Лишка, Заяц и Когут

На краю великого ліса в горах Карпатах жили лишка и заяц. Лишка мала хижку з леду, а заяц з дерева. Настала красива весна. Хижка лишкы стопилася, а заяцова зостала. Лишка просила заяця, абы єй позволил в свойой хижи загрітися. Заячок с охотом позволил, але лишка ся в хижи так добрі чула, же заячика выгнала. З великым жальом на сердци и с плачом мусіл заяц опустити свою хижку. По коротком часі встрітился заяц зо псами.

—Гав, гав гав!...

— Чого плачеш, заячику ?

А заячок повідат:

“Дайте мі спокой, псичкы. Та гдеж бым не мал плакати! Мал єм хижку з дерева, а лишка з леду. Лешкина хижа ся ростопила, а моя зостала, и пришла лишка до мойой хижы и мене выгнала з ней.

— Не плач, заячику, — потішали го псы, — мы єй выженеме!

— Не выженете!

— Выженеме!

Дошли разом до хижкы:

— Гав, гав, гав!...

— Выход лишко вон!

А она им з пеца:

— Як встану и скочу, то будут лем кудлы з вас летіти по кутах!

Псы ся настрашили и давай в ногы. Заячок зостался сам и дальше плаче.

Иде му на встрічу медвідь.

— Чого плачеш, заячику?

А заячок повідат: “Лиш ты мя, медведю! Як же не мам плакати! Мал єм хижку з дерева, а лишка з леду. Лишкина ся ростопила, а моя зостала. И пришла лишка до мойой хижы, а мене выгнала пречь.

— Не плач, заячику, — потішал медвідь, — я єй выжену.

— Не выженеш! Уж єй и псы выганяли, а не выгнали, ани ты єй не выженеш.

— Выжену!

Пошли выганяти.

— Выход, лишко, вон!

А лишка с пеца: “Як встану, а скочу, будут лем кавальці летити с тебе по кутах!

Медвідь ся настрашил и втюк пречь.

Иде зас заячок и плаче: встрітился з быком.

— Чого-ж ты плачеш, заячику?

— Лиш мя, быцку, в спокою! Як же не мам плакати! Мал єм хижку з дерева, а лишка з леду. Лишкина ся ростопила, а моя зостала. И пришла лишка до мойой, и выгнала мене з ней.

— Ходме, я єй выжену!

Ніт, быцку, не выженеш! Уж єй псы выганяли, а не выгнали, ба и медвідь выганял, а не выгнал, а ни ты єй не выженеш.

— Выженеме!

Ишли до хижкы:

— Выход, лишка, вон!

А лишка с пеца:

— Як встану, а скочу, будут лем стрямбы летіти с тебе по вшиткых кутах.

Быцок ся насташил и дал ногам знати.

Выбрался заячик зас в дорогу, а гірко, прегірко плаче. Иде му навстрічу когут с косом.

— Ку-ку-ри-ку!

— Чого плачеш, заячику? Слухай мня, котику. Як же не мам плакати! Мал єм хижку з дерева, а лишка з леду. Лишкина ся ростопила, а моя осталася. И пришла лишка до мойой и выгнала мня з ней.

— Ходме, я єй выжену!

Ні, не выженеш! Псы єй выганяли, а не выгнали, медвідь єй выганял, а не выгнал, бык єй выганял, а не выгнал, ани ты єй не выженеш.

— Выжену!

Пришли к хижкі.

— Кукурику!.. Несу косу на плечах, хотіл бы-м лишку скосити! Выход, лишко, вон!

Як тото лишка почула, настрашилася:

— Почекай, позберамся...

А когут зас: Кукурику! — несу косу на плечах, хочу лишку скосити. Выход, лишка вон!

Лишка вылетіла, але в том часі єй когут подкосил. Потом когут жил зо заяцом разом в хижці, як два родны братья, а было им барз, барз добрі.




[BACK]