Першый раз в історії Лемко Союза хоровый колектив з богатым художнім доробком поіхав до рідного краю нашых дідів, штобы выступити з лемківском пісьньом перед публиком велькых міст як Львів, Тернопіль і Киів. Нашы сьпівачкы з Юнкерса, Н. Й. Нью Джерзі — вшыткого 10 осіб — протягом трьох тижнів з 5-го по 26-го июля встрічалися з простима совітскыма людми. Там они сьпівали, бесідували, — ліпше повісти, жыли дома з украінским народом. Але найвеце памятнима были встрічы з лемками-переселенцями, якы прожывают у Львові і Тернополі, юж веце як сорок років. Витали львівскы лемкы своіх сестер з Гамерикы з слезами в очах і з букетами прекрасных квітів.

«Горы нашы Карпаты» — том сьпіванком хор «Карпаты» разом з відомым івано-франківскым ансамблем «Усьмішка» почынав своі концерты, што ся увінчали велькым усьпіхом. Цы то во Львові, цы то в Тернополі, цы в Кийові, велесотня публика дарувала нашых сьпівачок горячыма аплодисментами і чысленныма букетами сьвіжо-купленых квітів.

Під час телемосту Львів-Вінніпег

Керівник самодіяльного ансамблю «Усмішка» Юрій Фейда та соліст Михайло Сливоцький з співачками ансамблю «Карпати»

Побывали нашы дівчата на Тернопільщыні, где встрічалися з родином — ріднима братами, сестрами, тетами і навет дідами, і бабцями. Были встрічы также з многыма відомима вченыма, писателями і художниками лемківского походжыня.

Сьпівачкы «Карпат» одвіділи Талергофскый памятник у Львови, где теплым словом и букетами квітів оддали чест невинным жертвам австро-венгерского терора 1914 р., відоме місто Канів, штобы вшанувати памят великого сына украінского народа — Тараса Шевченка.

«Приізд «Карпат» на Украіну, — повіла в Кийові директор хору, Мистопредсидаталь Лемко Союза Джанет Фучыла, — давня наша мрія, значна част лемків тут жые. Мы видиме, што культура і мистецтво лемків набыли тут великого розквиту. Богатый фольклор нашых предків гідно поповнив скарбницю украінской культуры. Лемківскы народны пісні выконуют ансамблі, хоры, відомы сьпівакы, звучат они по радіо і ТВ. Разом з нами в концертах выступали совітскы колективы, якы стали нашыма щырима друзями».

Два разы выступав хор Карпаты по радіо і ТВ на Украіні. Найгарщы традициі нашой культурной праці в Америці ся не остали замкнуты в околиці Нью Йорка. Они стали відомима в краю нашых предків і сприяют поглубленю дружбы медже народами Америкы і Совітского Союза.

«Такы встрічы, культурный обмін, — одзначыла в Кийові Джанет Фучыла, — то една з тых доріг, по якій мы можеме принести на нашу Землю мир і братство. Мы нигда не забудеме гостинных встрічей на вітцівскій земли, де мы почували себе як дома. Сподівамеся, што то не остатній наш приізд. Мы і надале будеме робити вшытко можливе, штобы зміцнювати добросусідскы односины медже народами нашых краін. А пісня стане нам в том добром помічницьом».

Своім репертуаром хор «Карпаты» роздавав своій публиці на Украіні незабутні вражыня. Американскы лемкыні напевно переконали многых глядачів, што лемківска народна творчіст продовжат збогачувати культурне жытя американскых лемків взагалі. За тото вельке досягненя нашым дорогым дівчатам належыт ся щыра подяка.