Стефан Ф. Телеп
Stefan Telep, Стефан Ф. Телеп
Пок. Стефан Ф. Телеп.

Наша Американска Русь была богата патриотами-пионерами, котры пришли в Америку с под хлопской стріхы. Найбольшым числом такых пионеров може похвалитися Американска Русь с найбольше опутаной в чужу неволю многострадальной Лемковщины.

Єдным из такых пионеров без всякой суперечкы был Стефан Ф. Телеп, родом из села Перегримкы, окончивший свою патриотичну миссию навікы. На просьбу из редакции “Карпатска Русь” Петро Лялюсь из Мейфильд, Па., близкий друг пок. Стефана, разом с братом Петром Ф. Телепом котрый теперь проживат в селі Перегримкі, бо в послі долгых років на емиграции, в 1966 року вышол до краю до свого села, штобы там дожити свои послідны рокы, постаралися списати коротку историю пок. Стефана Ф. Телепа и разом с фотографийом прислали для нашого календаря.

Из истории Стефана Ф. Телепа порозумієме мы и порозуміє наше, в Америкі рождене поколіние, сколько то то треба было енергии, часу, труда и способности занятися всіми предприятиями, якы он завершил, почавше от основания и занятия в читальни, присутствия на всіх собраниях церковных и народных вічах, на науку наборщика и основание запомогового братства и окончательно стає редактором двох газет — русской и английской. Ту показуєся дух и вытревалость человіка, способность человіка, котрый даже не мал случайности окончити высшых школ. А подобными пионерами были и многы основатели и инициаторы нашых великых запомоговых организаций, без огляду, яку назву они несут в теперішный час.

Петро Лялюсь во свойом письмі пише о Стефані Ф. Телепу, слідующе:

Стефан Ф. Телеп родился в 1882 року в селі Перегримка на Лемковщині в Галичині. Приіхал до Америкы до Мейфильд, Па., молодым хлопцем в 1903 року. Оженился зо 14-літньом дівочком Мариом, з роду Сеньо. Они выховали четверо дітей, двох сынов и дві дочери. Был добрым мужом для свойой жены и добрым отцом для своих дітей. Старался, абы всіх выховати, як найлучше, дати им школу, яку собі сами выбрали. Дві дочкы жиют и єден сын, а найстарший сын Андрей помер в 1956 року.

Першу роботу тут в Мейфильд достал в Джермин, Па., где чистили, мыли угля. Тота робота по якомси часі ся скончила, и он достал другу роботу на желіанодорожном дворци. За цілый тот час, што робид про компании, то вечерами дома учился друкарской роботы, бо он мал велику охоту друковати. Складал букву до буквы и друковал розмаиты билеты, летучкы, оголошения про братства, представления, концерты и т. д. По даяком часі он мал так дуже роботы в друкарни, што оставил роботу на желізной дорогі, а робил лем в друкарні.

Русский патриот, лидер Мейфильдской околицы Алексий Шлянта задумал в 1912 году организовати запомогове общество для роботников, (хлопску организацию). До так великой роботы запросил до помощи С. Ф. Телепа. Оба вписовали членов, организовали братства и на першой конвенции делегаты признали, што конечно єст потреба мати свою газету, где бы можна отповісти и пояснити людям, котры дуже ворогували напротив хлопской организации, и на той самой конвенции выбрали А. Шлянту редактором місячной гізеты “Любовь” и С. Ф. Телепа финансовым секретарьом. Имено новой организации дали “Русска Православна Любовь”. Знашлися люде, што страшно ненавиділи нову организацию. Шлянта и Телеп мали дуже, а дуже до роботы, покля припровадили всьо до порядку, а и ворогы по даяком часі потихли. Так оба привели до порядку общественну роботу. Шлянта помер в 1924 року.

По яком то часі выбрали С. Ф. Телепа редактором газеты “Любовь”. Новый редактор, як он сам говорил: “Я выдаю газету для хлопов, а не для панов”. Он писал дуже выразно, розумно, абы всі могли розуміти, што читают. Сам он любил понад всьо, што єст русске и православне, то так и писал, заохочал людей, абы вписовалися до русскых запомоговых обществ и братств, кружков. Писал новости зо старого краю и Америкы. Писал поучительны статьи, а где треба было, то и насварил, збештал. Тоты люде, котрым правду написал про их лінивство, недбальство, на него ворогували, а робочы люде йото газету читали и дуже хвалили. Он выдавал газету до 1957 року. В том року он захворіл и мусіл перестати друковати.

Робота общественна, начаті Шлятом и Телепом до сегодня прогрессує в дуже добром финансовом положению. Касса Р. П. Л. єст $425.000.00, а валюация єст 151% процент.

С. Ф. Телеп спровадил свого брата Петра в місяцу августі 1917, где нашол йому роботу. Петро, приіхавшы малограмотным, бо йому даже не было ище 15 літ, але у свого брата Стефана научился грамоті. Он научился не лем читати и писати, але и грати в представлениях ролі театральны и співати в хорі. Петро робил разом с братом друкарскы роботы за довший час, а потом Петро выіхал до Детройта на роботу. Стефан Ф. Телеп мал штор с книжками, образами с прекрасныма рамками. Єдным словом любил науку и научал другых, ци то было в народной справі, ци в политикі.

Краян родом из села Дошниці пише так:

“Перший раз я виділ С. Ф. Телепа в Мейфильдской читальни. Галя была заполнена людьми старшыма и молодшыма, а молодый человік сідил коло стола и читал голосно, выразно книжкы и газеты. Я спросил єдного человіка, кто то єст тот молодый человік, што так добрі читат, бо певно он высоко ученый, а може и хоче быти попом? Человік отповіл, што то єст наш краян зо села Перегримкы, Ясельского повіта. Он нигде дуже до школы не ходил, а сам учился и учится, пише прекрасно, читат дуже добрі, а и друковати розуміє. В церкви його виджу співати в хорі, читат Апостол, грає в представлениях. Дуже добрый аматор. Дальше говорят, што С. Ф. Телеп написал представления, и же отограли перше його представление, потом друге, третье... Не знам всіх по имени. Памятам, што он написал 1) “Счастье в Америкі”; 2) “На другом світі”; 3) “Бог свідок”; 4) собрал издал “Віночок” — сборник русско-народных пісень; 5) собрал и издал “В суді”, также написал и напечатал представление “Хитра дівчина” и практичный подручник — Грамматикы”.

Кромі газеты “Любовь” он и сын выдавали тыждневу газету на английском языку “Мейфильд Ньюс”. Роботы мали много. Покупили больше друкарскых машин, и то были дорогы машины, бо лем за єдну машину заплатил 17 тысяч долларов. Робили тяжко и долгы годины.

Газета “Мейфильд Ньювс” была интересна и дуже популярна. Не лем русскы люде любили єй читати, а всі народности єй читали и хвалили. Тота газета каждого тыждня была в каждом домі в Мейфильд и Джермин и в другых сусідных плейзах. Молоды люде, котры отъіхали до иншых городов за роботами, то просил, абы им посылати газету “Мейфильд Ньювс”, бо из газеты дозналися, што робится в тутейшой околици и всі новости.

В місяцу сентябрі 1956 сын Андрей несподівано помер. Для Стефана, отца, не лем што оставил великий смуток, але остала и велика робота. Робил он кілько мог, а в 1957 року захворіл сам и мусіл всьо друкарство заперестати. Была то велика утрата для нас всіх, бо дві газеты перестали выходити. Люде жалуют до теперь и говорят, што неє человіка, абы мог зробити роботу обох Телепов.

С. Ф. Телеп был патриотом не на словах, але на ділі. В Перву Світову войну, коли собирали жертвы на Червеный Крест, он жертвовал сам, ходил от дому до дому коллектовал, просил всіх, абы жертвовали. То саме было, коли соберал жертвы на освобождение Прикарпатской Руси и знова третий раз то саме, коли соберал на “Рошен Вор Релиф” (Русска воєнна помочь в часі ІІ Світовой войны). Брал живу участь во всіх церковных справах. Был присутным на всіх собраниях церковных и світскых. Майже цілый час, як долго жил в Мейфильд, был в церковном комитеті тростистом. В братстві св. Бориса и Гліба был секретарьом больше, як ЗО літ.

Любил он гостины и співы.

Помер июня 19-го, 1965 года. Похоронили його июня 23-го 1965 г. при участи великой громады народа. Похорон совершал о. Д. Решетар. Сказал прекрасну прощальну проповідь. Похоронили його на Р. П. цмынтарю в Мейфильд на пляцу, котрый собі сам выбрал.

Солодкий спочинок послі тяжкого труда! Вічная память!


ПЕТРО ЛЯЛЮСЬ, Мейфильд, Па.



[BACK]