Lishchina

Старинне село Ліщины, Горлипкого повіту на Лемковині, положене в горской околици лемковскых Карпат, помеже горами Щобы од полночы, лосянский Верх, и кунківской Копы од заходу и од всходу в поближу стратегичного пункту в Карпатах, знаной горы Магуры. Село Ліщины в докладнійшом описі положене єст над маленьком горском річком, званом Присвопянка, котра свій початок має з под горы Магуры в селі Прислоп а переплывал што раз то большым струмиком по камінно-скалистом корыті през села Новиця, Ліщины и Кункова, где впадат до рікы Ропа помеже Дівами, коло села Клемковка.

Село Ліщины граничыт з селами: Рыхвалд и Білянка од полночы. Лосе од полночного заходу, Кунковы од заходу, а зо всходу граничыт зо селом Новиця. Село Ліщины положене єст переважно по правой стороні річкы Присвспянкы, за вьшятком нижнього конца, котрый положоный єст по правой стороні рікы. Ціле село было поділене на 16 ріль, з котрых важнійшы были: Цапівка, Адзимівка, Чергонівка, Яцківка и Корбівка. Село Ліщины мало свою прекрасну во свойом стилю парафияльну церков обряду греко-католицкого (унияцку) под покровом св. евангелисты Лукы, котра была збудована в 1835 р.

Не можна поминути, што храм тот был збудованый зо щыпаного на половину, а пізніше тесаного дерева, где были биты деревяны кілкы заміст цвяков, а одзначалася тым, што был ту выконаный в прекрасном легком стилю иконостас, котрый по днеска звертат увагу на себе свойом артистичном красотом и интересном різбом в дереві в виді звішающых виногрон над царскыма дверми. Дуже знавцов стверджат, што была то єдна з найкрасшых церквей в середині — на цілой Лемковині. На прекрасном стильовом великом престолі стоял чудово артистично выконаный з дерева кивот, котрый до днеска зарахуваний єст през знавцов штукы сакральной до артизму найвысшого уровня. По лівой стороні стоит прекрасный стильовый для нашого обряду бочный престол, на котром в глубині в великой повазі красуєся Матер Божа неустаюча помочи. При том престолі в місяци маю одправлялися маівкы до Матери Божой о ласкы для села, о добрый урожай в селі и благословеньство для лемковского хотара.


StLukes Church

Церков под им. Св. Ев. Лукы в селі Ліщины.

Як уж высше вспомнено, церков была парафияльна, обряду всходнього греко-католицкого, до котрой належали села: Білянка и Кункова, хоц и втых обох селах были церквы.

Неможливым дотыхчас усталити на подставі літописов и архиву церковного од чого село прибрало собі назву Ліщины, но як выглядат з простого розумования, без жадной дискуссии можна приняти, што в той части Карпат, а ближе окреслити околицы было барз дуже лісковых оріхов, котры як знаме родятся на ліщині и правдоподобно село Ліщины завдячат свою красну назву тому прекрасному деревцу — ліщині.

3 устных подань жытелей села Ліщин выходит так, што село Ліщины датує свой початок ище перед XIV столітием. Около 1600 р. на подставі літописов было ту уж около 15 фамелий, бо о том свідчат ролі села, на якы было поділене в том часі.

Од тых роль прибераны были назвиска родин, як Корбы од Корбівкы, Ядкы од Яцківкы, Карпякы од Карпяківкы, Чергонякы од Чергоняківкы, Адзимы од Адзимівкы и так дальше. Дакотры роды уж цілковито выгасли, лем позостали назвы роль их имен, як наприклад Яцкы, по котрых уж давно выгас слід.

Як кажде село на Лемковині, так и село Ліщины переходило свои веселы и трагичны часы. Панувала ту страшна хворота, звана холєром, котра здавалося замкне историю села Ліщин и зотре го з малы Лемковины и Карпат, но пришли ліпшы часы и село оджыло новым, хоц тяжкым жытьом и розвивалося з року на рок, так што перед другом світовом войном нараховувало уж около 110 фамелий.

Яко довод страшной катастрофы села сут два цментариска, на котрых ховано селян, котры умерали на тоту страшну в том часі хвороту, называну холером. Єден цментар стоит до днеска на Лосянках на горі од села Лосє, а друтый цментар над луками над церквом, но а найновший, хоц и тот єст уж барз старый, єст коло самой церкви.

Село Ліщины было положене в долині помеже горами, на котре барз гардый видок был з Лосянок, бо было в большинстві крыте бляхом, часто купленом през родины, котры выемигровади до Америкы. Были так само хыжы под гонтами, а найновшы под дахівком, што разом надавало красоту села.

Село Ліщины было типово рольниче з выпасам рогачей худобы. Не можна поминути, штобы не зазначыти, што сел о обок рольництва и выпасу худобы, занималося гандльом деревяным товаром, а частично и самым выробом точеных предметов, як веретена, грибкы до цируваня поньчох, ріжного роду товчков до дзямліня компери, ріжного рода вішав(?) на убраня, правд до боденок и другых артистичных предметов. Тот типовый характер села Ліщин заховался до днеска, хоц єст он уж больше змодернізованый, як даколи в примитивном передвоєнном часі.

Была ту и єст надальше сельска школа дост в добром стані, котра была збудувана коротко перед війном в 1935 р., переважно за жертвы собраны Иваном Чергоняк Ст. в Америк! од єдносельчан. Не можна оминути, щто до войны, был ту изучаный, хоц лом частично наш материнский язык. Были то барз тяжкы условия под кєровництвом школьным Леопольда Бировца (поляка), котрый яко передвоєнный польский нациста ненавиділ милозвучного нашого материнского языка. Часто доходило до сварок, а и биткы меже тым паном Леопольдом, а нашыма защитниками, як Зином Обшарском — родном сестром Петра Корбы, котра нераз ужыла млинчівкы и міряла кошелю на плечах п. Леополда.

Из устных оповіданий выходит, што в розвитию села дуже причынился отоц духовный Йосиф Банидкий, котрый походил зѳ села Долины на Лемковині. За його побыту и церковного предсідательства Ивана Чергоняка ищы довго перед першом світовом войном, бо в 1910 року, была помалювана в чудово добраном стилю церков, и началася организовати приватна початкова школа, котра была проваджена през церковных дяков. Так само в 1912 р. церков была покрыта бляхом за предсідателя церковного Петра Корбы, котрый згынул на першой світовой войні.

То лем в великой короткости опис села Ліщин, котре заслугує собі в днешньом часі на специальну увагу, завдякы твердому Лемковскому характеру, бо до того села праві же найбольше повернуло фамелий (около 35) з выгнаня, штобы надальше по той “другой тяжкой хвороті — холєрі”, яка навиділа цілу нашу Лемковину в 1947 р. привернути давный характер села. Початкы уж сут добры, бо завдякы Ивану Чергоняку Ст, з Джерзи Сити задзвонил зас дзвон з дзвонниці старинной церкви, котрый Иван Чергоняк закупил сам собственно в памят свойой упокоившойся жены Теклі з думком, што голос того дзвона возве його єдносельчан села Ліщины не лем ку защиту того старинного лемковского села, але возве их, як и пробудит дакотрых з глубокого сну ку защиту цілой нашой Лемковины, єй прадідной культуры, котру их прадіды им передали в рукы и казали твердо тримати з увірением, щто приде колисий справедливость для нашого народа и нашой прекрасной Лемковины, бо о то просили их прадіды, діды, отцы, а и они сами покровительку старинного престолу ліщинской старинной церковці. Так само под предсідательством по поправці церкви ту в Америці П. Корбы з Юнкеру Н. Й. собрано около 1.700.00 долл. на поправку ліщинской церкви и иментаря. Особы, котры найбольше интересовалися сбором были слідуючы: П. Корба, Михаил Чергоняк, Мария Корба, Пантелимон Крилівский и Ваньо Станчак. Тота искра любви єдносельчан Ліщин най буде добрым прикладом для другых сел Лемковины, котры напевно потребуют такой помочы од нас лемков — американов зо Святой Землі Вашингтона.


Ліщинян з Чергонівкы



[BACK]