Золотый Юбилей Супружеской Жизни Теодора и Александы Гулик
Hulick
Теодор и Александра Гулик

Каждый чоловік во свойом житью може свою историю описати або оповісти, но кажда история буде иначе звучати. То и я хочу в пару словах свою историю описати о нашом супружеском житью.

В году 1912 молода дівчина лишила родну Лемковину зо села Криживка, повіт Новый Санч, дочка Андрея и Катерины Саламонь, и пошла глядати лучшой долі тут в Америкі, як и другы нашы краяне. Так само я, Теодор Гулик, з родины Григория и Марии Гулик о рік позднійше в году 1913 лишил рідне село Терстяну. Так мы обоє николи не знали єдно о другом в нашой родной Лемковині. Мы ся познали в малом місточку Сингек, Н. Дж, и там мы ся женили. На Сингаку тогды лем што нова церков была побудувана, так здаєся, што наше перше весіля было в той церкви в року 1917, 27-го января. Так мы обоє 27-го января будеме обходити 50-літный супружеский юбилей. За тот час наше житья, можна повісти, было счастливе, кромі того, што была тяжка депрессия и другой світовой войны. Мы ся дочекали пять сынов и едну дочку. Нащых пять сынов служили на войні: трьох на японском фронті, єден на Сегарскых пустынях, а єден на Гермаском фронті во Франции. То были дуже тревожны часы для нас обоих чекати несподіванну новость з войны, но вшитко нам перешло гладко, бо вшиткы нашы сынову вернулися с той страшной войны счастливо, поженилися, так што мы обоє дочекалися 18 внуков и єден наш внук уж служит в американской армии. То так наше житья супружеске скоро зышло, што мы ся дочекали дожита до 50-літия нашой супружеской жизни. Мы обоє з лемковском группом пошли зме отвидіти нашы родны стороны, а и нашу Велику Родину Советский Союз, єй городы, як Львов, Києв и Москву, як тоже в Польші Варшаву, Краков и другы міста, што мы николи ся того не сподівали, же будеме то видіти. О том, што мы виділи, николи не забудеме, не забудеме нашы родны стороны, котры мы лишили 53 рокы тому назад, а якы мы их нашли, то о том уж всі знают. Мы там родилися и выросли, а так поіхали в далеку чужину, котра днеска являтся нашом придбаном отчизном, то єст наша Америка.


Теодор и Александра Гулик.

HulickEnd

[BACK]