Слава 40-Літному Юбилею Л. С. — Н. А. Цисляк

В момент открытия 25-го Головного Съізда Лемко-Союза дня 30 августа 1969 року в Карпаторусском Американском Центрі в Юнкерс официально закончилося сорок літие нащой культурно-просвітительной организации и єй діятельности на просторах великой Америкы и Канады.


CRCenter
Карпаторусский Американский Центер (Лемко Голл), где отбылся
25-ый Юбилейный Головный Съізд Л. С.

Сорок літ, то прекрасный протяг часу в жытю человіка, но а ище больший в жытю организации такой, як наш Лемко-Союз. Єсли стати на вершку того 40-літия и оглянутися на панораму той діятельности, мушено глубоко задуматися и быти гордым на ню, на місце єй рождения в 1929 року и на розвитие своих конаристых голузей в єй сорока-літия.

Родился Лемко-Союз в зимовом місяци январю, подчас великого морозу и сніжной заверухы, в далеком Виннипегу в Канаді. Чым он был повитый в білы сніжны пелены и омотаный в мрачну кризу світового безроботя, незавидной судьбы, в котрой находился и наш родный край и горстками по світу розметаны групкы никому нич невинных емигрантов.

Загорівшеся слабе, як на тонькой ниткі світелко, идея Лемко-Союза выдало надост теплоты и довкола нього громадилися помало люде, перед котрыми не было судьбы до жытя и началися пригрівати при том світелку и помалы провиджати свою дорогу до дачого лучшого. Тото мале світелко в далекой Канаді мало в собі животворну силу, його увиділи передовы краяне зашмарены на емиграцию в Соєдинены Штаты. Они прихылили свою прочнійшу свічу и світло засвітилося понад Америку. Світло увиділи майнеры в темных майнах, робочи по містах и фармеры по своих фармах. Вшиткы они начали горнутися ку світлу, ку родинной теплоті. Они начали читати газету, организовати отділы, а с часом централизовати их и переміняти на велику культурно-просвітительну организацию, штобы помагати своим, котрым никто помочы не дал и сами собі. Но помагати не было чым, бо несчастном депресиом были охвачены вшыткы.

Кромі того слаба маленка организация пережывала другы трудности. На ню, на ей урядников, наваляли пострах за культурну роботу, што они будут суджены, тратити роботы, будут дегортованы. В тоту роботу кромі чужой реакции впряглися свои темны и чорны силы. Нас пробували отчужити от своо родного краю, то насильном украинизациом, то страхом комунизма. А світло засвічене на тонькой ниточкі не погасло, а воспламенялося ширше и ширше. Оно пошырилося на 81 отділов мужескых и по десяткі женскых и молодежных.

В политичном направлению, скоро послі признания Совітского Союза Соєдинеными Штатами при президенті Рузвельті, в ціли связи со своима кровными братами русскыми, украинцами и білоруссами наша организация Лемко-Союз вступат в культурну связ с Совітскым Союзом и потом с Славянскым Комитетом в Москві и участвує активно враз с другыми славянами во всіх роботах той діятельности.

В часі захвата Гитлером судетской части Чехословакии, мы карпатороссы под водительством Лемко-Союза и карпато-русскых церквей созвали в 1942 року в городі Питсбургу протестацийный конгрес в защиті Чехословакии.

Потом в часі II Світовой войны Лемко-Союз найактивнійше трудился, всі нашы силы были звернены на сбор жертв на медицину для бойцов Красной Армии, на приодіву и молоко для населения на знищеной войной Украині. То потверджуют факты грамот выданых Лемко-Союзу. Для пояснения событий Лемко-Союз организовал карпаторусску радио порграмму за всі три и пол рока войны.


FolkDancers
FOLK DANCERS. A Lemovinian evening of spinning was рortrayed at the fourth Folk Festival of the Cleveland Folk Arts Association by (left to right Nick Cislak, Joan and Beverly Zelenka and Marie Kvaska. Members of the Lemko Cultural Association, they were part of a cast of 1,000 persons who put on two separate displays of folk dancing and singing at Public Music Hall.

В культурной области при большых отділах Л. С, як в Юнкерс, Кливланд, Торонто, Монтреалю и другых велися школы для дітей русской азбукы и грамоты. Во многых місцевостях велися танцорскы кружкы для дітей, котры выступали и про свои отділы и про отділы в другых містностях и про другы народности або благородны ціли, як в Мангатан Гол, Карнеги Гол, а окончательно группа Глинка, котра существовує на чартері Лемко-Союза сталася извістном публикі при середных школах и университетах в Америкі. Они загартают славу Лемко-Союзу. При иншых отділах существовали хоры чыстѳ лемковскы або русско-лемковскы.


Glinka
Ансамбль Глинка.

Члены Лемко-Союза являлися составителями многых представлений из народного жытя и учителями их поставок. Соткы и соткы было их поставлено за тых 40 роков в ріжных місцевостях, а гдекотры брали участь в междунациональных фестивалях, где присутствовало десяткы тысяч присутных, а послідный дводневный, котрый укоронувал 40 літну діятельность отбылся в Лемко-Резорті того літа, был уж в цілости карпаторусский.

Где и коли треба было, давалися лекции, высвітления фильмов. Меже фильмами из традиций лемков находиме два, єден с 1933 року и другый с 1964 року. До шторочных народных дней належат Русаля и День Талергофа. Русаля началися ищы в 1933 року и массово отбываются дотепер.


LemkoWedding
Рекорда “Лемковске весіля” Стефана Шкимба.

Заохочены діятельностьом Лемко-Союза ріжны нашы таланты издали на плытах (рекордах) около 200 ріжных мельодий, співу и оркестров. Был бы то интересный сбор музыкы и мельодий, єсли бы то всьо удалося дакому из нас собрати в єден альбум.

Печатаня газеты, журналов, календаров и другой литературы навікы останеся великым ділом Лемко-Союза. При помочы Лемко-Союза и той литературы организовалися полезны народу комитеты, а єдным из них єст Лемко-Релиф Комитет, котрый подал руку помочы знищеному войном родному краю и подал надію народу до житя.


LemkoChoir
Лемковский народный хор в Юнкерс, Н. Й. 1963 р.

Покупкы и будовы народных домов, як Юнкерс, Кливланд, Ансония, Бриджпорт стоят на почетной точкі діятельности Лемко-Союза, а уж правдивом гордостьом єст наш Лемко-Резорт, в котром єст много будов, а меже ными новый памятник Талергофа с музейом в нижньой його части.

Лемко-Союз не переломился даже под такыма смертельныма ударами, якым явилося насильне выселение лемков из родных земель, уход от него першого организатора Д. Вислоцкого, а потом несподівана смерть редактора органа Л. С., д-ра С. Пыжа. От тых часов Лемко-Союз перешол понад страшну пропасть, а при том вмісто упасти, будувался дальше, примір Лемко-Резорт, створение фильмы с традиции лемков и другы важны крокы усадомленяся в грунт новой отчызны Америкы и надвязаньом узей с родным крайом и народом. І


SASTourists
Єдна из Туристичных Групп Лемко-Союза

Лемко-Союз дал начало тым туристичным поіздкам, посредством котрых маме можност отвиджати родный край и знакомитися с його потребами. То Лемко-Союз провюл головну кампанию за жертвами на будову памятника партизанам Лемковины в Устью Русском, котрый был открытий І-шом туристичном группом с Америкы и Канады в 1963 року. Тот памятник стал сольом в очах националистичным шовинистам, a подал надію розогнаному народу на своє право на прадідовскых землях Лемковины. А группы туристов продолжаются и уж 7 группа Л. С. завершила свои поіздкы того року. Треба всім гордитися тым, што программа устава Л. С. составлена 40 роков тому назад, при всіх найгоршых обставинах и условиях была выполнена с шырокым замахом, бо и судьба Лемковины показана днеска на світло денне, а то доведе до єй освобождения, до того, чого добиватся Лемко-Союз.

Ту всопмнены лем головны черты діятельности Л. С. в дуже коротокой формі. Будущий историк буде примушеный написати єднотомову книгу за кажде десятилітие, єсли схоче описати діятельность Л. С. подробнійше.

Зато най не буде никому дивно, што на привітственной написи делегатов 25-го Гол. Съізда Лемко-Союза верхом ишли заслужены слова:

“Слава 40-літньому Юбилею Лемко-Союза!”.

Такий клич єст справедливо заслуженый, тяжкым, выносливым и честным трудом каждого члена Лейко-Союза.


Н. А. Цисляк



[BACK]