Иван Теодорович ЛЕМКИН
Туга за Лемковином Родным Крайом — Иван Лемкин
Лемковино, родный краю,
Моя прелесть, земский раю,
З жальом в сердцу тя витаю,
О тобі я все думаю.
Ани отец, ани мати
Не дадутся нам розстати,
Иду спати, рано встаю,
О тобі я все мечтаю.
Коли в сердцу тугу маю,
Або горе отчуваю,
До тебе я ся звертаю,
Своє сердце открываю.
Як пред тобом ся выжалю,
То уж в сердци спокой маю.
Ты мой скарбе найдорожший,
Голубочку найсолодший.
Лемковино, люба Мати,
Я не в силі описати
Свойой тугы, свого горя,
Слез выляных цілы моря.
За тобом плачу, гыну,
Так в ночы, як и в днину,
О тобі я все думаю,
Тобою ся восхищаю.
До тебе я все вздыхаю,
В тобі всю надію маю,
Без тебе жытя не маю.
Тобом жыю, отдыхаю,
Як счастливы мы ся чули,
Коли разом з собом жыли.
Ты нас сердцем голубила
И в обнятях нас пестила.
Хлібом, сольом нас кормила,
Хоть сама голодна была.
Ты нас сердцем огрівала
Хоть ран ты там много мала.
Ворогы нас розлучили,
На погибель засудили,
По світі розпорошыли,
Штобы марно мы згынули.
Мы от тебе отдалены
На погыбель призначены,
З любых гор выселены,
По світі розпорошены.
Будь проклята тота хвиля,
В котрой з пекла вража сила
Брутально нас выселила,
Наше жытье докончила.
Тяжко было ся розстати,
За тобом, люба Мати,
З горами ся прощати,
З болю, жалю поплакати.
Любы горы оставити
И в незнане деси идти.
В світі долі сой глядати,
Нераз горко заплакати.
Вельку рану в сердцу ношу
И штодня Бога прошу,
Штобы горе пережыти,
Счастливо вік докончыти.
В сердцу туга, вельке горе,
Вылятых слез ціле море
За лугами и лісами.
З жалю, тугы за горами,
За хижином с краю села,
За стежечком, што нас вела
До церковці на горбочку,
Серед дерев, як в віночку.
О, як тяжко мі на сердцу,
Што мы розлучены
И по цілом земском гльобі
Мы розпорошены:
Не тішися, сило вража,
З нашой горкой долі,
Сплыне на нас ласка Божа,
Будем знов на волі.
За терпіния и страдания
Бог вынагородит
Нашы мукы и рыдания
Он нам осолодит.
Нашы горы розрадуют,
Солнце засіяє,
Лісы громко зашуміют:
“Лемко повертає!”
Цілы вікы переминут,
Мы ся розроснеме,
Нашы врагы всі погынут
Мы тут зостанеме.
Бо то наша русока земля,
То наша отчына,
То колыбель святой Руси,
То наша спадчына.
Горы нашы, горы святы,
Бескиды, Карпаты,
Ту мешкали нашы предкы,
Білыи Хорваты.
Стада овец в лісі пасли
И землю орали,
Штобы больше землі было,
Лісы карчували.
Тож мы лемкы автохтоны,
Тут на власной земли,
А не якысы пройдисвіты,
Ци приблуды вредны.
Надармо пан Мацієвский
Таке нам голосил,
Што лемков на польску землю
Круль Казимір спросил.
Што не было ани сліду
О нас у Карпатах,
Аж нас стягнул на сву біду
По білых хорватах.
Простый парох из Тылича
Вченому доказал,
Што он вченый без облича
Дурньом ся показал.
Той фальш откликати,
Тяжко было ученому
Бо прийшло му, як пяному
Блудов ся встыдати.
Вы панове историкы
Пиште вшыткы правду,
Як сте добры католикы
Не задайте гвалту.
Не фалшуйте истории,
О то вас благаме
И не робте комедии
З фактов, котры знаме.
Мацієвскы у нас были
Вчера и сут ныні,
Историю, што писали
Най читают свині.
Историю так писали:
Много фактов отнимали,
Де не треба, додавали
И так правду закрывали.
Цілу нашу историю
Так подзюравили,
Же дзюрами меж народом
Незгоду зродили.
Они внесли в нас руину,
Народ поріжнили,
Выдумали Украину,
Штобы Русь знищили.
Украину Берлин сплодил,
А Відень уродил,
Польскы паны выховали
Для Гитлера хвалы.
Польскых панов дябли взяли,
Украину русскы дали
И хоц Гитлер уж не скаче,
Берлин за ньом дальше плаче.
Маме своих историков,
Высокоученых,
Пан Ключевский и Третяков
Мужы досвідчены.
Маме тоже Рыбакова,
Гречку, Шахматова,
Соловия, Прожнякова,
Всіх гений голова.
Маме ище много другых,
Умных и ученых,
Не треба нам людей чужых,
Маме досвідченых.
Всі солідны историкы
Так нам повідают,
Же вороты робят крикы,
Бо рации не мают.
Стож нашы историкы
Нам все поясняют,
Жe початкы Руси святой
Пра-славян сягают.
Нашы предкы пра-славяне
В Карпатах мешкали,
Як потреба заходила
З врагами воювали.
Грецку віру мы приняли
Из уст Методия,
Всім славянам показали
Де свята Миссия.
Зостализме окрещены
Во престольном граді,
Через учнів Методия,
В церкви Велеграді.
О дві соткы літ скорійше
Мы ся окрестили
И дві соткы літ милійше
Богу ся молили.
До Києва свята віра
Прийшла з Подкарпатья.
Обі Руси полюбились,
Бо то родны братья.
Русский Києв обдаровал
Русьом Прикарпатье,
А народ наш заваровал
Слово тое свято.
От товды то Прикарпатье
З Києвом ся зляло,
От той хвилі слово Русин
Для нас святым стало.
Такий вот єст початок
Нашой Лемковины,
Хотяй смутный єст остаток
Той святой краины.
На Карпатах и Бескидах
Русь ся формувала,
По Европі в тяжкых бідах
Ся розпространяла.
Два тысячы літ минає
От предков начала.
Богу нехай честь быває,
Святой Руси хвала.
Лемковино, люба Мати,
Притуль мя до себе,
Ци єст лекше де спочати,
Як тут близко тебе.



[BACK]