АНТОН А. ЦИСЛЯК (Лемко от Прадіда)
Загально-Коротка История Руси — Антон А. Цисляк
CondenHistSub

ЧАСТЬ ПЕРВА:

НА ЗАПАДНЫХ ОКРАИНАХ ДЕРЖАВНОЙ РУСИ:

На западных Карпатах по обоим сторонам Бескидов, по меже річками Попрадом, Дунайцом и Сяном, из покон віка жиє русске племя лемко-русинов. Даколи в глубоку старину тота территория лемков-русинов была родином білохорватов и ядром Червеной Руси, котра то на зарі истории русского народа входила в состав древне русской державы князей Олега, Игоря, Владиміра и Ярослава Мудрого, с первоначальном столицом в Києві, а потом яко Галицко-Русске Княжество Ростиславичов и Романовичов аж до 1340 р., коли то Червену Русь захватил польский князь Казимир ІІІ.

С того часу наша Галицка або Карпатска Русь много разов переходила под власть чужих держав, як Австро-Венгрии, Словаков и Поляков, и хотяй послі І Світ. Войны, революции и розвала Австро-Венгрии, возродилися або повстали новы народны державы, и хотяй гдеякы восточны части Галицкой Руси были возсоєдинены в русской державі, но сама западна часть — Лемковина была етнично и политично розділена на дві части, и часть приділена была до польской, а друга часть до чехословацкой державы.

Из того видно, што наша Галицка або Карпатска Русь в загалі, за царскых уж часов до великой русской державы не была включена, або до так званой царской России николи не принадлежала, но помимо того, весь наш карпаторусский народ в чужих державах национально и социально угнетаный, завсе ориентувался на Восток до свого великого русского брата и вічно мриял и стремился до объєдинения с великым русскым народом. Но, што творилося там дальше на Руси (в России) того наш народ дуже мало понимал, або даже и ничого о том не сознавал.

Длятого, нам карпатороссам буде то не лем дост интересно и научно, але и дуже полезно поняти и дознатися ближе правды о том, што творилося там в русской державі на загал, як повстало самодержавие, коли и як заводилося там “кріпацтво” або невольниче право, и што довело до русской революции и свержения царского правительства.

НАША НАРОДНА НЕВОЛЯ:

Мы старшы люде выходцы из Карпатской Руси Лемковины (Галичины, Буковины и проч.) мы сами частично переносили чуже народный гнет и насильства старой “панщизны”, но о много больше наслухалися от нашых старшых людей, отцов и дідов, якы сами они ище переносили и запамятали тоты стары панщизняны часы, як то они мусіли насильно повиноватися завсе волі панов, якы мали власть житья або смерти над бідным народом, як они мусіли тяжко робити и працувати на богате и роскошне житья своих панов и рабовладільцев, або як они мушены были робити 4—6 дней для пана, а 1 день для себе, або треба было робити у пана за 10 або 12 сноп для себе. Кромі того треба было платити незмірны податкы и отробляти всякы иншы потребы для пана на його фольварку.

Такы и всякого рода иншы порядкы заводилися для панскых роскошов и богатства, заводилися там с давных ище часов римского або германского права, но они змінялися с часом на ліпше, або на горше, залежно от того, як коли и до котрой державы нас прилучали.

Но, коли взяти на загал, то здаєся, што наш карпаторусский народ николи так тяжко не пострадал в чужих державах, як страдал весь великорусский и украинский народ за часов самодержавия и кріпостного права в царской России.

ПРАВА И ЗАКОНЫ НА СТАРИННОЙ РУСИ:

Тепер найперше нам треба познакомитися ближе с историом старинной Руси за княжих часов. В давну старину за княжых часов на Руси, всякы права и законы установлялися по воли всего народа на созываных народных вічах. В тоты часы, т. є. аж до татарскых нападов на Русь, русскы князьи не были самодержавными правителями на Руси. Их призывали на княжение по волі и рішению народного собрания або віча. Князьи заключали с народом договор с присягом и ціловали крест с обіщанием, што будут управляти согласно народному обычаю.

Князь не мог сам розпоряжатися во всім и поступати тогды по свойой власной волі. Народне віче было тогды сильнийше от власти самого князя.

У князей были невеликы воєнны дружины, а головна воєнна сила русской земли складалася тогды из городскых и сельскых наборов, из земскых збройных полков, и народом выбранными их начальниками во главі. Длятого то, коли князь притиснял жителей, або нарушал их обычаи, то народне віче могло сказати князю: “Не хочеме терпіти больше твого насильства, заберайся от нас, а мы знайдеме собі другого князя.”

Тогды русский народ не был ище в рабском положению, народ сам принимал участие во всіх общественных ділах. Коли самы князьи хотіли начати войну, они должны были просити согласия на то на народном вічу, значит звертатися за порадом до всего народа, и народне собрание рішало, идти або не идти на войну.

Народне собрание выберало также свого намістника и старостов, котры присутствовали на княжеском суді, штобы не дати в обиду земскых людей (селян), княжеска дружина не могла тогды властвовати и издіватися над городскыми и сельскыми жителями, як то потом издівалося над тым народом дворянске войско при московскых царях. В тоты часы князям навет заборонялося набывати або скуповати землю в своих княжествах.

Земщина, т.є. все коренне земске население Руси, чувствовало тогды свою силу. Оно уважало своих храбрых князей, но не унижалося и не раболіпствовало перед ними, и не признавало их за земных, всемогучых богов. Значыт, земска народна сила перевысшала в тоты давны часы силу князей, русский народ не был тогды порабощенным у своих правителей и был ище свободным народом.

Но то не означало ище, што в давны часы на Рухи было полне равенство меже людьми. Были и тогды богаты або “ліпшы” люде, были “середны” и были и “бідны люде”. Богатых людей было больше в городах (містах), они богатілися из торговли, котру вела Русь з Греками и Хазарами. Богаты люде куповали собі рабов, котрыми розчищали цілинны земли на орны поля, и так росшыряли свою господарку. (В давны часы рабами были звычайно воєнно-плінны, котрых заберали, а потом продавали их в рабство богатым).

Бывало часом и так, што обіднівшы свободны люде сами запродавалися на службу к богатым, штобы из заробку могли завести свою сельску господарку. Такых людей называли “закупами”. Но такых подневольных людей не было тогды много на Руси. В селах жили тогды свободны земледільцы. Они прочищали и орали свою землю, полювали за звіром, занималися рыболовством и пчеловодством. А свободной, никым не занятой земли было тогды сколько кому угодно, и никто не требовал за землю ниякой платні або податков. Всі поля, лісы и рікы были тогды открыты и свободны русскому земледільду або звіролову. И где только доходили топор, пила або плуг (соха) там могла поселятися деревенска Русь.

На початках русскы славяне занимали плодородны южны (полудневы) земли рікы Дніпра и його приплывов. И там у них скоро выросли большы торговы городы, як Києв, Чернигов и другы. Києв, особенно тогды быстро розбогатіл. Всі лісны товары, як футра, мед и воск, якы добывали русскы славяне сплавлялися тогды до Києва, а из Києва купцы іздили з ними в чужы стороны и там их продавали. Зато києвске княжество сталося скоро и богатым и найбольше заселенным.

Всі старшы в роді князьи старалися тогды попасти на княжий києвский престол, всі они добивалися києвского княжения.

Но, на києвске княжество уже из давна нападали дикы кочевикы, с початку печенигы, а потом ище больше дикы варвары половцы. В ХІІ віку они преградили торговы пути из Києва до Царгорода, и часто своими нападами опустошали южны княжества, заберали много жителей в плін (неволю), а потом продавали их в рабство. Тогды в тых містах житья стало небеспечне и трудне так, што придніпровскы славяне начали покидати києвске княжество, часть из них повертали взад поближе в нашы стороны, но большинство из них подвигалися дальше к сіверо-востоку, в больше холодну, сурову и неприступну сторону.

Они проходили зо своими топорами и плугами через дремучы лісы аж до берегов рікы “Ока” и верхнього Поволжа, где жили тогды финскы племена. Племена тоты были мирны и славяне не воювали с ними. Славяне - россы поселялися коло них, сроднялися разом, а с тым змішовалася и народна культура.

Послі того переселенияся малороссов из юга на восток, києвске княжество много опустіло, но натоміст берегы Окы и Волгы начали быстро заселятися. Там повстало теперь сильне Суздальске Княжество с новыми городами: Владиміром, Москвом и Тверью. Тепер осередком Руси стал не юг, а сіверо восток.

Суздальскы князьи Андрей Боголюбский и Всеволод Больше Гніздо, хоц они были и считалися старшыми князями, но они уже не хотіли переноситися до Києва, а жили во Владимирі, а києвскых князей держали под свойом властьом. Из за того, што теперь там на сіверо-востоку володіли великы русскы князьи, тоты земли называли Великом Русью, а народ великороссами.

КОЛИ И ЯК ПОВСТАЛО САМОДЕРЖАВИЕ НА РУСИ?

(Теперь приведеме коротко выдержкы из русской истории за Л. Шишком. Невіроятны разказы из часов царского самодержавия.)

Не на долго оставалося в спокою и Суздальске княжество. В 1237 року на Русь нагрянула огромна татарска орда, она вынищила большу часть русского населения, а остальных забрала в своє подданство. Было то страшне несчастье для всей Руси. Послі того нашествия татар, русскы люде перестали быти свободным народом. Они подпали уж тогды в татарске ярмо, и мусіли во всім повиноватися татарскому хану.

Теперь Русью управляли уж ханы. Татарский хан обложил тогды русский народ поголовным (на кожду особу) податком, а для сбора тых податков, хан призначил попередных русскых князей, як своих подручников. С того часу русскы князьи не залежали уж больше от народного “віча”, а зависіли во всім от татарского хана. Перше князьи радилися зо самыми жителями и заключали договор з народным вічем; “Ярлик” (назначение) на княжение, а так верталися управляти народом, — а теперь они іхали в Золоту Орду, там получали от татарского хана, непросячы от народа согласия.

Подъяремный русский народ не мог противитися волі Хана и мусіл повиноватися во всім тым управителям, котрых хан над ним поставил. А то были тоты самы русскы князьи, но теперь не были выбераны народом, а наставниками татарского хана.

Одного из тых русскых князей, татарский хан або “царь”, як начали його называти русскы, — назначал старшим або великим князем, а всі остальны князьи мусіли были повиноватися тому старшому князю, а котрый не повиновался, того хан казнил смертью, а в його княжество посылал татарске войско с приказом палити села и міста и вынищовати жителей.

Послі такых дикых розгромов ужасный страх завладівал русскыми людьми на долгий час и они не могли навет подумати о давной вічевой свободі. Заміст давной свободы, теперь поширилося рабство на Руси. Сам великий князь теперь, коли приходил в “Золоту Орду”, то он ползал на колінах перед шатром татарского хана и кланялся йому до земли. Но, зато он у себе дома также требовал, штобы всі ползали перед ним на колінах. И так скоро потом на Руси началося битье людей бичами, завелися тілесны мучения и смертны казни на рынках.

Отже, в тоты часы на Руси возвысилися Московскы князьи, они ліпше от другых князей знали угодити грозному татарскому хану, и с помочом його войска подчинили свойой власти всіх остальных русскых князей. Они соберали дань (податкы) в пользу хана по всей русской земли, но при том они не забывали и за себе, и зато дуже скоро розбогатілися сами. Так они начали скуповати цілы сусідны обшары земли и волости и розширяти свои владіния, а у гдекотрых менших слабых князей, просто заберали або силом отнимали их княжества. Такым способом они скоро собрали в своих руках и привластили собі близко всю русску землю.

Такий захват совковскыми князями всіх другых русскых княжеств, называли они “Собиранием Руси”. С того и началося самодержавне Московске Государство.

Послі татарского нашествия, спераючися на татарского хана, Московскы великы князьи подчинили свойой власти всіх другых князей и сталися самовластными на Руси. О русском народі ніт што и говорити. Народ был пліненный и порабощенный в татарске подданство и мусіл безпрекословно повиноватися своим правителям.

С часом, потому, коли Золота Орда ослабла от внутренной незгоды и роздоров и роспалася на части московскы князьи освободилися от власти хана, перестали платити ханам дань, и сами стали называтися царями. Из прежных наставников хана, они сталися теперь самодержавными правителями. Но положение русского народа ничым не измінилося от того на лучше.

Татары и до того не сами управляли Русью, а управляли нею через московскых князей, котрым передали свою власть. Власть и теперь оставилася така сама, яку створили татары, то єст неограничена самодержавна власть, власть азиятскых поработителей над покоренными народами.

Давны “вічевы” порядкы не вернулися больше на Руси по уході татар, бо послі 200 літного татарского ига (ярма), там на Руси закріпилися совсім татарскы порядкы. Они просякли в душы русскых людей так, што они привыкли смотріти уже сами на себе, як на рабов, як прирожденных слуг-лакеив свого пана або государя. И в такой-же рабской вірі старалася воспытувати их и русска православна церков. Русске духовенство уж с давна перешло на сторону сильных (міра сего) московскых князей. Оно во всіх своих поучениях и молитвах усердно твердило простому народу, што не татары установили тоты лакейскы порядкы, а были они установлены самым Богом, штобы в рабском послушанию терпіти и подчинятися своим правителям и наставникам.

До того великы князьи, або “цари” як они потом зачали называтися, теперь они мали больше своє войско, яке складалося из преданных им дворян, а не так як давно, што у князей были только свои невеликы дружины. Но, коли Московскы князьи ставали возвысшатися, то и дружины (бояры) менших князей переходили на больше выгодну службу до богатых московскых князей.

Такым способом на службі у великого князя собралася многочисленна дружина (войско) из дворян, як они теперь начали называтися, а тоты дворяне на ділі составляли собственне войско московского князя. Между тым всім, народне ополчение (узброєние) уж давно ищезло, у народа не было теперь ни оружия, ани привычкы к воєнному ділу. Вся воєнна сила сосредоточена была теперь в руках московского князя, и он мог силом заставити народ повиноватися свойой волі.

Такым путьом возникли на Руси московскы самодержавны порядкы. Во главі стоял царь, котрого духовенство обратило в земного полу-бога. Царя окружали бояры, по большой части из давных меншых княжескых родов. Они сиділи в думі и в приказах, (законодательных разпоряжениях), але головным обовязком их было охраняти царскы доходы.

Такых бояр цари посылали во всі городы, в роді теперішных губернаторов. Воєводы іздили по волостям, где насильством и пытками вымучивали от селян грошы. За боярами были дворяне, якы составляли царске войско и приводили в исполнение царску волю. Царска воля заміняла для них и віру и закон.

Зато дворяне были возведены царьом в высшу кляссу людей, а весь остальный народ належал уж до низшой податковой кляссы, то были, “чорны и подлы” люде. Они должны были рабствовати, служити и робити на высшу кляссу людей, и платити царю податкы.

ЗАВЕДЕНИЕ КРІПОСТНОГО ПРАВА НА РУСИ.

Головным занятием русского робочого населения, так як и давно было земледілие. Коли татары завоювали Русь, тогды весь русский народ занимался земледілием, зато татары называли русскых “християнами”, або крестянами и тота назва осталася в народі до того часу.

По татарскому праву, вся завоювана земля принадлежала хану, а зато потом и московскы князьи, перебравшы власть по татарском хані, присвоили всю русску землю для себе и брали за нью дань - податок зо всіх крестян-земледільцев. Так вся давно крестянска земля перестала быти крестянском, теперь належала она до царя, а то значило, што селяне - крестяне сиділи на государственной земли и длятого несли за ню всякы повинности, а в том они должны были кормити и содержати царске войско. Грошей тогды было мало, зато цари заміст платити своим служащим дворянам грошами, они роздавали им земли, на котрых сиділи крестяне.

Получившы таку заселену людьми землю, дворяне ставалися поміщиками, но земльом владіли они лем дочасно, покаль они несли царску службу, а коли же поміщик умер, то земля передавалася знов другому служащому дворянину и знов не на власностъ, а лем до ужитку аж до його смерти.

Так возникло на Руси локальне право дворян, котре в початках не дотычилося крестян, а дотычилося только одной земли, и то не на вічну власность, а лем тымчасового єй ужитку.

Вічным правом на землю пользувалися тогды лем царь, и гдекотры бояре из давных княжескых родов, а также и многы монастыри, котрым цари и бояре даровали свои земли, штобы по смерти забеспечити собі выгодне місце в раю. Завдякы такому суевірию, в руках духовенства тогды скотилося много земель, а гдекотры монастыри владіли тогды уже огромными земными богатствами.

Такым образом очевидно, же послідовательно вся земля московского государства была уже разобрана высшом кляссом. Найперше земдя належала царю, котрый зберал податкы от крестьян, землей владіли давны княжескы роды, и на праві пожизненного ужитку владіли службовы дворяне и поміщикы, а в конци монастыри и духовенство.

Не владіли земльом лем сами землеробы, т. є. люде, котры своим трудом землю обробляли. Сами земледільцы або землеробы были цілком лишены права на власность свойой землі. Они могли только обрабляти чужу, т. є. царску або поміщичу землю, робити и платити податкы, то значит отдавати половину або третину своих плодов землевладільцу. Така то была тогды основа всего московского государства.

Высшы кляссы завсе стремлятся к тому, штобы примусіти низшы кляссы робити для себе, длятого они найперше забрали землю в свои рукы. Тогды-то трудове и робоче население, котре завсе в старину жило только из земледілия, лісного або рыбного промысла, попадат теперь в житьову зависимость от землевладільцев.

Забравшы власть в свои рукы, цари поспішили забрати и землю в свои рукы. Тым они закріпили свою власть, а тым самым и забеспечили положение свого дворянства, без котрого они не могли обыйтися, им начали роздавати землю.

Так на том захваті земли царями и на той роздачі єй дворянам, было построєне государство. Царску и дворянску власть не возможно отділити от царского и дворянского земледілия, єдно завсе звязане было и трималося єдно на другом. И того факта не треба было николи забывати русскому народу.

А мы видиме, што на протягу множества літ русский народ не преставал вірити и надіятися на тото, што в конци царь отбере от дворян землю, а отдаст єй крестянам-земледільцям. Из того видно, што народ русский не сознавал ясно фундаментальной основы самодержавия на Руси. Треба собі уявити то, што необходимом силом опору для всякой власти являтся богатство. Бідный не може владіти над богатым, а бідне правительство не може владіти над богатым народом, а головне богатство каждого народа заключатся в земли, особенно в тот час, коли головным народным промыслом являтся земледілие.

Коли бы так в московского правительства не было бы на руках земли, то оно николи не могло бы статися “самодержавным”, бо оно было бы біднійше от народа. Длятого власно, при старых “вічовых” порядках, русскым князям даже запрещено было привлащение земли в своим княжестві, штобы тым князи не усиляли свойой власти над народом. Отже, по той же самой причині царске правительство, як долго оно остаєтся самодержавным, оно николи по свойой волі не звернет народу отняту от него землю, штобы не ослабити свойой власти над ним. И власно потому самодержавне правительство не может отобрати землю от дворян, а передати єй крестянам, бо тогды оно лишило бы себе головной дворянской подпоры. Дворянство уж с давных часов была правдива подпора престола и самодержавной власти и зато цари, штобы удержувати и усиляти свою власть, роздавали землю дворянам и тым самым они подчиняли им робочий народ. И навет само царске правительство не скрывало той правды от народа. Оно навет приказувало губернаторам и священству постоянно голосити и повторяти крестьянам в церквах: “Послідуйте совітам и руководству дворянства, и не вірте вздорным слухам о даровых прирізках (участках) земли”.

Но, штобы выобразити собі и поняти правдиву сущность того, нам треба перше познакомитися с историом самодержавного русского государства.

ПОЧАТКЫ КРІПАЦТВА НА РУСИ:

На самых початках, роздавание царями земель заселеных крестянами дворянам, не означало ище прикріпления крестян к той землі. Хотяй крестяне были безземельны, но покаль они были ище на полу-свободными людьми. Они могли ище тогды переходити от єдного поміщика землевладільца к другому, но где бы они пришли и на якой земли бы осіли, то они мусіли нести всякы повинности и были в зависимости от свойого землевладільца. Значит, што свободными они были праві, только (в теории, на око) по названию. Но, скоро была отнята им и тота послідна на око видима свобода. Правдиве формальне закріпощение крестян началося на казенных (государственных) царскых землях. Там крестяне з самого початку были звязаны вспольном запоруком. Кажда волость (господарство) общества всіх государственных крестян, должна была платити назначенный податок, и нести повинности за означену им землю вообще (всі разом), за всіх их общом поруком. Єсли бы єден член ушол из их господарства, то всі остальны мусіли платити такый самый податок и нести всі повинности, як и перше. Длятого власно, самы государственны крестяне змушены были затримувати своих сообщественников (прикріпляти их к землі) а отпущали их только тогды, коли они знашли за себе заступника. Так подобно и дворяне-поміщикы потом захотіли утруднити свободный переход крестян, штобы кріпче держати их в своих руках. Они начали добиватися полного закріпощения крестян к землі. Ту треба спомнути, што для многых крестян свободный переход от єдного поміщика к другому, и без того был затрудненый их біднотом.

Безземельны крестяне часто приходили до поміщика з голыми руками, без коня, без коровы и без всякого господарского знаряжения. Штобы начати господарку, они мусіли позычати у поміщика сімена и робочый скот, платити йому аренду за хижу и дворовы забудования. В виду того, они ставалися должниками, и не могли уйти от него, покаль не уплатили йому всього долга.

Длятого и свободный переход для поміщичых крестян из за бідноты и задолженности, скоро почти сам собом прекратился. Значит, што уж саме вывлащение земли, отняло у крестян их давну свободу.

Коли так прекратился свободный переход крестян от єдного поміщика к другому, то остался ище єден выход, а то перевод их с земли на землю самыми поміщиками. Єсли сам крестянин не мог оставити свого землевладільца, то за його согласием другий поміщик заплатил за него долгы, мог перевезти його на свою землю. И так робили богаты землевладільцы. Коли им треба было робочих людей, то на весну або под осень они посылали своих приказчиков выкупляти чужих крестян из долгов и переводити их на свою землю. У богатых поміщиков крестянам было легче жити, и они радо соглашалися на такы згоды.

Но, с концом 16-го віка, при Ивані Грозном начали появлятися царскы указы, на початку о запрещению богатым поміщикам переманювати крестян из казенных (царскых) земель, а потом также и от меншых поміщиков, штобы не было убытка царской казни и службовым дворянам. То был ище єден крок до полного закріпощения крестян.

Тепер крестянин не мог освободитися от свого поміщика, навет при помочы богатого землевладільца, а поміщик перестал боятися, што крестяне уйдут от него, хоц он буде их ище больше угнетати.

Крестинам теперь оставалося только єдно спасение, а то: бігство.

Коли крестянам было дуже тяжко жити у дакотрого поміщика, то они переходили потайно на землю другого поміщика, и там скрывалися у него. Так як поміщикам треба было робочих рук, то многы из них принимали такых біженцев и помагали им укрыватися. По указу царя Федора из 1597 г. поміщик мог глядати такого біжавшого от него крестянина только за 5 літ часу, а послі того часу крестянин переставал быти біженцем, и поміщик не мал больше на него права. Тот указ осталял ище крестянину, хоц лем невелику надію на спасение, треба было йому прожити 5 літ дагде в глухых лісах, и так выходил свободным.

Поміщикы, конечно, глядали своих біглых должников, но по уплыві срока 5 літ, тратили на них свои права, длятого поміщикы старалися закрыти селянам отвор або проходну діру. Они зачали домагатися у царей такого права, штобы они могли безсрочно (завсе) глядати своих біглых крестян и штобы крестяне до конца свойой жизни не могли освободитися от них.

Цари не давали на долго проситися, и скоро дали им на то своє согласие. За царя Михаила Романова, тот 5 літный срок для розыска (глядания) крестян-біженцов был продолжений на 10 літ, а знов за царя Алексия Михайловича, указом 1645 г. был уже отстраненный всякий срок, значит, крестяне окончательно были прикріпленны к той землі, на котрой застал их тот указ. Они мусіли вічно жити на той землі и робити на свого землевладільца.

Так поміщикы достигли свойой ціли, што в конци обратили в вічне рабство первоначального свободного русского орача-господаря, того самого богатыря Миколушку Селяниновича, о котром співатся в старинной басні (легенді). С початку у богатыря отняли землю, потом його самого обезсиленного и збіднілого помалы прикріпостили к землі, покаль наконец не наложили на него сильну ціпь (кайданы), и не отдали його в полну власть дворянам и поміщикам. Така то єст правдива история давно кріпостного права в царской России.

ПОСЛІДСТВИЯ ОТ КРІПОСТНОГО ПРАВА

Што дальше діялося и як обходилися поміщикы с тыми закріпощенными рабами, узнаме ище из несколькых, гдеякых слідующих приміров.

По мірі того, як у крестян отнимали всі их права, возрастала над ними власть поміщиков так, што крестяне все больше и больше перетворялися из людей на животну або рухому власность (просту худобу) своих господ.

За царя Михаила Романова вьшол указ (закон), што коли поміщик не мог бы заплатити свого долга, то казна (госуд-банк) буде стягала його долг от крестян того поміщика. Єсли бы поміщик убил чужого крестянина, то властитель убитого мог взяти у него на замін ліпшого його крестянина, с женом, дітми и всім його животным скотом. Из того видно, што крестяне не уважалися уж тогды як люде, але як движима річ.

Скоро потом, поміщикы начали обмінюватися своими крестянами, даровали их в придане своим дочкам, передавати их из рук в рукы по договорам. Так приміром в 1632 г. при том же царі М. Р. поміщица, вдова Лукерия Куломзина передала свому пасербу своих крестян: Мишку Минина, Шумилку Семенова и Ларка Евстатиева с женами, дітми и всіми их животными. А в єдной записи по угоді между двома тогдашними поміщиками сказано так: “да он же Роман уступил мні Ивану Ивашкину крестянина Федьку, прозвище Чукан с женом, дітми и животы”. Знов в иншой записы: “Се аз Иван Осипов, сын Сазонов в сем 1675 г. дал затью свойому Лукі Юрьеву, за дочерью своею Пелагиею в приданное, свою вотчинную крестянку вдову Агафию Викулину с дітми єй: Кузькою, Карпиком, Остапкою, Тихоном, да с дочерми, дівками Дарицею, да Матрешкою”.

А подобных приміров из тых записок осталося безконечне множество.

При царі знов Алексею Михайловичу, был навет изданый особый указ, о дозволению поміщикам продавати своих крестян без земли на свозі (ярмарок) в роді рабочой скотины. А с тым разом, поміщикы присвоили собі право тілесного наказания, т. є. бити крестян розгами и батогами. До полного закріпощения того ище не было, тогды поміщик мог за кару забрати у крестянина даякий даный йому участок земли, мог наложити на него даякий штраф, но бити його не мал права.

Теперь поміщикы в своих приказах писали так: “А кои (котры) крестяне учнут не слушатся, их надо имать и веліт их бить нещадно батогами на сході перед людьми”. И так разпространился на всей Руси тот оскорбительный, страшный обычай тілесного наказания крестян, што взрослых, а часто и старых обнаженных людей били, як и где попало.

Отже, теперь мы знаме, што таке позорне діло началося на Руси разом с кріпацкым правом, коли то цари зо своим дворянством обернули крестян во свою робочу скотину.

Коли же на Руси завелося уж кріпацке право, то разом с тым ище больше участилися побігы крестян, бо крестяне все такой оставалися людьми и не хотіли терпіти такого унижения. Зато, они помимо желаний царя и дворян, часто убігали от своих господ, при чом нерідко палили их дворцы и убивали своих господ. Длятого то царь Алексей Михайлович выдал особый указ в 1658 г., штобы такых біглецов ловити, а потом вішати або казнити их смертью.

Но, не помог и тот царский указ, бо крестяне и дальше глядали спасения в бігстві от свого тяжкого житья. Многы уходили в степы, на Дон и на Волгу, где они разбойничали або приставали к козачеству. Нам знана история, што в 1669 г. донскы козакы и біглы крестяне подняли бунт против поміщиков и под проводом Степана Разина вырушыли на Москву. Они потерпіли неудачу и были побиты царскым войском. Сам Степан Разин был роздертый на четырі части, а множество тых восставшых крестян были перевішаны або посіканы до смерти.

Так при царі Алексею Михайловичу было установлене полне право кріпостне в России, а с тым окончательно был закріпленый союз между самодержавным царскым правительством и дворянством.

УПРАВЛЕНИЕ ЦАРСКО-ДВОРЯНСКОГО СОЮЗА.

Теперь переглянеме коротко, як дальше управляли тоты союзники “Цари и дворяне”.

Тогды по всей Руси было уж заведене рабство, а где єст рабство, там єст темнота и невіжество, бо лем свободный народ може мати доступ до просвіты и образования. Саме рабство держится головно в невіжестві и браку просвіщения в народі.

Нам відомо теперь, што русский народ пережыл долго в рабстві под властью татар, а потом московскых царей, зато ніт дива, што он оставался в полном невіжестві. Тогды, навет самы єго управителі и духовны руководителі были мало учены, або навет и совсім безграмотны. Літописец говорит, што великий князь Димитрий Донский “не был хорошо изучен по книгам”. А великий князь Василий Темный не уміл даже читати.

Ище при старых московскых порядках русскы цари мусіли призывати к собі на службу многых чужестранных офицеров, майстров и лікарей. Чужоземцы жыли на предмістю Москвы, званом Німецка Слобода. Царь Петр, ище з малолітства был дуже любопитным хлопцем, он познакомился з гдеякыми майстрами из Німецкой Слободы и часто заходил, головно к швайцару Лефорту. От него Петр узнал много о чужых краях, и виділ на власны очы, што чужинцы во многых ділах понимали больше от русскых. Он выростал не в дворцовых стінах, где не было доступа свіжой мысли, а на полной свободі, где получил не царске, а свободне воспытание, а зато он больше, як другы цари походил на обычайного человіка, а не дворцового идола. Он жил з матерю в подмосковском селі, в дали от бояр и духовенства. Там он собрал своего возраста дітей из небогатых дворян, составил из них полкы и при помощи тых полков, он потом отнял власть от свойой старшой сестры, запер єй в монастырі, а сам стал управляти государством. Петр был от природы человік большого розума. Коли он понял, чого недоставало русскому государству, он не щадил ни себе, ни другых, штобы все перестроити по новому.

Но, Петр был найперше царь, и зато думал лем о свойой царской пользі. Йому треба было сділати сильным своє государство, и мати надост грошей в свойой казни, а до народа было йому мало діла. Он любил Россию так, як поміщик любит своє хозяйство, — другы цари смотріли на Россию, як на свою мачоху, а на народ як на своих кріпостных рабов. Такы подобно были и близкы совітникы перших московскых царей, што гдекотры не знали навет своє имя подписати.

Не ліпше было діло в грамотности духовенства, в селах по церквах священникы проповідей не говорили, а церковна служба состояла в кадилі перед иконами и піния для народа непонятных церковных стихов. Русскы люде дуже мало розуміли свою віру, навет молитвы не знали, а все діло заключалося для них в иконах и обрядах. Они знали лем, што они русскы и православны, но никто из них не мог бы объяснити, во што он вірит. Така то была тогды на Руси церковна віра. Во всім треба было поступати по старині; “всім страстям мати мніние (мысель), а ум — то самый злый враг человіка”, так говорили духовны руководителі народу.

И царске правительство старалося тримати народ в темноти, зато не пущало своих подданых за границу в чужы краи, штобы они не виділи обычаив чужых стран и штобы там дачого не научилися. При такых порядках русске государство было долгий час отгороджено як бы каменном стіном, от всего остального мира. По той же самой причині и весь народ был бідный и вся держава разорена. Не было в державі ни фабрик, ни заводов, ни ремесельников, а от того был брак доходов и прибыли. А то як добре оружие, порох, пушкы и всьо треба было куповати в чужых странах.

И так хотячы, нехотячы уж попередны цари начали думати, штобы розстатися зо старином и допустити хоц лем немного світла и наукы, основати высшы школы, начати печатати світскы книжкы и переняти дашто от иностранцев. Но головным преобразителем русского государства был царь Петр Первый, названый зато Великым. “Не отчизна для крестян, а крестяне для отчизны, не царь для народа, а народ для царя” — так смотріл на государство и Петр.

Войско потребне царям найперше. Войско царей московскых того часу складалося из козаков, из стрільцов и из дворянского узброєния. Петр не довірял вірности свободолюбивых козаков, котры выберали своих отаманов, ани также и стрілецкым полкам, якы также выберали свою старшину. Длятого он задумал установити в себе постоянне войско, яке уж было тогды во всіх иностранных державах. При таком устройстві наберают рекрутов не из дворян, а из всего народа, заберают их далеко от свого родного міста, и тримают их надолго в казармах в строгой дисциплині, под начальством офицеров из дворян.

Там под постоянным надзором и в постоянном страху рекруты скоро обращаются в воєнну машину. Они стаются сліпым орудием в руках начальства. Крестьяне теперь мусіли нести аж тройну повинность — давати рекрутов, платити податок для офицеров, и кріпостну як и перше.

Устроившы так войско, Петр задумал разширити свои владіния, и пробитися к морскому берегу. Берегы Чорного Моря заняты были крымскими татарами, под владінием турецкого султана, а берегы Балтийского Моря — Шведами. Зато в Россию тогды не было простого доступа многым заграничным товарам, а русскы товары знов мусіли платити великы пограничны цла и оплаты.

Петру треба было грошей на удержание свойой армии зато начал пробивати собі дорогу к морю, и долго воювал с Турками и зо Шведами, за потребны йому морскы берегы. Для осягнения той ціли он не щадил никого и ничого. Он наберал рекрутов для войны и многы тысячы людей на казенны роботы для будовы морскых пристаней и кораблей и пр. так, што больша часть населения знаходилася на воєнной службі, або на казенных роботах, а остальны мусіли платити подвойны и потройны податкы.

На конец, послі побіды над Шведами в 1708 г., на берегу Балтийского Моря у устья рікы Нева, Петр начал строити новый город “Петроград”. Постройка города стояла много гроша, но и множество людскых жертв. Около двасто тысяч людей было взято на постройку, из котрых мало кто вернулся домов, они перемерли там от болізней або переутомления в роботі. Но Петр не жаліл людей, подобно як он не жаліл и себе самого. На народ он смотріл тоже по старому, як на природженных царскых рабов. Но зато старался он за дворянами, он выдал тогды дуже важный закон, што всі помістны землі были отданы дворянам на вічну власность.

Дальше потом, о пару десят літ послі Петра, цари освободили дворянство от несения воєнной службы, а тот обовязок возложили зас на плечы крестянства. Так, хотяй Петр своим переустройством новых порядков зробил много для пошырения и розбудовы свойой державы, но для улегчения житья простого народа, он не зробил ничого доброго. Його воєводы и начальство по прежньому грабили, мучили, разоряли и продавали простый народ, як скотину. Зато и в народі росли сильны раздражнения против Петра, што доводило нераз до кровавых бунтов, якы Петр своими войсками жестоко усмирял и узтреблял.

Правда только, єдно нововведение Петра, што помимо воли самого царя, вышло потом на велику пользу простого робочого народа, а то было заведение наукы, яка проникла в Россию при Петрі. Петр и науку вводил, але только для свойой личной потребы и державной пользы. Йому потребны были учены люде, як майстры, воєнны офицеры и прочы, зато он посылал молодых дворян учитися в чужы державы, спроваджал к собі на службу ученых людей из заграницы и заводил в России середны и высшы школы для дворян. Початок к тому дал ище його отец.

Но наука служит всім, а не только царям. Наука, так як солнце, світит всім одинадково и разгонят народну темноту, и помагат народу видіти всьо, навет и то, што стараются правители скрыти от очей простого народа. Так и царь Петро потом ради потребы наукы, он сам прорубал широке окно (выгляд) в Европу, через котре начало пробиватися світло в темне русске царство. Из того часу знов правительство мусіло поборювати науку всякыми способами, штобы скрывати правду от простонародья.

Петро, названый Великым, подорвавшы своє здоровля умер предвчасно в 1725 р. на 53-ом року свого житья, не оставившы завіщания.

Послі Петра Великого на престол засіла його друга жена Екатерина Перва. Она была царицом только по имени, но заболіла и скоро потом через два рокы померла в 1727 р.

Послі Катерины І. на престол возведенный был малолітный родственник Петро ІІ. Был то роспущенный, лінивый до наукы и ничгодный хлопец. Головным дорадником был його тесть князь Меншиков, но молодый царь не любил його, и так скоро Меншиков был усуненый с должностей и высланый в город Березов на Сибирі. Тогды и Меншикова отобрано было 90 тысяч душ кріпостных крестян, 30 миллионов рублей и больше 200 пудов золотого и сребряного начиня (посуды).

Но скоро потом молодый царь простудился на полюванию, заболіл оспом и помер в 1730 р. Потому на царский престол была призвана и посажена вдова Анна Ивановна. Она была малограмотна и необразована женщина и сама не могла управляти государством. Была она легкомысленна, любила только роскошы и пышны праздненства. При цариці Анні Ивановні был єй любовник Бирон (бывший конюх), котрого она привезла из Курландии. Был то человік жестокий и царица подчинялася його волі. Он робил все што захотіл, а русскы вельможы должны были повиноватися, инакше им грозила казнь. Всі головны должности занимали тогды німцы. Так она процарствовала 10 літ, а перед смертью назначила на престол, новорожденного сына свойой сестры Ивана Антоновича, котрого объявлено было престолонаслідником. Но скоро потом на царский престол засіла його мати Анна Леопольдовна с Минихом во главі.

Тымчасом молодша донька Петра Вел. знала добрати к собі друзей из гвардейцев и с ними пошла в царский дворец, приказала арештовати Анну Леопольдовну, и так "Божией милостью” вошла на престол цариця Елисавета Петровна. Она царствовала 20 літ, сама она мало занималася государственными ділами, любила веселу жизнь, балы, праздникы, маскарады. Не была она учена, але и небыла глупа женщина, она дорожила мудрыми и досвідчеными людьми. За час єй царствования велася война с Прусией, але во всім государстві были страшны безпорядкы. Поміщикы мучили крестян, зато многы солдаты не верталися домов на Родину, многы крестяне поднимали бунты, або біжали в лісы и ставали разбойниками.

За наслідника престола, она спровадила свого племенника из Гольштына, принца Карла Ульриха. Был он з роду полуумный выродок шут (паяц), пропитанный німецкым духом ненависти к России. И теперь знов тот выродок “божий помазанник” послі смерти Елисаветы Петровны, был объявленный русскым царем под именем Петра Третого. Он скоро отдал Фридриху завоюваны русскыми войсками от Пруссов земли. Сам наділ на себе прусский мундур, и так в прусскы мундуры оділ свою гвардию, окружил себе німцями и объявил поход в Данию, воювати за Гольштинскы земли.

На счастье, ци нещастье России, царствование Петра ІІІ было прекращено, його власном женом. Она была также німка, привезена из заграницы, то была принцесса София Августа Фридерика и перекрещена на Екатерину. Но Петр ІІІ возненавиділ свою жену, ище коли был только наслідником престола. Он переіхал до другого дворца зо свойом любовницом, и заявил публично, што його жена дура, и што он запре єй в монастырь.

Но жена його София А. Ф. была далеко не глупа дура, а як раз была дуже мудра и хитра женщина. Видячи, што єй грозит опасность, она начала глядати собі помощников помеж придворными вельможами и среди гвардейскых офицеров, штобы Петра ІІІ звергнути из престола. В том ділі помагали єй головно братья князи Орловы. В часі коли гвардия готовилася к походу в Данию, Алексей Орлов и Василий Бабиков выіхали по Катерину до Петергофа и привезли єй до Петерсбурга. Там их войска уже замінили всі варты и заняли дворец. Был там уже архиепископ Веньямин, где приводил войска к новой присягі, а в Зимном дворці собралися члены синода, сенаторы, генералы и прочи, всі они ціловали крест на вірность Екатерині. И так “Божею милостью”, в Москві 1762 р. короновалася потом самодержавна всероссийска “Екатерина Вторая”.

С ей мужом Петром ІІІ, и другыми “божыми помазанниками, она справилася также по “божескому провідинию”, они нечаянно умерали, або внезапно пропадали.

Екатерина ІІ. подобно як и Петр Великий старалася укріпити свою власть и могущество. Она начала войну с Турцией и забрала Крым, потом приобрила южны степы и подошла к самым берегам Чорного Моря, чого добивался ище Петр Вел. Но всі тоты земли досталися не народу, а были взяты в казну, а потом розданы дворянам и поміщикам.

Потом знов при розборі Польши, часть прилучена была к России, другы части забрала Австрия и Германия, при том она не только прилучила правый берег Дніпра з малорусскым населением, но забрала для себе и польскы земли с коренным польскым населением. Полякы много раз поднимали восстания за свою свободу, но завсе были кроваво усмирены силом русскых царей.

Правдивой пользы от того не было ниякой, ни для народа, ни для русской державы вообще, а была только польза для тых знатных вельмож, котрым были розданы, одобраны от поляков помістья. Внутренне управление Екатрины ІІ, звернене было только к тому, штобы усилити дворянство, яко свою головну подпору. Жаден из русскых царей и цариц, не зробил так много поблажок и уступок дворянам, и так много зла крестянам, як зробила Катерина ІІ.

За час свого царствования она роздала многым своим любимцям около 800 тысяч государственных крестян, значит, тым она обернула их в кріпостных рабов.

Она завела кріпостне право во всей Малороссии (теперь Украині), где такого до того часу ище не было, бо крестяне могли тогды ище переходити свободно от одного поміщика к другому, як то было перше и во всем московском государстві. Но Катерина на выгоду дворянству завела в Малороссии полне кріпостне право.

В указі 1792 р. она розрішила продавати кріпостных крестян, як животну скотину за долгы их поміщиков. Она дозволила поміщикам высылати своих кріпостных крестян на каторжну роботу, без всякого слідства або суда. Наконец, она заборонила кріпостным крестянам подавати жалобы або скаргы на своих поміщиков. Штобы не робили з ними поміщикы, крестяне не мали права навет жаловатися высшому начальству, за што подлежали наказанию кнутом и высылку на вічну каторжну роботу. И так поміщикы пользувалися таком безграничном властью над крестянами, творили што захотіли, накладали на них незмірны податкы, мучыли их барщином и подвергали их невіроятным наказаниям.

Для приміра тут знов наведеме несколько указов из записок священника. В газетах часто печаталися такы объявления:

“Продается 30 літна дівка, и гнідая лошадь, их можна видіти у домі Губерн. Секретаря”, или “продается мужский портной (кравец), кухарь и вашманчик (сапожник-швец), тоже верховая лошадь и прочной роботы коляска”.

“Всім извістно бывали случаи, што поміщикы міняли сотню кріпостных людей за одну собаку, или за борзую суку отдавали цілую деревню с крестянами.”

"Поміщик Ефимов веліл (казал) жені свого дворового выкармливать двух щенят своей грудью. Муж этой женщины не змог вынести такого издівательства и утопил барских щенят. Поміщик приказал прижаривать ему ногы на раскаленных уголях”.

Можна бы написати цілу книгу о такых подобно невіроятных жестокостях, мучениях, а даже убийствах, якы уходили безкарно поміщикам, за их знущанияся над своими кріпостными людьми. Такы то были на Руси порядкы, за правления “Божией помазанницы” Екатерины Второй.

ПУГАЧЕВСКИЙ БУНТ И НАРОДНЕ ПОВСТАНИЕ.

Штобы позбавитися от такого гнета и мук, крестянам оставалося лем убіжати, або своя проста розправа. Многы крестяне біжали в Польшу и другы страны, штобы там скрытися от царской правды и милости. Часами крестяне мстилися и побивали своих угнетателей, зажигали их дворцы, а потом убігали. Из за такых жестокых угнетаний и недовольства, часто происходили во многых дворцах крестянскы бунты по всіх губернях, аж на конец, дошло до общого народного бунта або повстания, яке назвали Пугачевскым бунтом.

Мы много слышали уж о том Пугачевском бунті, но ище спомнеме о нем коротко: Емилиян И. Пугачев, был донскым козаком и много побывал на войнах. Потом он біжал на Кавказ и там скоро был избранный атаманом, но в конци он як біглец был арестованый и посаженный в тюрму. Йому удалося из тюрмы убіжати в Польшу, но коли повернул, то знов попал в тюрму, и так што 3 разы біжал из тюрмы, а теперь он попал на Ураль. В тот час между козацтвом началися слухы, што Петро ІІІ жиє (он же Божией милостью нечаяно умер) и што вмісто него убито другого, а не царя Петра ІІІ. Отже так Пугачев, под именем Петра ІІІ начал организовати недовольне козацтво и кріпостных крестян в свою армию, штобы отомститися цариці Екатерині (його жені) и всім дворянам и поміщикам, за невірность царю.

Он в имени царя обіцял своим войскам землі и волю и всякы выгоды, а дворянам жестоке наказание и люту смерть. Он думал собрати большу армию и забрати Москву, войска тогды в Москві не было, бо война с Турциом не была окончена. Так по дорогі на Москву было много великых сражений с царскыми войсками, где в большинстві он выходил побідоносно. Тото востание тревало близко два годы, так што Екатерина царица приказала заключити мир с Турциом, штобы войска ужити против Пугачева. Было то в 1774 г. — и тогды то в сражениях Пугачев потерпіл неудачу и поражение, много войска попало в плін, а сам Пугачев убіжал в Башкирию.

Он знова потом организовал свои полкы и много раз ище зражался с царскыми войсками, но в конци он был розбитый. Около два тысячи його войска было убито, шість тысяч попало в плін, а сам Пугачев біжал за Волгу. Но тым разом його довірены помощникы Чумаков, Творогов и другы здрадили Пугачева и передали в рукы царской власти. Пугачева розорвали коньми на четырі части, многых плінных крестян казнили, а многы біжали тогды поза границы на всі стороны. Многы из тых біжали аж до Карпат и там в нашых сторонах схоронилися по нашых селах на Карпатской Руси. Мы уже читали давнійше в нашой газеті “К. Р.” замічания, а также свого часу в календарі Л. С. была история о том, што названия родин як: Духновичы, Гарберы, Москвы, Копыстянскы и другы, по нашых селах на Лемковині, то потомкы тых давно убіжавшых крестян, послі того Пугачевского бунта в царской России.

ЧЕРЕЗ ТУМАН НАЧАЛО ПРОСВІЩАТИ.

Спомнено было уже, што цари принужденны были открыти доступ наукі в Россию для своих личных и правительственных потреб, а зато они мимо свойой воли мусіли открывати высшы школы, посылати молодых людей за границу, и дозволити печатати учебны книгы.

Так уже при Екатерині ІІ начали появлятися учены люде в России, котры обращали науку на служение и на пользу всего народа.

Первыми такыми людьми за Екатерины ІІ были Н. И. Новиков и А. Н. Радыщев.

Николай И. Новиков, родился в дворянской семьи, учился в Московском Университеті, а потом поступил на войскову службу и будучи гвардейским офицером он читал книгы и дополнял своє образование. Потом был приглашенный в Москву на службу секретаря в комиссии депутатов, где он познакомился с русскыми законами, а также с грубостью и невіжеством высшого дворянства. Послі окончения той службы, он вышол в отставку и начал выдавати в саркастично-шутливой формі газету “Жарт, сміх и правда”, в котрой он жартами и насмішками осміювал русскы порядкы и дворянскы самовольны выбрыкы. Особенно он нападал на кріпостне право. Така правда с очы дворян не любилася Екатерині и йому запрещено было издавати газету. Тогды он переіхал из Петрограда до Москвы, и там он завюл свою власну типографию, где начал печатати всякы полезны книгы, головно переведены из чужестранных языков.

Його книгы росходилися далеко и широко, и помагали просвіщению русского общества. При нем тогды собралися гдеякы честны и умны люде для помощи. Єден был сын богача Татищева, он отдал большу часть свого майна на помощь Новикову. Тогды Новиков и його друзья основали в Москві “Дружеске Общество”, с большим капиталом.

В имени того Общества основано высшу школу для подготовкы народных учителей, и много подобных цілей поширения наукы. За такы опасны для власти діла Новикова арестовано и засужено його “якобы в тайных замыслах”, но вмісто смертной казни, його заключено на 15 літ тюрмы в кріпости, где просиділ он до самой смерти Екатерины. Новый царь Павел по вступлению на престол, приказал Новикова зараз освободити. Он помер в 1818 году.

Другым такым человіком, котрый не страхался смерти, и первый поднял свой голос в защиту крестян и против кріпостного права, за царствования Екатерины был Александер Ник. Радищев. В молодости был он посланый правительством за границу для высшого образования. Там он увиділ много и много учился, но вернулся на родину проникнутый новыми мыслями. Он не мог оставатися спокойным и равнодушным зрітелем того, што водилося кругом, а головно не мог он стерпіти положения кріпостных крестян, и так он написал книгу: “Путешествие из Петербурга в Москву”, в котрой он описал всі бідствия и несчастья русскых земледільцев.

А. Н. Радыщев писал свою книгу за четырі годы, а потом он заложыл свою типографию. Он сам книгу отпечатал и начал єй широко роспространяти. Не было тогды ище цензуры и книга Радыщева не была затримана при самом єй выході и она скоро росходилася между народом, бо в ней первый раз была открыто высказана правда. Коли уж позднійше книга Радищева попалася в рукы Екатерины, то она от страху и гніву не могла придти до себе, и она от злости заплакала.

Радыщева скоро схватили, посадили в кріпость и осудили його на смертну казнь. Але цариця не рішылася казнити його смертью, а по свойому “милосердию” выслала його навікы в Сибирь, где он прожил до смерти Екатерины. Книгу одобрано от всіх у кого єй знашли и предано созжению (спалению). В России книга Р. была запрещена, але она была перепечатана за границей в 1849 году.

Такым образом мимо воли и недовольства властей, постепенно пробивалася и росла наука и просвіщение в царской России.

Наконец, в 1796 г. Екатерина ІІ умерла от удара, она лежала безмовна и нерухома. Тогды на престол вступил єй сын Павел. Был то человік строгий и вспыльчивий, але часом добрый и справедливый. В нем нахопилося много злобы против Екатерины и высшого дворянства, зато он начал рвати все и перестроювати по свойому. Павел начал теперь мститися на дворянстві и многых любовниках Екатерины и за убийство його отца Петра ІІІ. И на все дворянство началися гонения, многы вельможы дворяне были изгнаны из Петербурга, а с крестянами он обращался так, як правдивый потомок давных московскых князей. Он освободил из тюрмы Новикова и вернул из выгнания Радыщева. Поміщикам он запретил тілесне наказание, заказал им требование роботы в неділі, або больше трех дней роботы на барщині, а также наказал прекратити гонения на духоборов-старообрядцев.

Павел не терпіл найменшого противоречия свойой царской власти и на крестян смотріл, як на ничтожных черваков, але от його бішенного характера терпіли приближенны к нему дворяне и вельможы. Они, штобы позбавитися от вічного страха и трепета, составили заговор убити царя. Заговорщикы хитрым обманом перебрали царску охрану в свои рукы и вечером 1801 г. Павел был задушенный в своим дворці. Потом было объявлено, што государь Павел кончался от удара на сердце. И так через труп убитого отца по “Провидинию и волі Божой”, был коронованый його сын Александер І.

Александер І занял престол с добрыми намірениями. Його учителем был умный человік Швайцар из свободной страны и йому удалося защепити в сознание ученика отвращение к рабству и самовластию. С початку он намірял отказатися от престола, але потом видячи, яке зло творит России царске самовластие, он задумал приняти царску власть с тым наміром, што он созвет Земский Собор и передаст йому управление государством. Он намірял найперше освободити крестян, а потом отречися от “самовластия”.

Но от його замыслов до правдивых діл было далеко. Послі придворных совітников он надумавшися, придумал “Государственный Совіт”. Такий совіт обсуждат законы и подає своє мніние о них, а царь по своему желанию, потвердит, або ніт. Но головна ріжница в том, што члены совіта не выбераются народом, а назначаются самым царем из одного только высшого класса, князевь, графов и бывшых намістников (губернаторов). Отже самопонятно, што от такого “Совіта” порядкы не измінилися, и все осталося по старому.

То же само вышло и с кріпостным правом, бо при обсуждению діла оказалося, што освобождение крестян значило обидіти (образити) дворян, на котрых опералася царска власть. И так кріпостне право осталося в полной його силі, с измінением только, што поміщик по свойой доброй волі, на особых условиях мог отпустити крестянам землю в аренду, от котрой должны были платити наложеный податок. Александер І намірялся запретити также продажу кріпостных рабов, но потом царь скоро забыл, а навет и не знал, же в России существуют ище такы законы.

НАШЕСТВИЕ ФРАНЦУЗОВ НА РУСЬ В 1812 Г.

Штобы ліпше поняти, што дальше творилося в России, як и почому, то треба нам коротко узнати, што творилося перед тым во Франции, и длячого Россия вела войну с Франциом.

Ище в 1789 г. во Франции стался переворот и настала революция. До того часу во Франции, подобно як и в России была самодержавна власть короля, французскы крестяне были обтяжены всякими повинностями и платили незмірны податкы. Вся власть была в руках дворянства и государство было в страшном безпорядку. Король марніл безумны суммы грошей на роскошне житье в своим дворі, а дворяне розкрадали казну, так што довели державу до банкротства. Тогды король Людвик ХѴІ казал скликати Всенародне Собрание депутатов, штобы придумати новы налогы.

Но депутаты от народа рішили, што діло так дальше не може идти, а треба найперше ограничити королевску власть, треба обуздати дворянство и устроити так, штобы государственне правление выдавало на росходы только за согласием народных депутатов, а также штобы всі законы обсуждалися в Народном Собранию. Король не думал отказатися от самодержавной власти, он розогнал народных депутатов, а самых передовых посадил в тюрму и начал стягати свои войска к Парижу.

Тогды во всей страні началися волнения и найперше вспыхло в Парижі. Всі робочы толпы направилися к арсеналу, забрали все оружие и приступом забрали Бастилию (головна тюрма), и с того началася революция.

Узнавшы о том измучены селяне поднялися всі по всей Франции, заберали вилы, косы и сокыры, выганяли поміщиков, запалювали дворы, нищили стары дворянскы грамоты и заберали их землю. При таком обще-народном возстанию и самы королевскы войска не хотіли стріляти до народа, и начали переходити на його сторону.

Король увиділ, што не може сопротивлятися и рішил уступити. Он явился на народне собрание и дал присягу новому уложению, по котрому власть короля была ограничена вольом народа. Так было уничтожено самодержавие во Франции.

Но сам король Людвик ХѴІ и окружавшы его дворяне надіялися ище на помощь другых самодержавных государей. Они затягли тайны уговоры и призывали чужестранцев идти войном на Францию. И так по тайному соглашению, он король Людвик ХѴІ хотіл біжати на сторону німецкого войска, котре стягалося уж до границ Франции. Но план не удался, его познали в дорогі, там его арештовали и под стражом привезли до Парижа. Там гдекотры депутаты требовали, штобы короля лишити престола и судити як здрадника, але большинством рішили дарувати провину и на дальше признавати его главом государства. Так он знов на народном собранию дал торжественне обіщание не нарушати нового государственного порядка.

Но давшы присягу, король Л. и на тот раз не дотримал свого обіщания, и потайно мал сношения с німецкими государями, так што австрийский император и прусский король пошли войном на Францию. Они разоряли краину, заберали кріпости и подходили к Парижу.

В такой опасности вся Франция поднялася на ногы и весь французский народ взялся за оружие. Разом с тым по всей Франции вспыхнуло негодование против короля, што он на свой народ и на свою страну призвал чужеземны войска. Тогды сами парижскы граждане ворвалися во дворец, звергли короля Людвика с престола и перевезли его и его семью в городску тюрму. При объисках во дворци, они нашли тайну переписку и договоры короля с німецкыми государями.

Его изміна была теперь для всіх обнаружена. Через даякий час назначенный суд из Всенародного Собрания, за здраду и изміну своей страні приговорил его к смертной казні. И так в 1793 году, французскому королю Людвику ХѴІ, всенародно на площади отрубали голову.

Таке небывале и безпримірне событие, ище больше перестрашило и зблизило между собом самодержавных правителей. Тогды они заключили между собом “Военный Союз”, штобы разом покарати французов и примусіти их знова завести у себе самодержавну власть. До того военного союза присоєдинилася Екатерина ІІ и послала свои войска на помощь німцам против французов. Так началася война России с Франциом, она продолжалася при Павлі и тяглася ище при Александрі І, бо хотіли покорити свободолюбиву Францию. Но народ защищавший свободу был непобідимый, и не только выгнал чужинцев из свойой страны, но и сам потом начал наступления на чужи земли.

В завоюваных ними странах, они звергали самодержавных правителей и дозволяли народу установити у себе свободне правительство. Так они тогды освобождали подъяремны народы.

Но такы продолжительны войны принесли также и шкоду самым французам. У них вызначилося много знаменитых полководцев и ними овладіл воинственный дух, якый завсе небеспечный єст для свободы, бо через незмірну власть полководцев усилюєтся самовластие. Так сталося и во Франции.

Тогды прославился знаменитый полководец, генерал Наполеон Бонопарте. Он одержал много побід и его войско готове было идти за ним в оген и воду. У Бонопарте от того закружилася голова, и он объявил себе французскым императором и задумал завоювати цілый світ. Он завоювал уж близко всю Европу, и всядиль назначал на престол своих родственников. Наконец он объявил войну России. Наполеон собрал огромну армию войска, прилучил ку собі всіх подручных королей, и так в юнию 1812 г. перекрочил он русску границу.

В России тогды было объявленно всенародне вооружение для сопротивления и отбоев вражых сил. Послі несколькых битв и кровопроливного боя, он взял Смоленск и начал быстро посуватися до Москвы. Русскы войска под проводом полк. Кутузова отступали и избігали зражений. Кутузов по плану завлікал Наполеона в глуб России. Аж под Бородиным в близи Можайска Кутузов подпорядковал своє войско и принял бой. Было то кровопролитие зражение, где в бою погыбло около осемдесят тысяч убитыми с обох сторон. Но побіды не было, и Кутузов отступал дальше и отдал французам Москву.

Москва была опущена жителями, она была опустошена от съістных припасов, а к тому началися в Москві великы пожары. До того на біду Наполеона настала сурова русска зима, а французска армия была лихо одіта, без провиянту стояла там бездільно. Наполеон видячи свою ошибку, што зашол задалеко в глуб России, где не мог подвезти воєнных и съістных припасов, он приказал свому войску отступати, а сам он вернулся до Парижа. За ним потяглася его огромна голодна и лихо одіта армия. Много из них потопилися в рікі Березині, но больша часть той армии погибла от голода и холода, и перебита русскыми отрядами.

Так остаткы побідоносной армии Наполеона перешли назад русску границу, но за ними послідовала за границу и русска армия з Александром І во главі. Теперь он пошол освобождати завоюваны Наполеоном німецкы государства. Наполеон ище долго боролся з союзными войсками: России, Пруссии и Англии, но в конци вычерпалися силы Франции. Коли союзникы забрали Париж, Наполеон попал в их рукы, он отказался от престола и был потом высланый на остров.

Так знов на міспе казненого короля Людвика ХѴІ на престол поставили его брата, лем же ограничили его власть, созданием при нем “Палату Выборных Депутатов”.

УСИЛИЯ УБИТИ В НАРОДІ МЫСЛИ СВОБОДНОГО
ДУХА, ЧЕРЕЗ КОНТРОЛЬ И ЦЕНЗУРУ
НАУКЫ И ПРОСВІЩЕНИЯ

Война с Франциом мала двояке значение для России, она зробила большу переміну во многых русскых офицерах, а навет и в солдатах побывавшых за границом. Но сам Александер І вернулся в Россию з мыслями укріпити самодержавну власть. Послі войны с Франциом, всі европейскы государы собралися в Відню и там заключили свой новый “Священный Союз”, штобы взаимно помагати собі удержовати самодержавие не лем у себе дома, але и в чужих державах. В такой ціли они посылали свое войско в чужи державы там, где народ бунтовался против своих королев.

Приміром, коли в 1820 г. вспыхнуло народне повстание, то войска посланы были в Италию, а потом и в Испанию. Так само подобно, як в 1848 р., коли было повстание Кошута в Венгрии, то русскы войска, якы переходили через земли нашой Карпатской Руси, то они ишли усмиряти бунт против короля и укріпляти там самодержавие.

Но головна забота або старунок коронованых союзников был, штобы выкоренити из народа “свободный дух” в своих державах. Для достижения такой ціли они уважали, найперше церковну віру, яка учила сліпому и безусловному повиновению всякого начальства, а потом цензуру на печатание книг.

С того часу началося в России фальшиве церковне благочестие, людей нагоняли в церковь соблюдати обряды и проч. Всі низшы и высшы школы были отданы под надзор духовенства, штобы там не проникла наука або мысли “свободного духа”. Таким способом правительство старалося задержати народне просвіщение, и тогды была установлена также строга цензура на печатание книг. Ни одна книга не могла быти напечатана без дозвола цензора, штобы гдеяка свободна мысель в ней не выкралася на свободу. Мы знаме як строго Катерина ІІ покарала Новикова и Радыщева, но тогды не было ище цензурного права и каждый богатший человік мог купити або завести у себе печатню-типографию. А теперь свободны книгы можна было печатати только в тайных ище типографиях, або за границей и так потайно привезти до России.

Но кромі такых предприятых мір запрета свободной мысли и слова, и кромі строгой цензуры на печатание полезных для народа книг, было ище важне средство, а то “послушне войско” для поддержкы царской власти. Армия-войско потребне ест не так для защиты державы от чужого врага, як для внутренной охороны державной власти, против свого власного народа. Штобы мати “послушне войско”, Александер І завел в Армии строгу и жестоку дисциплину. В солдаті треба было заглушити розсудок и совість страхом, штобы вояк трепетал и боялся начальства за свою власну смерть, а тогды вояк забыват за всьо што ест, он готов ест убивати навет своих родных. Для такой дисциплины при войску учат, бьют и муштруют вояков в великой строгости, за всякы ничтожны провины, а навет часто и без всякой вины жестоко карают, а часто и до смерти убивают. В такых солдатах пропадал розсудок, совість, жалость и чувство, и солдат тогды на приказ начальника готов был убивати навет свого родного брата.

“СОЮЗ БЛАГОДЕНСТВИЯ”, ТАЙНА ОРГАНИЗАЦИЯ
“СОЮЗ ДЕКАБРИСТОВ”

Спомнено было, што послі войны, из заграницы многы русскы офицеры вернулися на Родину с новыми мыслями. Послі того, што они виділи в чужих свободных сторонах, им было тяжко смотріти на русску жизнь з ей кріпостным правом, побоями крестян, плачом и стогнами кругом.

Они сознали, што на Александра І не можна было больше надіятися, што его обіцянкы оказалися пустыми словами.

И так в 1816 г. в России, среди высшых офицеров повстало тайне общество назване “Союз Благоденства”. Члены того общества по уставу, должны были трудитися для блага России. Каждый из них должен был вступити на службу и заняти даяке важне місто так, штобы с часом всі высшы должности в управлению были в руках членов того тайного общества. Наконец было установлено, што если царь Александер І не даст ниякых прав народу, то в таком случаю не треба присягати его насліднику, не ограничившы его самодержавия.

Головными членами того общества были: полковник Пестель, четыри братья Муравьевы, оден из них полковник, два подполковникы и оден капитан, потом полк. князь Трубецкой, ген. князь Волконский, ген. Фонвизин, полк. Давидов, поручн. Рылиев и много другых. Всіх разом в тайном обществе было: три генералы, 28 полковых або баталионных командиров и 78 низшых офицеров, а между ними были также и невоенны, як князь Одоевский, служивший в государственном Совіті, Николай Тургенев и другы.

За 10 літ свого существования, члены тайного общества зділали много добра, они закладали школы в селах, защищали обиженных, выводили из употребления тілесны наказания, гдекотры из них уничтожили барщину (панщину) и старалися освободити своих крестян.

В армейскых (войсковых) полках где командовали члены общества, скасовали всякы давны наказания (кары) розгами або палками. Одным словом, всі члены свято исполняли взяте на себе обязательство трудитися для блага России.

Но сама головна и важна ціль того общества была, штобы измінити государственный порядок в России, ограничити самодержавие и освободити крестянство.

Они ждали только подходящого случая, штобы начати діло. Они раховали на то, што многы из них камандовали полками и войсковыми отділами, в котрых солдаты их любили и готовы были идти за ними.

По приміру, из бывших уже запутаных царских переворотов в России, они надіялися при помощи преданных им полков забрати правительство в свои рукы, заставити царя отказатися самодержавия, а потом созвати “Земский Собор”.

Головны их военны силы были в южной Армии, а то в киевской и каменец-подольской губерни, где командовал вятскым полком сам полк. Пестель, а также другыми полками командовали и другы члены тайного общества. В означеный час они должны были идти в Петербург, там злучитися с членами сіверного общества и разом овладіти дворцом. Але и там между ними нашлися четырі здрадникы, и каждый из них послал от себе донос Александру І. Царь в тот час находился в Таганрогі, но там он скоро заболіл и умер в ноябрі 1825 г. Не зробившы жадных распоряжений. По его смерти между записками найденый был донос на Пестеля и его приказано было арештовати. Из браку царского распоряжения о насліднику, бо дітей у него не было, повстало замішание и за три неділи никто не знал, котрый из его братов буде наслідником престола Константин або Николай.

Нагла смерть Александра І. заскочила членов общества несподівано. У них не было часу составити общий план для захвата дворца, а знов по причині доносов, рішили начинати діло зараз, хотяй не были належито приготовлены. Они знали уж, што их головный руководитель полк. Пестель был арештованый, а хотячи теперь замішательство выужыти для своей пользы, члены тайного общества в Петербургі, хоц они не были ище готовы, но и так рішили дійствовати.

На 14-го декабря 1825 г. была назначена в Петербургі нова присяга Николаю. Тот день замыслители выбрали привести свои лояльны войска на Сенатску Площадь, и коли удастся, то завладіти дворцом. На даный приказ привести войска до присягы Николаю, — праві весь московский гвардейский полк отказался от присягы, и вышол на сенатску площадь. К нему присоєдинилися всі гвардейскы матросы, и гдекотры роты иншого полка, так што на площади стояло около два тысяч солдатов.

По другой стороні зимного дворца, воколо Николая собралися вірны генералы зо своими солдатами. Жадна строна не начинала атаку, тогды на приказ Николая пущена была в атаку кавалерия. Три разы кавалерия начинала атаку, но завсе была отбита. Тогды Николай приказал высунити вперед пушкы (легкы каноны) и на приказ “стрілять”, запальщик солдат не запалил пушку. Тогды сам офицер запалял пушкы. Роздалися выстрілы и в рядах повстанцев повалилися убиты. Не змогли они устояти против пушок и начали отступати.

Побіда оказалася на стороні Николая. Зараз послі того повстания началися аресты по всей России, найперше были арештованы головны члены тайного общества, а так и всі другы члены, около 500 людей. Слідство продолжалося шість місяцов. Всі они трималися бодро и безстрашно, на слідстві всі брали вину на себе и никого не выявляли.

Пятеро из них были засуджены на смерть, 88 человік засланы на каторжны роботы, а 24 на Сибир.

Засуджены на смерть были повішены, они ишли бодро и спокойно смотріли смерти в очы. А Сергей Муравьев приклякнул и голосно сказал: “Боже спаси Россию и царя”. Он молился так, як Христос молился на кресті за врагов своих.

Такы были уж тогды учены люде свого часу. Не была то лем кучка вельмож, але многы соткы людей, котры выступили з благородными замыслами, штобы освободити крестянство и передати власть в рукы самого народа, Великого Земского Собора.

Вість о них розышлася по всей России, и они то власно заронили сімена будущой свободы в России. И так кончилося востание в Декабрі 1825 года, от чого тайне общество назване было потом “Декабристами.” В слід за ними пошли знов новы люде на тяжку борьбу за людску свободу и народне счастье. Гдекотры из них пережили Николая І, и дожили ище до нового царствования, коли то русске самодержавие мусіло частично освободити крестян от кріпацкой невольничой зависимости. Новый русский царь Александер ІІ, в 1861 г. утвердил законом требование освобождения крестян от кріпацкого права и дворянской зависимости, за котре его отец загонял крестян в тюрму або на каторжны роботы. За ним в 1881 г. занял престол его сын Александер ІІІ, а так потом в 1894 г. послідный царь Николай ІІ.

Но помимо знесения кріпацкого права, там и дальше продолжалося угнетение простого народа, а от того росло и поширялося негодование в народі против властей.

И так назагал коротко в принципі мы виділи як змінялися умны и полу-умны, добры, лихы и злы цари, но порядкы оставалися тоты самы, а крестьянство завсе стогнало в кріпостном рабстві. Але начата борьба “Декабристов” не отставала на місци, народне сознание розвивалося дальше и свободный дух проникал в душу народного житья так, што с часом довелося найперше до возстания в армии, а потом всеобщей народной и социалистичной революции 1917 года.


КАРПАТСКА РУСЬ И ЛЕМКЫ КАРПАТОРУСИНЫ

ЧАСТЬ ІІ.

В давну ище старину, на початках основы русской державы на Моравии повстало перше славянско-русске княжество, котре сягало гет далеко аж поза Краков в западных Карпатах. Там на Мораву пришли греческы миссионеры, проповідникы восточной християнской віры, св. Кирил и Методий и там они створили и завели старославянску русску азбуку и письмо, названу кириликом. В тоты часы западны Карпаты заселяло славянско-русске племя Білохорваты, котры в большинстві потом переселилося на Балканы и там засновали свою державу.

И на тых самых землях, там кругом Карпат образовалося потом велике Галицко-Русске Княжество, яке включало Галичину и Буковину, значит Закарпатску и Подкарпатску Русь, и другы земли. Отже Карпатска Русь, то территория давно великого Галицко-Русского Княжества вздовж и кругом пасма Карпатскых гор.

Послі переселения уж на восток русскых племен, из оставшихся в Карпатах тубильцев, розрослися и повстали новы племенны группы, названы теперь: Лемкы, Бойкы, Гуцулы и т. п. И так лемкы-русины, то потомкы білохорватов, котры в глубоку старину выкорчыли лісы в запад. Карпатах и творили там своеродну карпаторусску культуру, яку по них одідичили их потомкы, званы теперь лемкы-русины заселяющи Бескиды, по обоим склонам западных Карпатскых гор, т. е. Лемковина и Пряшевщина.

Лемкы-русины, то назагал честный, богобойный, добродушный и трудолюбивый народ. Жил он собі мирно и в згоді з сусідами славянских народов, поляков, чехословаков, но и своих племенне-русскых братов, тепер украинцев и другых неславянскых народов, то єст венгров.

Там на Бескидах в Карпатах лемкы жили спокойно, управляли свою землю, будовали свои села, міста, церкви, школы, творили и розвивали своеродну характеристичну народну культуру. И так лемкы карпаторусины терпеливо пережили много сот-літну неволю и гнет национального и социального насильства, аж до І Світовой Войны.

Тогды то весь карпаторусский народ, а головно лемкы-русины пострадали народно и политично и пережили страшну трагедию “Талергофа”, от народной здрады украинскых наци-самостийников на услугах у німцев. Там в Талергофі, Терезині и многых иншых таборах смерти были выгублены многы тысячи найлучшых сынов русского народа.

То была направду несчастна трагедия для лемковского народа, яка скоро потом показалася в браку доброго и честного руководства на початках народного движения за освобождение Карпатской Руси из чуженародной неволи.

Скоро потом знов, в часі ІІ Світовой Войны лемкы карпаторусины также громадно причинилися для побіды над німецким фашизмом. Лемкы принимали участь в борьбі и за весь час войны партизанили по обоим сторонам Бескидов, а при отступлении фашистов через Карпаты, лемкы массово вступали в ряды Красной Армии, участвовали в боях и гнали разом німцев аж до Берлина. Но але скоро послі побіды и освобождения отчизны от німецкого фашизма, карпаторусины лемкы знов потерпіли трагичну поражку от польского шовинизма.

В 1947 р. поверх сто тысяч лемков-русинов, тото автохтонне мирне племя было подступом спровоковане и незаконным актом польской влады, насильно изгнане из его прадідной и родной земли Лемковины и переселене на западны земли Польшы.

Теперь лемкы карпаторусины жиют по світу розбиты, розсіяны и страчены, без своей родной земли и без свойой родной Отчизны, за котру они страдали, отдавали свое житья и проливали свою русску кровь.

ИСТОРИЧНЫ СОБЫТИЯ И НАРОДНЫ ОЖИДАНИЯ.

Лемкы, як и взагалі всі карпатороссы через долгы столітия не мали близкой связи с русским народом в России. Наша Карпатска Русь, т. е. Лемковина и Пряшевщина, Вост. Галичина и Закарпатска Русь, Буковина и другы земли, была розділена на части в чуженародных державах, зато мы уж до царской России николи не принадлежали.

Из того ясно, што наш народ в чужих державах не знал або не узнавал всей правды о том, што там в царской Росии за тот час творилося, бо зрештом и сам русско-украинский простый народ не сознавал правды о собі. Тогды правду можна было только переживати и видіти ей на власны очи, но говорити, писати або читати о ней, было строго цензуром и законами запрещено.

Но помимо того всего, там была завсе наша велика Отчизна, и там была наша народна кровно исторична связь. В давнину и нашы предкы в чужих державах, также переживали тяжку неволю, може не менше жестоку панщизну, а к тому также они переносили национальный гнет и социальны насильства, но наш карпаторусский народ пережил тоты тяжкы панщизняны часы, а при том он сохранил свою віру и свою старинно русску народну бесіду и культуру.

В карпаторусском народі сохранилася тверда віра и любов до всего русского народа, не взираючи на то, ци то была стара княжа, ци потом царска, або теперь Совітска Русь, то для карпаторусинов она была и буде завсе наша велика русска Отчизна. Карпаторусский народ твердо вірил и завсе ожидал, што даколи прийде из востока русский князь або царь и освободит свой русский народ из чуже народной неволі.

Дивно было зато нашому народу, коли в 1848 р. русскы войска переходили Карпатску Русь, через горы Карпаты на Угорщину, а потом знов через Карпаты вернулися в Россию. Люди зачудовано дивовалися, чом то царь не занял тогды всі нашы русскы земли и не прилучил их с народом до русской державы?

Теперь нам уж відомо, што ище в часі французской революции, всі самовластны державны управители, цари, кайзеры и короли заключили “Союз” помагати собі взаимно против всяких бунтов и народных возстаний, против их самовольной власти. Из того нам теперь понятно, што тогды царьскы войска ишли на помочь австро-угорскому королю Ф. Й. усмиряти бунт Кошута на Уграх, а не соберати русскы земли воедино, або освобождати наш русский народ в Карпатах.

Цари мали надость людской земли, а за простый народ они не дбали. Простый народ они уважали только за животну худобину, а гдекотры из них смотріли на простых людей як на черваков, по котрых им можна было ходити або доптати ногами.

Гдеси скоро послі революции в России, русский писатель Илья Еренбург походил там по нашых гористых землях Бескидов аж поза Карпаты, а потом сам здивованый, он написал коротку, но интересну историю о Карпатской Руси и характеристику о жиющом там народі. Он там зазначил, што аж при царі Павлі в России дозналися, што там в Карпатах живет русский народ.

Коли то приняти за правду, то из того можна бы судити, на сколько то заотсталы в наукі и необзнакомленны в истории о происхождению русского народа и його общественной культуры были цари и их управителі дворяне и поміщикы. Но а штоже тогды можна повісти о простом народі, закріпощенном в рабстві и темноті без просвіты и народного сознания, або даякой основной истории о происхождению русского народа.

И тот же сам бідный, в рабстві поневоленый и в невіжестві заотсталый, тот простый мужик-крестянин хлібороб, не змог был сам он николи освободитися без помощи, от того вікового рабства и людского унижения, коли бы там в России не вышли из честной русской народной интеллигенции на помочь вперед, такы умны и честны люде, як: Новиков, Радищев и другы за ними послідователи, потом знов члены Общества Декабристы, а поза ними знов люде перенявшы на себе тяжку борьбу за народну волю и свободу до людского счастья.

Зато и мы не можеме похвалити царске и дворянске правительство за даякий народный прогресс, бо всьо што они зробили для поширения державы або дворянства, то было только для укріпления свойой державной власти, но не для добра або уліпшения житья простого народа.


* * *

Но поза границями старой державной або царской России народно найбольше пострадали карпатороссы лемкы в Австро-Венгрии за часы І. Світ. Войны в 1914-1917 р. Ище на самых початках войны и до часу русской революции, коли десяткы тысяч самых передовых людей-патриотов, интеллигенции и вірных сынов русского народа были выгублены в Талергофі, Терезині и иншых німецкых таборах смерти.

От того потом в часі революции и послі розвала Австро-Венгрии, в розгарі народного освободительного движения Карпатска Русь, (Лемковина и Пряшевщина) уж до того розчлененна, розбита и ослабленна народно, пострадала головно из браку народного руководства, а к тому уж новы наци - украинцы самостийникы саботажували и шкодили народному объединению, но а полякы и чехословакы знов своилися до нашой земли, и так они силом потом собі єй забрали.

Отже тогды як раз, тому из давна поруганному карпаторусскому народу потребна была помощь для його освобождения, но коли взяти под увагу повысше указаны причины тогды неисложных обстоятельств, то лемкам и не можна было надіятися на помощь, в час народного освобождения. Тогды в розгарі революции русский народ сам боролся за своє освобождение от царско-дворянской рабской неволи и кріпатства. До того треба было отбивати чужестранну интервенцию, но и вести домашню борьбу с буржуазиом, за свою народну справедливость, коли тымчасом скоро знов настала Світова Война.

Зато мы и не можеме упрекати весь русский народ в том, што не был нам на помочы в часі освобожденияся народов.

ПОВЕРХНЫЙ ВЗГЛЯД НА ИСТОРИЮ

В календарі Л. С. на 1967 г. было поверховне изображение и короткий очерк историчных событий на Руси в перегляді устройства и розвою племенно народной культуры русской державы. Там было представлено, што в старинны часы Русь, яко народна держава начала поширятися от нашых Карпатскых гор на южный и сіверный восток, а с тым движением народа и с часом многых столітий мішалася, измінялася и поширялася наша давно славянско-русска народна культура по своим природным характерным нравам. Так подобно измінялася и розвивалася и наша старославянско русска, т. е. наша карпаторусска бесіда из котрой в конці образовался и повстал великий обще-русский литературный язык.

Теперь нам відомо, што давно до часу татарскых нападов на Русь, вся русска земля была свободна и принадлежала простому народу-земледільцу. Князьям не было дозволено навет привлащовати собі землю в своих княжествах.

Дальше мы дозналися, як тяжко русский народ страдал за пару сот літ в ярмі татарской неволи, но потом знов, як тяжко жилося русскому народу при московских царях и як то там заводилося постепенно кріпостне невольниче право на русской землі.

Отже, так як за остатны часы, мы много уж наслухалися всякой дурной клеветы и ненавистной вражой пропаганды против русского народа от тых новых украинскых наци-ренегатов, што “москали”, то не русскы люди, бо то они монголы и фины, што тоты москали заграбили силом их Украину и як страшно тоты русскы москали мучили и знущалися над их украинским народом, и т.п.

И так тоты украинскы наци-ренегаты завсе натровляют нас ненавистью до русского народа, учат нас свойой выдуманной теории, и заказуют лемкам признаватися до русского народа, што лемкы не москали, але наци-украинцы. Отже так они перекручают факты, а фальшом закрывают правду историчных событий.

И так, штобы узнати правду, а усунути обман и ложь, треба коротко навести правдивы факты историчных событий. Правда єст, што мы лемкы не москали, бо от нашой Карпатской Руси через Киев аж до Москвы, то огромне пространство русской земли. Но история говорит, што “Карпаты, то была колыбель русского народа”, и от Карпат поширялася русска земля до Киева, а потом аж до Москви и до Владивостока.

Коли то давно нашы предкы, прадіды карпатороссов осталися дома в Карпатах, то их родны и племенны братья пошли дальше на восток аж до Киева (теперь Украина) потом из Киева пошли знов дальше на сіверо-восток и дошли аж до Москвы, а потом там ище дальше и дальше так, што тота русска держава разпространилася так далеко, што по территории днесь она сама найбольша держава на світі. За ньом слідує Китай, потом Канада, а так Соединены Штаты Америки.

Зато ніт смысла спорити над тым, што мы не москали, але на показаниях историчного процесса розвою народной культуры, мы также и не украинцы, але мы сме карпаторусины лемкы.

Дальше они, украинскы зрадникы, морочат людям головы, што русскы (москали) то фины и монголы, што они заграбили Украину и мучили украинский народ в кріпостской неволи.

Отже мы знаме из Истории Руси, што в часы татарских нападов на Киевску Русь, то многы люде убіжали в нашы стороны аж до Карпат, но але саме велике большинство из них, т. е. малороссов, теперь украинцев, пошли дальше на сівер, разом зо своими киевскыми великыми князями. Там они осілися коло Москвы, и начали там княжити. Малороссы принесли уж там свою русску культуру из Киева и там с часом мирне племя финов злялося разом в той новой принесенной там русской культурі.

Значит, же тота велика и розвита на Киевской Руси народна культура и великий русский язык побідили и заляли финску культуру. И там на тых землях знов образовалися и повстали новы великорусскы княжества с киевскими князями во главі. Из того видно, што тоты русскы москали, то потомкы давных малороссов-украинцов, а тоты самы московскы цари, были также потомкы тых давных великих князей, котры перенесли свою столицу из Киева до Москвы.

Отже тоты теперь московскы цари, послі извержения татарского ярма, сами заняли ханску власть самодержавного управления в свои рукы, землю присвоили для себе и так постепенно закріпощали весь русский народ, т. е. крестьянство в своих московских княжествах, а так и по всей Малороссии, т. е. Украині.

А то означат, што тот русский москаль, крестьянин земледілец, ци мужик так само стогнал от кнута в московских княжествах, як и малороссы страдали на Украині под нагайками своих же панов атаманов и пр. залежало только от чувства и доброты, або от жестокости своих гнобителей.

Давно можна было в том обвиняти хибаль царей и их самовластне державне управление, неограниченной власти дворян и поміщиков, над простым закріпощеным мужиком або крестьянином. Но, якже то можна уж теперь упрекати с таком яром ненавистью зато весь русский народ (москалів) в жестокостях угнетения старой царской системы управления, теперь ніт ани жадного смысла ани словечка правды.

С другой стороны к тому треба зазначити, што название Украина то было слово на означение части наддніпрянской земли русской захваченой поляками, як своей колонии, но николи така назва не относилася до Галицкой або карпатской русской земли, а тым менше не до народа.

И як же то иронично, наивно и безобразно глупо выглядат, так фальшива ненавистна пропаганда из ярой ненависти до русского брата москаля, отказоватися або изміняти свою прадідну историчну назву Русь.

Карпатороссам лемкам ніт жадной причины ворогувати против русского народа, а тым меньше ніт смысла, штобы отказуватися або изміняти свою национальну назву. Москали для лемков не страшны, а название Русь або русский для лемков карпаторусинов ест дорогоцінне, благородне и благоприятне.

РУССКА РЕВОЛЮЦИЯ И ПЕРЕВОРОТ В ЕВРОПІ

Коли в 1917 р. в часі І Світовой Войны началася велика революция в России, тогды наступил также крах национальной и социальной политикы и в другых державах. Русска революция потрясла цілом Европом так сильно, што во многых державах повалены были из тронов долов, многы коронованы монархы и самовластны управители.

Из великих держав повстали, переобразовалися або возобновилися стары державны республикы на лад стародавных своих национально-буржуазных принципов, як Польша, Чехословакия, Угры и другы.

Так подобно и в России на самых початках повстала народна буржуазна республика со временным правительством во главі Керенского.

Но в России в тот час была уж велика партия большевиков и они потрафили перебрати народ на свою сторону, так што скоро они потом знов зробили переворот (октябрска революция) и перебрали власть в свои рукы. Тогды партия начала заводити новы законы и порядкы на основі и принципах интернационального социализма.

Так началося народне житье по новой социальной системі, по наміченой плятформі и планам народной господаркы и розбудовы индустрии. Но при том ище долгы рокы треба было поборювати и свою домашну буржуазию, як и заграничну интервенцию. И в таких тяжких условиях житья, по новой наукі и системі, при плановой народносоциальной економии, большевикы зробили за короткий период часу великий и замічательный прогресс в переустройстві новой совітской державы, покаль знов началася нова Отчизняна Война, от несподіваного нападу Гитлера на Совітский Союз.

Но за весь тот час лемкы карпаторусины были пригнобленны в незавидном положению народного житья, старой буржуазно-панской системы национального и економичного гнета, народно розділены границом в чуже национальных державах Польші и Чехословакии.

ДРУГА СВІТОВА, АБО ОТЧИЗНЯНА ВОЙНА

Тымчасом нагрянула ІІ Світ. Война. Германия задумала панувати над цілым світом, забрати всі народы и накрыти их своим німецким фашизмом. Покоривши близко всю Европу, Гитлер несподівано напал на Совітский Союз. Была то страшна и затяжна война, яка запричинила великы страты и в людях и страшны знищения краю, а головно на Украині. Всі народы Совіт. Союза сплочены во едино в идеи нового социального житья и наполнены духом патриотизма “За Родину”, геройско сражалися в боях и доблестно отбивали навалы вражих сил фашистской военной машины.

В той освободительной войні от німецкого фашизма, всі карпатороссы были по стороні Совітского Союза, и боролися за народну свободу. За часы той затяжливой войны карпаторусины партизанили по обоим сторонам Бескидов на Лемковині. А при отступі німцев через перевалы Карпат, лемкы массово вступали в ряды Красной Армии и разом принимали участь в боях аж до окончательной побіды.

И тут в Америкі и Канаді весь наш карпаторусский народ оказувал незмірну помощь, як морально, финансово и материально, так и при сборі одежи и других потребах для помощи русскому народу пострадавшому от войны.

Коли наконец, Германия была побіжденна и розбита, Красна Армия наступала и освобождала всі заняты фашистами державы. Коли уж Польша, Чехословакия и Угорщина были освобожденны, тогды у них по волі освобожденного народа, заведены были новы реформы и порядкы на основах социализма, и в тотчас они, яко незалежны державы приключилися до социалистичного блока держав Совітского Союза.

НЕСЧАСТНА ДОЛЯ КАРПАТОРУССКОГО НАРОДА

Неудачны угоды и неблагоприятны послідствия

Тут на місци заявити увагу, што на самом ділі, по правді и справедливости, як и по законам демократичной свободы, тот вірно заслуженный карпаторусский народ, послі многовічной неволи в чужих державах, должен был также мати право на свое народне объединение и получити свою автономну республику Карпатску Русь, подобно як достали украинцы, білоруссы и великоруссы. А в остаточном разі карпаторусины должны бы быти объединены народно и включены разом до Совітского Союза.

Отже теперь, коли то послі Отчизняной Войны и побіды над німецким фашизмом пришло знов до угоды и установления новых границ меже народами и по желанию народного самоопреділения и народной свободы, як то гласят законы социалистичных держав совітской конституции, то карпаторусскому народу знов была устроена велика кривда и народне насильство. Ни лемкам-русинам в Польші, ни руснакам на Пряшевщині в Чехословакии не было дано ниякой можности голосования на свое народне самоопреділение. Без всякой должной церемонии, часть Карпатской Руси — Пряшевщину залишено было при Чехословакии, а Лемковину — оставлено знов Польші на поругание и на загладу народа лемков-русинов.

Скоро потому оказалося, што то была сама больша и головна ошыбка зо стороны Совітского Союза в уступках розчленения нашой родной земли и передания, тогды поверх 800 тысяч русского народа яко меншинства чуже национальным державам при новой их угоді. Оказалося, што угода не выйшла на пользу Совіт. Союза, а только на ущерб и на шкоду всего карпаторусского народа.

Коли бы карпаторусский народ был тогды сплоченый воедино и оставался жити там на своей родной земли в сусідстві славянских держав, то при помощи новой совітской наукы, техникы и новой системы житья тот лемко-русин, змог был там до теперь створити замічательный прогресс и небывалый добробыт на Бескидах.

На початках там в Совіт. Союзі натискали дость сильно на программу интернационализации народностей, но очевидно наразі оказалося то ище не практично и не на часі, по причині отпора и сопротивления людского чувства, их народного сознания и патриотизма, и длятого совітскы управители попустили и уменшили тот натиск на программу интернационала. Но тым самым чином они помогли и дозволили там, гдеяким затаенным наци-шовинистам на всякы их свавольны выбрыкы и насильства над народными меншинствами в социалистичных державах, чого по законам их совіт. конституции, не должны были допустити.

Им же самым особенно должно быти ясно, што где в державі ест национальный гнет и насильство, там не может быти ни социальной ани економичной правдивой свободы и ровности. Така политика вносит только вражду и ненависть, вред и шкоду для всіх держав совітского блока.

Отже, тымчасом полякы (многы шовинисты тогды на урядах) схитрилися и задумали собі зараз створити “Монолитну Польшу”, а штобы лемков-русинов на скоро вынародовити (ополячити) они придумали подступ для провокаций лемков о здраді Польшы. И так в 1947 р. на подставі незаконного акта, без обвинения, без законного слідства або правосудия, значит так самовольно поспішили на скоро изгнати,больше стотысячне автохтонне в Карпатах племя лемков-русинов, из их отвічной прадідной отчизны Лемковины на западны земли Польшы.

Там лемкы теперь розчленены по несколько родин по всіх селах меже поляками, штобы там русины, без своей народной школы и русской культуры чимскорше вынародовылися. И к тому невіроятному событию трагедийного насильства над невинным и безборонным народом, полякы установили собі ище закон о запрещению массового повороту лемкам на свою родну землю, на свою отчизну.

Аж в 1957 р. полякы заявили публично, (но только так для ока и обольщения), што переселение лемков-русинов было по ошибкі незаконным актом, и што тым чином лемкам зроблена была несправедлива кривда. Но дальше в том ділі до сегодня ничого больше не сділано, а навет тоты нелегальны их законы, о забороні поворота лемков на свою родину, ище по сей день остаются в силі закона, — не змінены!

И якже то неприятно, и иронично и безобразно выглядат теперь тота социалистична свобода для карпаторусского лемковского народа в Польші?

И так, Совітский Союз дал народну свободу всім, як полякам, чехословакам, уграм, украинцам и другым, дозволил им створити свои народны державы и розвивати свою национальну культуру, а только свому найменшому родному брату, коренно русскому народу карпатороссам, такы же самы права национальной свободы, ему отказано, насильством отобрано и подавлено и законом запрещено.

А теперь, як мы зауважуеме дальше, там створяются знов национальны державы коштом вынародовления народных меншинств, и творятся новы национально-социалистичны блокы, якы на будуще даколи знов можут або будут соперничати або враждувати между собом.

НАШЫ ПОГЛЯДЫ И ВОЗРАЖЕНИЯ.

Мы карпаторусины лемкы сознаеме до чого то всьо должно идти, што там послі революции в России напрям совітской политикы, як в смыслі наукы национального понятия и сознания, так и народно-социального житья людей слідует по новой линии народного переобразования людей, сообразно новой идеологичной наукы и системы народного общежития. Но покаль тот напрям дойдет до свойой ціли, то по наукі Ленина и принятых законов, каждый малый народец должен был мати полне право и свободу розвиватися культурно и своеобразно по нравам свого народного характера.

И коли то, послі насильного переселения лемков-русинов в Польші, мы тут долго стримувалися от возражений и критикы взглядом польского народного правительства, а к тому тут нас увіряли и говорили, што там в партии ошибок не ділают. Так мы долго ожидали на гдеякы правдивы вісти о важных причинах, на гдеякы оправдания або исправления такой грубой ошибкы. Тымчасом доходили до нас только неоправданы слухы, што то было только тымчасове переселение, покаль там выкрыют и вынищат гнізда украинскых наци-бандитов, недобиткы гитлеровских войск, укрывавшихся там в Карпатах.

Оказалося потом, што тоты украинскы нацисткы банды мали связи с польскими шовинистами на урядах, они разом творили провокации и саботажували польске народне правительство, а потом обвиняли лояльных лемков-русинов. Зато потом лемкы, без слідства, без доказательства або правосудия мали быти выгнаны. Но то всьо творилося только для обмана, бо ничого потом ни доказов вины, ни оправданий и ничого в том ділі не было зроблено. Наконец лемкы поняли, што на самом ділі была то только польска свавольна политика для скорого вынародовления лемков - русинов в Польші.

Тогды выявилося нам, што не только просты люде в партии (часом укрыты шовинисты - саботажникы), но и самы головны управители совітской власти ділают не малы ошибкы. И так перша и найбольша ошибка Совітского Союза оказалася зараз на початках при угоді в уступках, на розчленение земли Карпатской Руси и народа, розділено и залишено в чуже-народных державах, то была перша груба ошибка по угоді. Но друга ошибка совітского правительства, то уж саме грубе преступление законов совітской конституции о народной свободі, што они допустили там до такого безправного насильства над коренно русскым невинным народом, а то изгнание цілого племени лемков-русинов из их родной отчизны, и то не ради даякого интернационала, а просто для вынародовления лемков.

Отже, такы уголовны преступления законов совіт. конституции мы лемкы яко народ пострадавший ни похваляти, ани терпіти не можеме, бо то было, ест и будет завсе насильством и подавлением воли карпаторусского народа, як и против наукы и программы Ленина о народной свободі.

Не умістно же теперь упрекати царей або их самовластне державне управление, бо очевидно, што вина падат теперь на самовольне управление совітской власти, особенно на людей, котры допустили до такой трагедии народного подавления, но и на тых, котры виділи и знали о том, а занедбали на часі таку грубу ошибку в преступлению совітской конституции исправити.

И так коли потому мы зауважували там в Польші всякы насильства над нашим народом, то мы не могли обонятно терпіти такого безобразия, и тогды мы начали возражати и критиковати, головно, штобы звернути увагу совітской власти, што там у них в социалистичных державах до сегодня ище практикуется гнет и насильство наци-шовинизма.

Очевидно теперь, што таке грубе преступление законов совіт. конституции, як насильство над лемковскым народом, безправного изгнания коренно русской народности, подавления его народной свободы и ганебного унижения чести и народного достоинства в социалистичной державі оправдати не можна. Жадны извинения за ошибкы, якы на часі можна было исправити, ниякы хитры выдумкы, або недоказаны правосудием провокации, ни иншы неумістны придуманы для обмана извинения або оправдания, ани навет хоцбы тогды и найліпшы намірения польской влады, то подля законов народной свободы теперь оправдати не возможно.

Таке ганебне насильство подавления свободы и порабощения карпаторусинов лемков в социалистичной державі Польші, останется вічно чорным пятном на страницах истории народов Совітского Союза, подобно як закріпощение крестян осталося чорным пятном в истории царской России.

Дальше мы сознаеме также, што теперь там в Совіт. Союзі всі граждане, а особенно молоды люде проходят народны и высшы школы, а в том и науку переобразования людей в понятию национального вопроса, як свободного человіка. Из совітскых школ выходят теперь высоко образованы политичны руководители и учены люди из народа, учители, докторы, правникы, инжинеры и всякого рода технично и фахово вышколены и образованы люди, котры смотрят днесь на старый світ по своим новым выображениям, як на людске народне житье, так взагалі и на світову международну политику.

А мы знов старшы люде смотріме на тото наше людске або народне житье по нашим давным понятиям, по старому воззрінию нашой народной наукы и сознательности. Не дивно зато, што многы из наших старших людей не выображают собі ище такой огромной переміны людского общественно-народного житья, по новой социалистичной системі. Зато и нова совітска политика здается нам неясна, часом не по нашим нравам, або часом и цілком непонятна.

Но то само, што наши понятия, або воззріния общественного строю житья и новой политикы немного росходятся, то в самом ділі не означат ище, што мы цілком неправильны в наших народных поглядах, бо по законам, мы всі люди равны и свободны.

И карпаторусины лемкы яко народ мают полне право по всім демократичным законам писаным або неписаным, яко народ насильно подавленный, поневольно розчлененный и по частям залишенный в чуже национальных державах Польші и Чехословакии для его денационализации, — то самопонятно, што его народным, честным и моральным обовязком есть станути солидарно на защиту в обороні от своей народной загибели.

Отже зато лемкам русинам прислугует право не только на возражения, честну и конструктивну критику за свою правду, но по желанию лемкы могли бы также внести свою жалобу и скаргу на вытворену лемкам незаконну народну кривду, до найвысшого международного суда ООН, и там домагатися своей народной правды и справедливого рішения судьбы для всего карпаторусского народа.

Так приказует нам наше людске чувство и народна совість, наш розум и сознание патриотизма и любви до нашой найблизшой родины и отчизны Лемковины и в загалі всей Карпатской Руси.

Теперь мы карпатороссы споглядаме на тоты світовы переміны и события поверховно, безсторонно и безучастно, а тымчасом мы старамеся познати ближе тот новый світ и их там совітску народну политику. Правда, мы тішимеся их прогрессом и народными успіхами и длятого мы симпатизуеме и помагаме также в движению, поширению мира во світі.

Мы зознаеме небезпеку и зато уважаме, што всякы людскы незгоды, або вражды между народами должны лагодитися по справедливости, добровольно, дружелюбно и мирно в згоді, а не войнами, якы руйнуют и нищат народны краины и добробыт, а людям приносят горе, біду и несчастье.

И так мы старамеся во всім помагати, но але самым собі мы на чужині, ани нашому народу там в краю, особенно тым на выгнанию, мы много помочи не можеме, бо як говорит русска народна пословиця, што: “Против течения воды (горі водом), далеко не поплынешь”. Но о том ище будет спомнено пониже.

ХРОНОЛОГИЯ ПЕРЕМІНЫ ИСТОРИЧЕСКИХ СОБЫТИЙ

История, то рекордовы запискы перемін и прогресса житья в природі, т. е. из переміны самой природы, в том животных существ, из житья людства, народов, держав и т. п.

Природа, то вічный процесс перемін и переустройства до усовершенствования свого власного природного свойства. И так природа вічно перетворюется и прогрессует завсе вперед. Таке право живой природы относится также до людей, бо так як человік переживат свои фазы и переміны людского житья в природі, так и каждый народ в своей державі переходит всякы фазы перемін и свого культурного розвою, для достижения або усовершенствования своей системы народного житья. И подобно, як в самой природі часом случаются невыяснимы чудовища, так и в житью народов або держав заходят часом гдеякы ошибочны неудачи або неожиданны послідствия, тогды дочасно затримуется дальший прогресс для исправления ошибкы, або для переміны новой формы в напрямі своей дальшой народной судьбы.

Значит, што ровномірно с течением часу, и залежно от часу, місця, отдаления и природных обстоятельств, всьо на світі измінятся, або перетворюет свою форму, своим природным процессом, и завсе прямует относно до своеродного усовершенствования. И подобно так, творилося всьо народне житье, за весь период истории, от самых початков основания древнерусской народной и державной Руси.

Отже теперь, коли мы сопоставиме коротко такы периодичны переміны событий свого часу, то нам представится загальне изображение той первоначальной державной Руси, и в переображению ей на обще народну, социально нову совітско-русску державну Русь.

ПОВЕРХОВНО-КОРОТКЕ СОПОСТАВЛЕНИЕ СОБЫТИЙ

Подобно тому, як на початках нашой русской истории началося передвижение народа от наших Карпат, т. е. от Запада на Восток, поширялася русска земля и возрастала народна колонизация што раз дальше и дальше, и с течением столітий часу ровнобіжно и постепенно с тым розвивалася, измінялася и поширялася вся русска народна культура и вообще русский язык, аж до часов великой революции и переворота в России.

Революция, то ест в роді як житейска буря в природі, подобна до вихровой заверухы або урагана, што бурит домы, выдерат дерева с коренями из земли и нищит, палит або заливат и перевертат всьо, што на заваді по ей дорогі — так подобно и русска революция розвалила стару систему житья и уничтожила давны стары царскы порядкы, а на місце старых завела новы законы и порядкы, нову систему людского житья в России, на новых засадах и принципах совітской социалистичной наукы.

И так с часом, за послідны десяткы літ, там на Востоку витворилася и выросла нова народна совітска культура и система людского житья.

Отже тота нова система житья, культурного прогресса и народной творческой силы при помощи наукы, техникы и планомірного господарства, розвилася и взросла до незмірно великой силы свого народного и державного могущества.

И теперь знов подобно, як на початках истории русска народна культура поширялася от Запада на Восток, так теперь нова розвита и переображенна, совітско-русска народна культура отбилася от берегов и повернула свой напрям от Востока на Запад.

Як бы от взрыва и выбуха той своей незмірно огромной творческой силы и своего державного могущества, як бы от громов молнии в природі, там от востока, от Москвы, Ленинграда, от Сибири, Ураля и Кавказа отбилися великы морскы волны (фалі) и повертают на запад, заливаючи постепенно всю давну русску землю. Так она, тота нова могуча совітска народна культура теперь повертат назад и заливат Украину, потом нашу старинну (Червону) теперь Карпатску Русь, а за тым с часом она залиет и всі старославянскы земли, народы и державы, связаны разом в Совітском Союзі, но и так дальше...

Так по нашым взглядам и понятию представлятся теперь правда о Совітском Союзі, а фактом тых показаний можут послужити великы достижения наукы, техникы, розвою индустрии и господаркы и в загалі культуры Совітского Союза, 50-ый годовщины Октябрской Революции.

Очевидно ясно, што против такого прогресса новой совітско-русской народной культуры, оператися невозможно и безмысленно.

Но зато, покаль оно дойдет до большой переміны и осягнения их наміренной ціли, то нам непремінно предстоит соблюдати и сохраняти нашу народну карпаторусску культуру.

КАРПАТОРУССКА НАРОДНА КУЛЬТУРА

В далеку давнину, там в западных Карпатах по обоим склонам на Бескидах с давных часов проживало старорусске племя, от котрого потомкы сохранилися аж до днешних часов, теперь они названы лемками-русинами. И тото племя лемкы карпаторусины розвивали дальше свою старинну славянско-русску культуру, но при том они сохранили и затримали свою оригинально славянско-русску (лемковску) народну бесіду, свою отрубно-характеристичну ношу и строй и отмінны старославянскы звычаи и обычаи.

Там лемкы русины управляли свою землю и занималися головно скотоводством и полюванием. Они там в горах будували свои села, школы и характеристично свого рода церкви, якы отличалися и своим зовнішным видом, так и в нутрі своим живописным малюванием икон и всякой артистично выконанной утвари, деревяной різбы и прочих выробов.

Несомнінно теперь, о лемках карпаторусинах знают не только близкы сусідны славянскы народности, бо о Лемковском народі и их розвитых талантах и их своеродной характеристичной народной культурі дозналися теперь и в Москві, знают о лемках-русинах в Києві, во Львові и по цілом Совітском Союзі.

Отже, безвзглядно на то, што наша краина, наша отчизна Лемковина тымчасово пострадала, и теперь она опущенна и занедбана, но земля ест там где была, и наш народ жиет по світу культурно. Зато лемкы-карпаторусины не должны упадати духом и тратити надію, же то всьо для нас пропало. Ніт, бо ище много ничого народно для нас не пропало.

Нам треба собі ясно выобразити, што для переобразования всіх народностей в идеи общественного строю житья, заберат ище много поколіний часу, и покаль оно дойдет до наміченной ціли, т. е. до международного сообщения всіх народных культур воедино, то тымчасом вся наша добра народна культура буде верхувати, а всьо што ест лихе и нездале буде измінятися або пропадати, зато, треба нам головно свою народну культуру сохранити.

Там всі давны народны события на Руси останутся записаны в историчных архивах, а всі старинны памятникы будут вічно жити и пригадуватися в народных преданиях и музеях, на многы будущи поколіния людской и народной истории.

Отже и карпаторусска народна культура лемков не пропаде в той международной заверухі и новой Совітской народной культурі. Она буде вічно жыва в народі, бо там на землях Лемковины и Пряшевщины, по обоих сторонах Бескидов, як в загалі по всей давно Галицко-Карпатской Руси ест множество историчных памятников, народно-церковной архитектуры и всякой иншой артистичной изобрітенной культуры, котра буде завсе напоминати на историчны события, давно-старинной, княжеской Галицкой Руси.

Длятого важно, штобы лемкы-русины сосредоточили всі свои силы и сплотилися воедино народно, штобы в солидарности могли успішно сохраняти свою обще народну культуру, як памятникы своих народных историчных событий, так и старинной, церковной архитектуры, живописных икон и всякой цінной и достопамятной утвари.

Лемкы-карпаторусины там в чужих державах должны доглядати за тым, штобы народным врагам не дозволяти знищити народны свои характерно збудованы церкви, не дозволяти им выкрадати и заберати из них всякы дорогоцінны живописны иконы и архитектурны историчны памятны річы, а тым самым и не дозволяти врагам на унижение чести и народного достоинства свого лемковского народа.

Отже, лемкы сами должны досмотріти того, штобы непремінно сохранити свою характеристичну культуру, штобы вся тота наша карпаторусска народна культура войшла даколи в склад и состав, той новой народной совітско-русской культуры.

НАША НАРОДНА КУЛЬТУРА НА ЧУЖИНІ

И на чужині, в Соединеных Штатах и Канаді, лемкы-карпаторусины створили также свою народну и богату культуру. Набудовали они множество русских церквей и школ, позакладали при них свои запомоговы братства, сполкы и великы общества, а по при них созданы многы народны домы и всякы социальны и политичны клубы и культурны центры.

Тут головно представлена будет коротко только частина або одна фаза из житья карпаторусинов-лемков, сгруппованных при народной организации Лемко-Союза.

Отже у лемков ест своя народна культурно-просвітительна организация Лемко-Союз, для общого объединения карпаторусского народа. За орган Лемко-Союза служит народна газета “Карпатска Русь”, там ест своя народна печатня, где издается газета, календари и всяка культурно-просвітительна литература, на своим лемко-карпаторусском наречию.

Карпаторусины-лемкы мают свою народну велику и красиву забудову КРАЦентер (Карпаторусский Американский Центер), який служит для народно и социально діловых (бизнесовых) и для культурно-просвітительных народных цілей.

К тому у карпаторусинов ест народна земля Лемко Резорт, покуплена на участках шерголдеров, як народне прибіжище для отпочинка, народных предприятий, и в загалі як народне и социальне ділове заведение. Лемко Резорт Парк, то саме прекрасне и удобне місце, як бы в Карпатах помеже горами, и там теперь построенный памятник народной трагедии Талергофа.

При том у лемков-карпаторусинов ест чартерована благотворительна народна организация Лемковского Релифа, для несения помощи нуждающимся соочественникам в чужих державах.

До всего того, подходят ище и принадлежат всякы меншы народны группы, як комитет постройкы Талергофского памятника, комитет по изданию исторично документального, характеристично народного карпаторусского фильма “Лемковске весіля”, но и многы иншы для народно-культурных предприятий комитеты.

Вся тота культура створена карпаторусским народом, то не только наше народне богатство, то наше честне достижение народной культуры и то ест достоинство всего нашого карпаторусского народа.

Отже теперь и тут на чужині важно ест самоперше, штобы всі нашы обще народны институции и заведения, свою народну культуру и всі нашы народны достижения сохраняти, розвивати, поширяти и хранити их так, штобы они без призору не пропадали, або не попадали во вражи чужы рукы.

Длятого на первом місци, для обще народного діла стоит печатне слово, т. е. своя печатня, народна газета и литература, без якой жадна организация не может существовати. Без народной газеты, нияка обще народна, культурно-просвітительна діятельность, розвой або прогресс народный ест неможливый.

Отже, сильно важне ест, штобы народну печать и газету належито забезпечити так, штобы она непрестанно и завсе могла служити свому народу и народному ділу на будуще.

Потому Народна Организация Лемко-Союз являтся самым головным и активным чинником и двигателем нашого карпаторусского народного движения и прогресса. Значит, мы всі члены Л. С. должны сосредоточити нашу увагу, всі нашы усилия и ужити всіх возможных заходов, штобы образуміти малосознательных народно людей и притягнути большинство карпаторусского народа до его народной организации Лемко-Союза, а головно всіх народно идеальных и влиятельных передовых людей, як из Лемковины (Польшы) так с Пряшевщины (Чехословакия).

Тогды вытворится больше массова народно карпаторусска организация, яка буде мати велике народне значение, котре буде мати большу силу и политичный вплыв и на нашу народну карпаторусску справу.

Дальше слідует КРАЦентер велика народна забудова, яко народно-ділова (бизнесова) институция, для подпоры и помощи культурно-просвітительного розвою и поднесения карпаторусского народа. Отже, КРАЦентер должен мати завсе солидарно-кооперативну поддержку, от всего сознательного карпаторусского народа.

Поза тым ест ище народне имущество (земля-парк) Лемко Резорт, Корпорация, яко народно-социальне ділове заведение. Лемко Резорт Парк, ест то знатна народна институция, котру карпаторусский народ должен достовірно сознати и активно дружелюбно и солидно поддержовати.

СОЛИДАРНОСТЬ, ТО НАРОДНА ТВОРЧЕСКА СИЛА,
И СИМВОЛ НАШОГО НАРОДНОГО СОКРОВИЩА

Там в Лемко Резорт Парку красуется теперь памятник Талергофа, построенный в достойну честь и вічную память погибших мучеников и стражданий карпаторусского народа в таборі смерти, того злопамятного Талергофа, Терезина и прочих таборов, где они отдали свою жизнь, за свою честь и народны идеалы, за свою русску віру и народны убіждения во единство всего русского народа.

Памятник тот был построенный комитетом талергоза, на добровольны жертвы от лемко-карпаторусского народа.

Тут на місци замітити, што в наслідок выгубления тысячов самых передовых идеальных народных патриотов, то сама тота народна трагедия Талергоза, отразилася потом и доложила также свою долю, в той теперь несчастной судьбі лемковского народа, а то в самом часі народного освободительного движения в 1918 року.

Отже, самый памятник Талергофа, то прекрасна архитектурна структура, в роді приснопамятной капличкы, с алтарным престолом в середині, а с баньом и три-раменным крестом на верху.

В подвалі на сподку того памятника заведена библиотека карпаторусской истории и культуры. Там хранится архив с документами истории того злопамятного Талергофа, рекорды имен (по возможности знаных) мучеников и страдальцев в Талергофі, а также и рекорды всіх благодітелей и жертвователей на сооружение того памятника.

А при том заведено там невеличкий музей карпаторусской характеристично народной культуры и ручных артистичных выробов и талантов нашого лемковского народа.

И так, тот знатный памятник Талергофа в Лемко Парку, то саме важне и головне притяжение народной массы людей. Тот памятник интересный не только свойом структуром архитектуры, но и своим научным и культурным заведением. Он притягат до себе не лем наш народ, але также и чужих людей. Отже, тот сам памятник мает вплыв и важне историчне значение, бо он представлят и саму народну трагедию историчного события, нашу историю, як вообще нашы народны культурны достижения всего карпаторусского народа.

Зато важно будет теперь ище на часі досмотріти за тым, штобы тот историчный и достойный памятник Талергофа забеспечити на будучность. Значит, организация Лемко-Союз и Корп. Лемко Резорт, должны составити легальный документ по угоді и зарегистровати законно в реальном имуществі Лемко Резорт, Инк., штобы на всякий случай, во вічны часы забеспечити вольный доступ и свободну дорогу до памятника Талергофа. Такий легальный документ должен быти зробленный зараз-теперь, покаль живы ище мы и многы страдальцы злопамятного Талергофа.

При том памятнику потребно створити даякий фонд, для дозора и утримания памятника завсе в належитом порядку и уважению, а также для указания достовірной информации о самом Талергофі, як и познания историчной правды карпаторусского народа.

Никто из нас не в стані предсказати на далеко будучности и никто не может знати, як долго наш карпаторусский народ будет продолжатися своим народным и русским духовным житьем, бо и тут наш народ памалы ассимилюется в чужой англо-американской культурі. Но покаль в карпаторусском народі будет жити русский дух, так и наш народный маеток, и ЛемкоРезорт Парк буде обеспеченый народом.

Отже як для карпаторусско-лемковского народа важно ест теперь на часі досмотріти и постояти за тым, штобы за всяку ціну обеспечити и сохраняти свою достойну народну культуру, там на землях Карпатской Руси, штобы даколи наша народна культура войшла в историю народов совітско-русской новой культуры.

Так и тут на чужині в нашой прибранной отчизні лемкы-карпатороссы должны жити дальше своим народным русским духом, творити и розвивати народну культуру по при своих народных организациях, для достижения высшого народного уровня и належитого признания честного достоинства карпаторусского народа.

А тот наш на чужині построенный помятник Талергофа в Лемко Парку, на всякий случай на будуще забеспеченый будет завсе напоминати людьям и освіщати страшну народну трагедию в Талергофі, як першого в світі людской истории такого табора смерти, для массового вынищования народностей, о страданиях и замученных там лемков-карпаторусинов, за их народны идеалы, за русску віру, честь и любов до свого народа, за свою народну правду и віру во единство всего русского народа.

И тот памятник, подобно, як Статуи Свободы на многы поколения, покаль только будет жити русский дух в нашом народі, он будет завсе освіщати правду, защищати народну честь и его культурны достижения и достоинство всего карпаторусского народа.

Тот памятник, як источник світла историчной правды будет освітляти и открывати ложь на всякы несправедливы и провокативны интригы взглядом нашого віками поруганного народа, а за нами свідком правдивых событий тых часов останется наша народна история.

Памятник Талергофа останется навікы в истории людства, як символ нашой русской народной віры и символ дорогоцінного сокровища нашого карпаторусского-лемковского народа.




[BACK]