АННА КОБАН, Гибискус Парк, Фла.
Лемковскы Народны Співанкы — Анна Кобан

СІДИЛИ СОЙ ДВА ГОЛУБЫ

Сідили сой два голубы, моргали на себе,
Прийди, прийди младый хлопче, з вечера до мене.
Прийди, прийдти младый хлопче, хоц лем на годину,
А я свого старенького пошлю на калину.
Идь ты, старый бородатый, калину ламати,
Бо я ся барз наробила, буду спочивати.
Пошол старый бородатый калину ламати,
А я веду за рученьку милого до хаты.
Сіли собі за столиком, курку обгрызуют,
Она свого миленького к собі пригортаєт.
Идте, діти, на улицу, вызерати тата.
Та най будет хоц годину веселая хата.
Пришол хлопец из улицы, и в долони плящет,
Гуляй, гуляй моя мамцьо, тата нема ище.
Пришло дівча из-зо двора, рученьками трясет,
Утікай, утікай моя мамцю, бо чорт тата несет.
Пришол старый бородатый тай стал на подвірю,
А я хлопец молоденький, гдеж я ся подію?
Лягай, хлопче молоденький, под мою перину,
А я лужу на верх тебе, скажу — марно гину. . .
Иди, старый бородатый, меду купувати,
Болит мене головонька, буду умерати.
Пошол старый бородатый меду купувати,
А я свого миленького вывела из хаты.
Иди, иди, младый хлопче, тай не озерайся,
А як придешь на другий раз, то скорше звивайся.
Я сой хлопец молоденький, в свого отца вдался.
Лечу, утічу попод берег, в коноплі сховался.
Там дівчата молоденькы коноплі ламали,
Взяли мене попод пахы, до дому завели.
Пришол домів бородатый тай руками треплет,
Кыйси параль в лужку лежал, ище лужко тепле.
А ты старый бородатый, не вчийся брехати,
Як єс виділ и послідил, было поимати!
Ты уж старый бородатый, а я собі пышна,
Гдеж я свои оічы мала, же я за тя пошла?
Иди, старый, молотити, а я буду терти,
Так пойдеме обідвоє стодолу подперти.
Не престану молотити, не оставлю ціпа,
Як ты добра господыня, шануй человіка.

* * *

МАЛА Я ФРАИРА

Мала я фраира в неділю,
А где я ся с ним подію.
Казала, же го мати послала,
Ци бы-м го любити не знала.

Мала я фраира в понеділок,
Але он любил пять дівок,
Так я його порядні збештала,
А потом на дворь выдрыляла.

Мала я фраира в вивтарок,
Кажут, дост молодый, літ сорок,
Та ци я уж розум стратила,
Жебы-м я дідуся любила?

Мала я фраира в середу,
Але не мал зубов с переду,
Выбили му якыси бетяре,
Та най же го біда покаре.

Мала я фраира у четверг,
Думалам-м полюблю хоц теперь
Але не знал он ся любити,
Та штоже с бортаком робити?

Мала я фраира в пятницю,
Але великого пяницю,
Так от нього кропка смерділа,
Бодай дагде біда згоріла.

Мала я фраира в субботу,
Што он знат уж вшитку роботу,
Бо то мой Яничко с Пряшова,
Я про нього такой готова.

* * *

ЗАСПІВАЙМЕ СОБІ

Заспівайме собі двома голосами,
Єден пойде верхом, (2) другий долинами.
Любуй же мня любуй, лем мня не выдавай,
Як придешь до корчмы, (2) близко мня не ставай.
Паленку не купуй, бо пити не буду,
На танец мя не берь, (2) бо с тобом не пойду.
Паленку пить будешь, бо єст карчмарьова,
И на танец пойдешь, (2) бо-с фраирка моя.
Любуй же мня любуй, и я тебе буду,
Хоц в кажду неділю, (2) бита про тя буду.
Цілувала бымся, аж мні слина иде,
С тым моим фраиром, (2) што на вечер приде.
А он нашу хижу, с далека обышол,
Он ку другой дівці (2) потаємкы пошол.
Любуй же мня любуй, кедь єс мня започал,
Бо ти буде дьябол (2) на погребі йойчал.

* * *

ЗАКУПАЛА ЗАЗУЛЕНЬКА

Закукала зазуленька, ой и кує, и кує,
Повіч же мні, зазуленька, где мой милый ночує.
Ци на горі у кляшторі, ци поіхал с ханами,
Повіч же мні, зазуленько, где мой милый коханый.

На лелию воду лію, а на ружу не буду,
Погнівался мой миленький, препрошати го не буду.
Погнівался вчера в вечер гдеси коло полночы,
Больше я го не припущу, выдраплю я му очы.

Не будеш мні моя мила мои очы драпала,
Бо я пойду в світ широкий, а ты будешь плакала.
Може буду, або ні, може буду, може ні,
Ты за гору, я за другу, тай о тобі забуду.


* * *

БИЛА ЖЕНА МУЖА

Збила жена мужа,
Тай в суд жалувати,
А судья приказал
Женочку продати.

Взял муж жену на ярмак,
Зачал продавати,
Видит жена, што не жарт,
Зачала плакати.

Даруй мі мой мужу,
Я зле поступила,
Возми мене домів,
Буду тя любила.

Взял муж жену домів,
Жена за катульку,
Як ти тото не поможе.
Пущу до тя кульку.

Сідит жена на припецку,
Ногы собі мочит,
А муж стоит при порозі
Тай вытріщил очы.

Пребачу ти моя мила,
Што ты мене била,
Коплю тобі горнец меду
И коновцю пива.


* * *

ПОВІДАЛ МІ ЄДЕН ХЛОПЕЦ

Повідал мні єден хлопец,
Же я не знам хліба упечь,
Я ся на то позлостила,
На хліб собі розчинила
В понеділок заправила,
А во второк замісила,
А в середу съопалала,
А в четверг рано посадила.
А в пятницу съобертала,
В субботу зас звыберала.
Як в неділю закроила,
В середині діра была.
Такий мні ся хлібец выдал,
Попод шкору коцур бігал,
Лем сой хвостик закачурил,
А скиркы ся не дотулил.

* * *

ШТО МІ С ТОГО ПРИШЛО

Што мі с того пришло,
Тай з мойой потіхы,
С кым буду зберала
Малины, оріхы,
Моим словом маленькым,
Тай гнівамся с миленькым.

Пришлам на музыку,
Сталам при порогу,
Мой милый танцуєт,
Слава Пану Богу.
Он танцує, выкручат,
А до мене лем тручат.

Пришол пред музыку,
Бренкнул талярами,
А мои очата залялися слезами.
С того смутку велького,
Пошлам до дому свойого.

Пришлам до домоньку,
Сала на лужечко,
А ту ктоси пукат
В моє оконечко:
Моя мила, пусть мя там,
Моє сердце, отвор, отворь там.

Пришол до комнаты,
Подарункы дає,
Єдвабну хусточку,
Позлачаны край. . .
Твои хусткы не беру.
Тебе с хаты выгоню.

Он начал просити,
Солодко благати,
Жебы ся на нього
Больше не гнівати.
А я тому не винна.
Же я любви голодна.

Я му дарувала,
К собі пригорнула,
От мого милого
Слова зажадала.
А он ся мні обіцял,
Же не будеся на мня гнівал.


* * *

ДУЄ ВІТЕР ДУЄ, ВСЕ ЛЕМ НА БЕСКИДІ

Дує вітер дує, все лем на Бескиді,
Не была я давно с милым на бесіді.
Ани на бесіді, ани на шептаню,
Дай же мі го Боже на солодком спаню.
Пошол мой миленький на море плавати,
А мене оставил горенько плакати.
Пошол мой миленький, ани го не видно,
Лем му на камені подковечок слідно.
Пошол мой миленький до той Америкы,
Нич мні не оставил, лем жаль превеликий.
Дай мі Бог видіти и бесіды чути,
Бо сердце не може за нього забыти.
Як мой милый ишол, так мні наказувал,
Жебы твоє личко никто не цілувал.
Зелена липка, жолтый квіт,
Не пойду за тебе, пойду в світ,
Там роспущу косу по плечу,
Не раз горько, яжко заплачу.



[BACK]