенным чоловіком, должен стояти членом Л.С. и читати газету “Лемко”, бо лем так будеме народом, с котрым другы народы будут рахуватися. За газету “Лемко” я плачу точно, бо я хочу кажде число точно получати. То єст така газета, што до ней пишеме всі зо всіх кутов Америкы и Канады и старого краю, зато газета “Лемко” для нас интереснійша от всіх другых газет, и я не хочу, штобы мі была затримана, зато єй точно плачу.

Состою членом Л.С., потому што Л.С. мене любит и принял мене в члены, где могу скрытися от бризгов гитлеровской гнойовкы. Потому што Л.С. открыват всякых продажных подляков, намоченых в гитлеровской гнойовкі, и то даже такых, котры надівают на себе червены плащы. Потому што Л.С. смотрит на восходяще солнце прямо на Восток. Потому што Л.С. говорит чисто русскым языком, говорит правду о проклятой судьбі карпаторусского народа. Л.С. иде вперед и прочищує путь-дорогу всім карпатороссам, котра занечищена продажными самозванными проводниками. Єсли бы я не стоял членом Л.С., то мі бы здавалося, што я стою в зимі в трупарні меж замороженными трупами и жду “весны”, коли розмерзнеся земля, штобы быти погребенным полужывым разом с трупами. Потому што Л.С. выступил твердо в защиту Карпаторусского народа, и, защищаю чи Подкарпатску — Пряшевску — Лемковску Русь, творит велике діло в русской истории, чого доказом єст вой біреных гитлеровскых собак на Лемко-Союз. Но мы не удивлямеся им, они же знают, што за их продажну роботу жде их судьба батька Мазепы, його сына Петлюры, його внука Скрипника и правнука Волошина.

Стою я в Лемко-Союзі и предплачам газету “Лемко” длятого, бо то организация и газета моя, мого народа. Газета “Лемко” мя так тішит, як мене тішит веселый лист от моих родных з мого родного села. А Лемко-Союз, то так, як моя ширша фамилия, с котром завдяки той организации я схожуся на митингах и предприятиях, где мы разом учимеся и обговорюєме свои народны и робочы справы. А такой другой организации наш народ не має, штобы го так учила боротися за його народну правду и вела го до прогресса и свободы.

Лемко-Союз не робит ниякых рижниц меж мужчинами и женщинами, всі мы в той организации ровны. До сего часу у нас не было такой организации, котра бы того учила и признавала ровне право женщині з мужчином. Мы, жены, были покривджены в родинном и народном житю. Л.С. научил нас интересуватися народным житьом и світом, культуром и политиком. Без той организации наша жена остала бы ище по старому некультурному обычаю, гет позаді, мы, жены, были бы зме страчены, все ище бы нам мужове говорили, што наше місце лем коло пеца. А то нас дуже понижало в культурном світі. И зато мы, жены, дуже вдячны нашой организации и єй руководителям, што нам, женам, дали початкы просвітні и заинтересували нас нашом и нашого народа судьбом и судьбом бідной кляссы.

Стою в Л.С. длятого, бо Л.С. робоча организация, дає народу робочу науку, а я милую весь робочий народ. Я мушу высказати, што у мене лем тот єден найкрасший гонор, што я можу быти членкиньом такой организации, котра так справедливо учит и сміло бореся за право свого поневоленого народа и всего робочого народа, за його свободу и красше житя. Зато я ціню Лемко-Союз над всьо. А газету “Лемко” предплачам, бо, як для всего нашого карпаторусского народа, так и для мене, она великий учитель, бо каждый з нас може легко порозуміти правду, котру она толкує нам на нашой родной бесіді, як родна наша мати. Она хоронит нас от всього злого и учит нас, як по-робочому жити, як єден другому в нужді помагати. Зато єй редакторам, котры своим тяжкым трудом открыли нам двери до просвіты и культуры через тоту организацию и газету, Дмитрию Вислоцкому и Д-ру Симеону Пыжу жичу доброго здоровья и много літ прожити.

Дорогий наш учитель Гунянка, хочу я вам написати, длячого я стою членом Лемко-Союза и предплачам газету “Лемко”. Стою я в той первой нашой правдиво-народной организации длятого, бо я познала в ней правду и справедливость, а той правды и справедливости учит нас наша организация через свой орган, газету “Лемко”. Ту я нашла правдиве християнство, тоту любов, о котрой кричат фальшивы християнскы проповідники, але сами той любви ку народу не мают. Наша организация через свою газету будит нас всіх з мертвого сна, так ту на емиграции, як и в Карпатах и соєдинят нас в єдну народну непобідиму силу для борьбы за свободу. Она робит з нас здоровых умыслово людей, котры уж розуміют світ и житя на світі. И я все буду предплачати таку газету, бо она для мене найдорожший скарб.

Христос Воскрес! Так довідуєтеся, длячого я стою в Лемко-Союзі. Та зато стою в Лемко-Союзі, бо я сам лемко з діда-прадіда и буду лемко аж до смерти. А газету “Лемко” предплачам, бо люблю читати и знати правду всьо, што ся діє по світу и в Карпатах, и ту в Соєдиненых Штатах и в Канаді. Але доброго для фермера и роботника нигде нема, лем всяди нужда, опруч Совітского Союза, где фермер и роботник управляют державом. Там єст благодать божа, а решта всяди біда, война и голод для робочого народа.

Организация Лемко-Союз перемінят людей. Коли вы станете до розговору с членом Л.С., то вы сейчас замітите, што тот чоловік розуміє світ, политику, робочу справу. Я стою членом Л.С. и знаю, што я за тоты рокы научился много в той организации, з єй литературы и газеты. Я стал тоже другым чоловіком. И длятого я дуже высоко ціню Л.С., так што коли приде даяка неприяность для той организации, то мні тоже дуже неприятно, я боюся, штобы организация не подупала. Но народна организация и робоче народне житя, то так, як корабль на морі. Коли погода добра, корабль плыве ровно, без трудностей, а приде буря, кораблем киває и колыше. Но послі бури знов приходит погода и житя робоче плыве дальше, а з ним и житя робочых организаций, лем добры капитаны потребны, добры руководителі, котры бы знали вести корабль по правильном пути, не завели го на скалы.

Такыми робрыми капитанами я уважаю руководителей нашой организации. Под их руководством нашы члены и приятелі нашой организации дошли до того, што у нас уж ніт некультурных выступов ни на митингах, ни на предприятиях, а головно мы дошли уж до того, што як головне правление организации, так и поодинокы отділы и члены ведут честно господарку финансами организации, точно здают рахункы и контролюются, не так, як то нашы т. з. “патриотичны” або церковны организации, што никто не знає, сколько было приходу, а сколько росходу.

Вопрос поставленый перед членами нашой организации Л.С. в 10-ту годовщину єй основания, являєтся дуже важным для всіх нас. Штобы дати правдивый отвіт, перше всего мы мусиме быти щиры и не дурити сами себе, але заглянути в свою душу, штобы переконатися, яка переміна зашла в нас от часу вступления в члены Л.С. Наша отповідь буде егзамином из той наукы, яку мы за протяг нашого членства получили в той нашой народной школі, яком єст Лемко-Союз.

Лемко-Союз, то перша наша карпаторусска организация, котра взяла собі за ціль збудити наш народ из твердого сна, выпровадити из темноты на дорогу правды и освободити от рабства и вызыску.

Я, як сын того карпаторусского народа из найтяжше поневоленой части Лемковины, сам частично переходил тоту нужду и несправедливость в Родном Краю, котра выгнала мене в чужу сторону глядати для себе лучшой доли. И ту не нашол я той правды ани той лучшой доли. Не нашол для себе притулища. И ту высмівано нашу материнску бесіду, нашы обычаи, называно разныма именами, станося вызыскувати для чужой ворожой пропаганды, а навет приходилося почути и таке от нашых найближшых братов, што наш народ так далеко заотсталый, як африканскы дикуны. Ту познал я, што боротися против того всього може лем народ, организуваный в свойой культурно-просвітительной организации и тоту роботу я виділ в организувании Лемко-Союза.

Вступаючи членом первого отділа нашой организации в Виннипегу, Канада, я розуміл значение коллективного труда для поднятия нашого народа, но не думал, што в так коротком часі наша организация потрафит провести так велику роботу среди нашого народа и достигне тых результатов, якы мы днес видиме. А сомнівался я потому, што знал тоту брудну здрадничу роботу нашых проводиров, яку проводили они в разных организациях перед основанием Лемко-Союза. Не вірил я, штобы нашлися правдивы проводникы, котры бы взяли в рукы провод организации. Но, як видиме, они нашлися. Под руководством тых пару нашых проводиров мы днес можеме похвалитися, што наша организация выховала свою нову интеллигенцию народну, котра буде продолжати их роботу.

Рост того маленького деревця, засадженого в далекой зимной стороні Канады, роспустил свои корені и збудил до нового житя нашу емиграцию и нашых братов на Родной зомлі. В той организации почала розквитати культура и просвіщение для цілого народа на здоровом фундаменті правды. А правда все побідит.

В Лемко-Союзі я познал ліпше сам себе, научился любити свой народ и свою русску культуру, научился боротися за свободу и ровны права не лем для свого народа але и всіх поневоленых и угнетеных народов світа. Научился трудитися для общого добра, роспознавати правду от замаскованой правдом неправды, познал то, што борьба за свободу нашого народа связана с судьбом всіх угнетеных народов и борьба их то наша борьба. В Лемко-Союзі познал я то, што не купит за жадны грошы, а то идею, за котру люде отдают своє житя. Познал я правду и борьбу трудового народа цілого світа. За тоту всю правду стоит и бореся наш народ в Лемко-Союзі, а як нас учили, “голос народа то голос божий”, я иду за тым голосом и длятого я стою членом Лемко-Союза.

Газету “Лемко” я предплачам длятого, бо то газета мого народа, газета моя, котра не має инших жерел на своє издание, кромі поддержкы и предплаты своих читателей. Газета “Лемко” не была бы моя, єсли бы она не обстоювала и не боролася за мои интересы, за интересы народны и робочы, а поддержувала то, што єст вредным для нашого розвития и свободы. Не была бы она моя, єсли бы она издавалася за грошы нашых ворогов, бо в тот час она бы мусіла продаватися, а продаючи себе, она продавала бы и мене и цілый наш народ. И длятого читати свою газету, а не платити за ню, значит то само, што красти народне добро. Ніт меже нами такого, котрый бы не мог предплатити собі свою газету, оплатити тоту маленьку частину наукы яку поберат из газеты. А науку поберат каждый велику. Вартость єй може оцінити лем тот, кто загляне в свою душу и подумат, як он выглядал перед тым, коли не читал “Лемка”.

Газета наша, то тот наш учитель, котрый просвіщат наш розум и дає нам тото найважнійше орудие в борьбі против угнетателя, за свободу и справедливе житя. Жадна газета не може дати того знания, што даст своя газета, котра пишеся народом, о нашых интересах, на нашом материнском языку, подає чисту народну правду. Она збудила наш народ из твердого сна, она дала науку членам нашой организации, она дала світу знати о нашой кривді, она показала перед цілым світом, што наш народ живый и хоче жити и розвиватися и не позволит стерти себе из лица земли.

И длятого каждый честный и щирый карпаторосс, каждый тот, кто хоче себе звати правдивым борцом за народны права, котрому добро свого народа лежит на сердці и не годится с кривдом свого народа, должен стояти членом Лемко-Союза и читати газету “Лемко”, штобы разом з другыма трудитися для свого народа, як ту, так в старом краю.

Вступайме в Лемко-Союз и предплачайме свою газету “Лемко”, котра розъяснит нам правду.

Прочитавши вашу статю, в 25 н-рі “Лемка”, в котрой пишете, што читателі учатся от редакторов, а редакторы от дописователей, (бо иншак не може быти газета народнов газетов) — то не дає мі покою, штобы вам не написати, што я думаю. А головно хочу вам отповісти на тоты вашы вопросы, котры вы поставили: “Длячого вы стоите в Л.С.” “Чого вас научила тота организация?” “Длячого предплачате ‘Лемка’ ”, и т. д.

Коли бы вам на тоты вопросы отповідали лем старшы члены, што уж давно в организации стоят, и лем они выражали свою признательность и любов к Л.С., то не єден самолюб або противник Л.С. бы нам або и вам сказал: “Ах, та они можут хвалити, бо они с того дашто мают!” Але коли выразит свою любов и признательность всьо членство, не лем старшы, але и новшы члены, всі читателі “Лемка”, не лем тоты, што уж роками читают тоту газету, але и тоты, што недавно читают, то нашой признательности и любви не посміє никто перекручати.

Я не старый член и не старый читатель. Отже моя отповідь на тоты вашы вопросы в короткости така:

Лемко-Союз для мене культурный руководитель, членом Л.С. я стою зато, бо он єст народна организация мойого народа. Л.С. учит мене моральности, людского братства, єдности. Газета “Лемко” для мене национальна и душевна пожива. Л.С., його членство и його орган “Лемко”, то єст нероздільна тройца, котра творит культурне житя нашого народа.

А коли так, то я ся спрошу, што такий чоловік вартат, котрый не интересуєся житьом свого народа? Мы донедавна праві всі такы были, што мы не интересовалися народным житьом аж Л.С. и газета “Лемко” нас до того заставили. И длятого я высоко ціню нашу организацию. Я не можу порозуміти такого чоловіка, котрому здаєся, што до житя му старчит його профессийне знание. Мы видиме, што таке саме знание не забеспечат чоловіку житя, ани народу будучного розвития, што кромі того треба народной организации и политичной наукы.

Мі лем жаль, што в нашом народі много ище такых, котры рады посмішкуватися поза куты, нибы то с членов Л.С., а на ділі то означат, што они сами зо себе посмішкуются. А то мене дуже болит, не за Л.С., а за тых моих братов, што они так затемнены нашыми угнетателями и их агентами.

Пят літ тому назад принюс до мене мой краян одно число “Лемка”. Я прочитал раз. Але не вірю своим очам. Зачинаю читати другий раз. Правда, то наш родный язык. Первый раз в свойом житю я читаю газету на свойом родном языку, якым говорит карпаторусский народ, там далеко за зеленым океаном на мойой родной Карпатской Руси. И я дуже росчувствувался, мои думкы повели мене назад до минувшости, пробудилося моє родне чувство до свого народа. “Лемко” стал для мене так дорогым, што я не мог встриматися, штобы дораз не написати до той газеты. Бо не лем самым языком она мене порушала, але и тым, што я в ней прочитал дописи такых простых роботников, як я сам. И того самого дня я послал до “Лемка” допис и предплату. Перва моя допис была о том: “Ци нас паны превелебны просвіщают, ци затемняют?”

Так “Лемко” стал мі от того часу найдорожшов новинков по двох причинах: Перше длятого, што он пишеся на мойом материнском языку, а друге, што пише тото, што нам всім потребно для житя. Я сам николи бы до газеты не писал, коли бы не было “Лемка”, и я мусіл бы тримати на свойом сердці великий тягар. А тепер мой тягар меньший, бо я ділюся тым тягаром с читателями “Лемка”, з другыми роботниками, котры читают и пишут до “Лемка”, учимеся єдны от другых посредством той нашой правдиво нашой газеты. И длятого всі нашы ворогы ненавидят “Лемка”, зато они тепер так мучатся, не мают спокою ни в день ни в ночы, хотіли бы пожерти газету “Лемко”.

Читаю я часами такы газеты другых народностей, но они, хотя называются робочыми газетами, не смотрят на национальный и языковый вопрос по-робочому. Словакы бы хотіли, штобы мы называли себе словаками и штобы нам был милый словацкий язык. Украинцы бы хотіли, штобы мы называлися украинцами и штобы нам был милый украинский язык, и другы нашы сусіде, як мадьяре або полякы тоже бы хотіли, абы нам лем их язык был милый. А “Лемко” учит, што каждому свой язык милый, та и нам, карпаторуссам милый свой карпаторусский.

Через газету мы собі найдеме соткы и тысячы незнакомых лично приятелей, котры будеме єдного чувства и єдной мысли. Я, послі своих дописей, сам получил много писем от незнакомых мі людей, из Америкы и старого краю.

Коли ся встрітите с чоловіком, а дознатеся, што он читат “Лемка”, то вы уж чувствуєте го дуже собі близкым, стискате собі рукы по приятельскы, вы уж знате, што мате до бесіды с просвіщенным чоловіком. Нашы стары проводиры мают уж 40 літну газету, а єй редакторы и примусовы предплатникы все на єдном місті стоят.

И длятого най никто не чудуєся тому, што тоты запомоговы редакторы выступают против “Лемка” и называют го “безбожником”, бо у них тот “безбожник”, кто говорит правду. Але чым они веце выступают, то веце людом очы отверают и “Лемко” має веце предплатников. Так учится народ и ширится просвіщение.

Из того каждый може видіти, што наша газета пише так, як мы хочеме, и тым она нам дорога, длятого мы за ню охотно платиме, длятого и я собі предплатил “Лемка”, бо он єст мі найдорожший из всіх газет.

Не длятого я стою членом Л.С., штобы мене кто заманил обіцанками, но я хочу быти культурным чоловіком и я сам глядал организации, котра бы мене учила. Я бы нашол таку организацию другой народности, но я почал читати “Лемка” и он мене того научил, што я не смію опустити свой народ, бо наш народ потребує найбольше организации и просвіты, и моя совість не позволила мі идти гет от свого народа, ганьбитися го зато, што он культурно занедбаный “кляссовым гонором”, поділеный тым “гонором”. Приміром, коли мы в старом краю выберали сельский уряд, то нас поділили на три группы-кола. До першого кола входил поп, корчмар и ище двох-трох найбогатшых газдов-шолтысов. До другого кола входили т. з. “добры газдове” — середнякы, котрых уж было парунадцет, а до третого ціла громада малоземельных газдов. Богаче с попом сиділи за столом, середнякы стояли насеред хыжы, а біднота зозаду коло дверей, в дверях и за дверями. И тото перше коло, поп з богачами выберали вийта, а середнякы и біднота не сміли слова повісти. Но и тото перве коло, значит поп, корчмар и двох-трох шолтысов управляли селом. Як видиме, то и пред войном был фашизм, бо то єст фашизм, што бідны не мают ниякого голосу, лем богаты.

Тоты кляссовы гоноры у нас так были закоренены, што и я сам в краю был гоноровый нато, што я “середняк”, и належу до другого, а не до третього кола, што я стою на середині хыжы, а не при дверях, або за дверями. Организация Л.С. и “Лемко” осміяли тоты нашы “кляссовы гоноры” и вылічили нас з них, чым мы перше гордилися, то тым тепер ганьбимеся, а чого перше зме ганьбилися, то тепер тым гордимеся, бо зме стали скромными культурными людми и вродилося у нас чувство справедливостци завдякы наукі Л.С. и “Лемка”. И длятого я стою членом Л.С. и предплачам “Лемка”, и уж мене никто от той организации и газеты не оттягне, ніт такой силы на світі, почавше от “борканюковского коммунизма” аж до поповского царизма, такий я чуюся сильный в той наукі, котру мі дали Л.С. и газета “Лемко”.

Коли я был ище школяром перед войном в старом краю, то я читал газету “Лемко”, и она мі ся в тот час полюбила длятого, бо в ней можна было найти много сміху и правды, так што она мене дуже заинтересовала. Но она дуже короткий час была мойом потіхом, бо скоро єй выход был забороненый, бо пришла война.

Але от того часу я постоянно слідил за таком газетом, ци бы єй где не достати, и таки дочекался, и зараз от початку єй выходу попалася мі до рук и до днес єст моим нерозрывным товаришом и учительом.

И зато я стал предплатником газеты “Лемко”.

А тепер вопрос, длячого я стал членом Лемко-Союза?

Коли чоловік читат таку газету и интересуєся своим народом и його судьбом, то приде сам до переконаня, што коли єст така наша организация, котра стоит в обороні нашого народа, то ходити поза организацию, як страченый, не выходит, лем треба стати в ряды организованых и з нима разом стояти в обороні свого народа и робочого класса.

Так и я сам добровольно зголосился до организации Л.С., и тружуся разом зо всіма нашима членами про свой народ, и будеме так долго боротися, покаль робочий народ не побідит гнет фашистский, так як робочы Совітского Союза побідили несправедливость силом и правдом.

Стою членом Л.С. длятого, бо хочу быти культурным чоловіком, як и другы люде, и так само хочу добра и свободы своим братям в Карпатской Руси. “Лемка” я не лем читам, але и ширю, каждого нумера роспространяю по 20 екземпляров. За свободну Карпатску Русь!