Велика Кривда — Любомир Камянский

Малым хлопцем читал я в книжках Общества им. Михаила Качковского, што полякы и мадьяры — малы народы, але хотіли бы быти великыми. Та на ганьбу! Не можут нияк стати великнами по причині свойой национальной слабости и низкого уровня культуры. Зато и бісятся, зато знущаются над слабшыми от себе, особливо над русинами, часто — густо сами собі на шкоду.

Штобы не быти голословными, наведеме даякы историчны факты. Гнобленье шляхтом Русинов допровадило до всенародной козацкой мести, до кровопролитных битв и наконец до розвалу Польшы. Завдяки великым державам воскресша Польша Пилсудского пошла шляхом шовинизма, дискриминации и терора против русского меньшинства. Панам не подабатся Русско-лемковска республика. Они арештуют и судят Д-ра Ярослава Качмарчика, свящ. Дмитрия Хиляка и селянина Николая Громосяка, як зачинщиков против польской власти. Польске ярмо, польскы пацификации, езуитска ненависть до Руси, віры, бесіды в продолжению 20 літ закончилася полным провалом под ударом німецкого оружия в двох днях.

Великий вклад в борьбу против лютого наіздника-германца внесли Русины-лемкы. В их рядах глядал обороны и помочы нынішный секретарь коммунистичной польской партии Владислав Гомулка. Нарешті побідила русска сила, завдяки якой знова повстала Польша. И што же случилося? На основі ложных и злоумышленных заключений относно убійства ген. Сверчевского польске солдатство допустилося нечуваного злочину: за єдну ночь выкинуло автохтонов Русинов из их одвічных осель Б Карпатах. Стон, плач, рыданье, лямент, отчаяние не поддаются описнию людскыми словами. Зроблено то зато, штобы Русь знищити до тла.

На том, єднак, не конец!

Знаючи, што Русин-лемко от природы твердый, кріпкий, неподатливый, польскы политикы, психологы и езуиты постановили роспорошити лемковске племя по цілой Польші и лишити його житья в компактной (в єдной) массі, просто, знивечити його звычаи, обычаи, бесіду, віру и всю культуру. Коли дакто бере в оборону лемков, то державны польскы мужы заявляют: у нас зараз єднолитна Польша, Русинов-лемков у нас ніт, они всі выіхали до России...

Мылитеся, панове!

У нас ищы много залишилося Русинов-лемков. Вы за них отповісте, куды их поділи, што з ними зробили. Але подме дальше. Што творится на нашой Лемковині гнеска? В той справі найліпше буде, як отдаме голос самым польскым писателям, котры пустили в світ книгу “Верхы”, выдавництво органу Польского туристично-краєзнавчого Товариства за 1966 год, том 73, Выданья 35 (Краков, 1967). Про Лемковску Русь ни слова! Русскы Бескиды переименованы на Бещады. Місцевости, якы были ключом и где кипіло житье, гнеска покрыты краяками, парийом, пусты, біле пятно в центрі Европы. Вильгельм Девбицкдий в статьи п. з. “Проблема заселения и загосподарования Бескидов” в журналі на 200-203 сторонках меже иншым пише:

“В 20-й остатніх роках Польшы людовой загадка загосподарювания Бескидов не сходит з темы дня Воєводской Рады Народовой. Тота тема переросла в загальну державну справу. Не дивлячися на неєдноразовы постановы и пропозиции Комитету Економичного при Раді Министров, поліпшинья нема. Не помагают специальны постановы, грошевы заохочения для осадников; планове и непланове заселенье терпит крах (на Лемковині), пропадают выділены квоты грошей”.

Дальше автор жалуєся, што Бескиды — одинока вылюднена краина в Європі. З огляду на неможливость их заселенья, он радит перетворити тоты дикы пусткы Бескидов на туристичный край.

На 125-ой стороні “Верхов” поміщено єст фото зруйнованой церкви з надписом: “Старе хилится к смерти”. 3 автором фото Пульцем мы цілковито згодны: руком солдата нищится старина Русинов-лемков на святой лемковской земли, яка под пануваньем Польшы стала пустыньом с кряками и тернином.

На 216-й стороні журнала Ю. Анд звертат увагу на забыткову церковь в с. Жолобок. Тоту памятку лісництво перетворило в магазин настнья лісных дерев, што сильно не подабатся туристам. Тому лем автор поучат уряд замкнути церковь, то-єст ликвидувати совоім.

Коментар излишен! Але дальше Анд остановлятся на церковных образах. В січню місяню 1963 р. были покараны судом от 1-2 роков тюрьмы або от 6-16 тысяч злотых кары 5 злодійов за крадеж икон. Меже злодіями были студенты. Жаль, што автор не подає, што то за иконы, где они были украдены? Нам ясно, што тота крадеж єст єдным из способов грабежа культурных святынь и безцінных скарбов Лемковской Руси.

Наконец достойна особливого подиву статья Адама Чарновского на 295-297 сторонах “Верхов”. Говорячи за будову музея для старинных памяток в Сяноку, он хитро-мудро и солоденько подходит до справы: робится добрым приятельом лемков, проливат кроводилячы слезы над гибелью лемковскых памяток и радит: вшыткы церкви розвалити, розобрати, и уламкы здати в музей, штобы спасти культурны памяткы...

Ціль автора ясна. Он хоче отразу убити двох зайцов: 1) приспішити загладу культурных памятников на Лемковской Руси, 2) засліпити очы лемков, говорячы: Смотте, лемкы, якы мы полякы культурны и добры для вас як близко береме до сердца вашы святыні и складаме до музею, жебы не пропали...

Знаме вашы паньскы наміры! Хочете приспішити полне вынищение слідов русскости в Карпатах; хочете убити всьо, што лем пахне Русью, всі храмы, всі кладбища, всі кресты, всі иконы, всі надгробны плыты, всю культуру Руси, міста, села, народ, віру його, бесіду, звычаи и обычаи.

Лем не ликуйте занадто, панове! Велика кривда, яку вы задаєте Русинам-лемкам, отобьется на вас самых!! Вчаснійше, ци позднійше вы за тоту безчеловічну кривду горько заплатите! Нас в музей не зложите, а сами завалитеся в пропасть, як ищы николи ниякы панове польскы не завалилися!

А теперь пару слов до Вас, братья Лемкы!

На нашм очах запропащуєся наша отчизна, наша Лемковина, наша Карпатска Русь. Мы свідками страшной трагедии и горя, яке переживат наш народ!

Деспоты вынародовляют його от дітинства, убивают нашу культуру и всьо, што нагадує Русь, всьо, што придбали нашы няньове, дідове и заклинали нас словами и слезами не отдати врагам ани пяди земли!

Памятайме, што история и потомкы не простят нам нашой байдужности, што мы дозволили похоронити Русь в Карпатах, нашу святу, многострадальну Лемковину!

Братья Русины-лемкы! Не час нам молчати! Всіми голосами повинны мы кричати на весь світ про тоту страшну кривду и несправедливость, запричинену нам Русинам-лемкам на Бескидах в Карпатах. Мы тоже люде! Ци допустиме таке злодійство в 20-м столітию, в рокы атомной епохы?! Всіми способами и силами стараймеся повалити драконский закон заграбников нашой земли, што заборонят нашым братям и сестрам повертатися до свойой хыжы, до свого села, на землю отцов, дідов-прадідов,

Станме разом, кличме єден другого до обороны свойой отчизны, до обороны своих прав!


Любомир Камянский (Лемко от Крыниці).

* * *


[BACK]