Доц. Д-р АНДРЕЙ ШЛЕПЕЦКИЙ

Президент Людвик Свобода на Пряшевщині — Доц. Д-р Андрей Шлепецкий
Пряшев, ЧССР.

23-го мая с. р. Пряшевщина достойно встрітила легендарного героя за освобождение ЧССР, президента Людвика Свободу. За послідных 23 роков, ту, на историчном Дуклянском перевалі, где лежат вічным сном больше як 80 тысяч героив Совітского Союза и 8 тысяч чехословацкых воинов, пришли поклонитися сотні, выдающихся государственных діятелей СССР, стран социалистичного лагеря, представители Франции, Англии, Америкы, Канады. Мы памятаме, як в свойом часі ту пришол любимец народа президент Антоний Запотоцкий, министр обороны СССР маршал Малиновский и др. Всі русины достойно встрітили своих дорогых гостей. Но Пряшевщина на тот раз встрітила президента Л. Свободу, котрый на Пряшевщині, в дни дуклянскых бойов росположил свой штаб в русинском селі В. Буковец, а послі освобождения страны, благодаря його личной поддержкі русины Пряшевщины отримали материальну помоч. Под його руководством был побудованый Храм-памятник в Лаборци — як символ братства меже ЧССР и СССР! И вот, русины дождалися свого дня. Серед них побывал любимец народа, герой Совітского Союза и ЧССР, президент Л. Свобода. Николи не забыти того світлого майского дня!

Година 9:30 рано. Из Кошиц в Пряшев приізжат колона автомашын “Шкода — 603”! Впереди, увінчена многочисленными свіжыми цвітами, іхат машына президента! Каждый приближатся к машыні, мече цвіты, желат, хотя на секунду, увидіти человіка, первого гражданина ЧССР — ПРЕЗИДЕНТА!

В центрі Пряшева, где стоит памятник А. Духновичу, находится тьма людей. Иголка не упала бы на землю. Хотя робочий день, весь город як бы омолоділ, стал красивым! “Сивенький наш батько”, — кричат пионеры! Президент остановлятся около містной ратуши, возлі здания, где 16 июня 1919 р. была провозглашена Словацка Республика Рад. С теплым словом привітствує президента предсідатель МНК Емиль Рейнкравт. Президент обертатся тихим словом к гражданам Пряшева: “Вірность за вірность — любов за любов!” Записавшися в книгу МНК — президент отправлятся к Дукли.

От Пряшева до сусідного місточка Гиральтовци всього 30 км. Узнавшы граждане Гиральтовец, што президент ту не остановится, товдиль выслали свою делегацию в Кошыці с требованием: “Єсли иначе ніт, то ляжеме на дорогу, но остановитися ту Он должен”. Дійствительно, и ту остановился. Потом президент остановился в м. Стропкові. Пришли ту из всіх сел, особенно рады были селяне мойого села В. Буковец, где президент 3 місяцы прожил в дны жесточайшых бойов на Дукли. Жители русинскых сел от Стропкова до Свидника застелили дорогу цвітами, и на каждом селі мы замічали лозунгы на родном материнском языку: “Привітотвуєме нашого любимого господина Президента”, “Свидник приветствует свойого освободителя”.

От Свидника на Дуклю 20 км. Коли-то полностью розрушены села и дорогы, гнес красивы здания, народ оділся праздничо!

Дукля! Цілий світ знає тото священне місце! Горят греческы огні... Президент кладе лично вінец павшым героям СССР, Польши, ЧССР! Он тихо стоит и глубоко задумался... Народ плаче... Президент остановлюєся при могилі павшого генерала Сазавского. И вдруг 75-літна русинка Русинко из села Комарника, котра перша из жен встретила генерала Л. Свободу на чехословацкой земли. Президент єй познал, тепло обнял и даже нескілько минут поговорил. Ніт слов, штобы описати данну встрічу!

Час летит. Обідный час. Президент с представителями Пряшевщины, с министрами инж. Дзуром и Павлом остановляются в готелю "Дукля” в Свиднику. В тот час со всіх концов Пряшевщины спішыт народ в амфитеатр. Собралося больше як 30 тысяч русинов! Президент обращатся к народу:

“Перед 24 роками в черезвычайно трудных и усиленых бойов в Карпатах и на рікі Ондава мы порозуміли, як легко в 1938 року стратили свободу и як трудно єй добываме обратно. Около 140 тысяч совітскых воинов и приблизительно 12 тысяч чехословацкых пролило свою кров в боях за свободу словацкого и чешского народов. Сегодня свою жизнь, свободу и судьбы операме о вірных и надійных друзей. Тым являтся Совітский Союз. Так, Совітский Союз подтвердил своє братство свойом кровью и николи нас не оставил и не измінил. Наоборот, стоит с нами твердо и вірно. Тоту дійствительность мы должны снова порозуміти и припоминати гнес и штоденно, особенно в гнешных горячых днях, коли агресивны войны ище не окончилися, коли реваншистичны и националистичны силы в Западной Германии зас двигают головы и выступают с печально извістными староновыми требованиями против независимости и территориального єдинства нашой Республикы.

Потому говорю открыто всім и на всі стороны: наша дружба с Совітскым Союзом являтся твердом и постоянном. Мы не даме єй никому ослабити, ни нарушыти. Наоборот, мы будеме єй в будущом ище больше и всесторонно укріпляти и росширяти. Благодаря Совітскому Союзу, международне положение Чехословакии являтся прочным, як николи перше. Сегодня мы можеме спокойно спати и робити — без старости о свою свободу и государственну независимость. Надійном поруком в том являтся Совітский Союз. Гваранциом тому являтся и наш союз с другыми социалистичными государствами, котрый и в будущом буде всесторонно укріпляти. Мы хочеме розвивати добры связи и сотрудничество и с нашыми несоциалистичными сусідами... Не можу в Свиднику не вспомнути єдинство, котре сімволично представляют Дуклянский и Свидницкий кладбища. Ту вічным сном лежат друг при другу по-братскы русины, словакы, чехы из Волыни, из Чех и Моравии, совітскы воины, всі коло себе. Тото єдинство павшых геройов нас обовязує к єдинству и нас живых!” (Отрывкы из газеты ЦК КПЧ “Правда” от 24-го мая 1968 р.).

К вечеру Президент Л. Свобода был уж в Кошицах и в тот же ден вечером был в Прагі.

Дійствительно, триумфальный путь! Русины гнес омолодли. Они вірят, што полна свобода буде дана и им, и больше не мают права розмаиты националисты и недобиты фашисты оскорбляти народ, больше 40 тысяч котрого вышли из Карпат, и разом с героическом Совітском Армиом освободили Карпаты, и всю Чехословакию от фашизма.

Гнес, коли в ЧССР проходит демократизация, мы ище раз озерамеся в прошле и твердо віриме, што наше счастье и благополучие лем разом с народами родных братов по ту сторону Карпат — русскым, украинскым и білорусскым народами. А тот, хто хотіл бы тоту дружбу розорвати, най знат, же повстанут ище раз закарпатцы и товдиль потребуют тото, чого так добивался наш герой Адольф И. Добрянский: “Жить навсегда с Россией и Украиной”.




[BACK]