Два Юбилеи о. Иоанна Полянского, Бывшого Управителя Апост. Администрации Лемковщины
Father John Poliansky
о. Иоанн Полянский

О. Иоанн Теодорович Полянскый родился в Баниці, грибовского уізда, на Лемковщині, сын малорольных земледілцов Теодора и Марии. Гимназию кончал в р. 1911 в Сянокі, богословскы студия на львовском университеті в р. 1916. В грудни того же року рукополаганый в иереи через епіископа Григория Хомишина. Душпастырскы посады займовал в Тулиголовах, Смольнику и Вороблику королевском. В лютым 1935 р. зостал именованый канцлером Апост. Администрации Лемк., а послі постепенно: совітником той же Админ., просинодальным испитователем, просинодальным судьйом, цензором книг религийного содержания и т. п. По смерти першого Апост. Администратора зостал именованый декретом Столицы Апостольской регентом Апост. Администрации Лемк. С концом грудня 1936 р. вернул на парохию Вороблик и оттуда в потребах доізджал до Курии Ап. Админ, для полагодженя бижучих діл.

В часі гитлеровской окупации перейшол цілы етапы знущань и арестовань. Дня 6 октября 1939 р. благодаря клевет укр. священника Горечки, наданого до Вороблика в характері сотрудника, о. Полянский зостал арештованый и приговореный к смертной казни. Приговор не зостал выконаный. Клевета выйшла на яв, приговореного выпущено на свободу.

Дня 21 июня 1941, в дни нападу Гитлера на Совітский Союз, зостал о. Полянский вторично арестованый и оттранспортованый в ясельску тюрму. Послі двох неділь выпущеный на свободу, а 15 июля 1941 по раз третий арестований и вывезеный на конфинацию до Кельц, де перебыл под острым наглядом гестапо до укончения войны.

В марті 1945 р. повертаючи из гитлеровской неволі на одной желізничой стации коло Ряшова зостал обрабованый через совітского майора. Внесенье против него жалобы до русской комендатуры нич не помогло и покарано не майора а о. Полянского. Благодаря благородности стрегучого караула уможливлено узнику утечу из вязниці.

В окресности Вороблика грасувала збойницка банда, сорганизована латинскым священником Яном Шуль, бывшым пробощом в Радехові, которой цілью было приневолити лемков до выізду до Совітского Союза, а майно их зрабувати. Ночными нападами з оружием на мирне население Вороблика Шульовцы прогнали людей из Вороблика, а полишене майно заграбили. Не пощадили и о. Полянского. Ночью напали на приходство, обрабовали о. Полянского и наказали йому под загрозом смерти до 12 часов опустити приходство, што сейчас сділал и переселился до своих фамилиантов в Перункі, коло Крыницы. Лиха доля тоже и тут його не минула. По раз пятый його арестовано и вывезено в крыницку тюрьму. Благодаря интервенции латинского пароха Крыниці послі нісколько днях його выпущено на свободу з наказом выіхати до Совітского Союза или на западны земли Польшы. О. Полянский выіхал во Вроцлав, столицу Шлеска Долішнього. От 1 января 1946 до сегодня исполнял душпастырскы обязанности в лат. приходах, переслідованый и гоненый через лат. епископов и лат. духовенство. За отправление Службы Божой в греч. обряді на Рождество Христово для лемков в р. 1952 зостал позбавленый через лат. владыку прихода и выброшеный на брук. Без средств к жизни скитался больше пол года, заним одержал опять приходство в другой епархии, а именно в Рогах. За 20-літну вірну службу лат. церкви и польскому народу получил сегодня от епископа копняка.

В найблизшом времени намірят остати среди лемков. Из литературной діятельности о. Полянского кромі многых статей и рефератов большым його трудом єст История Лемковины под заглавием ”Серед зеленых Карпат“ в V частях.

В минувшом році празновал о. Полянский юбилей 50-літия священства, а в настоящом року 80-літие його жизни.

За общественный труд получил от Найвысшых Властей Народной Польшы 2 золоты кресты и нісколько другых отличий.




[BACK]