Просьба к Новому Року
Старий Рочку тя лишаме,
Який ты был, вшиткы знаме.
Был єс добрый для дакого,
Але и не про каждого.

Єдным дал єс здравья, силы,
Другых загнал єс в могилы.
Єдным дал єс похворіти,
Иншых обернул в калікы.

Фронт воєнный єс поширил,
А свті єс не оборонил.
Было дост плачу, страданья,
И от нужды наріканья.

Дакус мы тя поганиме,
А дакус и похвалиме.
Правду повісти, неврокы,
Были от тя горшы рокы.

Бо роботы добрі ишли,
Веце родных до нас пришли.
Люде ся кус подробили,
Гарды грошы заробили.

Пред страхами ся не крыют,
Дуже ліпше собі жиют.
Лем там в нашой Лемковині
Все нам рыют дикы свині.

Але уж най буде,
Забудут тя люде.
Вины ти пребачат,
Бо Новый Рок вкрачат.

Тысяч 967-мый,
Ты на плечах принесеный.
Будут Тобі ся кланяти,
Мир на світі требовати.

А богатство само собом,
Приде властным своим ходом.
Як мир буде вставленый.
Каждый буде вдоволеный.

Дай розум проводирам,
Най ся займут святым миром.
Войны малы и великы
Заборонят нам навікы.

Позрий там на Лемковиун,
Бо мы маме там родину:
Отцов, мамы, сестры, братов —
Час з неволі ся вырвати.

Зроб дорогу до свободы,
Най красуютсяі всі народы
Зо своима культурами,
Красныма обычаями.

До прогресса вкаж дорогы,
Най двигнутся уж раз на ногы.
Час найвысший и остатный,
Дашто таке показати.

И хоц най ся громы валят,
Всі народы тя похвалят.




[BACK]