Короткий Историчный Очерк Лемковской Руси — Виктор П. Гладик

ОТ РЕДАКЦИИ:

Виктор П. Гладик помер 21-го апріля 1947 року. Он помер на 74 року житья. Родился в селі Кункова, горлицкого повіта, в 1873 р., но на жаль, у нас ніт записи дня и місяца його рождения, длятого просиме нашых старшых лемков, котры знают о його дню рождения и його биографию житья, прислати нам до редакции. Дивно нам єст в редакции, а тото буде дивно и многым нашым членам и читателям газеты “Карпатска Русь”, што Виктор П. Гладик был великым лемком и великым русскым патриотом, котрый в тых самых часах, што и нашы бывшы покойны редакторы писали, то в тот сам час и Виктор П. Гладик писал барз дуже о лемках, як видите из той статьи, яку тут печатаме, а связь между ним и нашыми редакторами была дуже слаба або нияка. Мы, молодша генерация, мало знали о його писаню, а теперiшня повоєнна емиграиия лемков совсім ничого о ньом не знає. А як видно, то в тот сам час, як нашы редакторы при Лемко-Союзі переводили книжку-роман “Як гартувалася сталь” Николая Островского, а потом переводили историю Совітского Союза на наш язык, то в тот час Виктор Гладик писал такы поучительны истории о нашом краю Лемковині, а наша газета того всього игнорувала. Розумієся, што Виктор Гладик относился осторожно к коммунизму и к большевикам, але он тримался міцно и щыро церкви и свого народа, а идеология коммунизма, як раз тото голосит, же штобы быти добрым коммунистом, то треба идти в гущу народа, в церков и всяды, где жиє народ. К Лемко-Союзу Гладик не онтосился ворожо, но не похвалил политику Вислоцкого ани Д-ра Пыжа, што мало дбали и мало писали за свой власный край, а заполняли газету, календари и другу литературу материалами, якы до небес восхваляли всьо тото, што творилося в Совітском Союзі, а майже до тонькости ганили всьо то, што творилося в Америкі, так точно, як и теперь всі “прогрессивны” газеты в Америкі пишут, якы восхваляют всьо и видят всьо лем в Совітском Союзі, же там всьо єст найлучше, а ганят, оплювуют всьо то, што робится тут у нас в Америкі.



VictorGladik
ВИКТОРЪ П. ГЛАДИКЪ.
Первый редакторъ и основатель газеты „Правды”.

1873 — 1947


В посметной вісти от пятницы 25-го апріля 1947 года, ч. газеты 17, Д-р Пыж написал дуже скромну посмертну вість. В той посмертной вісти Д-р Пыж дає признательность В. П. Гладику за його патриотизм к Руси и православию и называт його народно-церковным діятельом. Но Д-р. Пыж пише дальше, што В. П. Гладик не хотіл рахуватися и поддержувати нияку народну организацию, котра не была связана с церковью. Гладика Д-р. Пыж представил, што он зробил много добра для православной церкви, и при том сказано єст, што вел борьбу с “попиками-радыкалами”, якы служили тут в Америкі за агентов Папы Римского против православия. Д-р. Пыж говорит, што тоты “попы-радыкалы” не были ниякыма “радыкалами”, як и сам Папа Римский не был и не єст радыкалом, но при том он дає им признательность, што они были хитрійшы и облестнійшы и знали, як подойти к нашому народу тогды, як “зацофаны православны батюшкы и епископы с царской России того не потрафили”. Недивно, што потом тоты “зацофаны” православны батюшкы не хотіли з нами тримати в Лемко-Союзі и читати або жертвовати на наш пресс-фонд! Правда, што тогды у нас было ищы дост нашых людей в Америкі, где было до кого говорити так, як каждый хотіл выразитися, но сегодня мы уж не можеме поужити такы понижаючы духовенство слова, бо мы уважаме, што єст несправедливо и грішно.

Виктор Гладик, гдеси перед самом смертью, коли уж нашы лемкы в Польші были насильно выселены з Лемковщины, то в тот час он выдал острый протест против польского коммунистичного правительства, и протестуючы, он нарисувал Лемковщину, як гробницу, як величественный цмынтар з множеством свіжых могил и крестов. Так його предсказания исполнилися, бо по сей день наша Лемковина выглядат горше, як цмынтарь, бо даже цмынтаров там уже осталося мало, а могилы нашых отцов и кресты на могилах, нашы церкви, всьо то было знищене. Свіжых могил там дуже не осталося, 6о народ наш был выгнаный, як до Совітского Союза, так само и на западны польскы землі.

Виктор П. Гладик, як высше сказано, относился к русскым коммунистам и большевикам холоднокровно и осторожно, но в єдны часы, коли русскы большевикы и коммунисты зробили фильм царя Ивана Грозного, где было знято побоище русскых зо шведами, и там Виктор Гладик увиділ, што в фильмі были воскликы: “За Русь! За царя! За Россию!” Коли Виктор Гладик вышол из театра в Нью Йорку, то поклапкал Василя Гончарика из Юнкерс, по плечах и сказал: “Васю, ніт што ся бояти за Россию, за Русь! Тоты люде, што зробили тот фильм, знают русску историю, не ганьбятся ньом, и они направду сут русскы люде”.

Виктор П. Гладик был первым редактором газеты “Правда” и основательом днешнього Общества Русскых Братств. Перве число газеты “Правда” вышло во світ 11 марта 1902 года. Он тоже редагувал газету “Поступ”, “Лемковщина” и другы. Не стало Гладиков и другых русскых патриотов-лемков, не стало и газеты русской в нашом Обществі Русскох Братств!

Фотознимку мы получили от Петра Гардого, котрый отозвался з великом похвалом о Виктору Петровичу Гладику. Он был дуже рад тому, што мы в редакци не забыли нашого великого лемковского патриота, писателя, редактора, лектора и учителя.


* * *

Земля нынішньой Лемковской Руси росположена на сіверном-полночном склоні лісистых Карпат, котры от высокых Татр по ріку Попрад называются Бескидом Западным, а от рікы Попрада до Дуклянского перевала-прохода носят название Бескид Середний або Низкий. Дальше к востоку от Дуклянского перевала по истокы рікы Сяна в повітах сяноцком и лісском, русскы Карпаты называются — Бескид восточный-всходный. Хребет Бескидов становит природну границу меже бывшом Польшом на сівері и Словакиом и Мадьярийом на югі-полудни. 3 востока Лемковска Русь соєдинятся с восточно-галицко-русском земльом — с цілом Русью, а на западі и сівері прилігат к польской землі, а также к русской на т. з. Спишу сягаючой майже до Татр, а ныні принадлежачой к Словакии. По польскых розмірах хребет Бескидов розділяючий Лемковску Русь от Руси Подкарпатской єст долгий сверх 600 клм., но фактично долгота хребета Бескидов далеко довша, як указуют польскы землеміры, котры не включают в хребтовый ланцух крайных огнив Бескида западного и восточного. Западный Бескид полякы называют польскым Бескидом або Безщадом, а также ціле пасмо карпатскых гор заселене исключительно русскым населением — польскыми Карпатами, хотяй добре знают, што южна-полуднева часть повітов ново-сандецкого, горлицкого, ясельского, кроснянского, сяноцкого и лісского компактно заселена русскыми лемками не говорячи уже о Восточной Галичині, где оба склоны Карпат соєдинены с шыроко-далеко роспростертыми русскыми землями.

На сівері-полночы Лемковску Русь от польскых гуральов и Мазуров отграничат звичайна етнографична русско-польска границя ведуча через погранича польскых и русскых сел от Попрада и русского села Верхомлі Великой на западі, и за тым попри польскы села: Шташкова, Шымбарк, Цеклин, місточка Змигород, Дукля, Рыманов, Беско, Барилов. От Барилова к востоку границю становит ріка Сян выплываюча из склонов Карпат. Поза высшеозначенном границьом єст несколько русскых сел окруженных польскыми, як Скляркы, Надяз, Вороблик королевский и больша русска высша над ріком Вислоком к полночы от Рыманова обнимаюча русскы села Браткову, Чорнорікы, Ріпник, Петрушову Волю, Опаровку, Бережанку, Высоку, Бонаровку, Ванивку, Красну, Лютчу, а также ряд поселков принадлежащых к русскым селам-парохиям.

На восток от Барилова, Сянока, Ліска, — вообще горішного течения Сяна, русскы села значно перемішаны с польскыми або же с русскыми слатинщенными и ополяченными селами.

Поверхность Лемковской Руси на Галицкой стороні выносит около 8,000 кв. километров.

Население Лемковской Руси трудно точно опреділити с той причины, што при переписи польскы писари где лем можут, то записуют русскых селян поляками. Ведля статистикы напечатанной в шематизмі с 1936 г. “Апостольском Администрациом Лемковщины”, русске население Лемковской Руси, не включаючи там жиючых поляков, жидов, циганов и др., мало выносити в 9 деканатах (благочиниях) 145,180 человік. В том числі мало быти 127,305 греко-католиков або униятов, 17,577 православных и 298 сектантов.

В поєдинчых деканатах жило:


гр. кат. прав. сектант.
1. Буковском 14,021
11
2. Горлицком 17,291 2,894 141
3. Грибовском 4,801 6,008
4. Динисовском 13,674
42
5. Дуклянском 9,761 8,061 50
6. Короснянском 7,140 3
7. Мушинском 22,593 42 32
8. Римановском 19.087 652 13
9. Сяноцком 18,896 7 22



Разом всего 127,305 17,577 298
Всіх разом 145,180

Знова польска статистика показує другы цифры о населению Лемковской Руси. В брошюрі “О Лемковщизнє”, напечатанной в Кракові в 1935 г. напечатано, што в Западной Лемковской Руси (повіты Новый Торг, Новый Санч, Горлицы, Ясло и Кросно) в 136 русскых селах жиє 68,272 русскых лемков, а обще население той области числит понад 82,000 жителей. В Восточной части Лемковской Руси (пов. Сянок и Лiско), ведля польской статистикы, жиє 77,525 русскых лемков. Разом всіх 145,516.

Из высше приведенной статистикы видно, што полякы нарахували больше число русскых лемков, як нарахували русскы издатели шематизма. Знова полякы нарахували на цілой Лемковской Руси 284 русскых сел, а издателі шематизма нарахували такых сел, в котрых находятся церкви и к церквам принадлежащы дочерни церкви приселкы и подальшы русскы гр. кат. селения — 342. С того можна заключити, што и польска и русска статистика населения Лемковской Руси не єст точна. Тото стверджено в той же брошюрі “О Лемковщизнє”, где на слідующой страниці, послі напечатания статистичных данных, сказано, што “число лемковскых сел выносит около 300 с населением (русскым) около 150,000 лемков”.

Интересны тоже данны напечатаны в упомянутом шематизмі о числі гр. кат. парохий и завідательстві. В шематизмі указано, што на Лемковской Руси єст 121 матерных церквей, 72 дочерных и 10 каплиц для богослужений и при них 127,305 гр. кат. — парохиян. Знова польска статистика показує, што на Лемковской Руси в 9 деканатах єст только 118 парохій, 309 сел и приселков и 138,045 “вызванцуф” (вірующых).

Для приміра, як полякы, а также администрация гр. кат. парохий на Лемковской Руси переводят спис русского населения, можут послужити слідуючы цифры:

В шематизмі изданном “Апостольском Администрацийом Лемковщины в 1936 г. указано, што в селі Поворозник (новосандецкий повіт) до 1936 г. жило 1040 гр. кат. (русскых) и 15 рим. кат. (поляков).

Польска газета “Глос Подгаля” с 6-го сентября 1930 р., напечатала статью, в котрой льживо доказує, што в Поворознику жиют орущены полякы, а тото доказуют прозвища дакотрых поворозничан, як Баран, Бартош, Бем, Бляди, Ценявский, Червоноброда, Дрозд (Дроздик), Гурняк, Голда, Гурский, Патлавский, Петруга, Пчола, Свидерский, Щерба, и др. “Тоты лемкы, пише “Глос Подгаля” — походженья чисто и выразно польского и являются лем поляками”.

Возражаючи на брехні польского шовиниста г. Г. Юстик написал в львовской русской газеті “Земля и Воля” с 20 сентября 1939 г. опровержение брехні польского “мондралі”, в котром между прочым пише:

“Червоноброда и Бяли — то цыгане с крови и кости и “Глос Подгаля” може собі их присвоити, но тоты, о котрых Г. П. пише, што они чисто польского походженья — “николи не были и не будут поляками”.

Дальше автор упомянутой статьи напечатанной в 3. и В. пише:

“Наш Поворозник, в котром жиє 13 польскых родин, несколько цыганов и веце, як 3 тысячы русскых — слідовательно не 1040, як указано в шематизмі. А г. Юстик, як житель Поворозника, знає точнійше число населения свого села як польскы писари и гр. кат. администраторы.

“Тото само можна сказати и о Крыниці (купелеве заведение), пише автор упомянутой статьи, о котрой пишеся — што она польска, хотяй в ней мешкат около 5,000 русского населения и лем 1,500 не-русскых” — єврейов и поляков. Ведля статистикы напечатанной в шематизмі в 1936 г. в Крыниці селі и Здрою жило в часі составления шематизма 2,139 гр. кат. (русскых), 3,480 латинян (поляков) и 3,000 єврейов.

Из высше приведенных цифр читатель може сам судити, што число русского населения на Лемковской Руси, єсли його справедливо счислити, выносит около 250,000 человік.

ИСТОРИЧЕНЫЙ ОЧЕРК РУССКЫХ СЕЛ
В НОВО-ТОРГСКОМ И НОВО-САНДЕЦКОМ ПОВІТАХ

В историчных записках о древной жизни славян упоминатся и о славянском племени, жиючом в 3-м и 4-м віках в сіверном-полночном подкрылі Татр, южной половині Сяноцкого, Ясельского и Сандецкого крайов. Были то, як пише чешский историк П. И. Шафарик, предкы нынішных русскых лемков. Знова русский историк Янушевский на основі ним найденых документов, твердит, што римскы историкы упоминали о русском племени в древной Панонии (ныні Мадьярии) уже в 278 г. — Греческий цар-историк Михаил Багнянородный в историчных записях с 919 г. упоминат, што предкы нынішных русскых бойков жили в нынішных самборском и стрыйском округах, а также в полуднево-восточной части нынішного ново-сандецкого округа. — О том, што на нынішной Лемковской Руси жиє от непамятных часов русский народ, говорят тоже Галицко-Волынска літопись, грамоты русскых києвскых и галицко-волынскых князей и польскых королей. Приміром, село Чертеж коло Сянока, як говорит предание, истновало перед княжением галицко-волынского князя Романа, княжившого при конці 12-го столітия. В Чертежі послідный галицко-волынский князь Юрий ІІ, який дольший час жил в замку коло Сянока, поселял чертежников — всякых майстров и инженеров, якы там рисовали планы домов, кріпостей и прч. — Село Юровцы основал сам князь Юрий ІІ в первой половині 14-го столітия. — Там он мал свой двор. Там-же, недалеко Сянока, находится село Половцы, ныні наполовину ополячене. Тото село, як говорят историчны досліды, было основано перемышльскым русскым князьом Володаром в 1125 г. Там между русскыми селами князь поселил взятых в плін половцев, якых русскы князі, послі побіды над половцями розселяли на Прикарпатской Руси. (Половці, дике азиатске племя). Так само село Сторожы Великы, Костаровцы и др. побудованы за часов княжения русскых князей в Києві, Галичі, Львові, и Перемышлі.

Находячыся русскы села в западной части нынішной Лемковской Руси, мают за собом тоже много историчных записок, датованных уже послі того, як польский король Казимир, завоювал Львов и в 1349 р. всю галицко-русску землю прилучил к Польші. Послі того, польскы королі, краковскы рим. кат. бискупы, польскы князи, дідичы и старосты выділяли поодинокым селам поля на содержание церквей и священников. В том ділі солтысам и священникам королі и др. выдавали законоправны грамоты, якы в многых селах по ныні хранятся.

Ниже приводжу короткий опись села в новоторгском и ново-сандецком повітах напечатанный в шематизмі с 1936 г. и другых русскых и польскых очерках русской, найдальше на запад в Карпатах лежачой окраины.

Шляхтова єдно из старых, историчных русскых сел на Лемковской Руси, ныні послідне на галицко-русской землі на западі. О том селі упоминатся в грамоті выданной в 1391 г. польскым королем Ягайлом и королевом Ядвигом, краковскому бискупу Янови и його наслідникам, што бискуп за заслугы, якы сділал для польского королевства, получил Шляхтову и др. села. В том часі — перед 500-600 роками, Шляхтова, як упоминатся в грамоті, называлася — “Шляхтова Воля”, єднак с бігом часу “Шляхтову Волю” змінено просто на Шляхтову. Так тото село по ныні называтся. Зо Шляхтовом бискуп Ян получил землі принадлежащы к королевскому замку “Плохе”, находячомся в ново-сандецком повіті, а также Мушину, місточко Пястков и слідуючы русскы села: Поворозник, Андрейовку, Щавник, Ломницу, Перуну (возможно нынішню Перунку), Угринцеву (ныні Угрин). В свойом историнчом очерку о. Юлиян Никорович упоминат, што можна припускати, што землі принадлежащы к земку “Плохе” с русскыми селениями, в том и Шляхтовом, подпали под власть Польшы в 1340 р., послі того, як король Казимир завоювал Львов и прилучил галицко-русске княжество к Польші. О русскости Шляхтовы и єй старожитности свідчит название невеликой річкы, што переплыват через Шляхтову и впадат до Дунайца. Тота річка от непамятных часов названа — Русскым Потоком, а протягнена через Шляхтову старинна дорога, через котру проізджали русскы купцы из востока на запад в Прагу и Відень по-ныні называтся Русскым Путем.

Дальше историчны запискы указуют, што в 14-ом столітию Шляхтова принадлежала до якого-то Томы из Навойовой (польске село коло русского села Королева Русска) и його потомков. В 1542 г. Шляхтова принадлежала Акакию Йордану с Закличина, а в 1581 Петру Навойовскому. В 1741 р. властитель Шляхтовы был польский князь Павел Сангушко, а от 1828 г. належала родині польскых графов Стадницкых в Навойовой.

В русской церкви в Шляхтовой находится евангелие, в котром на послiдньой стороні єст записка, што евангелие подарувал для церкви в 1542 г. властитель Шляхтовы Акакий Йордан. Тота записка посвідчат, што церковь в Шляхтовой существовала перед 400 годами.

Историчны досліды указуют, што и сусідны зо Шляхтовом села Щавниця, Коростенка, Новый Торг, принадлежали до Шляхтовой, но с бігом часу были слатинщены и ополячены. Шляхтова с сусідными русскыми селами Яворкы, Біла Вода и Чорна Вода давнійше становила єден приход, но позднійше была розділена на два приходы. В Коростенку и теперь показуют місце, где стояла русска церковь, а в Щавниці поныні осталися названия “Попова лука” и “Дьякова лука”, што укзаує на то, што лукы принадлежали до русского священника и дьяка.

Яворкы, сусіднн село Шляхтовы, віроятно приняло свое название от яворового ліса, на зрубі котрого оно побудовано. Села Біла Вода и Чорна Вода приняли свои названия от потоков — білый поток и чорный поток, што переплывают тоты села и впадают до Русского Потока. Понятно, што исторична принадлежность Яворок, Білой Воды и Чорной Воды тота же сама, што и Шляхтовы. В Яворках в 1798 г. была вымурована хороша церковь, котра принадлежала к церкви в Шляхтовой. В 1820 р. в Яворках установлено самостоятельный приход; к церкви в Яворках принадлежат Біла Вода и Чорна Вода. Статистика указує, што в 1935 р. в Шляхтові жило 672 русскых гр. католиков-униятов, 38 поляков и 2 євреи, в Яворках 617, в Білой Воді 541, а в Чорной Воді 346 — разом 1504 русскых, 48 поляков и 9 єврейов.

ПОВІТ НОВО-САНДЕЦКИЙ

В ново-сандецком деканаті находится 15 большых сел, в котрых сут церкви и священникы, 7 меньшых сел с дочерными церквами и 2 малы села в котрых находятся лем каплицы для богослужения. Имена сел напечатаны в алфавитном порядку.

Верхомля Велика росположена на правом берегу Попрада, 20 км. от коли-то русского, а ныні ополяченого городка Мушины. В грамоті выданной краковскым князьом и кардиналом Юрийом Радвилом, с датом 3 августа 1595 г., упоминатся, што Радвил отдал єден лан ролі на удержание церкви в Верхомлі Великой, значит, што в ХVІ віку в Верхомлі Великой была русска церковь.

До Верхомлі принадлежат Верхомля Мала, Ломниця, Пивнична и Кокушка. Население Верхомлі с к ней принадлежащыми селами и приселками в 1935 г. выносило 2,125 русскых гр. католиков, 2 полякы и 22 євреи.

В Верхомлі Великой родился в 1845 року извістный писатель Лемковской Руси о. Владимир Хиляк (Иероним-Аноним). О. Хиляк написал много цінных оповіданий, якы были переведены на ріжны другы языкы.

Войкова лежит на самом хребті Карпатскых гор. Коло Войковы выплыват потомок из “жерела трьох королей”. Предание говорит, што там колиси давно сошлися три королі. Историкы допускают, што легенда о трьох королях основана на съізді королей, о котром упоминатся в “Волынско-Галицкой Літописи” повіствующой так: . . . По сем же бысть сьнем (сейм). Русскым князем с Лядским князем с Болеславом снимашася в Тернаві. Данило князь (Галицкий) с обоима сынами с Львом и с Шварном и Васильком князь с своим сыном Володимиром и положиша ряд межи собою о землю Рускую и Лядзскую, утвердившася крестом честным”. Тота встріча королей, по мнінию автора “Волынско-Галицкой Літописи” относится до 6776 года от сотворения світа. Як розграничили князі русску землю от лядской (польской) о том літопись не упоминат.

Войковскы солтысы мают оригиналы грамоты датованной 3-го августа 1595 року, яком краковский кардинал Радивил надає Хомі Поворозницкому лан землі на солтыство, а другий лан на удержание ліса, принадлежачого священнику. С того видно, што в Войкові была уже в том часі церков и Радивил дал лан и ліс на удержание священника. Ведля статистикы в Войкові жиє 393 русскых униятов и 18 латинников.

Жегестов росположеный на высоком взгорю над Попрадом 15 км. от судового городка Мушины. Судячи по грамоті датованной в Жегестові 26 июня, 1525 року, краковский бискуп Франц Красинский, выименовал Гаврила Юрашку из сусідного села Андрейовкы солтысом в Жегестові и передал йому млин и тартак. Священник в том часі получал от селян по єдной копі овса с каждой ролі. К Жегестову принадлежит дочерна церковь в поблизком селі Зубрику, што лежит тоже над Попрадом. Грамота польского краковского бискупа Андрея Требицкого с датом 4 апріля, 1664, говорит, што униятскому священнику в Зубрику принадлежит “Кащаковска Роля” и священник єст частично освобожденый от податковых тягаров. С того видно, што в Зубрику была самостоятельна парохия, котру прилучено позднійше до Жегестова. — В Жегестові находятся минеральны воды, якы из взгляду на поблизке купелеве заведение в Крыниці, мало извістны и мало експлоатованы. — В Жегестові жиє 1020 русскых униятов, 93 латинников и 9 єврейов; в Зубрику 325 русскых, 11 лат. и 4 євреи. Парохом Жегестова єст широкоизвістний церковно-народний писатель о. Роман Прислопский, написавший между прочим книжку: “Примір латинизаторской гакаты на рубежах Галицкой Руси”.

Злоцке находится 3 км. к полночи от Мушины в живописном положению. До Злоцкого принадлежат дост великы села Щавник и Ястрабик. Місцевы метрикальны записы указуют, што всі три села существовали на початку ХV віка. 26 июля, 1575 року, краковский польский бискуп Франц Красинский выдал привилей Васькови Валахови на солтыство в Щавнику, а бискуп Петро Гембицкий отдал пресвитерови (священникови) Андрейовкы церковный грунт в Ястрабику, який утримовали місцевы солтысы Кондрат, Иван и Михаил с тым, што тот грунт має служити для ястрабскых священников. — Самостоятельна парохия в Ястрабику существовала до 1791 г., а в Щавнику до 1809 г. В Злоцком жиє 661 русскых, в Щавнику 664, в Ястрабику 548 — всего 1873 русскых, 14 латинян и 14 єврейов. — В Щавнику родился о. Николай Милянич, Василий Милянич, бывший судья, Василий Милянич, воєнный комиссар, Алексий Милянич, народный учитель и о. Теліщак.

Крыниця-село, то найбольше русске село на Лемковской Руси. Давнійше минеральны жерела в Крыници находилися в примитивном состоянию. От булькотала в жерелі-студни вода, люде приходили до жерела, пили минеральны воды и никому и в голову не приходило, штобы при жерелах построити купелеве заведение, доперва о. Виктор Жегестовский, крыницкий парох с 1948 р. до 1869 р., узнал лічничы свойства крыницкых минеральных жерел, поблагословил их и розголосил лічебничу их силу для хорых. Скоро при жерелах были построєны купелевы будинкы и так постепенно при купелях на “помірках” взростал город Крыниця-здрой. Ныні крыницкы купели извістны широко-далеко и літньом пором в Крыницу в купелі съізжаются тысячи хорых и любопытных туристов. Крыниця-здрой на русскых “помірках” ныні польско-єврейский городок.


Виктор П. ГЛАДИК, 1939 р.

(Окончание буде в календарю на 1972 год.)



[BACK]