Юбилей Лемковского Народного Дома в Кливланді

Двадцет роков то красный претяг часу в житью человіка або и в житью якой бы не было институции. За двадцет роков може дуже змінитися и в житью єдного человіка и в житью организации а навет цілых держав и народов. За двадцет роков єднорочна дітина дозріє и завладіє дост великом пауком, и за двадцет роков 50 рочный, здоровий мужчина стане 70-рочным стариком. Зато восшло в людский обычай, коли така рочниюа приходит застановитися над прошлым и задуматися над будущым. Для такой оказии устроюются так званы десят-рочны, двадцет-рочны, двадцет пят-рочны и тому подобны юбилеи.

Єден из такых юбилейов празднували нашы краяне в Клевеланді, штат Огайо, минувшой осени 31 октября, 1965 р. Празднували они 20-літие набытья свого Лемковского Народного Дема. В тот день они устроили юбилей с гостином и народном забавом.

Так, як в початку повіджено, за 20 роков можна дуже пережити доброго и злого, так переживал и наш Народный Дом тяжкы, трудны и небезпечны часы, а пережывал и радостны дни свойой славы и гордости

Повідат народна пословица, што добре ся быстро забыват, а зло ся долго памятат. Но в том выпадку мы воліли бы, вспоминати добры и славны дны. Кромі славных дней Кливланд має за собом высоко цінкы заслугы и перед организациом Лемко-Союз и перед нашым цілым лемковскым народом с тым, што он взял головну опіку над цілым Лемко-Союзом, коли он был ище молодым в первых роках свого розвитая.

То был Кливланд, где нашлися добры лемкы патриоты, што помогли устроити Перший Съізд Лемко-Союза, а то было ище в 1931 року. Съізд отбылся в німецкой, так званой Маникер Голл недалеке от теперішной будовы. Наша будова была в тоты часы лем для высшой публикы, недоступна для народной организации, помимо того, што властительом єй был наш краян прящевщан Корень, котрый выбудувал тот дом.

Кливландчане припоминают собі назад тоты часы, як в бесідах с Кореньом они выражали охоту мати таку галю, бо сами поміщалися в рентованом домі на Старкведер ул. через парк от того дома. На такы заявления Корень сміялся так, як бы го лыскотали. Но с часом судьба так покеровала, што тот дом стал домом Лемко-Союза и уж преслужил нашому народу полных 20 роков. Головна заслуга при том была Андрея Лабика, котрый безперерывно призерался на стройну и крепко сбудовану будову Кореня, и по причині доброго знакомства с містецкыми урядниками и вліятельными людьми того дистрикта. Розумієся, што он мог взятися за покупку того дома лем зато, што за ним стояли добры и сильны патриоты свого народа, котры были готовы сами зложити потребну сумму на покупку того дома, и были охочы до роботы завести поправкы, якы до того часу дом уж потребувал. На 25 рочном юбилею, котрый уж не так далеко, напевно будут точно представлены имена тых пионеров для вічного почтения нашым народом.

В самых початках Лемко-Союза в Кливланді началася культурна робота. Кливландскы жены составили представление „Лемковске Beсіля“ и показували го на сценах. Им уж тогды было лекше братися до такой роботы, бо до Кливланду пришла группа передовых людей, котры працували при издательстві газеты “Лемко”. Редакция поміщалася в сусідстві на Професор авени. Послі Кливланда, и особливо послі I Съізда Лемко-Союза начали организоватися отділы Лемко-Сеюза по цілой Америкі и Канаді, хоц уж и перед тым было пару Лемковскых Комитетов, в роді отділов, котры приняли свои числа и стали отділами Лемко-Союза. Была то громадна и воодушевляюча діятельность. И помимо того, што редакция перенесла свою обытель до Нью Йорка, то містны отділы остали дальше працувати, и доробилися того, што в 1944 року купили свой дом. А не треба забыти, што и печатны машыны были куплены при помочы пожичок кливландскых членов особливо лемка погребника Павла Головчака. Кливландскым передовым патриотам припадат сама заслужена признательность, бо то они выстаралися о чартер для Лемко-Союза на всю Америку и Канаду. Жены организовали свой великий отділ, бо для получения чартера, согласно права, не выстарчало в початках членов в мужескых отділах.

Хоц потом на даякий час Кливланд утих в культурной реботі но працувал тяжко при набытью свого народного дома, а при том барже все стоял на першом місци в пресс-кампаниях потребных для удержания свойой народной газеты, и тоже провадил громадну роботу при сборі фондов на Русский Воєнный Релиф, штобы побідити Гитлера и прогнати с занятых ним славянскых земель.

Послі того, коли уж война остала окончена и настали мирны часы при предсідательстві Осифа Дзямбы, Николая Кобеляка, Илии Владыкы и Дорофтея Ковальчика пришли Кливланду дны великой славы. Культурна робота на ново была возобновлена начали ставитися культурны предприятия с представлениями. Кливландскый Кружок прославился своими выступами, котры поставлял не лем в свойом Народном Домі, але и в другых містностях як Лейквуд, Лорейн, Питтсбург, Па. штат. Великой и незабытной славы Народный Дом а стым и имя Лемко-Союза здобыло собі тогды, коли наш кружок начал выступати што рочно в междунациональных фестивалях в великой Публик. Аудиториум обок с 24 другыми национальностями. Предприятия устроювалися при поддержкі містной газеты ”Кливланд Пресс“ и єй сотрудника трансильвальца Теодора Андрейкы, котрый в характері корреспондента выізжал высше 20 раз кождого року в Европейскы Краины для обсерваций. Тогды имя лемков записалося в місцеву печать Кливланда, в газету, в програмны брошюры д тоже в книжку ”Нацональности Кливланда“, где подробно описано, кто то сут лемкы. Той истории никому не удастся выкопати ани выбрати четырьома волами.

Помимо того, што с часом тота діятельностъ утихла, но она не замерла. В Народном Домі и дальше час до часу отбываются концерты, и все єст місце где притулити народну роботу.

Так 31 октября наш Кливланд, под котрым словом розумієме наше лемкоске население зышолся численно, штобы вспомнути и почтити тоты достижения, котры были в том домі досягнуты за прешлых 20 літ, а кромі того набрати ище охоты и силы до дальшой роботы и до дальшых подвигов, а тым часом приготовлятися до славного 25-рочного срібного юбилея, котрый надіємеся и жичиме штобы был счастливый, и штобы мы могли видіти ся всі в здоровом и веселом стані.

На 20-рочный юбилей Главне Правление послало в виді гостя Ольгу Єдинак, свою містопредсідательку, Карпаторусскый Центр в Юнкерс свого предсідателя Журава а к тому предсідатель отділа запросил из Нью Йорка редактора ”Карпатской Руси“, Николая Цисляка, котрый пришол зо свойом родином: женом Мариом и сыном Андрейом. Запрошение редактора было связано с тым, што и он свого часу был управительом Народного Дома Лемко-Союза в Кливланді.

Мы часто читали за гостины, Кермешы, Русаля и юбилеи. Народ наш посходится с близка и с далека, погоститися и весело забавитися. Часом така забава ище принесе финансову поддержку организации. Но Кливланд тым часом прославил своє 20-літие ище додатковым важным событием. Члены Кливлендскых отділов укоронували свой юбилей вінцом славы и вічной памяти. Они стали фундатором центрального окна Талергофского Памятника в Лемко-Резорт, котрого як раз в час коли была потреба уставляти го Тым чином Кливланд глубше записался в историю народного житья лемков в Америкі.




[BACK]