Наша Организация Лемко-Союз в 1967 и 1968 г. — Стефан Кичура

Хоц в Лемко-Союзі мы не маме десяткы тысяч членов, як бы то на ділі должно быти, але Лемко-Союз завсегда перше, а специально минувшого року являлся самом найболше интересном организациом, о котрой лемкы бесідуют по цілому світу. Они бесідуют о Лемко-Союзі зато, бо они в нем видят таку организацию, где лемкы, коли стаются членом Лемко-Союза, то чувствуют себе, як во власном домі при свойой родині. Они сут согріты добрыми чувствами, добрыми словами членов Л. С., урядников отділов и головных урядников. Лемко-Союз в трудном свойом положению давал собі рады за цілый прошлый 1967 год и с таком добром надійом он вступил в новый 1968 год.


1967 Lemko Convention

В Леміко-Союзі в головном правлению часто отбываются собрания, на котрых обговорюются лем діла самых лемков-карпатороссов и их приятелей. В минувшом року в Лемко-Резорті в Монро, Н. Й. с початком августа отбывался 24-й головний съізд Лемко-Союза. И мимо того, што лемкы лем частично жиют на Лемковині, ходят часто видіти тоту свою отцовску землю, то мимо того, што там на той землі сталися великы и нечуваны зміны, то и так тверда русска душа лемков не поддалась на то, штобы дати себе спровоковати ріжным агентам, якы выступают против того прогресса, який єст в Совітском Союзі и во всіх краях Восточной Европы. Лемкы, котры зышлися на свойом съізді, горячо витали прогресс не лем той земли, на якой они тут жиют и их фамелии, але они витали прогресс там в старом краю и тішатся тому, што врагы прогрессу хотяй як хотят пошкодити тому прогрессу, то им не удаєся тота робота. И лемкы в Америкі и в Каналі, а читатели газеты “Карпатской Руси” в ріжных краях Европы и Полудневой Америкы показали уже велику солидарность и велику силу. Тоту силу они показали и тым, што они боролися всяды против войны и стояли за мир на світі.

На съізді зышлися направду великы патриоты Америкы и Канады, а на встрічу им вышли лемкы в цілом світі. Найбольше нашы лемкы заинтересовалися свойом организациом, то тут в нашой Америкі. Они организувалися в своих отділах, кругом своих институций и народных домов. Всі тоты передовы отділы прислали своих делегатов на тот 24-й съізд с тым намірением, што там на том съізді мы должны выробити ище лучшы планы, приняти их съіздом и пустити их в рух для выполнения их отділами, читателями газеты и нашыми симлатаками. И зато, што тот съізд выробил такы планы широкой народной роботы, принял их и дал их на выполнение цілой организации, то сегодня у нас уж процвітат велика народна и культурна робота. На съізді делегаты тішилися успіхами пресс кампании, котра того року прошла нам найбольше успішно. На съізді делегаты говорили щиро и открыто о судьбі нашого народа в цілом світі. Там были перший раз за ціле його существование приняты резолюции на 5-х языках и посланы в назначены правительства, а то єст: Совітскому правительству, Польскому правительству, Чехословацкому правительству, Чехословацкому правительству, як тоже губернатору Нью Йорк штату, в котром отбывалася наша конвенция-съізд. Радо читали нашы люде составлены резолюции, в котрых не звучало вороже отношениєся к жадной из тых держав. Правда, лемкы поскаржилися за протестовали поотив того, што край лемков Лемковина опустіла, лемкы были выселены и так помалы вынародовляются. Но лемкы тоже роблят великий прогресс в цілом світі. Наибольший прогресс лемкы ділают, то в Советском Союзі. Там лемкы влялися разом в єдно велике и могуче социалистичне море и они свою часть выполняют так, як найлучше знают и можут. Они гордятся свойом державом. а держава Совітска Украина гордится лемками. В совітскых газетах, по радио и по телевизии ширится лемковска культура, котра мала замерати, а она тут ширится и наш народ, нашы переселенцы там тоту добру роботу щиро витают и длятого они ище с большом силом и охотом выполняют свои гражданекы обовязкы. Представте собі, што перший раз за цілу историю существования лемков, лемкы мают таке саме полне право на науку, як и всі граждане СССР. Тота любовь к всьому тому, што творится сегодня в Совітском Союзі возросла на великого сильного, а к тому на счастливого человіка. Счастье людей, то єст перва річь в житью людей в Совітском Союзі.

Длятого мы на головном съізді могли читати из самого Львова много теплых привітствий нашых передовых лемков для нашых членов и нашых читателей. Сего року, як николи перше, нашы лемкы в Совітском Союзі заинтересовалися свойом родном организациом на емиграции. О том свідчили не лем привітствия от лемков, але и добры предложения на добро организации и на добро газеты. Такы добры привітствия от нашых братов подійствовали на делегатов, што они отчули тоту братску связь нашым народом в Совітском Союзі. Такы привітствия съізд получил не лем от лемков, но тоже от Комитетов связи с Києва и Львова. Тоты пожелания Лемко-Союзу укріпили у нас всіх силы для дальшой культурной роботы в Лемко-Союзі.

Съізд рішил реорганизовати отділы, организовати новы отділы, организовати нашу молодежь в молодежны отділы, а также съізд рішил выдати нову газету на английском языку. То єст великий крок вперед, велика отвага делегатов, но и, розумієся, слава для нашого народа! Така газета уж вышла з друку и єй имя єст — “Карпато-Рошен Американ”, (карпаторусский американец). Як видно с першого номера, то тота газета принесе нашому народу на емиграции свою радость и велику корысть, а то всьо завдяки тому, што делегаты на съізді набрали новой охоты и енергии до народного діла, то выбрали сой тоже и добрый комитет и цдлый Центральный Комитет, який пильнує свойой роіботы. Єсли так пойде діло дальше, то в том року 1968 наш Лемко-Союз прославится свойом роботом и народ ищы лучше його поддержит.

Туристичны группы, якы организовал Лемко-Союз в прошлом принесли йому саму большу славу. Тоты туристичны группы, котрых было 4, а в том 1968 року организуєся 5-та, так сказати, юбилейна группа, котра выіде в Совітский Союз и Польшу на цілых 33 дни. Тоты группы мали за задачу найперше отвидіти своих родных, якых они не виділи по 30, 40, 50 и больше роков. Встрічы з родными были не до описания. Познаючы сын отца, маму, брата и сестру, то завсегда в горячых слезах падали в объятия и здавалося, што не розыйдутся братья, не лишит сын отца, маму, не отойде тот потяг назад, або тот аероплан не полетит назад, який привез до краю нашых родных.

В 1967 году мы были такыми свідками такых встріч и николи их не забудеме.

Но встрічы лемков в Совітском Союзі и встрічы в Польші мают своє отмінне лице. Лемкы в Совітском Союзі чуются иначы, як лемкы в Польші. Даже тоты, якы жиют на родной Лемковині, не сут так певны себе, як сут певны нашы лемкы в Совітском Союзі. Як прислухатеся к звуку родной бесіды, то сердце радуєся, што нашы лемкы в Совітском Союзі ище все сохраняют и свою бесіду и свои обычаи, бо справляют и весіля и крестины на лемковский лад. Веселы лиця у молодежы говорят о том, што они сут задоволены тым житьом, тым бытьом, яке они мают сегодня в Совітском Союзі.

Мы віриме, приміром, што лемкы в Совітском Союзі поширят свою народну культуру, приде даже к тому, што им буде позволено печатати свои газеты и книжкы на лемковском нарічию, бо в Совітском Союзі всі национальны меньшинства мают тоту свободу, то и нашым лемкам она належится. К тому помалы приде, хоц сегодня ищы не всі тото хотят признати, але они признают с часом бігу нашого житья и житьового прогрессу.

Лемкы в Народной Польші тоже уповают на таку саму народну свободу, як и лемкы в Совітском Союзі. Народна Польша робит прекрасный прогресс в цілом єй житью и она николи не позволит того, штобы лемков вынародовити. Мы знаме, што в Польші найдутся такы полякы, котры будут наганяти лемков в лемковский союз, бо лем в таком союзі лемкы будут сильны сами и будут могли помочи барз дуже в розвитию цілой Народной Польші.

Друга ціль лемковскых туристичных групп в Совітский Союз и Польшу была познакомятися з новым житьом, видіти тото житья, а повернувшися обратно в США, росповідати о том житью лем саму найяснійшу правду. А лемкы, якы брали участие в туристичных группах, были всі робочы люде. Они знают прекрасно оцінити кажду и найменьшу добру роботу для уліпшения житья, бо они в США и в Канаді так само трудятся на таке саме лучше житья, як и нашы братья в краю трудятся, штобы тото житья было веселе и счастливе.

Не любят лемкы клевет и они, вернувшися обратно в США и Канаду выражаются с большом похвалом о житью людей в Советском Союзі и в другых славянских, странах.

Лемко-Союз, то мирна организация. Она учит згоды, любви и пошаны не лем для поєдинчых народов, но тоже отдільно для каждого человіка. Лемко-Союз завзято пре вперед за мир и дружбу зо всіми народами, а стоит непорушимо против войны и убийства людей на том нашом світі.

Даколи, коли нашы будучи писатели и историкы будут соберати всі истории о прошлом житью Лемко-Союза, они дадут велику признательность йому зато, што он в том 1967 року и в том 1968 року працувал за тот мир в мирном часі не горьше, як он працувал за свободу людей на світі — в воєнном часі.

Підеме и в том 1968 году видіти своих братов и сестер в краю. Принесеме з Америкы им поздравления и любовь от нас всіх и от самой нашой краины Америкы.


Стефан Мих. Кичура.



[BACK]