До Истории Лемко-Союза в США и Канаді в 40-Літие Його Существовани — Василий Вархоляк
(Спомнны долголітнього члена, организатора и два разы предс. Л. С.)


В 1929 року, коли Димитрий Вислоцкий приіхал до Америкы из Канады, то он начал выдавати газету “Лемко”. В той роботі йому помагал, гнес уже покойный, Стефан Шкымба. Но выдавати газету єдному редактору было дуже тяжко, бо треба на выдание газеты средства, треба штобы газету чытали нашы люде. А нашых людей дуже тяжко зорганизовати, штобы чытали газету або брошуры и книжечкы выдаваны человіком, котрый може писати газету або брошуры, котры интересно написаны для нашого народа. Бо нихто не хоче платити за литературу, котра єст полезна и поучытельна и потребна для просвіты нашого народа.


Dimitro Vislotsky
Дмитро Вислоцкий або Ваньо Гунянка, бывший редактор газ. “Лемко” и “Карпатска Русь”.

Покойный Стефан Шкымба в тот час начал организовати Лемковске весіля и выпущати рекорды, длятого треба было людей, котры бы наспівали на тоты рекорды, то Стефан Шкымба начал робити пробы в себе дома, бо у него не было жадного клуба, где бы можна собератися на пробы співу. То в тот час Стефан Шкымба зачал просити представителей, котры были представителями даякого клуба або церкви и мали звяз из нашым народом. До той роботы он запросил собі покойного Михаила Дужого из Клифтон, Н. Дж., Стефана Геренчака из Джерзи Сити. Тоже просил мене, штобы я йому помагал, но и Прокопа Гончака, псаломщика, котрый помагал йому организовати співаков, котры наспівали рекорды и одограли Весіля, котре Михаил Дужий фотографувал.

Перший фильм “Лемковске весіля” был знятый Михаилом Дужим на фармі Геряка в Стемфорд, Конн. До той роботы Стефан Шкымба запросил Димитрия Вислолкого, штобы он писал и реклямувал тото весіля в газеті “Лемко”. Димитрий Вислоцкий согласился из Шкымбом и начал йому помагати в той роботі. Начал приходити на пробы и писати в газеті “Лемко”.

Єдного разу Шкимба нанял боса из Бруклина и мы поіхали до Стемфорд знимати фильму. Я сиділ разом из Д. Вислоцким и подал йому план, як можна организовати нашых лемко в тут в Америці и што мы румали робити ище в 1921 року. А то было так:

Я поіхал до Клевеланд, Огайо на похорон мого стрыка Ивана Вархоляк, то нашы лемкы в Клевеланд, Огайо мні подали плян, штобы мы перенесли нашу роботу из Нью Йорку до Клевеланду, бо там богато нашых людей, переважно лемков, жыє, мают много богатых людей-бизнесменов, велике братство взаимопомочы, мают богату церков, то робота піде дуже легко, але для той роботы треба спровадити из Старого Краю нашого студейта Василя Колдру, того самого, котрый был судженый авсстрийскым правительством за патриотизм, И тоже треба спровадити протоиерея Капанадзе, котрый организувал Велику парафию в Клевеланд. Длятого был организованый специальный Комитет, але ничого с того не вышло, бо у нас в Нью Йорку была издательске общество, котре начало печатати газету, выдавати книжны, то треба было печатню перевезти до Клевеланду, але на тото треба было грошей, штобы купити печатны машыны, бо Комитет, котрый был выбраный в Клевеланд, не собрал надост грошей, потому ціль тота не была зреализувана. Было собрано грошей 200 долл, на шыфкарту и Шыфката была выслана, но Колдра шыфкарту звернул назад до Америкы и одказался приіхати. С того поводу мы не могли то ту роботу, начати в 1921 року.

Я предложил Д. Вислоцкому, штобы начати организувати отділы до Лемко-Союза, бо он сам на свою руку из Шкымбом ничого не зробит, а у ас уже єст своя типография в Нью Йорку, то можеме начати тоту роботу разом, бо печатня єст, лем треба перебрати маєток на организацию и начати роботу на шыроку скалю, Д. Вислоцкий выслухал моє предложение и ничого не сказал, же то можна або не можна зробити.

Через тиждень, послі того, Д. Вислоцкий нашолся в Клевеланд, Огайо и начал организовати Лемко-Союз в Клевеланд и там выбрал чартер на нашу организацию для цілой Америки и Канады. И так, як я йому сбвітоівал, так он и зробил, но то, што у нас было готове печатня и газета, то он не принял. Зачал всьо по свойому. В Клевеланд отділ зорганизовал сильный, так як я йому говорил. Всьо ся му удало, але то не потревало долго, бо ся посварили из попом и членами, котры йому помагали организовати отділ.

За тот час мы ту в Нью Йорку организовали сильный отділ мужеский и женский, то Д. Вислоцкий виділ, же там в Огайо його плян ся провалил и в тот час знову звернулся до мене, штобы я нашол поміщение, што треба печатню перевезти до Нью Йорку. Я ся згодил на то и печатня была перевезена до Нью Йорку. Мы ту в Нью Йорку и коло Нью Йорку организовали сильны отділы в Пассайку, Бруклині, Джерзи Сити, Линден, Елизабет, Ньюарк, Байонн и всього было 16 отділов в первом округі.

Потом мы начали организовати дом для типографии, бо я знал, што як буде типография и канцелярия, го и лекше для Лемко-Союза в свойом домі, бо не буде платил рент чужым людям, а тоты грошы будут идти на издательство. Але и ту я стрітился из великыми трудностями, бо совітникы Д. Вислоцкого збивали його из пути. Каждый хотіл строити по свойому плану. Не хотіли приняти мой план, построити такий дом, який єст потребный для типографии и офису редакции. Зашли великы трудности, бо Вислоцкий не вірил, же ся даст построити такий дом, бо ціль головна была Центральный Дом строити в Нью Йорку або в Пассейку, штобы люде, котры приіхают по ділах организации могли заходити до редакции посовітоватися из редактором и з Головным урядом.

Найблисшы совітникы Вислоцкого не вірили, же ся даст построити такий дом, то тоту справу всегда розбивали на Голловных Съіздах, бо ся не могли погодити, где має быти той дом будуваный. Но на конец погодилися сторити в Юнкерс, бо Юнкерскы отділы мали землю для свого отділового дома и юнкерскы отділы уже начали строити маленьку галю для свого отділа, где тепер ся находит типография и такым способом Д. Вислоцкий погодился строити Центральный Дом в Юнкерс, Н. Й.

Тот дом мы мали на мысли строити для Лемко-Союза, штобы был власностьом организации, но так як Лемко-Союз в тот час не мал грошей на постройку дома, то мы начали организовати нашы отділы Лемко-Союза. Каждый отділ Лемко-Союза мал стати членом того дома. Мы рішыли, што отділ, котрый даст членске 100 долл., то буде постоянным членом, то єст пожизненным членом або член, котрый уплатит своє членске 25 долл., тоже буде пожизненным членом и т. д.

Зашла ошыбка, бо мы выбрали чартер на Карпаторусский Американский Центер. Центральный Дом должен быти построєный под чартером Лемко-Союза, то сегодня бы мы не мали клопоту, бо цілый маєток и дом, и грошы, якы має Лемко-Союз належали бы до Лемко-Союза. Так, што Головный Съізд Лемко-Союза мог бы рішыти цілу справу издательску и маєткову Лемко-Союза. Потому, што Лемко-Союз то всьо организовал, так што и грошы, котры вложыли отділы и члены, но и чытателі газеты “Лемко” а потом “Карпатска Русь”, то всьо принадлежыт членам Л. С. и чытателям "К. Р.”

И Лемко-Парк так само организовали члены Л. С. и чытателі газеты “К. Р.”, бо они купили шеры, длятого тот цілый маєток належыт єдному народу, котрый ся называт именем Карпатороссы. Бо члены, котры ся родили по обоим сторонам Карпат, то их прадіды и отцове ся называли всегда русинами, а послі первой світовой войны объєдинилися под тым именом и рішыли объєдинится из русскым и украинскым народами.

Головна ціль Лемко-Союза было сторити народны домы и организовати культурно-просвітительны клубы, где мали быти чытальні для старшых членов и школы для нашых дітей и молодежы членов, котра ся хоче учыти чытати и писати, бо дома, где мы ся родили не было можливо ся учыти. Мадяре, чехословакы и полякы о то ся не старали, штобы нашы люде были учены. То в Чехословакии давали мадярскых, а в Австрии давали польскых и римокатолицкых агентов, котры ся старали наш народ поневолити.

Мы лемкы, в Старом Краю, 60 роков тому назад не мали свойой литературы. Вся литература приходила на нашы села из, Львова. По селах нашы люде мало чытали, бо по селах не было жадных чыталень, то газеты чытали лем священникы або дакотры грамотны вітове и церковны радны и дякы. Нашы лидеры, як священникы, так и світскы учены люде писали на малорусском языку або кириликом. Писали в таком духу, як учыли першы апостолы славянскы Кирил и Мефодий, котры переводили на славянский язык из грецкого и другых народов, с котрыма они мали общение. Они начали свою науку на Моравии и в Польші. Там,, где родилися нашы предкы, котры приняли християнство и церковну литературу, якой учыли Кирил и Мефодий. Нашы предкы жыли том науком и нашы родиче нам передали тоту науку и культуру. Мы жыли том науком, што зме толучыли од нашых ученых священников и світскых лидеров, котры получыли образование в бывшой старой Австрии.

Около 1908 и 1909 року на нашы села на Лемковині начали приходити агенты римско-німецкых целибатников, котры нагнали нашу интелигенцию и священников, котры нас учыли истории и национальной принадлежности, то тоты целибатникы зачали переслідувати нашых священников и нашу интелигенцию, зачали тровити римско-німецком отровом нашых селян. Зачали кофискувати нашу литературу и на силу посылати свою культуру. Их ціль была знищыти всю нашу литературу и нашу интелигенцию.

А коли ся начала перша світова война, то всю нашу интелигенцию зачали арештувати и всіх высылати до Талергофу.

Коли нашы першы емигранты приіхали до Америки и начали организовати свои организации церковно-народны и культурно-просвітительны клубы, но и запомоговы братства, то дуже ся не сподабало тым римско-німецкым целибатникам. Начали они тоту саму роботу шырити между нашым народом тут в Америці и Канаді. По сегодня ведут они роботу, як тут за морьом, так само и в старом краю. Хотят они всьо спаралізувати и забрати маєткы, як церковны, так и народны, а нашы лидеры того не розуміют и даются дурити на всі стороны. Лізут до тых здрадников, а на всьо своє, што сами организовали плюют и оставляют на произвол судьбы. Наше несчастье заключатся в том, што наша молодеж мішатся из тыма агентами и признают им рацию, бо не знає, што єст наше и што єст чуже для ней. Просто отдає дармо то всьо, што построили их родиче для них.

Што нам треба робити дальше? Штобы помочы тому ділу, нам треба ся всім опамятати и всім разом строити то под своим именбм, бо лем так можеме строити. То, што мы построили за остатніх 80 роков ту в Америці то замало. Нашы братя, котры ся переселили на Украину до Совітского Союза дадут собі рады, бо они тепер мают свою державу, котра ся старат дати науку всім своим гражданам, котры жыют на територии Совітского Союза. Так само наша молодеж, котра жыє на территории в Чехословакии або в Польші, то так само має можность учытися. Мы уже маме добрі вышколеных людей во Львові, Києві и в другых містах, где ся переселили нашы братя.

Я всегда вірил и тепер ище маю таку віру, же як ся всі порозумієме тут в Америці и Канаді, то буде велика сила, бо нас ту єст в Америці и Канаді понад миллион, то як бы каждый дал лем єдного доляра на рок на тоту роботу, то бы был миллион доляров и можна бы было зробити велику роботу на народном ділі.

Я призывам всіх нашых лемков в Америці и Канаді записатися в члены Лемко-Союза и запронумерувати собі газету “Карпатску Русь”, як тоже купувати календар Лемко-Союза каждый рок и купити собі Историю Лемковины, котра має быти напечатана тепер, бо то даст нам можность ближе порозумітися, што, мы за народ. В теперішньом світі ся интересуют такым народом, котрый має свою культуру и сильну организацию. Так берме ся сами за діла, бо нихто чужий нам не поможе.


Василий Вархоляк, б. организатор и гол. предс. Л. С.



[BACK]