25-рочный юбилей супружеской жизни филипа и юлии кода
Philip and Julia Koda

Юбилянты Филип и Юлия Кода, Стамфорд, Конн.

Юлия и Филип Кода зо Стемфорд, Конн., праздновали 25-літие свойой супржеской жизни.

Обоє юбилянты родилися в Америки. Юлия в Джерзи Сити, Н. Дж., в 1907 року, а Филип в Стемфорд, Конн., в 1909 року.

Коли Юлия мала два рокы, то єй мама, Мария Михальска, разом с молодшом 8-місячном сестром Мельком вынесла до краю до Устья Русского, где оставила их при бабкі и вернулася обратно до Америкы с тым планом, што за час коли зяроблят даякы грошы в Америкі, вернутся жити до свого села Устья Русского. По часі планы змінилися. Родина розлучена жила довгы рокы, пришло больше дітей, а два дівчата Юлия и Мелька зостали в Устью при бабі и там росли, ходили до школы и пережили Першу Світову Войну, за што Юлия нераз оповідат.

В 1926 року обі сестры вернулися с краю до Стемфорд, Конн. Юлия роспозналася с Филипом Кода и так 22 ноября 1941 р. поженилися. Жиют они прекрасно в згоді. Походят они обоє зо знаных нам широко фамелий по стороні Михальскых и Кодов. Мы лемкы в Стемфорд знаме о их заслугах народных, як русских патриотов. Братя Коды: Иван, Штефан и Михаил разом с Петром Михальскым, отцом Юлии, вірно помагали при будові лемковской организации и газеты “Каратска Русь”, бо то всьо зостає нам в памяти. Всі братья Коды походят зо села Шквиртне, повіт Горлицы. Жена Ивана Коды Йоанна Ліщинска зо села Ждыні, вся родина по обох сторонах Горлицкого повіта. У Юлии и Филипа єст єден сын Владимир, котрому уж 21 рок, и он так старанно выіпланувал в секреті при помочы братов Михальскых, их жен, што всьо устроил для того торжества несподівано, штобы родиче о ничом не знали, в их власном домі. Гостину устроили 4 дны пізнійше, то юбилянты думали, што то забыте и так дали ся обманути выіхати на другий плейз. А коли ся повернули, то был сурпрайз, несподіванка. Гавз был заполненый гостями и родином. Так ся натішили, веселилися и угощалися. Так мы гев знаме Юлцю Михальску — Кода, а в Устью Русском Юлыця от Шмайды. Она старанно помагат всім, кому треба помочи, не лем родині, але и другым чужим людям. Дай Боже здоровья прожити разом обоим счастливо другых 25 роков до золотого юбилею.


Теодор Гончарик



[BACK]