Вышовадка, Ясельский Повіт На Лемковині — И. Ч.

Неє хибаль на той земли красшого природно положеного краю, як наша любима, лагодно гірска зелена карпатска Лемковина, колыбель нашой прадідной лемковской культуры. Прекрасны даколи во свойом стилю лемковскы селечка, днеска уж сут лем вспомніньом перешлости.

Посмотме лем на єден маленький фрагмент лемковской красоты. То лем фрагмент барз докладной и трафной выобразні типового лемковского селечка Вышовадкы в лемковском краю зеленых Карпат, котрый одтворил наподставі опису наш лемковский талант, природный, артист, бывший головный Редактор “К. Р.” Николай А. Цисляк.

Вышовадка село положене в лагідных горах низкого Бескида на Лемковині помеже горами Коповянец, Гырча и Коляшин, в лагідно гірскых долинах помеже сусідныма селами Грабом, Довгым, Радоцином и Ростайнами в поблизку Чехословацкой границы.

Хоц село Вышовадка не было в собі так велике, бо лем нараховувало 55 хиж, то єднак при твердом лемковском характері газдов села, была ту в красном свойом лемковском стилю православна церковця под покровом Всіх Святых. Церковь была збудувана коротко перед 2-гом: Світовом войном в 1935 р., а головным єй будовничым был родвый брат извістного лемковского патриота и предсідателя Кливландского отділа Лемко-Союза ч. 6 Осифа Дзямбы — Михаил Дзямба.

Было ту так само добрі зорганизоване кулко рольниче и як звычайно по лемковскых селах — жидовска корчма. С того села найбольше походят Коскы, Дзямбы, Павелчакы и Кимчакы. Село Вышовадка положене єст над маленьком річком Рыяк, котра впадат до Вислока. Хижы розміщены по обох боках річкы Рыяк, переплетены кількома гірскыма поточками, выружнялося тым, што праві каждый газда мал свой маленький сад овочевый.

Село Вышовадка было типово рольниче, як подобно и другы села лемковскы. Была ту так само сельска школа, в котрой до войны был изучаный наш материнский язык.

То лем короткий опис села, котре собі заслугує для нашого Лемко-Союза на специальну увагу, бо с того села походит наш великий лемковский патриот и любитель свого народа — предсідатель Кливландского отділа Л. С. ч. 6 Осиф Дзямба и його супруга Текля, котра так само єст теперь по утраті Акилі Барна — предсідательком женского отділа ч. 1 в Кливланд, О. и єст любительком вшыткого, што лемковске.

Кто бы хотіл мати в себе во свойом домі на памятку фото-карточку з лемковского села Вышовадка, Ясельского повіта, на Лемковині, може купити собі в нашой редакции, бо предсідатель Осиф Дзямба жертвовал нашой редакции 1000 тых фото-карточок. Ціна 1 посткарткы лем 25ц., а за 5 карточк лем 1 доллар. Вшиток вырученый доход с продажы посткарткы піде в пользу пресс-фонда нашой газеты “К. Р.”, Так само можна купити посткарточкы в Лемко-Парку, бо и там Осиф Дзямба, лемковокий дятель на народном полю, залишил другу тысячу посткарток. Головне Правление и Редакция “К. Р.” выражат Осифу Дзямбі высоку благодарность и жичит йому дальшых успіхов в народной роботі.


Долголітный приятель родины Дзямбів — И. Ч.


Wyszowadka

Загальний видок, на село Вышовадку, пов. Ясло на Лемковині. Видок тот намалювал Николай Цисляк на подставі оповіданя Йосифа и Теклі Дзямба — вышовадчанів.


[BACK]