Нашы Памятникы — Михаил Донский

Вшиткы народы мают свои памятникы, памятникы историчны, памятникы культуры, а так само памятникы, котры припоминают о борьбі народов за свободу и прогресс.

Маме такы памятникы и мы лемкы. Тоты памятникы будували нашы прадіды, діды и няньове, а декотры и наше поколіния. Тыми памятниками дорожили и опікувалися нашы передновы люде и переказували их старшы молодшым.

В 1945-1947 роках нашы люде змушены были опустити свои родни села, а так само и нашы памятникы остали без опікы. Треба повісти, же дакотры с них уж пропали, дакотры нищиют дальше и не в силах их днеска уратовати, але сут дакотры, што при вспольном порозумінию и помочы материальной удало бы ся уратовати. О тых остатных хотіл бы-м дашто написати. Як ходит о памятникы нашого будовництва и архитектуры, то серед них єст найповажнійшом церковкы. Велике число, то уж або розобраны, або скоро розвалятся и згниют от того, што перетікают дахы и гние дерево, а так само с середины нищиют малюнкы и дорогоцінны образы. Часть с них в ужитку и тоты сут меньше загрожены, бо практикующы люде опікуются нима. Друга часть, котра представлят велику вартость забыткову, єст обнята опіком державного консерватора, котрый в міру можности и средств провадит ремонт, як в Ріпках, Ганчові и иншых.

Остатныма днями рішено передати ище пятнадцет церквей в воєводстві Ржешовском до ужитку практкуючым (вірующым). Вопрос єст лем теперь тот, ци загосподарувати и отремонтувати!

Сут у нас и такы памятникы, котры поставлено в рочниці принятия православной віры, то єст крещения Руси. Такий памятник стоит в селі Ганчова, сут и в иншых селах. В Перегримкі стоит памятник мученикам Талергофа. Правдоподобно в селі Воловец стоит памятник М. Саидовичу, а недавно отнайдено памятник 44 мученикам в Перемышли, котрих 14 серпня (августа) 1914 року зрубали шаблями австрийскы палачы. (Меже ними была молоденька дівчина Мохнацка). Памятник находится в добром состоянию, лем неє на ней таблицы с именами помордуваных. Єст дуже місцевостей, где в остатной войні помордувано нашых партизанов и мирных жителей, але місця тоты до того часу ище не сут упамятнены. Што правда, побудовано символичный памятник павшым в борьбі за свободу с німецкым оккупантом в Устью Русском, але незалежно от того, належало бы ся упамятнити и тоты місця, хоц не великым коштом, напримір, в Перегримкі, где лежат нашы герои Григорий Водзик и Андрей Завойский, в Розділю, где помордувано кілка особ и спалено хижы, в Клопотници, где росстріляно жену Стефана Оленича и спалено четырі хижы, в Мацині, где росстріляно кількох людей, в Свіржові, где згинуло двох партизанові в Мысцові и иншых селах Лемковщины. То єст нашым долгом оставшыхся в живых заопікуватися тыма місцями погибшых геройов, котры отдали свое житья в борьбі с гитлеровскым оккупантом, бо то буде доказом, же нашы люде не стояли на убочы, а боролися, отдавали свое житья и днеска мают право на свободу.

В Польші прошлого вересня (сентября) поминкы помершых, и в тот день вшиткы люде идут на гробы своих близкых, кладут квіты, світят свічкы и лямпкы. В тот день цмынтари біліют в квітах. Тым способом живы отдают честь и пошану близкым.

Минушого року перший раз перед святом поминков собралися лемковскы діятели и рішили, жебы отнайти вшиткы місця, где лежат помордуваны нашы герои и зробити список, а в міру можливости их упамятнити, хоц бы на разі без большых выдатков, заопікуватися тыми памятниками, котры ся ище сохранили и их отновити.

А в день свята вмерлым 1-го вересня группа лемков зложила квіткы и горющы лямпкы на памятнику мучеников Талергофа в Перегримці, а так само на гробі недавно помершого Петра Павляка.


Михаил Донский



[BACK]