До часу, покаль не стал тот дом под руководством Лемко-Союза, тота наша организация здавалася все ище тымчасовом. Нашы противникы лем ждали, коли Лемко-Союз упаде. Тепер уж и они видят, што Лемко-Союз, то не така организация, як то починали нашы стары патриоты, без народного фундаменту и силы. Карпаторусский Американский Центр, то верх десятрочной роботы первой нашой правдиво народной организации, Лемко-Союза.

На другом місті поміщеный список тых первых, найліпшых нашых членов, членов фундатогов той нашой Народной Будовы. Меж ними находятся такы люде, што коли бы мы не мали их в организации, то мы бы не могли ище братися до народной будовы. Первым из них, то предсідатель Центра, Иван Малютич. Тот наш член положил много бескорыстного труда до той будовы. Не всі з нас порозуміют тот його огромный труд для нашого народа и признают, што єсли бы не тот чоловік, то тота будова бы нас о много больше стояла, а може бы єй совсім не было, бо он вынашол тот прекрасный пляц и руководил цілый час том нашом будовом. Сколько мог, помагал му кассир Центра Владимир Гончарик. Третий такий чоловік, без котрого тота будова не могла обыйтися, то Михаил Гавран из Стамфорд, котрый приізжал каждый роботный день, за маленьку плату на житя и яко наш отвітственный роботник и надзиратель трудился без рахунку часу, яко специалиста по будові. Тым тром нашым членам належится велика признательность от нашой организации и всей нашой карпаторусской емиграции за их бескорыстный труд при первой нашой народной будові.

Што до отділов нашой организации, то при будові на первом місті стоит сам Юнкерс. Юнкерскы члены Л.С. и своим трудом и своими жертвами причинилися найбольше до первой нашой народной будовы, так члены мужского, як и женского отділа. Юнкерскы отділы набыли тоту землю и они почали будову, но отступили тоты свои початкы, жертвы и труд для цілой организации совсім бескорыстно, розуміючи, што ціла организация, то их организация. Послі Юнкерса сейчас на другом місті стоит наш славный Стамфорд, а єсли взяти процентово до величины нашой колонии, то Стамфорд, што до жертв и членского, стоит на первом місті. За Стамфордом слідующий Пассайк. Правда, Пассайк одна из найбольшых нашых колоний, но нашы люде в Пассайку виділи, як будувалися у них “народны домы”, и виділи, як тоту их працу заберали банкы. И треба нашым людям в Пассайку признати, што єсли они могли причинитися столько до нашой народной будовы, сколько причинилися, то они порозуміли, што она не будуєся на таком “фундаменті”, як тоты “народны домы” в Пассайку. Такых людей, што тото уж розуміют, як видиме, в Пассайку нашлося много.

ЕМИЛЬ БЕТЛЕЙ наборщик и печатник в типографии “Лемка” и член Контр. Комиссии К.Р.А.Ц.	СТЕФАН КИЧУРА наборщик в типографии “Лемка”.

Плод десятрочной культурно-просвітительной роботы нашой организации, видочный плод для каждого, наш Карпаторусский Американский Центр, прекрасный народный маєток. Тепер мы мусиме доказати, што мы можеме не лем будувати, но што мы можеме и добри газдувати народным маєтком, што тот маєток буде нам рости и рости, што он принесе нам доход не лем для сплаты долгов, но и для ширения среди нашого народа дальшой просвіты и культуры, для культурной и политичной помочи нашым братьям в краю в их борьбі за народну свободу.

Тота наша перва народна будова, то лем початок нашого народного господарства. Оно мусит розвиватися дальше, мусит рости, такы народны домы будуваны на таком самом народном фундаменті мают стояти по нашых карпаторусскых колониях. А центральна наша организация мусит дойти ро того, штобы мы мали свою народну фарму, на котрой бы нашли притулок такы нашы люде, котры на стары рокы останутся без другого притулку.