Даяна Ли Векслер
Даяна Ли Векслер, Diana Lee Vexler

Даяна Ли Векслер, то внучка широко извістного пионера и народного патриота Даниила Гумецкого с Филадельфии, Па., котрый занимат уряд Містопредсідателя в нашой запомоговой органиадии Общества Русскых Братств. 

Даяна окончила в январю Овербрук средню школу, получивши при градуации школьне награждение от имени Филадельфийского калледжового музея художеств, в котрый она поступила на высшы студия. При градуации она получила тоже от Национального Общества почетну грамоту.

В часі наукы в ноябрі 1963 року єй припало встрітитися с научными представителями из Совітского Союза, котры як раз пришли студиовати научны методы в школах Соєдиненных Штатов именно в єй школу Овербрук Гайскул.

Треба вспомнути, што рок перед тым подобна группа американскых учителей посітила Совітский Союз, где студиовала методы наукы в совітскых школах.

Визиторами в Овербрук Гайскул были Александр Криволапов, редактор московской “Правды”, Генадий Павлович Елисеєв, историк при комитеті молодежных организаций, Кайл Вилльям из Чикаго и Морей Левин из Гарвард Колледжа служил переводчиком. Они были тоже в Совітском Союзі, а с ними Брусия Рединский служила за переводчика.

Коли гості из Совітского Союза отвиджали классы, то Дияна Векслер была избрана в четвертку, котра супровождала их по всіх классах, и отвічала на их вопросы. Совітскы гості были сильно заинтересованы в артистичных роботах молодой Дияны. Они потребовали отбиток из єй робот для показу студентам в Совітском Союзі, а тоже была опрошена, ци хотіла бы студиовати художество в России.

Меже заокеанскыми гостями и студентами упомянутой школы завязалося приятельство, бо ученикы давали интересны вопросы гостям о системі научания в совітскых школах, на што они, розумієся, отвічали.

Даяні было дуже дивно, коли узнала, што в Совітском Союзі половина из студентов, котры берут заграничны языкы, изучают английский язык.

Даяні желаєме доброго успіха на єй славной дорогі художества, штобы принесла славу свойой родині и свому народу, с котрого походит.






[BACK]