Горячий Привіт В 50-Ту Годовщину Всім Народам Совітского Союза, Меже Ними И Лемкам — Иван Адамяк

Коли началася І Світова война, то на Лемковині вся интеллигенция была арештувана австрийскым правительством и тысячы з них были вымордуваны. Австрийцы и германцы недовіряли карпатороссам-лемкам, бо они добре знали, што лемкы поверх 700 літ дуже прагнут, штобы были присоєдинены до России.

Коли война окончилася и царска Россия была на стороні побіды, но так вычерпана из сил, што ледво дыхала. В тот час трудящыся народы собрали свои силы и в страшных кровавых боях перебрали власть от царского режима. Як тогды, так и сегодня много чуєме критикы от чужых и поодинокых особ, от цілого світа, якы засуджают повстанцов-революционеров за убийство царя Николая І и ного фамилии. Мы тут не береме то так, штобы сказати, што таке убийство было правильне, але желаме припомнути світу то, што коли 9-го января 1905 р. робочы и крестьяне зо своима женами, дітьми и стариками ишли в религийном порядку с процессиом и сильно молилися и мали велику надію, што царь их тепло прийме и выслухат их прошение и поможе им в их страшной нужді, то царь Николай І приказал своим солдатам их выстріляти! Солдаты стріляли молящийся народ “перекрестным” огнем с карабинов и пулеметов, где было около 1000 невинных людей убито на улицах Петрограда. За такы поступкы царя світ замолчал и по сей день молчат дакотры.

В тот же сам час на молоденьку, только што сформувану перву социалистичну державу напали и чужы ворогы. Всім им здавалося, што за дуже маленьку жертву они завоюют для себе великы обшары русской земли. Але народы молодой державы потрафили розбити ворогов и привести внутрі порядок. Але и так часть их землі и народ остали под чужыма державами.

Наша Галицка и Пряшевска Русь были розділены. Галицка Русь попала под режим Пилсудского в Польшу, а Пряшевска под режим Масарика в Чехословакию.

В тот час напевно, што не было ани єдной державы на світі, штобы вірила, же нова социалистична держава выдержит тоты навалы цілого світа. В тоты часы по цілому світу всякого рода пророкы говорили, щто новый социалистичный режим в Росии только тымчасовый.

Тут треба подчеркнути, што нашы лемкы в Польші и в Чехословакии не были такого мніния, як остальный світ. В тот сам час на родной земли организувалися комитеты в той справі и домагалися от польского и чехословацкого правительств, што они желают мати свою Лемковску Республику и желают быти присоєдинены к СССР.

12 роков позднійше, по революции, у нас в США и Канаді была организована культурно-просвітительна организация Лемко-Союз. Организация Лемко-Союз и газета ”Лемко“ (позднійше ”Карпатска Русь“), от самых початков призывали свой народ стояти тісно в кооперации с народами Советского Союза. Коли пришла ІІ світова война, то наш народ был всеціло готовый на таку кооперацию тут на емиграции.

Коли 22 июня 1941 року Гитлер с його союзниками напали на Совітский Союз, то 24-го июня Головний Предсідатель Лемко-Союза, Иван Головач, скликал до нашого Карпато-Русского Центра в Городі Юнкерс, Н. Й. специальне засідание, где были присутны слідующы урядникы Лемко-Союза и редакторы газеты: И. Головач, Д. Вислоцкий, Д-р. С. Пыж, П. Гузлей, С. Кичура, Андрей Грабский, В. Вархоляк и И. Адамяк.

В тот час Гитлер уж объявил світу, што за 5 або 6 неділь його войска дойдут до Волгы и цілый Совітский Союз скапитулює и буде належати до Германии, што означало, же в Москві мал быти фюрер Гитлер на місце Сталина. Гитлеровскы войска в тот час наступали на совітской земли от 200 до 400 миль на Восток. Красна Армия отступала майже на цілом фронті и лишила за собом Латвию, Литву, Білороссию, Молдавию и велику часть Украины. Новости приходили до Америкы дуже мрачны. Нацисты и их сателлиты Италия, Румыния, Мадьярия и Финландия ударили на совітску державу с 190 дивизиями, што числило 5 и пол миллиона человік и поверх 3,500 танков, поверх 50,000 моторового машинного модерного всякого рода орудия и около 5 тысяч бойовых, найлучшых самолетов. И снова новости приходили, што враг пре в напрямі на три стороны, а то: на полноч до Балтику и Ленинграду, а в середину на Минск, Смоленск и Москву, а на полудне на Києв.

На повысше упомянутом специальном засіданню Лемко-Союза было єдноголосно рішено, што наша организация бере собі за обовязок боротися на домашньом фронті и помагати всьом силом, всіма способами и чым и як кто може, штобы враг был розгромленый. Мы глубоко вірили в тот час, што нашы русскы братья не отдали Москву Наполеону, то тоже не отдадут и Гитлеру. Нашы желания точно сполнилися, бо Красна Армия не пустила врага в Москву.

Сегодня в 50-ту годовщину мы лемкы из США шлеме Вам всім гражданам Совітского Союза пламенный, сердечный привіт! Пятдесят літ для чоловіка, то означат, што тот чоловік прожил половину столітня, то много роков, але для державы означат дуже мало, специально для економичного розвития. По державным обрахункам Совітский Союз єст ищы дуже молоденька держава, але широко, як культурно, так и економично розвита.

Перед Совітскым Союзом и єй гражданами стоит велика будучность и велика отповідальность, штобы меньшы народы охоронити от несчастных войн. И не лем всі меньшы народы жиют под охороном Совітского Союза, але они всі, а между ними и нашы лемкы в Польші и в Чехословакии, ожидают от Совітского Союза помощи при вырішению вопроса судьбы нашой Отчызны.

Мы Вам желаме великых и радостных достижений розвития Вашой державы во всіх отраслях єй житья. Желаме Вам обогачения всіх гражданов Вашой краины. Мы всі клониме нашы головы пред тыма, котры отдали своє молоде житья за лучше завтра для будучого поколіния.


Містопредсідатель Лемко-Союза.
Иван К. Адамяк


[BACK]