Лемковске Весіля на Фильмі
Bidnik
Алексий Бідник,
Предсідатель Комитета фильмы
“Лемковске Весіля”.

Минувшого літа, то єст в 1965 року была завершена подія великого значения в житью нашой лемковской емиграции в Америкі и Канаді. Из колесок икно-апарата был знятый фильм прекрасного и цілым народом любленого обычаю Лемковского весіля. Обычай лемковского весіля нашы и другы люде называют опером, створеном самым народом на протягу многых віков його житья в Карпатах.

Як близкий сердцу лемков тот их обычай, можна судити хоц бы с того, што коли началася емиграция из Лемковины в Америку, то нашы люде, хоц в не своих условиях долго отправляли тоты весіля стало притримуючися стародавного обычаю. А коли под вплывом чужой и новой культуры уж не можна было устроювати, то лемкы составляли такы весіля в формі представлений и показували их на сдені для свойой и чужой публикы.

В нашом календарю на 1963 рок были поміщены співанкы весільного обычаю с обох сторон Лемковины, с Сянодкого повіта по польской стороні границы, котры были собраны Анном Кобан (зо села Черемхы) лем зо свого родного села, и то, розумієся, не всі и співанкы собраны Андрейом Куско на Пряшевщині, собраны на дорывкы в селі Чабины, и то не всі. Их співанкы представляют культуру весільных співанок лем в двох селах, а такых сел на Лемковині около 500. Всьо то разом представлят громадну скарбницу обычайовой культуры, котру лемкы творили без огляду, в якых трудных и под якыми чужими им правительствами не жили.

Кромі співанок с тых двох сел было поміщено цілый ряд фотографий из представлений лемковскых весіль, котры ставилися в ріжны периоды часу ту в Америкі и Канаді, як приміром в Нью Йорку, Юнкерс, Пассайку, Олифанті, Олд Фордж, Кливланд, Питтсбург, Лейквуд, Лорейн и многых другых. Коли мы помістили тоты фотографии, то нам здавалося, што то всьо, што было. Но нам начали писати и присылати фотографии с тых місцевостей, о котрых в Календарю не было вспомнено. Розумієся, люде точны даты позабывали, дагде погубилися фотографии, а дагде, где было трудно о фотографа в тых часах, то ани не брали фотографий. С того видиме, што в том календарю мы ледво зарыли плытку скору на том богатом традициями грунті.

Hojdich
Николай Гойдич,
директор продукции фильмы
“Лемковске Весіля”.

В том самом календарю Лемко-Союза на 1963 рок была отмічена 35-та рочница першой рекорды “Лемковске Весіля”, составленого и награного Стефаном Шкимба зо села Воловец, в Горлицком повіті, проживающым тогды в Бруклині, Н. Й. То была пионерска робота. Не лем, же лемкы вышли першы зо своими рекордами меже всіми народностями в Америкі и Канаді, але так составленого весіля на рекорді не успіла выдати и показати світу жадна друга народность, правду повісти, и по днешный час.

Рекорды “Лемковского Весіля” были так популярны, што днеска цілому світу извістна Колумбия Рекорд Ко., примушена была зробити другий наклад, бо были сильны требования. И другий наклад был публиком росхваченый. Днеска той рекорды мало кто має, она єст велика рідкость.

Кромі весільной рекорды Стефан Шкимба принялся за друге велике пионерске діло — издати фильм “Лемковске Весіля”, што и было выполнено. А котры весіля были сбераны на фармі Макария Геряка в Стамфорд, Конн. Фильм сберал наш талантливый фотографер и фильмовый оператор Михаил Дужий, из Клифтон, Н. Дж., родом зо села Перегримка, Ясельского повіта на Лемковині.

Робота была пионерска, але и занадто предвчасна. Фильм был лем в єдном кольорі и беззвучный. Скоро он был оконченый в американскых театрах начали показуватися звучны и кльоровы фильмы. Беззвучный безкольоровый фильм уж не можна было показувати на акрані. Техника отсунула начате діло в неповоротну сторону. Фильм остался невыкупленым с лаборатории М. Дужого. До того, Шкимба не мал попертья зо стороны жадной организации. Сам Лемко-Союз был в пеленках, в началі свого розвития, до того краину тиснула международна криза и о подобных культурных початках треба было забыты. Но добре діло николи не пропадат, и оно от повилося, як раз в нашых часах, просто тыми днями вышол новый звучный и кольоровый фильм “Лемковске Весіля, собраный в нашой народной здравници Лемко-Резорті, в Монро, Н. Й.

Так што теперішный звучный и кольоровый фильм не єст першым фильмом “Лемковского Весіля”, он єст наслідником першого, котрого мало кто виділ, кромі фотографий гдекотрых сцен, котры были поміщены в наш ом календарю на 1963 год.

Тым разом уж не єдиниця принялася за роботу, а ціла оранизапия Лемко-Союз зо своими отділами, котры тоту ціль поддержали большыми фондами. Газета “Карпатска Русь”, як и во всіх иншых выпадках причинилася своими призывами и пояснениями. А початок той діятельности дало рочне собрание I Округа Лемко-Союза, отбывающеся три рокы тому в Бруклині, Н. Й.

На том місци слідує остановитися на діятельности I Округа Лемко-Союза, бо с закончением издания фильмы “Лемковске Весіля” тот округ выполнил уж другу историчного значения роботу, котрым он сам дал начало. Першым такым историчного значения, то было рішение рочного съізда I Округа в Нью Йорку, на котром было рішено организовати Карпаторусску Радио Программу, котра в часі II Світовой войны выполнила громаднійшой важности діятельность сбора жертв на Русский Воєнный Релиф, о котром памятают и в Совітском Союзі и подавала моральный дух нашому народу, котрый подавался под страшном гитлеровском пропагандом о побідах над Совітскым Союзом. А теперішный фильм, то друга важна сторонка до истории I Округа, котром он може и должен гордитися.

Chelak
Анна Челак,
Кассирка Комитета фильмы
“Лемковске Весіля”.

На дальшых собраниях Округа был сформованый Комитет Фильмы “Лемковске Весіля” под председательством Алексия Бідника. Директором фильмы был избранный Николай Гойдич, кассиром Анна Челак. Найчисленнійше число особ приняло из такых місцевостей, як Линден, Елизабет, Пассайк, Юнкерс и др. Яка то громадна сила народа потребна была до выполнения того фильма, можна видіти из числа особ, котры в тот, або другий способ помагали в той трудной, але счастливой роботі.

За молоду пару послужили Анастазия Гойдич и Михаил Камінский. За отца молодой Иван Головач, а за маму Ольга Єдинак. За родичов молодого Василь Завойский и Анна Порада. Дружкы й дружбове: Єва Бугель, Мария Камінский, Мария Зельонка и Анна Зельонка, Юстин Пласконь, Стефан Фучила, Теодор Рудавский Мол., Петро Гойдич. Староста — Андрей Грабский.

Свашкы: Анна Челак, Мария Миценко, Мария Завойский, Мария Рудавский.

Маршалка — Алексий Барна

Латканиці: Соня Кухта, Олена Брунда, Юстина Ратушный, Ярослав Челак, Ричард Порада, Анастазия Порада, Анастазия Магала. Єва Стефура, Анна Фучила, Анна Кобан, Зоня Рудавский, Юстина Халупий, Анна Каня, Анна Березный, Юстина Гойдич.

Брат молодой — Иван Завойский. Сестры молодой: Олена Завойска, Олена Гойдич.

Цыганка-ворожка — Стефания Головач. Доматаре — Николай Порада и Стефан Копей. Музыканты — Стефан Челак, Теодор Рудавский, Петро Грищенко и Петро Шипак.

Планы декорации приготовил Дмитро Мерена, Николаи Цисляк и Иван Гарбера. Роботу выконали — Петро Сокол, Онуфрии Юнак, Василь Завойский, Алексий Бідиик, Иван Головач, Иван Порада, Теодор Рудавский, Петро Стефура, Анна Челак, Стефан Каня, Стефан Копей.

Костюмы — Анна Челак.

Газдыні: Катрена Каня, Мария Бідник, Настя Порада.

Просатаре: Петро Стефура, Иван Порада, НиколаЙ Гойдич. Директор співу и музыкы Стефан Челак. Директор продукции и часть скрипта НиколаЙ Гойдич.

Фильмовый оператор Ярослав Кулинич, його помочник Иван Порада. Директор звуку Владимир Явдишин. Суфлер Антон Каня.

Маючи такий великий состав особ, походящых из ріжных частей Лемковины по обох сторонах Карпат, а в Америкі живущых в ріжных місцевостях, треба собі представити тяжке, утомительне діло связане с науком, объєдинением, полагодом всіх сторон до завершения побіды. А побіда заключатся в короткых словах, якы высказал Дмитро Мерена перед делегатами 23 съізда Лемко-Союза по окончению фильма.

“Комитет Лемковского Весіля прагне повідомити Вас, уважаємы делегаты 23 Головного Съізда Лемко-Союза, што робота над документальным фильмом “Лемковске Весіля” єст закончена.

“Дворочный труд лемков-патриотов дал прекрасный твор в формі кольорового и звукового фильма. С гордостью треба отнестися днеска к тым людям, котры його створили. Посвячаючы десяткы дней дорогоцінного часу, они записали на фильмову ленту вікову традицию лемков и причинилися до показания світу єдного розділу нашой пребогатой лемковской культуры. Перший раз в истории світовой кинометографии буде проваджена до публичной популяризации наша лемковска традиция и тым способом навікы забеспечена перед загибелю”.

В короткых словах выражене ціле событие, віковый твор нашых отцов, дідов и прадідов и значение дво-рочного труда, котрый дал свой овоч, за што тым всім лемкам, котры в большой або меньшой мірі, тым або иншым способом причинилися до того, належится тепла, сердечна подяка и велика честь.

Собрати и объєдинити для такой творчой роботы таку громаду участников, было бы не мыслима без помочы организации Лемко-Союза и громадной любви до традиции створеной нашыми предками, бо треба знати, што кромі весільных обычайов, лемкы мают и другы богаты свойом красотом обычаи. Правда, они ушли в минувше с наступом новой модерной еры, но на фильмі все буде можна показати хоц бы лем тот єден обычай, котрый подивуют будущы поколіния, коли их увидят. Они будут горды, што их предкы в далеком прошлом были так высоко культурны, коли им буде здаватися, што прошлость належит до темных часов. Они станут горды за своих предков и с почестью пошануют их память и творы, котры віками служили нашым предкам культурным огниском в их трудной борьбі за свой быт и двоє существование.




[BACK]