Андрей Грабский — Стефан Кичура

В субботу 21-го сентября 1968 года вечером о 8-ой годині, по цілом місті Юнкерс, а с Юнкерс по цілой Америкі — рознеслася смутна вість о той, што в Профессиональном шпыталю в Юнкерс, Н. Й., скоропостижно, через коротку болізнь — помер Андрей Васильевич Грабский.

Тяжко было по розуміти, што могло случитися, што такий добрый, красивый душом и на подобу, человік, был примушеный попрощатися с тым радостным світом. Люде попросту не хотіли вірити тому, бо лем перед тыждньом он был в нашой редакции, был в Центрі, но на послідньом митингу Лемко-Союза отділов в Юнкерс, якого то отділа он являлся предсідательом, уж не был присутный. Но люде то не брали за дуже серйозно, бо он говорил, што має біду с хырбетом, то по той причині пошол до шпыталя для скоршой поправкы здоровья.

Пок. Андрей Грабский родился 29-го июня 1906 року, в Плимонт, Конн. Отец Василий Андреєвич Грабский и мати София, з роду Яцканич.

17-го февраля 195 он женился на Марии Горняк, с котром прожил счастливо 33 рокы.

У Грабскых родилося 4-го дітей: Павел, Василь, София и Виктория. Троє з них, а то Павел, София и Василь уж женаты, а Виктория самотна. Виктория в 1967 року окончила учительский калледж и теперь уж учит в єдной из юнкерскых школ. София робит в банку, Павел, найстарший сын, занимат высоку позицию, в Метрополитен Лайф Иншюренс Ко., а Василь покончил Университет Набраскы штату, а за тым университет права в штаті Мерланд, теперь на-днях, як пишеме тых пару слов, його имя было объявлено в газетах, як адвоката, доктора прав. Он тоже женатый.

О самом пок. Андрею В. Грабском можна бы написати дуже много, бо житья його было полне интересных дійствий и замічательностей. Характер спокойный приємный, а сам он являлся дуже интеллигентном людином. Через свой характер, через знание и свою природну подобу, Андрей Грабский был любленый и шанованыи не лем свойом фамелийом, родином, але и всіми його краянами и всіми членами Лемко-Союза, Лемко-Парку, Лемко-фильмы, парафиянами, братчиками и членами ріжных клубов, до якых он належал. А найважнійше єст и то, што Андрей являлся прогрессивным, многообчитанным человіком. Його не лем интересовало своє власне житья, або житья свойой фамелии, але он интересовался житьом цілого нашого народа и житьом прогрессивного світа. От самых наймолодшых часов он постоянно занимал уряды в организациях. Он был организатором робочой организации запомового Международного Робочого Ордена; был организатором Лемко-Союза; належал в Славянско-Американский Республиканский Клуб тут в Юнкерс; был членом парафии церкви на Симор стриті, где настоятельом являтся Митрофорный прот. Йосиф Пыштей. Андрей был за многы рокы менажером в Карпаторусском Американском Центрі в Юнкерс, был його урядником, секретарьом, и кассиром; был много раз предсідательом отділа Лемко-Союза и теперь, коли отошол от нас, он являлся предсідательом отділа Лемко-Союза. Был он тоже менажером Народного Дома, в Джерзи Сити, а в послідных роках, коли была знята фильма “Лемковске Весіля”, он отограл дуже замечательно ролю за старосту в той фильмі.

Не можна пропустити и то, што он являлся за многы рокы головным урядником Лемко-Союза, його рекордовым секретарьом, и теперь, коли отошол от нас, он являлся головным контролером Лемко-Союза.

Вы могли видіти пок. Андрея Грабского на всіх головных съіздах Лемко-Союза, на окружных съіздах, на окружных забавах; вы могли його видіти на сцені грати представления; Вы могли його чути бесідувати зо сцены до людей, откаль його бесіда неслася выразно, зрозуміло и с полном любовью к слухавшых його.

Теперь, коли всі діти його сут на своих позициях, несколько літ тому купил новенького гавза, бо ціле житья в Америкі жил лем на ренті, и всі другы справы были упорядкованы, то в такий час, коли треба было жити и тішытися свойом фамелийом и женом Мирном, Грабскйй отошол на вічный отпочинок. Память Андрею Грабском между нашым народом николи не угасне.


Стефан Мих. Кичура.

WiseMen

[BACK]