Село Ванивка — Илько Шуфлят, Vanivka — Ilko Shuflat

Хочу написати хоц лем мало за нашу Лемковину в Кроснянском повіті.

Село Ванивка находится на восточну полноч от свого повітового міста Кросна. Єст оно, на так званом Лемковском Острові русскых сел окруженых поляками. Полякы вклинилися меже тоту группу сел отділили их от решту русской Лемковщины.

В той группі сел, кромі Ванивікы єст село Чорнорікы, Коростенка, Боднаровка, Опаровка, Петруша Воля и Ріпник. Тоты села полякы с давных часов старалися за всяку ціну ополячити и затерти русскы сліды по лемках. Но хоц тоты села были одорваны от решты своих людей, што жили в Карпатах, не далися ани перемішати, ани ополячити. Здаєся, тота причина, што они были одорваны и окружены польскыми селами, они тым больше трималися свого родного языка, віры и обычайов. Они все смотрили на всхід до своих братов. Все мали надію, же приде колиси час, як не для них, то их потомства, же прилучатся до своих. Але так сталося, же по гитлеровской войні нашы землі не были прилучены до своих на всході, а зостали в Польші.

Люде с нашых сел знали националистичну натуру поляков, розуміли, што они не дадут им споспокою, а будут их дальше полячити, особливо коли будут мати власть в своих руках, то як было переселение вшыткы выіхали на восток до своих, и тепер не плачут, же их полячат. Хоц початкы были барз трудны и оплаканы, и тепер хоц може ище ніт великых роскошов, але для них то важне, же молоды достали образование, повыходили на высшы становиска, бо дуже с них єст учителями, инженерами, докторами и механиками. Так, што, як бы дакто и мал можность вернутися на стары місця, то мало кто бы повернул, хыбаль дакто зо старшых. А и молоды хоц бы вернули, то судьба им не страшна, бо мают науку.

А тепер напишу дашто за саму Ванивку, бо я в ней рожденый к выхований. Походжу з Ванивкы, то на кілько знам, то коротка опишу.

Ванивка была найбольша зо вшыткых тых сел, якы я вспомнул повысше, на том Лемковском Острові. Ванивка тяглася 7 километров. Было 500 номеров домов, около 3 тысячы населения. В Ванивкі было три склепы кооперативны, была читальня им. Качковского, в котрой за мене, было 300 членов. Провадилася велика культурна робота, отбывалися представления, концерты, бо были добры хоры, єден церковний, а другий світский, же мог заспівати хоц-где. Молодеж ходила на пробы представлень и хору, то не мала часу балагувати и тратити го на глупоты и выбрыкы. Начал провадити хор ище перед І Світовом войном Андрей Виталиш. Он был студент с польского роду. И як были вакации то он провадил хором и учил співу. По І Світовой войні провадил спів Войтко Мрозек. Он был даколи громадскым писарьом. Представления учил учитель Махновский, а як одышол от нас, то учил Мрожек, а позднійше подрос студент Андрей Оршак. Он дуже помагал, бо учил співу, а як треба бы было то и представления. (Тепер здаєся єст священником в Дрогобичу, недалеко Борислава). Мрозек єст в Бориславі, Махновский певно уж не жиє. Говорят, што в Италии в 1964 р. помер.

Так, же в Ванивці проводилася культурна робота, а при Ванивці и в тых другых селах не спали, бо ся озерали на Ванивку.

В Першу Світову войну было кількох селян из Ванивкы зо священником в Талергофі. Поверталися вшыткы, лем мой стрык Григорий Шуфлят ся не вернул, там остал замучений. Он был дьяком и писарьом, а же Ванивка была передовым селом в тамтой місцевости, то посылам и пару фотографий до календаря: церковь, Громадский Дом, в котром ся містила читальня и школа, Народный Дом, котрий был збудованый, як раз перед гитлеровском войном. То дуже хлопи робили задармо, абы мали свой Народный Дом. Я сам робил 9 дней и ниякой заплаты не взял за роботу. А такых, як я было дуже, бо того потреба вымагала, бо с фондами все трудно.

В том Народном Домі малися поміщати: склеп, молочарня и галя широка 14 метров, а долга 20 метров кромі сцены. Але гали не побудували, бо зашла война, лем дом поверховый, котрого даю знимку, але взяту лем зозаду, не с переду, бо с переду полякы не позволили брати и таку мі прислали. Видно, же полякы не хотят показувати с переду маєток, який достали за дармо по лемках-русинах.

В Ванивці осілися полякы, котры пришли от Львова и Тернополя, така зберанина. Єст их тепер коло 200 номеров. Копальня нафты перше была на єдном конци села, а теперь єст горі цілым селом.

Я виділ в попередных календарях знимкы сел и церквей с другых сел, то я описал в коротці мою родну Ванаивку, жебы и она не была позаду от другых, а то мож видіти по тых фотографиях, котры як печатка, сут свідками культуры нашого села.

Можна розуміти, што як была така велика школа поверхова, то и дітей было много. Як я ходил до школы, то было 6 учителей и 6 класс до наукы и церков немаленька, и громадский будинок. Там было житья веселе для молодых. Мали ся где поміщати и молоды и стары. Найбольше их тепер єст в Бориславі, бо аж около 300 фамилий. Решта в Тернопольской области и на великой Украйні в Донбасі порозкиданы.

Пишут, жиют хорошо, полякы их больше не переслідуют.

(Фотографии не вышли добрі, то не сут поміщены).


Илько Шуфлят



[BACK]