Фатима (разсказъ)

І.

Фатима была дочкою Гуссейна-паши. А Гуссейнъ-паша не былъ низкого роду. Его предки были въ родствѣ съ Магометомъ и богатства переходили съ отца на сына. Всѣ поколѣнія того рода проводили жизнь въ довольствѣ и роскоши, будучи окружены почетомъ и маючи въ своихъ рукахъ власть. Фатима, по природѣ уже хороша, была окружена довольствомъ и роскошею.

Отецъ ей малъ почти неограниченну власть. Подъ его управленіемъ находился районъ, положенный далеко отъ Константинополя, и онъ управлялъ нимъ цѣлковито самовластно, представлялъ собою почти удѣльного князя, держащого въ страху весь округъ и смотрѣвшого на его населеніе, якъ на своихъ подданныхъ.

Всѣ его сношенія съ Константинополемъ заключались въ посылкѣ податковъ султану и подарковъ его урядникамъ. Исполнивши тѣ обовязки, онъ могъ быти у себе неограниченнымъ господиномъ. Званіе паши онъ пріобрѣлъ якъ вслѣдствіе своей личной храбрости, такъ и благодаря своему богатству и знатности своего рода.

Онъ жилъ въ палатѣ, малъ свою свиту и войско и въ Константинополѣ знали, що если бы онъ задумалъ стати непокорнымъ, то коштовало бы то много хлопотовъ и не знати, чѣмъ бы кончилась борьба съ нимъ. Но Гуссейнъ не давалъ жадныхъ причинъ къ безпокойству, податковъ не задерживалъ, и никогда не забывалъ обдарити подарками визиря и кого слѣдовало. Онъ всегда былъ готовъ по первому призыву явитися въ рядахъ султанскихъ войскъ для борьбы съ невѣрными. Длятого его уважали и боялися его. Боялися его и уважали также тѣ, которыхъ онъ уважалъ за своихъ подданныхъ.

Фатима была дочкою любимой жены Гуссейна, Алише, отзначавшейся красотою. Свою красоту Алише передала своей единственной дочкѣ. Другихъ дѣтей у ней не было. Грозному пашѣ хотѣлось отъ ней мати сына, но хотя то его желаніе не осуществилося и хотя противъ Алише велись въ гаремѣ интриги, она все таки оставалася любимою женою Гуссейна.

Въ мѣру того, якъ Фатима дорастала, любовь ей отца къ ней и къ ей матери только увеличивалась. Для нихъ въ гаремѣ были отведены отдѣльны роскошны комнаты, убранны дорогими рѣчами. Для нихъ, когда Фатимѣ захотѣлося веселитися, другіи женщины спѣвали пѣсни и грали. Весь гаремъ старался догодити Фатимѣ. У ней были служницы, которымъ прислуживали другіи служницы. На каждый день у ней была нова одежда. Все, чего она захотѣла, было къ ей роспорядимости.

Фатимѣ приходилося неразъ слышати отъ другихъ, що ей отецъ грозный и строгій паша, но для ней онъ всегда представлялся тихимъ и добрымъ. Она не могла его представити собѣ такимъ, якимъ онъ былъ по отзыву другихъ. Она любила его слушати, когда онъ розсказывалъ ей сказки.

Такъ прошло ей дѣтство.

И только позднѣйше, когда она начала становитися дорослою, ей пришлося убѣдитися, що ей отецъ умѣе быти строгимъ.

Передъ тѣмъ не было дня, щобы хоть два разовъ не зашелъ въ тѣ комнаты, въ которыхъ жила Фатима съ матерью, но поволи началъ забивати на то. Що разъ то рѣдше видѣла она отца у матери и що разъ то рѣдше видѣла на его лицѣ усмѣхъ. И часами замѣчала, що мати ночью плаче.

Разъ услышала она, якъ ей мати въ розговорѣ съ отцомъ назвала себе старухою. Фатима знала, що быти старухою для женщины означае велике несчастье, но она не могла предположити, щобы ей любима мати стала старухою.

Послѣ того разговора отецъ цѣлу недѣлю не былъ у нихъ.

Тогда Фатима поняла, що ихъ счастье минае, що отецъ измѣнился къ нимъ и хотя окруженіе относится къ нимъ еще съ почтеніемъ, но того не на долго. Пройде любовь отца къ нимъ, почтеніе окружающихъ замѣнится ненавистью.

Фатимѣ не могло помѣститися то въ головѣ, що можно ей матерь розлюбити, що отецъ могъ того допуститися. Она рѣшила, що тутъ муситъ быти кто то третій, виноватъ въ томъ. Начала прислуховатися, и скоро поняла що тому причина. На службу Гуссейна пришелъ новый человѣкъ, ставшій изъ христіянина музулманиномъ, по имени Тимбекъ. По тонѣ голоса, съ якимъ произносили имя Тимбекъ, она поняла, що онъ пользуеся у отца великимъ вліяніемъ. Говорили що во всѣхъ дѣлахъ онъ сталъ первымъ его помощникомъ и дорадникомъ и що никто не зналъ придумовати для Гуссейна такихъ забавъ, якъ онъ. И черезъ то Гуссейнъ забывае свою Алише и заставляе ю плакати.

И задумала Фатима помочи своей матери въ ей горѣ.



Наконецъ Гуссейнъ появился въ забыту нимъ часть гарема къ Фатимѣ и Алише. На него ждала, якъ обыкновенно, кава, сваренна самою Алише. Тѣмъ разомъ Гуссейнъ улыбался и морщины на его челѣ розгладилися.

Фатима видѣла якъ то радовало ей матерь. И рѣшилася на смѣлый шагъ.

Отецъ сидѣлъ на диванѣ, Фатима у его ногъ, а Алише подальше. Гуссейнъ молчалъ. Не ловко ему было сидѣти тутъ, гдѣ уже давно не былъ и не зналъ, отъ чого начати бесѣду. Фатима начала перебирати струны гитары. И поволи въ тактъ музыки начала спѣвати несмѣлымъ голосомъ. Спѣвала она: „Отче, не выдавай мене за мужъ. Да благословитъ тебе Аллахъ, если ты не выдашь замужъ своей бѣдной дочки. Аллахъ, Аллахъ, вложи въ сердце моего отца жалость къ дочкѣ щобы онъ былъ справедливымъ.

„Мужъ возьме мене и увезе къ себѣ. Онъ полюбитъ мене, бо не можно не любити маленькой Фатимы. Онъ стане мене називати царицею своего сердца. Но, Аллахъ, вложи въ сердце моего отца жалость!

„Прійде часъ а любовь, дававша радость, перемѣнится въ смутокъ. Лучше, щобы не было радости бо смутокъ по радости еще страшнѣйшій. Прійде часъ и забуде онъ жену, котору любилъ. Отче, не отнимай мене отъ матери, она не перестане мене любити”.

Фатима спѣвала и увлекалася своимъ спѣвомъ. Голосъ звучалъ смѣлѣйше, рука ходила по струнахъ певнѣйше. Отецъ дивился на ню. Никогда онъ не слышалъ такой пѣсни. А Фатима тѣмчасомъ продолжала:

„Прійде часъ и прійдеся назвати мене старухою. А чи виновата я, що мужъ мой возьме мою красоту и молодость? Чи виновата я, що забуде мои ласки и счастье которыми закрѣплялъ онъ свои клятвы?”

Фатима подняла очи на отца и настрашилася того, що сдѣлала. Гуссейнъ тяжко отдыхалъ и былъ страшно гнѣвный. Онъ сдаеся только длятого не неребивалъ пѣсни Фатимы, що отъ бѣшенства не могъ проговорити слова. Такого грозного взгляда она у отца еще не видѣла.

— Фатима, гдѣ ты взяла таку пѣсню? Кто тебе научилъ ей? По що ты ю спѣвала? — спросила дочку Алише.

— Я знаю, кто научилъ ю той пѣсни — злобно сказалъ Гуссейнъ, — я знаю. . . Дармо будешь выпиратися. . . Хитра и зла женщина научила Фатиму той пѣсни и казала ей сдѣвати. И тою хитрою женщиною — ты!

Фатима нечаянно еще сильнѣйше ударила въ струны гитары и заспѣвала громко:

„Никто не училъ мене той пѣсни, нѣгъ, не училъ, а сердце подсказало правдивы ей слова изъ рыданій сложился ей смутный напѣвъ. Тому що иде изъ сердця и трогае душу, научити не можно. Аллахъ говоритъ устами невинной дѣвушки. Отче, май жаль надо мною!”

Фатима сама не знала, якъ вырвалися ей такіи слова. То сдѣлалося само собою помимо ей воли. Но вложила въ свои слова и пѣніе таку силу, що Гуссейнъ смягчился. Може подумалъ, що дѣйствительно Аллахъ вложилъ въ уста его дочки ту пѣснь. Теперь не сомнѣвался, що пѣснь сочинена Фатимою. Онъ опустилъ голову, подозвалъ до себе Фатиму и крѣпко ю хоцѣловалъ въ чело.

Отъ того часу Гуссейнъ посѣщалъ каждый день Алише, а когда былъ розстроеннымъ, казалъ Фатимѣ спѣвати ей пѣсню.


ІІ.

Торжество Фатимы тревало не долго. Не прошло года, а сновь вліяніе Тимбека на Гуссейна проявилось еще съ большею силою, чѣмъ передъ тѣмъ. Тимбекъ, видячи, що для Гуссейна забавы перестали быти интересны, нашелъ для него що-то другого, а именно нову красавицу для его гарема. Не минуло и трехъ недѣль, а нова красавица сдолала совершенно опутати Гуссейна. И онъ пересталъ посѣщати Алише и Фатиму.

Алише не могла того перенести. Плакала днями и ночами и не могла ѣсти. Фатиме жалѣла матери, но не могла ей помочи. И отъ жалю заболѣла.

Доносили о томъ Гуссейну. Тотъ обѣщалъ прійти. И посѣщеніе его было послѣднимъ. Алише послухала рады старой служанки и дала Гуссейну каву съ водою, которою омыла лѣву ногу при извѣстныхъ заклинаніяхъ. Гуссейнъ выпилъ каву, обѣцялъ еще прійти и ушелъ.

Фатима выздоровѣла скоро. Но въ гаремѣ стала извѣстна исторія съ кавою и ю обвинили въ колдовствѣ. Первымъ пострадалъ головний эвнухъ. Его утоплено въ мѣшку безъ всякого суда. Алише заказано выходити изъ комнатъ. Она просила, щобы позволили ей оправдатися, но ей не дали отвѣта, Фатима призывала отца до себе, но онъ не пришелъ.

А Гуссейна стало опускати давне счастье, Онъ началъ за богато думати о своей силѣ, пересталъ заниматься своими дѣлами, довѣрился со всѣмъ Тимбеку, а послѣдствіемъ того было то, що нимъ начали быти недовольны въ Константинополѣ. Съ податками опоздывано, подарковъ было меньше. Гуссейну послали упоминающе письмо. Онъ отвѣтилъ дерзко и дошло до того, що противъ него выслано войска. Гуссейнъ рѣшилъ боротися.

Исторія Алише якъ разъ сталася тогда, когда Гуссейнъ малъ отправитися со своими войсками противъ войскъ султана.

Но Алише боялась. Можно было теперь всего надѣятися, даже судьбы эвнуха. Единственнымъ спасеніемъ было бѣгство.

Ночью Алише и Фатима, переодѣты за эвнуховъ, бѣжали и скрылися у отданныхъ собѣ людей. Двѣ недѣли сидѣли онѣ въ пивницѣ, но захватили съ собою дорогоцѣнности и при ихъ помощѣ могли удатися дальше.

Еще передъ своимъ уходомъ узнали, що Гуссейнъ розбитъ войсками султана и що тѣ войска наближаются къ городу. Слѣдовало имъ чѣмъ скорше утѣкати.

Переѣхавши за границу, встрѣтилися съ совершенно другими условіями жизни. Не подобалися имъ другіи обстоятельства, но вертати не можно было. И ишли що-разъ то дальше. И такъ пришли въ южну Россію.

Дорогоцѣнности поволи изчезали. Алише не знала имъ цѣны и отдавала ихъ за безцѣнокъ. Наконецъ пережиты тревоги и скитанія подорвали ей здоровлье и она легла.

И больше не встала.


ІІІ.

Пріѣхало въ городъ войско. Молодый офицеръ, Лысковъ, былъ посланъ въ городъ за квартирами. Глядаючи квартиръ для офицеровъ, онъ наткнулся на страшну сцену. При умершей старшей женщинѣ была молода красавица, не знавша, що отъ горя дѣлати. Якъ узналъ Лысковъ позднѣйше, то была умерша Алише и ей дочка, Фатима.

Лысковъ заинтересовался судьбою молодой турчанки. Помогъ ей найти отвѣтне помѣщеніе, всѣ офицеры заинтересовались ей судьбою.

Случилось съ Лысковымъ несчастье. Заболѣлъ онъ сильно и долго пришлось ему лежати. Въ провинціональной глушѣ трудно было о опѣку. Но тутъ Фатима рѣшилася уходити за нимъ. И Лысковъ постепенно приходилъ къ здоровлю.

Со здоровльемъ приходила также и любовь къ той, що за нимъ ухаживала. Фатима отвѣчала взаимностью. И прожили они хороше время влюбленныхъ. Клялись другъ другу въ вѣчной любови, укладали планы на будущность.

Человѣкъ строитъ планы, не знае однако, чи може ихъ исполнити. Фатима и Лысковъ думали, що счастье ихъ близко, що никто не сможе его вырвали, и показалося иначе.

Разъ Фатима гуляла передъ домомъ, въ которомъ проживала, якъ къ ней подошелъ человѣкъ, одѣтый по европейски и заговорилъ до ней по турецки. Онъ сказалъ ей, що отецъ ей утѣкъ передъ карою Султана, що находится въ Россіи и хоче, щобы его жена и дочь пришли къ нему.

Фатима не хотѣла вѣрити незнакомому человѣку, но онъ показалъ ей письмо отъ отца. Она спросила его, якъ онъ могъ ю узнати; незнакомець отвѣтилъ, що дочку Гуссейна по томъ можно узнати, що она найкрасша изъ всѣхъ женщинъ.

Турецкій языкъ незнакомого, его лесть и письмо отъ отца подѣйствовали на Фатиму. Она спросила, якъ называеся, а онъ назвалъ себе Тимбекомъ.

Фатима сейчасъ стратила къ нему довѣріе. Но онъ угадалъ то и началъ себе оправдывати, що онъ дѣйствовалъ якъ слуга и исполнялъ приказанія господина, которы изъ боязни исполнялъ. Если же онъ сдѣлалъ зло ей и ей матери, то не хотячи, впрочемъ онъ теперь якъ посланникъ отъ Гуссейна и она може дѣлати, якъ хоче. Если хоче утѣшити старого отца, то нехай поѣде къ нему, если же жизнь съ невѣрными для ней дорога, то нехай остае съ ними.

Фатима уже была христіянкою и дивно ей было чути такіи слова отъ того, кто самъ былъ христіяниномъ когда то. И долго не рѣщалася.

Но Тимбекъ началъ ю уговорювати. Нужно держати въ тайнѣ мѣстце пребыванія отца, ибо за его голову наложена награда. Наконецъ онъ убѣдилъ Фатиму и та рѣшилася ѣхати къ отцу.

Фатима поѣхала. Тимбекъ достигъ своего.

Но скоро узнала Фатима, що Тимбекъ ю обманулъ. Не о отца ему ишло, которому измѣнилъ и которого выдалъ, а ишло ему только о остатки дорогоцѣнностей, якіи остали у Фатимы и о саму Фатиму. Тимбекъ былъ проходимцемъ, но полюбилась ему Фатима и онъ хотѣлъ ю сдѣлати своею. И сейчасъ по уходѣ изъ мѣстцевости, въ которой ю нашелъ, началъ къ ней приставати съ своею любовію.

Ѣхали цѣлый день. На ночь остановилися въ придорожномъ трактирѣ. Одна была только комната свободна и тамъ умѣстилася Фатима. По вечери, котору съѣли разомъ съ Тимбекомъ, не хотѣлъ онъ уходити. Ждалъ чего то.

Фатима ставилася неспокойною. Наконецъ просто заявила:

— Я хочу итти спати.

Но Тимбекъ не уходилъ. Очи его зашли мглою, сталъ неспокойнымъ и съ звѣрскимъ апетитомъ глядѣлъ на Фатиму. Наконецъ не выдержалъ и хрѣпучимъ голосомъ сказалъ:

— Я люблю тебе. . . Я жити безъ тебе не могу. Черезъ ту любовь я погубилъ твою матерь и тебе. Думалъ скорше послѣ того добитися моихъ мечтъ.

Фатима въ страхѣ отступила. Но Тимбекъ не могъ удержати свои страсти. Якъ звѣръ кинулся къ ней и схватилъ въ свои объятія. Фатима отбивалась всею силою, звала на помощь, но дармо, силы ей ослабѣвали.

И сдавалося уже, що муситъ статися жертвою своего наибольшего врага.

Но въ саму критическу минуту отворилися двери и въ нихъ показалася высока фигура русского офицера. Въ одинъ моментъ схватилъ онъ напастника и ударомъ уложилъ на землѣ.

Фатима безъ чувствъ пала въ его объятія.


ІѴ.

Якъ слѣдовало ожидати, Лысковъ занепокоился пропажею Фатимы. Якъ только узналъ онъ, що уѣхала съ незнакомымъ, сейчасъ предполагалъ, що тутъ крыеся яка то неясна исторія и що Фатима въ опасности. Не надумуючися, сѣлъ на коня и поѣхалъ слѣдомъ Фатимы.

Легко ему было находити слѣды. Фатима своею красотою привлекала всѣхъ. И Лысковъ зналъ, що скоро настигне Фатиму и отъ ней узнае правдиву причину ей бѣгства.

Настигала его ночь. Треба было поиски прекратити и глядати помѣщенія на ночь. Случай завелъ его въ тотъ самъ трактиръ, гдѣ помѣстился Тимбекъ и Фатима. Хозяинъ, видно въ смовѣ съ Тимбекомъ, не хотѣлъ никого принимати на ночь и отказалъ Лыскову. Но въ ту именно хвилю Лысковъ послышалъ зовь о помощь. Сейчасъ узналъ голосъ Фатимы и поспѣшилъ ей на выручку.

И пришелъ во время.

Показалося позднѣйше, що Тимбекъ долго слѣдилъ за Фатимою и що уложилъ ловкій планъ, щобы взяти въ свою власть Фатиму.

Но планъ ему не удался. За свои провиненія попалъ тамъ, куда ему слѣдовало, а Фатима стала женою Лыскова.

И при любящемъ мужѣ поволи забывала о пережитыхъ несчастьяхъ и страданіяхъ


——————oo0oo——————



[BACK]