Коротка История Лемко-Союза в Кливланді, О. и Його Издательска Діятельность

Лемко-Союз в Кливланді был организованый в 1929 року. Першым предсідательом был Михаил Баволяк, а секретарьом Стефан Ткач.

В 1931 р. Кливландский отділ Л. С. был, здаєся, найбольшим, бо мал понад 180 членов. В том року починатся найбольша издательски діятельность Лемко-Союза.

Другым предсідательом был выбраный Иван Кацан (уряд спр. около 4 м.), а по нем уряд предсідателя перенял його заступник Тимофей Гамбаль, котрый уряд полнил до конца 1933 р.

Брак власного приміщения на митингы Лемко-Союзу утрудняло планову роботу организацийну, бо што якыйси час треба было переноситися З єдного в друге поміщение.

В 1934 р. на уряд предсідателя был выбраный Андрей Лабик, а секретарем Николай Кобеляк. В том року вошол в житье Устав Лемко-Союза на цілы Соєдинены Штаты и Канаду. Устав в своих 40 сторонах в 5 розділі окреслят территорию Лемковщины в старом краю от рік Попрада и Дунайца по рікы Уж и Сян. Лемковщина, згодно с 5 пунктом Устава, обнимат такы повіты: Новый Торг, Новый Санч, Грибов, Горлицы, Ясло, Кросно, Березов, Сянок и Ліско, як тоже обнимат частину территории в Чехословакии, як Спишской, Абауйской, Шаришской и Земплинской хтолиц.

Территория тота была названа Лемковщином або Лемковином, где проживали с поконвіка лемкы.

В 1935 року организация Лемко-Союз в Кливланді за предсідателя Андрея Лабика покупила власный Народный Дом при ул. 1205 Старкведер, котра то будова до 1946 р. притігала до себе вшыткых емигрантов из Лемковщины.

В 1945 р. незалежно от того, што организация уж мала свой Народный Дом, покупила другий, выгоднійший и барже репрезантивный, при ул. 2337 Вест 11, котра то будова посегодняшный день єст думом лемковского народа тут в Кливланді и околици, а в цілой Америкі.

Найдовше уряд председателя полнил Андрей Лабик, бо аж от 1934 до 1948 р. с тым, што в между часі коротко полнил уряд Петро Волосанович и Афтаназий Ардан.

В 1948 р. предсідательом был выбраный Дмитрo Фаль, а секретарем Осиф Дзямба. В 1949 р. предсідателем выбраный был Николай Кобеляк, а Осиф Дзямба полнил уряд секретаря. От 1952 до 1954 р. предсідательом отділа был Т. Ковальчик, а секретарем Стефан Ткач. От 1954 до 1956 предс. выбраный был Илья Владыка. От 1958 до днеска уряд предсідателя Народной Оргацизации полнит Осиф Дзямба, котрый всьо отдає для добра свого народа и свойой народной организации.

Карпаторусский Календарь — Ваня Гунянкы на 1931 рок был першым календарном, який был изданый в Кливланді, бо попередны календари выходили в Филадельфии. Важны статьи в том календарі были такы: “Кто то лемкы”, “Их край и ціль Лемко-Союза”, “Сила будовы”, бесіда на открытию читальні им. Качковского в Сяноку в 1924 р. Было в том календарі поміщер много вершиков М. Волошиновича.

Дальшы календари были изданы в 1932, 33, 34, и 1935 раках под тым самым заглавием.

Из тых календарей, здаєся, найбольше цєкавым был календарь Ваня Гунянкы из 1934 р. Были в ньому 2 мапы и 57 образков. Важнійшы статьи были такы: “Познай себе — буде с тебе”, “Талергоф”, “Вертеп в Карпатах”. Найбольше статей было самого Ваня Гунянкы. Друковано было дуже вершиков Н. Микулича и О. Болдыша.

Вшыткых календарей Лемко-Союза в Кливланді вышло 5, а каждый из них мал понад 100 страниц.

Выдано ту 1 подручник букварь — “Карпаторусский Букварь Ваня Гунянкы”. Поміщено было в нем 37 образков. Выдано ту дуже иншых изданий, як представления, драмы, комедии: “Мужикы аристократы”, на лемковску бесіду перевел тоже Ваньо Гунянка; “Ицко Сват” — комедия в 2-х акта; “Дві натуры”, “Муж умер”, “Жены мудрійшы” Середницкого — сценичный образ в 1 акті зо житья лемковской емиграции; “Просвітителя народа”, штука в двох актах из житья нашого народа в Америкі.

Другы книжечкы были выданы такы:

“Борьба за национальны права и борьба за социальну справедливость” и “Прикарпатска Русь под Чехословацкым Режимом” — написал Д-р. С. С. Пыж; “7 Гріхов Головных” и “Правда о России”, написал Ваньо Гунянка; “Што принесла нам война”, написал Иван Яцош, оповідание бывшого солдата австрийской армии, участника I Світовой войны.

Из историчных и народных оповіданий были напечатаны такы книжечкы: “Збийска Полянка”, “Лемковскы Выродкы”, написал Родный Лемко Н. А. Цисляк; “Лемковскы Выродкы” оповідание из Житья лемков в повоєнных часах, основане на правді.

Из поезии “Лемковскы Народны Співанкы”, собрал и упорядкувал Сын лемка Антон Цисляк.

Были иншы издания, як мапа Лемковины на полотні и на папері котру выдал Д. Вислоцкий — Ваньо Гунянка.

С печати типографии в Кливланді выходила газета “Лемко” каждого тыждня (от 1930 до 1935 р.) и Лемко-Журнал каждого місяца на английском языку.

Хоц коротко подано активность Лемко-Союза в Кливланді, то єднак видиме, што діятельность народной организации, коли газета “Лемко ” выходила в Кливланді, была велика и перевысшыла вшыткы иншы организации. Коротке составление того, што робилося в Кливланді показує нам, што наша народна организация за свого существования в Кливданді выдала: 1 Устав, 5 Календарей (больше 500 страниц), 1 Букварь (64 страницы), 10 представлений; (около 270 страниц), 6 книжок (180 страниц), 2 историчны нарысы (61 страница), 1 книжка поезии (64 страницы). 1 книжка про кооперацию (32 страницы), 1 книжка ноты и 2 мапы. Разом было 29 изданий на около 1200 страниц, а в том понад 200 ріжных иллюстраций.

С того може быти днеска не лем рады, але и горды, што наша организация, хоц не была так численна, як иншы, но в просвітительной роботі не осталася позаду другых, а пошла далеко вперед от них.


ОСИФ ДЗЯМБА и ИВАН ЧЕРГОНЯК, Мол.,
Кливланд, Огайо.



[BACK]