З Новым Русскым Роком 1968! — Михаил Савчак

Народы на нашой планеті Земля встрічают торжественно свой Новый Год. Так робиме и мы лемкы-карпатороссы, бо встрічаме торжественно свой руский новый год.

Кто бы сой подумал з нас, же справляме мы всі тоту торжественну встрічу для Нового Року практично лем зато, же наша Земля перешла свою дальшу дорогу по орбиті около Солнца. От того понятия люде оттягнены далеко, а ориентуются лем по календарю и змінных порах рока. И мы лемкы-карпатороссы робиме тото так подобно, при чом обзерамеся на пройденый рок, наши добры и недобры выконаны діла, котры осталися уже лем в неповторной истории, штобы им дати оцінку и подякувати старому року за милость и добро, с котрым нас пожегнал.

На тот торжественный день припадат така сама задача и для нашой редакции. Несомнінно в першом ряді потребно подати низкий поклон от нашого издательства нашым читателям того календаря и газеты “Карпатска Русь”, котры найбольше причинилися до доброй роботы нашого издательства, бо их письма были найточнійшом ориентациом для нас редакторов, ци писателей або простых робочых. Письма нашых читателей были розличного содержания, але и так с каждого можно было чувствовати любов к свому народу, родной земли, свойой организации Лемко-Союза и свойой газеті, што помогло к тому, же лем мала часть писем от нашых читателей до того часу не нашла місце на сторонах нашой газеты и календаря.

За цілый старый рок наша совість в редакции, при всьом нашом издательстві, была чиста, бо робили зме, што было в нашых силах, штобы чым найлучше служити свому народу. И лем зато пару з нас, обычайны смертельникы, были в силах выдержати всі чужы напады, свои и чужы надавкы, понижения, бо в том помогли сте нам вы, дорогы читатели газеты и календаря своими поддержительными листами, щирыми жертвами, послухали сте и помогли нам выполнити ряд важных и тяжелых задач, на котры уж до теперь зме забыли, хоц выполняли зме их разом — мы, редакция, головне наше правление Лемко-Союза и вы, дорогы читатели. Без вас наш голос бы был лем “голосом вопіющого в пустыні”.

Зато, же звыкло в нашой газеті и календарях политикуєме, о войні (бо ище не окончена во Вьетнамі), пишеме о ненависти, о дружбі, взаимных договорах, конференциях, мирі, економии и иншых проблемах международного характеру, попробуйме теперь звязати всьо и выбрати лем тото добре. Напевно долго бы зме таке дашто глядали в старом року, бо война продолжатся, Китай має атомну бомбу, рыхтуєся на США и Совітский Союз, зазначил “успіхы” в культурной революции. Арабы и Израиль постоянно напряжены. Воєнный пакт НАТО приготовлят новы стратегичны планы. Варшавский воєнный пакт тренируется. На граници двох Корей перестрілкы. На Кипрі на час затихло. Нацизм зростат в Западньой Германии. Западна Германия начинат роздоры в Совітском блоку. Девальвация фунта стерлингов в Англии, Куба выступат против политики Совітского Союза и приготовлят по теории Кастра революцию в державах Латинской Америкы и т. д.

Окрім пару уопіхов в международной политикі научного и культурного характеру, старый год не принюс світу много добра. Был заключеный международный договор о использованию космичного пространства для мирных цілей, достали незалежность и свои державы многы малы поневолены народы, Президент Джонсон в дружеской атмосфері встрітился с Косыгиным, Совітский Союзо и США проявляют взаимны стремления жити дружно, але препятствує тому вьетнамска война...

А што нового сталося за старый рок в нашом родном краю? Много лемков вернулося зо Заходу на Лемковину. Пришли под голе або нецалком голе небо живорити. Лемко-Союз, Лемко-Релиф, многы нашы люде доброй воли помогли дакотрым с повернувшыхся збудувати жилища, облекли их и помогли для них построити Божы храмы. Польскому правительству ани на думку не пришло побудувати фабрику в Ганчові, Розділю або ицшом місци, где бы пару тысяч нашых людей нашло кусок хліба. Переслідование русинов поляками продолжатся.

В Совітском Союзі нашы лемкы доставаются на высокы посты, радио начинат пропагувати лемковску культуру. Телевизия приносит лемковскы пісні. Совітске правительство позволило 60 родинам с Пряшевщины повернутися организовано на нашу милу Пряшевшину. Пряшевщина “украинизуєтся”, так-бы то сказати, бо точнійше с помішания розумов она словакизуется.

Але сут и радостны новости старого року! Судьбом нашого народу, завдякы организации Лемко-Союза, начали интересуватися перед часом незаинтересованны совітскы представители в ООН, хотят о нас больше знати польскы корреспонденты и чехословацкий конзулят в Вашингтоні. Постоянный представитель США в ООН Голдберг и сам генеральный секретарь ООН У Тант в подходящий час готовы сут принята нашу делегацию.

Вірьме, же тот Новый Год 1968, до котрого вкладаме столько надій, принесе лем добро для нашого народа, нашой организации, нашых газет и нас всіх!


Михаил Мих. Савчак.



[BACK]