О Фильмі “Лемковске Весіля”
И сам не знам, што мам робиц,
Ци ся жениц, ци так ходиц.
Оженюся біда моя,
Вандрувати ножкы болят,

або

Ище-м ся не думал в том рочку женити,
Мусіла-с мі мила штоси поробити.

* * *

Такых и подобных співанок наши предкы створили велике число в своих молодых роках. То громадне число весільных співанок указує на то, што подія супружества для нашых предков была важным моментом и высоко моральным обовязком. Никто с нашых предков легкомысленно не женился, бо супружество означало вступ в нову отвічательну половину их житья. Каждый смотріл ци он уж єст готовый взяти на себе отвітственность за свого супруга и будущу фамилию. Зато перед женячком переходили молодого, ци молоду всякы мысли и планы, котры они выражали в співанках, як приміром и тота:

Ой зле, не добрі,
Женитися треба.
Взял бы-м сой богачку,
Богачка гойнує,
Ой зле, не добрі,
Вшитко розгойнує.

* * *

Ой зле, не добрі,
Женитися треба,
Взял бы-м собі вдову,
Нема свого дому,
Ой зле, не добрі,
Нема свого дому.

* * *

Ой зле, не добрі,
Женитися треба,
Взял бы-м сой сироту,
Не має родины,
Не буде гостины,
Ой зле, не добрі.
Не буде гостины.

—————o—————

Уж не зле, уж добрі,
Женитися буду,
Нашол єм сой таку,
Што на мою дяку,
Уж не зле, уж добрі,
Женитися буду.

—————o—————

Но не до вшиткых така ситуация относилася, же могли собі выбрати на свою дяку, кого хотіли, бо в больше случаях, як ніт, брали слово родиче, котры вірили так, што любовь молодых скоро ся мине, то ліпше звернути увагу на их будуще економичне положинья. С єдной стороны они хотіли добрі, але часто тым зробили зле, коли меже молодом паром не было жадной любви, а часом воліло єдно друге не видіти, и таке житья навет при богатстві до смерти не было счастливе.

Але якоси нашы предкы перенесли вшиткы трудности, и певно через то створили и оставили нам великы дорогоцінности в весільных обычаях, котры были так прекрасны и богаты, што нам трудно их забыти.

Молодиця, приміром стояла на верху, свойой радости, коли при выборі до шлюбу, просячы о родительске благословение свашкы при музыкі заспівали:

Счастлива-с, Марисю,
В пана Бога была,
Же ты свой віночок
До днес доносила.

До днес доносила,
Ладні-с собі несла
И свойой родині
Ганьбы не принесла.

Ни ганьбы, ни стыду,
Ни жадной прикрости,
Днеска ся отдаєш
В великой радости.

Музыканты грают
И весіля стоит,
Вся твоя родина
Тебе благословит.

Кто не може отчути в собі глубину мыслей, выраженных в тых співах? В тых короткых зворотках выражено так много с цілой молодости, бо послі родительского благословения отвераются ворота в незнану будучность.

Штобы не загубити слідов по тых прекрасных традициях, створеных нашыми предками передовы люде на емиграции в Америкі и Канаді рішили изобразити тот обычай и запечатліти го на фильмі для поучиня и памяткы нашым будущым поколінням, котре уж не знає за тоты обычаи, котры будут мати почетне місце, яко культурне наслідство давных часов. Тоты люде рішили приготовити и одобрати на фильм “Лемковске Весіля” в цілой його славі, где буде продемонстрована велика красота народных мелодий, співу, музыкы, стародавних танцов, народных и торжественных народных костюмов, обычайов, но и природа, в котрой тоты обычаи были створены и розвиты.

Начало фильму “Лемковского Весіля” дал Перший Округ Лемко-Союза, послі чого остал створеный комитет во главі с предсідательом Алексиом Бідником и директором Николайом Гойдич. В пробах принимат участие от 40 до 60 особ, так зо старшой, як и с новшой емиграции и пару в Америкі рожденных. Єст то вынослива и енергична группа, котра сходится барже каждый тыждень на пробы и терпеливо жде того дня, коли их всі усилия практикы будут сняты на документальный традицийный фильм.

Як кажде предприятие, так и фильм потребує кромі моральной помочы, помочы финансовой. Фонд на фильм собератся от початку, но до того часу он не єст достаточным, штобы мож брати фильм. Тота причина встримує діло фильмы. Но єст надія, што коли того року в календарю мы можеме показати лем фотографию с группы весіля, то на слідуючий рок мы успієме показати уж интереснійшы частины весільных церемоний с фильма.

Діло издания фильмы “Лемковского Весіля” єст так достойне всенародной поддержкы, як и всі другы нашы народны начинания.


LemWed

Акторы и участники фильмовой группы “Лемковске Весіля”. Дакотры из них уж пристроены добрі, як приміром, женщины, а з мужчин Николай Порада (направо з горы). Потребно ище пристроити в полный костюм всіх мужчин. (По правой стороні на фото стоит директор “Весі- ля” Николай Гойдич, а коло него Алексий Бідник, Предсідатель Комитета.)



[BACK]