За Повернение Лемков на Лемковину

Каждый лемко знає дуже добрі, што без того, штобы лемкы жили на Лемковині, не може быти в будучности и самых лемков, ни самой Лемковины. Лемковина, розумієся, што не пропаде, бо то земля, но народ може пропасти, єсли його будут вынародовляти в такой мірі, в якой його вынародовляют по сей день всі: и полякы, и украинцы, и словакы. Лемкы з Галицкой стороны Лемковины были силом выкинены зо свого краю и розбиты по цілой Польші. Лемкы по чехословацкой стороні тоже были притиснены тым, што послі Другой Світовой Войны, там на Пряшевщині не лем же діло не пішло в русинску пользу, но даже єдным словом никто о то не постарался, шюбы тым лемкам, як родным братьям лемкам по чехословацкой стороні, дати знати о судьбі лемков по польской стороні.

Школы, издание газет были перебраны тыми людьми, якы причинилися к всьому тому, штобы лемков задусити по обох сторонах пекельной границы. К народу в села не была допущена ани маленька новость о том, што по другой стороні границы полякы выгнали насильно и розогнали их братов. Во школі, ци єй провадили русскы, словацкы, ци украинскы учители, все робилося, робится и теперь так, штобы лемков задусити окончательно. Фабрикация лемков на Пряшевщині на украинцов велася и ведеся и теперь с цілом силом. Трудно и теперь получити даяку веселу новость за нашых людей с краю, бо руснацко-лемковского имени там встыдаются, то створили нове национальне имя, а то имя украинске. В Чехословакии и в Польші лем на тото чекали, бо при старом имени, при русинском имени не так легко бы было русинов вынародовити. Старе русинске имя не єст ненавистне ни в Польші, ни в Чехословакии. Но тоту ненависть к тому имени принесли люде, якы тут приходили перше и приходят и теперь, котры утікали от свого народа, за грошы чужых держав служили врагам русинов-лемков, штобы их поділити на маленькы группочкы, а так их совсім вынародовити до посліднього.

В Народной Польші лемковскы учены лемкы не пішли на помочь спасению свого народа. Учены лемкы в Польші пополячилися далеко перше, як ополячился даякий там лемко зо села без всякой выстой школы. Пару лем лемков в Польщі осталися, якы мают высше образование, што проявляют тут и там даяке народне житья, но и тоты лемкы боятся того, штобы там на другой стороні, або в Америкі о них дуже ани не вспоминали их братья, бо в Народной Польші переслідуют людей лемковского происхождения, або може и так уж не переслідуют, но нашы лемкы сут боязливы и не хотят за своє постояти. То єст смутна история, але зато правдива история.

На Пряшевщині тоже єст масса ученых лемков. Як посмотріте на них, то самый “доктор”, “профессор”, або и доктор и профессор, а газету або даяку книжку не можут выдати на родной бесіді. Пишут ріжно: по русскы, по украинскы, по словацкы, по чешскы, та даже по английскы або по німецкы, лем нияк не можут писати по свому. Так нас лемков Господь Бог покарал, што отобрал любовь у нашой интеллигенции к свому народу и призначил нас лемков на вынародовление. Но може оно аж так зле ніт, може то єст лем така пробка, ци меже лемками, як в Польші, так в Чехословакии найдутся люде, передовы люде, котры бы повели наш народ вперед. Може Бог приверне любовь нашой интеллигенции и она начне жити житьом свого народа, бо до того часу она тым житьом не жила.

Лемкы в Совітском Союзі тоже жиют житьом украинскым и русскым. Хоц як они бы хотіли вернутися назад в Карпаты, то не можут, бо єдно, же их не пустят, друге они там ишли “добровольно”. Єсли бы Совітский Союз мал таку свободу у себе дома, як мы маме тут в Америкі, то ищы бы помог тым лемкам, котры хотят вернутися на Лемковину, бо тым бы на дальшы столітня задержалася русска и украинска национальность тут на нашых землях. Но в той справі лемкови никто помочы не хоче. Всі три державы, то-ест, Совітска Украина, Польша и Чехословакия рішили єдноголосно вынищити лемков, яко русске. лемковске племя в Карпатах.

К тому всьому лемков поділили на ріжных: сут лемкы русскы, сут украинскы, сут польскы, сут словацкы, сут, може быти, и мадьярскы, то они всі разом, замість объєдинитися в єдну силу для того лем, штобы помочы лемкам вернутися назад на Лемковину, кажда тота группа начала отгравати таку ролю, яка єй лучше подавалася, або была выгодна для даякой другой группы народа або и даякой державы. Мы не раз писали в нашой газеті “Карпатска Русь” и в нашых календарях и в другой литературі Лемко-Союза, што найсчастлившы лемкы бы были тогды всі разом, як бы не звертали увагу ни на национальности, ни на языкы, а жебы в том ділі всі объєдинилися, як єден человік и запротестовали перед світом в обороні свого народа. Нашы желания не цілком прогали даром. В Америку в Канаді, в Совітском Союзі и во всіх краинах, где жиют лемкы, приходят к той мысли, што имена и назвы треба отложити на сторону, а треба спасати сам народ. Найважнійше єст, штобы нашы люде верталися массово на Лемковину и там жебы творили собі таке житья, яке они собі сами хотят створити. В Америкі приходит к тому, што лемкы, як бы они не называлися, отчули головну потребу, а то єст объєдинение нашой мысли в том, штобы помагати всіма силами нашым лемкам вертатися назад на Лемковину. То не лем треба помагати, але треба всіми силами объясняти каждому лемку, найперше лем тоту єдну задачу, а то єст вернение нашого народа на Лемковину. Лемкы, хоц то помалы приходит, подают собі рукы и полностью згаджаются на том, што нам треба всім лем дбати найперше за тото, штобы лемкы жили на Лемковині, бо без того не може быти Лемковины, як территории, заселеной лемками.

В том календарі мы не мусиме уж заберати много місця, як редакторы того календаря, штобы тото высвітлити, бо читатель календаря, по перший раз в истории лемков, послі нх выселения из Лемковины увидит, што лемкы воскресают, стают на свои ногы и идут сміло вперед. Много ученых лемков взяло собі судьбу свого народа близко к сердцу и постановили працувати над тым, штобы мы стали єдной мысил в цілом світі.

Много місця взяли в том календарі два нашы лемкы из Совітского Союза, а то Василь Хомик и Нестор Жилич. Мы сердечно витаме их обох в рядах лемков, якы борются открыто, сміло за существование не лем лемков, але за существование нашой Лемковины, по новому. Лемкы, єсли оставити их на Лемковині, то они дадут собі рады со всім: не робит ріжницы, яка там власть буде, або яка народна господарка буде, они потрафлят организованно выйти зо всього. Лемкы доказали тото теперь уж послі Другой Світовой Войны. Мимо того, што они были розбиты по цілому світу, лемкы организовано показали світу, што они жиют и хотят жити на Лемковині. Лемкы в Совітском Союзі на Украині показали и доказали, што они сут способны до всякого житья, яке их окружат. Совітскы люде дуже хвалят лемков, што лем кіл сут способны, даже выимково способны, до всякой наукы. Біда лем єдна, што лемкы сут вірны Совітскому Союзу, Совітской Украині, но Совітска Украина не дала лемкам тото, што єст для душы и мозга, для сердця и житья — найбольше лемкам потребне. Для лемка єст потребна народна лемковска школа, своє письмо, своя газета, своя книжка и сохранение своих лемковскых обычайов и традиций. Но и при такых условиях лемкы в Совітском Союзі потрафили зробити много, хоц бы прочитати роботу Василя Хомика, який пише за свою родну Лемковину. А як лемкы думают за свои горы Карпаты, за свои Бескиды, за Лемковину, то треба каждому читателю того календаря прочитати поему “Карпатскы Думкы” Нестора Жилича. Радуєся наше серде, дуже радуєся, што мы о собі не знали, а мы встрітилися в том нашом календарі з Нестором Жиличом. Велика слава поету от свого поневоленного народа! Нашы будучы поколіния, где бы они не были, будут соберати всьо тото, што написал Нестор Жилич, а в нашых селах на Лемковині наша мучительна земля поклонится свому поету и буде його звати к собі, як то он тоту мысель выразил в своих поетичных мыслях. Каждый лемко, який прочитат його поему, то хоц бы с каменя было побудуване його сердце, отчує якуси потребу поспішити с помочом Нестору Жиличу достатися на свою Лемковину... Мы в нашой редакции зробиме всьо возможне, штобы пустити во світ його свободны мысли, його тугу, його любовь к свому народу и свому краю.



Lviv71
ВО ЛЬВОВІ В 1970 РОКУ: Американскы туристы между своими краянами и учеными. С ліва на право: Анна Кобан из Флориды, США, пок. д-р Ваврик, (не знаме имя третьей з ряду), Корнелий Гавришков, Силия Громадзка из Масс., США, и послідный, в білом капелюху, Нестор Жилич, наш поет.


Сердечно поздравляме обох нашы хлемков — Василя Хомика и Нестора Жилича за то, што они отважилися и сут способны говорити світу в очы за нашу знищену землю Лемковину, и за єй отбудову в будучности.

Як зме высше сказали, што шыроко нам от редакции не треба уж росписуватися. Нашы призывы в прошлом нам принєсли велику несподіванку, бо на них откликнулися лемкы из всіх сторон світа, где днеска лемкы жиют. Наш тяжкий труд при газеті “Карпатской Руси” увінчался тым, што нашы лемкы читают тоту газету в цілом світі. Не робит ріжницы, же русскы и украинскы коммунисты в Совітском Союзі, а польскы католицкы коммунисты в Польщі, не допускают нашу газету в их державы. Они єй не допускают, але нашы лемкы там єй читают. Такой силы уж ніт, котра бы могла задержати свободне слово из свободной краины к своим братьям в цілом світі. Наша Америка принимат в себе всю коммунистичну литературу, бо тота краина, США, хоче, штобы єй граждане знали, што пишут и чым жиют люде во всіх краинах світа, а к тому и в краинах коммунистичных. И хоц бы наша краина Америка хотіла днеска не допускати даяку литературу к собі, то напевно она бы тайным способом проникала к нам. Но такой литературы во світі ніт, котрой бы Америка боялася. Свободного слова боятся лем тоты люде, у котрых ніт свободы печатного слова.

Мы призываме нашых лемков, ци они себе чуют украинцами, карпатороссами, русскыми, русинами або другыми, абы теперь звернули увагу лем на єдно: на поворот лемков на Лемковину и помочь тым, котры повертаются. Тоты, котры повернулися, або повернутся в близкой будучности, будут в истории записаны, як нашы герои, спасители нашой земли.

Лемкы! Вставайте в ряды! Най вас не ділит национальность и национальны назвы! Теперь треба нам всім працувати за отновление Лемковины, за отновление житья в родном краю Лемковині. Пересылайте нашу газету, календари и другу литературу родным в краю! Бунтуйтеся сами и бунтуйте душу в нашом народі! Не вірте в то, што нас дакто вынародовит. Єсли мы сами себе не вынародовиме, то никто другий нас не вынародовит! Организуйтеся, душевны бунтовщикы нашого народа в першы ряды! За вами пойде наш народ. Час єст уж великий. Всіми способами перти вперед за существование лемков и Лемковины!

Памятайме єдно, братья и сестры, што ани словакы, ани поляны, ани даже найблизшы братья украинцы и великоруссы нас не задусят, як ся объєдиниме в єдну збунтованну душевно организацию за побіду нашого многострадального народа лемков!

Вперед, братья, за лидерством “Карпатской Руси!” Вперед за Хомиком и Жиличом! Вперед за родну землю, кровью обляту и знищену! Вперед за житья! Бунтуйся, брате мой, бо без душевного бунта не можеш выбороти свободы для себе и для своих будучых поколіний! Вперед, брате лемку!


Бунтовщик душы лемковского народа —
Стефан Мих. КИЧУРА

——————o——————


[BACK]