О Лемко-Парку
LemPark
6 комнатный дом в Лемко-Парку — “Зозулька”.

Того року в календарю не поміщаме новых фотографий из Лемко-Парку помимо того, што в том року наша народна карпаторусска здравница найбольше за всі попередны рокы отновила и змінила своє лице.

Найбольшым предприятием в Лемко-Парку, то побудова нового модерного купального озера, котре змінило вид в цілой центральной части парка и надало му цінного виду. Озеро было окончене до осени, но уж мало кто скорыстал с него, так пустого озера мы не хотіли поміщати, бо на другий рок буде можна принята фотографию, коли озеро буде открыта для публикы.

Другом дуже интересном атракциом в Парку буде Талергофский Памятник храм-архив-музей, котрый до зимы ище не был оконченый, то фотографии из него появится в календарю Лемко-Союза аж на 1966 рок.

Мы не знаме, но надіємеся, што и Парк Русенка буде за тот час упорядкованый, што в нем будут ходникы, квіты и другы рослины с лавками и другими прикрасами. Єсли то буде зроблене, то и тот Парк в Парку буде поміщеный в календарю на другий рок, и тогды будут показаны достижения Парку за два рокы.

Нам старшым пришла на помочь наша молодежь, котра поинтересовалася ділами Парку так, як мы собі того желали и в снах предвиділи. Мы думаме, што смілый крок, нашых молодых побудувати модерне купальне озеро заслугує признательности и похвалы. Правда, што оно было окончено под осінь, але зато буде готове на першы дни літного сезона.

Нам здаєся, што и рішение о членском до купального озера має добрый напрям, бо тым обеспечится першенство для шергольдеров Парка. Шергольдеры должны с того насамперед скорыстати и выбрати собі доживотне членске право до купального озера. Членске включат супругов и дітей до 19 року житья. Діти старшы должны уж сами стати шергольдерами Парку, а так стати членами купального озера.

Финансовый стан Лемко-Парку єст солидный и поправлятся с каждым роком. Будучность його в молодых руках нашого потомства, котре пильнує його, як зиницу в оку.

LemParkLake
Лемко-Парк — Старе купальне озеро от стороны ліса. Нове модерне озеро находится зараз высше по середині на горбочку.



[BACK]