Поздравления Карпато-Русскому Американскому Центру

Ніт на світі, быти може, такой будовы, построєной нашым народом, котра бы носила таке горде и славне имя — “Карпаторусский Американский Центер”. А єсли бы дагде и была така будова, то она и так не была построєна лем самым народом, организованым в Лемко-Союзі в Америкі и в Канаді, як то был организованный и побудуваный Карпаторусский Центер в Юнкерс, Н. Й.

То были тогды тяжкы часы. Люде глядали куска хліба, глядали и даякого притулища народного. И коли уж Лемко-Союз змоцніл, мал уж 10 роков, то тогды он задумал побудувати собі народну будову, в котрой бы он мал притулище и газета “Лемко”, а теперь “Карпатська Русь”. Были тогды такы планы, што газета должна была мати особну будову на фронті теперішньой нашой галі, но потом показалося неможливым, бо завсегда центов бракувало, а до банку пожичати нашы руководители не хотіли идти, бо то означало “моргич”, а моргич, то-єст така прикрышка, же єсли ты не выплачаш го на час, то треба платити больший процент от проценту, а єсли взагалі будинок бы не мог платити жадной той части до банку, то тогды банк заберат цілу будову. Так сталося неєдному нашому лемку, або неєдной организации або приватным людям в бизнесі. Центер не допустился до того и продержался на свойом місци, остался нашым Центром.

Наш народ любит тот Центер, бо мы маме где зыйтися на собрание, на весіля, на великы и малы предприятия и на встрічу Нового Року. Сколько то щирых слов было высказано в том Центрі по отношению нашого народа, то лем он сам, Центер, може тото каждому в будучности росповісти. Лем самы съізды Лемко-Союза, парафиальны забавы, весільны гостины, заручины, несподіваны забавы, где часто люде шли тут встрічати або отбывати даяку несподіванку для другых, а потом показалося, што то было для них самых. Ци можна бы того всього зробити без Центра? Не можна. Ту лем позвонят люде, ци можут придти вынаняти сой галю, а коли обсмотрят галю, то уж дальше не идут, бо она им ся подабат, невзираючи на то, сколько будут платити за ей вырентование.

Так ты, дорогий наш Центрику, наш народ с цілого світа в 30-ту годовщину шле тобі найсердечнійшы поздравления!




[BACK]