Письмо Из Чехословакии — Юрий Явиляк

Многоуважаємий Стефан Михайлович!

Не знам, ци Вы памятате мене зо свидницкой встрічы, ци ніт. Но Вы с першого моменту, послі короткой бесіды, стали дуже близкым мойому сердцю. Я часто вспоминам Вас и жычу Вам доброго здоровля и много успіхов на народной ниві.

Мы внимательно чытаме Вашы статі в газеті “Карпатска Русь”, котра наконец то правильно доходит до нас. Робите велику услугу нам, руснакам, што печатате статі, котрими защыщате нашы народны діла.

У нас ище не скончылася борба з реакциом, котра в 1968 р. запустила корені. Подкупом заманены люде в так наз. унию продолжают страшыти честных людей побоями, кєд не будут униятами, провокуют их к гадкам, котры звычайно кончаются битком. Просто встыдно за такы поступкы. Католикы розбили руснаків, котры до 1968 року жыли спокойно, помагали собі при всякой роботі, и тепер бются меже собом. Та ци то не ганьба?

Посылам Вам газету “Нове жытя”, в котрой поміщена статя “Коли крестом люде бются”. Чытателю не трудно установити, на чыйой стороні правда. И такы беззакония совершаются под ведением водителей так наз. униатского движения!

Дорогий Стефан Михайлович! Поможте нам роскрывати виновников нашого народного нещещя, печатайте в газеті “Карпатска Русь” статі, котры достаєте од нас, такы, як “Як насаджали унию в 1968 р. в Цейкові”, “Церковна иерархия розшырят пространство”, “Жала”, “Последствия событий 1968 р.” и др. и посылайте газету на Пряшевщину. Вашы заслугы не будут забыты в нас.

“Спекуляция Ватикану вокруг екуменизма”, “Ватиканский екуменизм на практыкі” и др., котры появилися в газеті “К. Русь”, многым людям одкрыли очы и они стали освобождатися од шкодливого влияния зо стороны купленых за ватиканскы грошы агитаторов и провокаторов. Такы статі з великым воодушевлением чытают в нас люде.

Чытателі газеты “Карпатска Русь” должны знати, што в нашом случаю не иде річ о религии, но о политикі. Католикы и так наз. греко-католикы православных лем комунистами называют, а комунисты не признают их своими, так што православны зо всіх сторон биты, а все иіды тримаются. Сила их в том, што обороняют правду и справедливость.

Сердечно позодоровлям Вас и всю редакцию газеты “Карпатска Русь” и од душы жычу Вам доброго здоровля, щещя в особистом жытю и много успіхов в Вашой роботі на народной ниві.


С почтением

Юрий Явиляк



[BACK]