Што Нам Треба Робити? — 'Лемкорус'

Остатньо чытаме в нашой газеті “Карпатска Русь” розмаиты статьи, котрых тематика переважно навязує до нашого 25-го Головного Съізда Лемко-Союза, котрый отбудется в найблисшых днях, коли пишу тоты слова, бо уж за тыжден.

Думкы дописувателей сут розмаиты, але во всіх тых думках видиме єдны и тоты самы цілі:


а) як выйти з безнадійного стану в спарві нашой отчызны и нашого народа?

б) як объєдините всі нашы силы для добра нашого кргю, народа и нашой организации Лемко-Союз?


Думкы тоты сут добры и на часі, бо перед самым съіздом, то єст єдиным правдивым и незалежным од никого на світі “парламентом” нашого народа на емиграции, котрый яко такий може над нима дискутувати и впроваджати в житя через свою выконавчу владу, Головне Правление Л. С.

Правда, же тот наш єдиный на світі “Парламент” — Съізд Лемко-Союза не єст сильный, бо нема за собом попертя в роді полиции, войска, судов и т. п., але має попертя в народі, котрый го скликує раз на два рокы и котрый сполнят волю того народу.

Важность того события єст велика и нашы люде не лем на емиграции, але и в Польші, Чехословакии, Совітском Союзі и другы розсіяны майже по цілом світі, слідят за роботом нашых съіздов, бо лем мы ту можеме повісти собі разом тото всьо, што думаме и што хочеме зробити для нашого народа и нашого краю.

Перечитуючи всі патриотичны статьи и застанавляючися над выплываючыми з них пропозициями и внесками, я так сама хочу поділитися з нашыми делегатами на 25-ый съізд Лемко-Союза и всіма чытателями своима думками, котры може выдадутся Вам дакус заостры, але я не виджу иншого выходу.

Знаме з истории, же в протягу нашого 1000-літнього существования (бо лем за 1000 літ маме якы такы писаны факты о нашом народі в Карпатах) наш народ перешол через барз тяжку и тернисту дорогу, бо всі нас переслідували и гнобили. Переслідували нас польскы и мадярскы королі, князі, шляхта, бароны и их рицарі; переслідували нас австриякы; переслідували нас в передвоєнной Польші и Чехословакии; переслідовали нас гитлеровці и их помочникы — січовикы; переслідовали нас и дальше переслідуют повоєнны новы социалистичны державы Польша и Чехословакия. Не буду Вам, дорогы делегаты и чытателі, приводил фактов переслідований, бо хто чытат нашу газету, то тых фактов было и єст дуже, што уж не мушу их приводити, лем порушу тото, што хочу Вам коротко подати.

Мы знаме добрі, бо зме уж досвідчыли на власной скорі вшытко, што лем чловек може найгоршого досвідчыти, же уж маме дос вшыткого. И видиме, же нихто нам не хоче помочы, лем тота задача остаєся нам самым. То єст свята правда и не очекуйме уж нич од никого, лем сами штоси робме. Бо мы уж дос досвідчыли чужой помочы, котра то потом кінчылася в австрийском Талергофі, німецком Освєнцімі, в польской Березі Картуской и Явожном. Просме лем Бога и стараймеся сами всіма силами, жебы позбытися якнайскорше тых “нашых помочников и приятелей”, котрых єм вымінил повысше, а лем товдиль наш народ отдыхне свободно, бо без их опікы и помочы даме собі рады, а они при щиті свойой власти все нам одвдячатся такыма Талергофами, Осьвенцімами, Березами Картускыми и Явожнами. Они на нич инше не сут способны и лем так одплачуются слабшому од себе. Штож зробиме, кєд такий фальшивый світ...

Не зважаючи на всі кривды и терпіния, наш народ сильно прагне гнес жыти на свойой земли, котру частично стратил (часть Лемковины в Польщі) и свою свободу мусит выбороти власными руками, але найперше мусит сам объеяинитшся под єдном флагом и за єдну ціль — за свой, отцовский край!

Дахто напевно повіст мі: “Што ты хочеш ту в Америці будувати Лемкорусь або Карпаторусь?” Правда, же мы ту на емиграции не збудуєме свой край, але можеме о том сміло бесідувати и розсуджати, а нашы думкы и планы розшырятся там на родны землі и выгнаня, где тота справа мусит быти вырішена. Можеме тоже там поіхати в одповідный час, єсли будеме хотіли безпосередньо на місци помочы або можеме и обовязаны зме помагати материально той справі, а то лем робити можеме з Америкы и Канады. Знаме добрі, же не было бы ни Польшы, ни Израиля, ни многых другых держав на світі, коли бы не эмигранты тых народностей не помагали сами и своима грошами в высвободжению од окупантов и потом в розвитку економичном в часах повоєнных. И я не виджу иншого выходу, лем тоже и мы мусиме взятися за діло так як и другы народы а товдыль за пару десят, або и скорше, роков увидиме або нашы потомкы слушность (правду) того тверджения.

Лемко-Союз все пробувал розвязати якоси тоту справу, але нич с того не вышло. Наша емиграция и цілый наш народ были за тым, жебы наш край (по обох сторонах Карпат и теперішньой штучной отділяючой нас границі) присоєдинити до России або до Украины, але всьо надаремно, бо Россия и Украина, коли знищыли гитлеровцов, то не то, же не прилучыли нашых лемков-русинов до себе, але позволили полякам и чехословакам робити розмаиты досвідчения украинизации, но и найгорше, што могло быти — призералися як польскы жолдакы выганяли бідный народ з прадідной их землі. Штож вы на то братя с Києва и Москви нам одповісте?

Остатньо, як знаме з газеты, Лемко-Союз встрічался з делегатами Сов. Союза до Объєдиненых Наций, котры на тото всьо лем взрушыли плечыма, же не можут нам ничого помочы. Як то? Таж мы знаме, же Совітский Союз помагат цілому світу, где лем выбухне даяка вызволительна война, то там иде помоч. А чом то не можна помочи лемкам в их справі, котры в цілости были отданы Совітскому Союзу? Треба ту отверто повісти, же Совітский Союз може нам помочи, але не хоче. Чом так єст, то не знаме?...

Што Лемко-Союз прагнул добитися для нашого народа? Тото може выжнити резолюция выслана два рокы тому до Польского Правительства, на котру не отримал навет отповіди, што свідчыт, же не можеме веце з нима бесідувати ани просити, бо нам нич не підут на руку, лем мусиме твердо опертися о свой народ и йото непобідиму волю, а товдыль объєдинены выступити в ООН и домагатися свого.


ТЕКСТ РЕЗОЛЮЦИИ

(Резолюция была выдрукувана в языку польском, а мы єй нодаєме по нашому.)

Лемко-Союз
556 Юнкерс Евню
Юнкерс, Н. Й.

До Уряду Польской Річипосполитой Людовой в Варшаві

РЕЗОЛЮЦИЯ

Мы ниже подписаны, делегаты на 24-тый Съізд Лемко-Союза, котрый одбылся в днях: 2, 3 и 4 сентября (вересня) 1967 р. в Лемко-Парку, Монро, Н. Й., высыламе тоту резолюцию, штобы припомнути Правительству Польской Річипосполитой Людовой, котре єст одповідальне за выселение нашых братов з Лемковины в р. 1947 на Долішный Шлеск и Поморя, же минуло уж двадцет літ од хвилі примусового выгнания, а зробленой кривды не направлено до гнешнього дня. Десят літ тому Уряд ПРЛ обіцювал нам, же всьо залагодит на корысть Лемков, але як видиме и чуєме, то не много з тых обіцянок остало зреализованых (полагодженых) в минулом окресі на корысть покривдженых. То ище раз припоминаме и просиме о залагоджение справы повороту нашых братов, сестер, родителей и всіх покривдженых в роках 1944-1947 через примусове выселение, штобы тото было залагоджене по братскы, єсли Уряд ПРЛ и цілый народ польский, жычат собі братскрго всполжытия в будучности в родині словянской. В противном разі трудно буде рахувати на зрозумление, бо рана задана нашому племени, буде розшырятися и ятритися. Зас з того болю може выникнути непожаданый для обох сторон гнів, з котрого нихто не скорыстат.

Штобы залагодити повысшу справу з корыстьом для обидвох сторон, то мусят быти повзяты натыхмістовы кроны, а передовсім мают быти сполнены наступающы варункы:


1. Всі Лемкы з примусового выгнаня на Землях Западных и Полночных, як тоже с поза границ Польшы, повинни отримати право на поворот на их отцовизну в місце их уроджения або уроджения их родичов, ци предков, а одобраны их маєткы мают быти зверненні им або их потомкам. Зас за знищены будинкы, вытяты лісы и т. п., Уряд ПРЛ ма заплатити одшкодование.

2. Всіх осадников, котры заняли лемковскы господарства по року 1944 переселити на Землі Заходны и Полночны.

3. Лемкам, котрым забракне землі, або котры здобыли иншы позарольничы квалификации и заводы, забезпечыти роботу в поблизкых містах.

4. Дати им свободу выбору национальности и ровны права гражданскы зо всіми мешканцями краю.

5. Уряды в селах, громадах, повітах, воєвудзтві, школы, милиция на Лемковині мают быти обсаджены Лемками, а до высшых влад мусиме мати своих представителей.

6. Лемковина ма быти районом автономичным.

7. В школах и урядах на терені Лемковины ма быти впровадженый язык лемковский, а студентам забезпечыти доступ до всіх школ и университетов в краю.

8. Повинна быти забезпечена правом вольность (свобода) слова и организации людовых (народных).

9. В порозумлению з урядом Чехословакии повинни зме мати доступ до сел лемковскых по стороні чехословацкой и провадити шыроку выміну культурну и научну з лемками по тамтой стороні границі и зо всіми, котры сут розсіяны по цілом світі.

10. Уряд мусит забезпечити нашы терены в товары спожывны, промысловы, будувати фабрикы в опертю о богацтва натуральны той землі, школы, шпыталі, дорогы и т. п.


Рахуєме на прихыльне полагоджение и конкретну одповідь.


Делегаты 24-го Съізда Л. С.


Видиме, же домагания 24-го Съізда Лемко-Союза не были великы и неможливы до зреализования, але были одшмарены и навет полякы не одповіли на так важны для лемков вопросы о их будучной судьбі. Так што с того ясно выникат, же не можеме их веце нич просити, бо они нич нам не дадут, хыбаль лем вспомнену Березу и Явожно. Они собі постановили, же при помочы войска, милиции, но и новочасной наукы зможут лемков-русинов зъасимилювати (прогылхнути), што в певной мірі ся им уж удає, но и за парудесят роков лемкы-русины зникнув з арены и товдыль буде з нима спокой. Хыбаль всі того видиме, бо они тото роблят на нашых очах и планово, а нам лем остало о том дашто даколи спомнути, бо єдны ся боиме о свою скору, другы о посады, а треті думают, же то уж така наша судьба.

Ніт, наша судьба єст в нашых руках! Лем мы єй мусиме твердо взяти в свои мозолисты долоні и попровадити так як мы хочеме, а не так як нам хтоси подсказує або диктує.

С повысшого ясно видно, же штоси мусиме робити. Што нам треба робити? На тот вопрос трудно одповісти в пару словах, бо ту бы треба было списати ціды томы, а не в невеликой дописі всьо уняти, жебы хоц поверховно представити тоту стежечку помеже горы, на котрой полно каміня, зваленых колод, терня и ріжного кряча, а по котрой треба нам и нашым поколіниям крочыти в незнане будуще.

1. Передовсім треба нам всім лемкам-русинам ту на емиграции в США и Канаді, Польші, Чехословакии, Сов. Союзі, Югославии и на цілом світі найти вспольный язык и объєдинитися.

2. Мусиме в конци найти вспольну национальну назву, а то для краю выберме єдну з двох: Карпаторусь або Лемкорусь; национальность товдыль вывести од впровадженой назвы для краю, то єст карпаторус або лемкорус (так як называют себе білорусы — Білорусь и білорус).

3. Одшмареном другом назвом назвати столицу нашого краю.

4. Флага має быти з двох пасов: зеленого и синього, где на синьом пасі буде видніти всходяще сонце; но и тым самым треба обрати свой гимн.

5. Край наш має быти неутральным, як наприклад Швайцария и на швайцарской конституции и правах треба взоруватися яко на подставі.

6. Выбрати Объєдиненый Комитет Лемко-Русинов Світа, штобы кєрувал справами нашого краю, кєд не хочеме, жебы тым кєрувал Лемко-Союз.

7. Старатися о друкувание газеты, книжок и другой литературы на нашом народном языку, но и додати ищы до нашой теперішньой азбукы букву “Ґ”.

8. Уважати церкви за свои (на емиграции и в Старом Краю) тоты, котры будут поперати нашу народну справу.


* * *

Повысшы предложения сут лем вступным кроком до дальшой нашой народной роботы в Лемко-Союзі, но и в загалі нашого народа на цілом світі. Я вірю, же Лемко-Союз выбере якысий конкретный план, штобы сполнити свою ціль, то єст объєдинити всіх лемков-русинов на світі, а повысшы факты предложения поможут тому. Маме дві головны группы нашого народа, з котрых єдны думают, же лем принятие назвы украинец и Украина спасе наш край и выратує народ од загибелі — асимиляции; зас друга группа стоит при свойой традицийной назві русин, русский, но и уважат, же наш народ повиден быти прилученый до Росси и т. п.

Ту мусиме найти якысий компромисс но и мусит выплынути якыса третя объєдиняюча сила, котра бы потрафила пригорнути симпатиков обох повысшых групп, бо того вымагат ситуация нашого краю. 3 того вшыткого выходит, же мусиме найти вспольный план, жебы идти вперед й в будучность. Збудуйме новый и ясный дом для нашых потомков, штобы они не поневералися, як мы и нашы предкы! А потом не будеме нарікати, же нас молоды оставляют, бо єсли молодеж увидит, же мы знаме, где идеме, то она масово буде горнулася з нами.

Може дахто повіст, же нас єст замало, то чого мы ся будеме сіпати на такє штоси. Єст нас всіх на світі понад полтора до двох миллионов, а то в США и Канаді понад єден миллион; Польша около 200 тысяч, СССР понад 250 тысяч, Чехословакия понад 300 тысяч, но а решта в иншых краях світа. То аж не так мало. Длячого мы не можеме мати свойой свободной и неутральной державы, коли на світі меншы народы корыстают з того привилею. Возмийме для прикладу найменьшы народы и краины світа, котрых число людей єст меньше або ровне нашому племени, як Исляндия 190 тысяч, Кипр понад 500 тысяч и десяткы другых.

Для Д. Пройдисвіта хочу одповісти, же його обавы при конци статьи под назвом “Относно лемков и Лемковины” сут правдивы, але хочу тоже припомнути, же ци мы будеме добиватися о автономию, ци о неутральну державу, то они и так нас будут-переслідувати, як и нас переслідували в минулом. То я думам, же як приде нам потерпіти, то ліпше потерпіти за парудесят роков, як терпіти зас другый тысяч роков. А коли бы зме зрахували жертвы нашого народа за тысяч роков, котры понюс наш народ од сваволі выміненых мном перше гнобителей, то вышло бы величаве число невинно згинувшых нашых найліпшых предков. А в будучности не сподіймеся, же они будут ліпшы. Зрештом видиме гнес на прикладах, як розпалюют ненависть религийну и национальну, штобы нас самых поріжнити, но и пустити “русина на русина”, з чого хотят вытягнути корысть для себе ц своих держав.

Поздоровлям Гол. Правление, Центральный Комитет Л. С., всіх делегатов и делегаток, всіх членов Л. С., читателей газ. “К. Р.” и всіх нашых людей в США, Канаді, Польші, Чехословакии, СССР, Югославии и на цілом світі, где их розсіяла судьба, штобы всі в тоты дны скупилися в єдину и нерозорвальну группу и штобы разом вкрочыли сміло в нове тысячолітия яко вольны члены того світа.


Лемкорус

США, 22 августа (серпня) 1969 р.




[BACK]