Юбилянты Адам и Анна Лучкович — Стефан Шкимба
Adam and Anna Luczkowicz

Адам и Анна Лучкович.

Неділя 17-го ноября 1963 року буде памятатися аж до смерти Адаму и Анні Лучкович, котры того-же дня весело отпраздновали свой 50-літный юбилей супружества.

Юбилей начался с молебньом в русской православной церкви в Когус, Н. Й., а юбилейне угощение состоялося в Русском Клубі, узнаный яко найкрасший русский клуб на Американской Руси.

Тоту золоту свадьбу устроили своим родичам их діти, на котру позапрашали всю родину, кумов, краянов и знакомых, як с близка так з далека, бо был аж из Чикаго, Н. Й., Пассайка и другых дальшых місцевостей.

Так як никто уж не жиє из весільно дружины, лем єдна их дружка, то діти юбилянтов запросили мене, яко “лемковского старосту”, абы я перепровадил тото золоте весіля их родичов. Не буду я хвалился, а повторю слова гостей, же такого веселого золотого весіля ище в Когус не было, яке гості провели под моим староством в честь нашых краянов Адама и Анны Лучкович.

Обоє юбилянты походят из славного русского села Фльоринкы, повіт Грибов. В Америку прибыли они в молодом віку до міста Когус, Н. Й., где и повінчалися в субботу 16-го ноября 1913 року, и прожили в том місті Когус свой молодый вік.

Адам Лучкович родился от родичей Демка и Промкы Лучкович, його няньо Демко побывал 4 разы тут в Амерйкі, яко перший емигрант из Фльоринкы, и был на помощи другым нашым лемкам-краянам при организованию русского народного Союза, котрый то союз называют теперь — Украинский Народный Союз. Также няньо Адама Демко Лучкович был знаный на околицу села Фльоринка, яко найліпший спущатель олію с лену и конополь, котрым то олійом мастили стравы в постовы дни.

Юбилянты Адам и Анна выховали дві дочкы в русском духу и обом дали высше образование. Старша дочка Стефания выдана за Дмитром Петришин, тоже лемко-американец, но щиро любит и уважат всьо, што наше русске, а также учат они двох своих сынов Роберта и Ярослава быти такыми любовниками до свого народа русского. Оба их сыны уж доросли и поступлят в колледж.

Молодша их дочка Мария жиє при родичах и працує для стейту Нью Йорк в Албани. Таку саму роботу занимат их старша дочка Стефания Петришин, абы змогли они дати якнайвысше образования своим двом сынкам. Єй муж Дмитро помагат тестью и мамі в бизнесі, котрый они провадят уж близко 30 роков, яко рестерант-салона.

Кто из краянов села Фльоринкы желал бы росписатися с Лучковичами, они охотно каждому отповідят, где бы вы не жили, то пиште всі на пониже поданый адрес. А я, яко староста их золотого весіля от имени всіх гостей желаю обоим молодятам весело и счастливо прожити до их дияментового весіля.


Стефан Шкимба.

Willow Bar-Grill
Adam Luczkowicz, Prop.
12 Willow Street
Cohoes, N. Y.
Tel. CE. 7-0106


[BACK]