Пѣсня Старого Эмигранта — Лемка

У суботу по полудни,
О першой годинѣ,
Памятаю дуже добре,
Якъ бы то было нынѣ.

Сидятъ няньо коло стола,
На руки схилились,
Не дивлятся на свѣтъ Божій,
Дуже засмутились.

Коло нянья стара мама,
Слезамися обливае,
Жена моя молодая
Съ жалю омлѣвае.

Сестры тоже горко плачутъ,
Мене обнимаютъ.
Братья мои дорогіи,
Кони запрѣгаютъ.

Кони въ возѣ запряжены,
Пора отъѣзджати:
Будь здорова родинонько,
Няню, мамо, сестры, браты.

Будь здорова жено моя, —
Съ всѣми ся пращаю:
Пора пришла отъѣзджати,
Южь часу не маю.

Няньо, мама, жена, сестры,
Братья и сусѣды,
Пращаются: будь намъ здоровъ,
Пиши письма изъ чужины.

Старенькій отецъ, мати,
Мя благословили:
Молься Богу, наказуютъ,
То будешь счастливый.

Также маешь памятати,
За церковь русскую,
За нашъ народь, честный русскій,
За всю Русь святую.

И за жену, за дитину,
Маешь памятати,
А Господь ти въ твоихъ трудахъ,
Буде помагати.

Пріѣхавъ я на стацію,
Съ братомъ мы ся розпращали,
Купивъ билетъ до Освенцину,
Бо такь ми казали.

Пріѣхалъ въ Освенцинъ,
О самой полночи,
На сердце ми легла туга,
Заплакали очи.

Бо финансы на граници,
Шифкарту мѣ одобрали,
Въ арестъ мене посадили,
Чого, — не сказали.

У недѣлю вчастно рано,
Протоколъ стягнули,
И до мѣста портового,
Въ Бременъ отставили.

У Бременѣ два дни бывъ я,
Добре быво жити,
Але за день десять марокъ,
Казали платити.

На третій день приказали,
На шифу сѣдати —
Будь здорова родинонько,
Жено, отче, мати.

19 дней та шифа,
По морю плавала,
20-го у Нью Іорку,
У пристани стала.

Тутъ на доку у пристани,
Эмигрантовъ записуютъ,
Въ лѣсы, майны и фабрики,
До роботы отсылаютъ.

Одослали мя до лѣса,
Нѣтъ где ночувати,
Ѣсти хоче ся мѣ дуже,
А не хотятъ дати.

Гей краяне, роботники,
Тяжко но ту жити,
Ѣдме къ майнамъ а тамъ будемъ
Роботы глядати.

И теперь я у майнахъ
Долярики заробляю,
Моей женѣ и родичамъ,
На газдивство посылаю.

Прійду съ майновъ,
Переберусь и повечеряю,
Иду на порчъ, сѣдамъ въ кресло,
И “Правду” читаю.

Все читаю и думаю,
О родимомъ краю;
Родинонцѣ, пріятелямъ,
Всѣмъ счастья желаю.

emigrantsongend

[BACK]