Иван Малютич

Иван Малютич родился 17-го Марта 1894 року, в селі Ріпкы на Лемковщині в Польщі.

До Америкы приіхал 22-го Августа 1911 року до місточка, Шенандоа, Па., где получил роботу чищенья угля при майнах.

В 1912 року переселился до сусідного місточка Майнерсвилл, Па., где робил на ріжных роботах и в майнах и на дворі при майнах.

В місті Майнерсвилл Иван Малютич стал прихожанином русской православной церкви, где принимал участь в хорі и был избраный в уряд прихода, яко Секретарь. В Майнерсвилл он прожил 8 роков.

В 1920 року переселился ку свойой сестрі Антонии, по мужу Швец, до міста Ньюарку, Н. Дж. По пару місяцах переселился до міста Юнкерс, Нью Йорк, где остался до теперь.

В Юнкерсі познакомился с дівчином Варваром Микуляк, котра што приіхала в Америку зо сусідного села Ганчовы на Лемковщині и поженилися 5 сентября 1920 року. Иван и Варвара Малютич выховали єдного сына Симеона, котрый покончил высшы школы.

Обоє Малютичы от початку стали прихожанами русской православной парафии и церкви св. Тройцы в Юнкерс, Н. Й., и тоже, яко любитель співу Иван был членом хора и членом аматорского кружка так, як при настоятелю Кушварі при парафии розвивалося культурне житья. Иван Малютич был тоже контролером и секретарьом при упомянутой парафии.

Иван Малютич належит до отділа Общества Русскых Братств ч. 11 и был свого часу избраный в уряд отділа и получил премию за придбанья найбольшого числа членов до Братства.

При организации Лемко-Союза Иван Малютич выполнил роль пионера-организатора ч. 28, в котром занял уряд першого предсідателя отділа, а потом за весь час был вірным и активным членом во всіх предприятиях и особливо при культурно-просвітительной роботі. Организовал и учил представления, хор и танцорску школу и др.

В 1936 року члены отділов Лемко-Союза в Юнкерс, Н. Й. рішили побудувати свой народный дом для розвития дальшой культурно-просвітительной роботы. Тота будова, то єст наш теперішный Карпаторусский Центер.

При будові КРА Центра Иван Малютич явился головным инициатором и руководителем. Вся будова была на його плечах и його старунку, бо настали трудны часы світового кризиса и безроботья, а до того и погоня пропаганды против будовы. Но при твердой воли Ивана Малютича, Д-ра Симеона Пыжа, Дмитра Вислоцкого, Владимира Гончарика, Ивана Лабаш и другых членов, будова КРА Центра была докончена в найліпшом порядку.

Коли началася покупка Американского Лемко-Парку, Иван Малютич был тоже єдным из передовых инициаторов того діла и был в первом комитеті членом директории и кассиром. Иван Малютич от початку принимал активну участь в благотворительной организации помочы родному краю Лемко-Релиф Комитеті, в котром до того часу исполнят уряд кассира.

В знак глубокой подякы и признательности за труды для добра и славы нашого Лемковского народа в честь Ивана Малютича и його родины члены Л. С. и КРА Центра массово отмітили день 8 марта 1964 года торжественным банкетом в Карпаторусском Американском Центрі.

Народне почтение, котре было отдане пок. Малютичу, принесло йому невысказану радость. Он николи не сподівался, што за свого житья дождеся увидіти подяку так многочисленных приятелей, котры сошлися на торжество отдати йому слово признательности. Он не мог выразити подякы на торжестві, и всме ище находился под вплывом великого события в свойом житью, коли наремно заболіл. Был взятый до шпыталя и дня 19 мая 1964 року упокоился.

Смуток наступил в родині и меже членами. Для родины одышол муж и отец, газда дому, а для народной организации одышол от нас навікы ище єден с нашых передовых пионеров, якыми щедро была наділена наша передвоєнна емиграция. Най му буде память вічна в род и род.


JohnMalutich1

Меляния Цисляк передає цвіты Ивану и Варварі Малютич в имени организаций в день их почтения.

JohnMalutich2

Петро Корба, Предсідатель Карпаторусского Ам. Центра, передає Почетну Грамоту Ивану Малютичу.

JohnMalutich3

Теодор Рудавский, Гол. Председатель Лемко-Союза, передає Ивану Малютичу Почетну Грамоту.





[BACK]