Важна Книга

При конци 1964 року в 50 годовщину Талергофа появилася велика и важна книга о событиях тых времен, т. є. 1914-17 гг. В ней описаны переживания нашого карпаторусского народа в Галичині, Буковині, Лемковщині и вообще на цілой территории западных русскых земель, котры принадлежали тогды политично до Австро-Венгерской монархии.

В 50 годовщину Талергофа совершилися и другы события, относящыся к тому страшному периоду нашой истории. В День Талергофа, дня 2 августа в Лемко-Парку отбылося торжественне открытие начавшогося будовати Талергофского Памятника, храма-архива, музея при тысячных массах народа. Нью Джерзиситский, Пеннсильванский и Огайский благочины (округы) устроили свои Талергофскы поминания в Парамус, Ст. Клейр и в Кливланді. Организовался другий Талергофский комитет на челі с прав, священниками для постройкы каменного памятника в Ровском Парку, яко подарок емигрантам из державной России на памятку о карпатороссах. Понеже тот фонд перерос кошта будовы памятника, то за надвышку буде напечатана єдна, або больше книг о Талергофі, котры до того часу находятся в рукописах.

Всі завершения 1964 року слідує назвати великыми, даже не грішно буде назвати то пробуждением Американской Руси. В подіях 1964 року приняли участь такы люде и такы священникы, котры за 50 роков не зділали для свого народа, або для учтения памяти Талергофа столько, як за макове зеренце.

Полну благодарность за пробуждение Американской Руси безусловно слідує отдати культурно-просвітительной организации Лемко-Союз, котрый с 1959 року в первы неділи августа начал созывати Дни Талергофа, на котры тысячными массами сходился наш карпаторусский народ из цілой Америкы и Канады. В первый День Талергофа была зложена жертва, котра стала началом фонда будовы Талергофского Памятника.

Издание книгы, котру несподіванно рішил издати Петро Гардый и супруга Анастазия с дітьми належит теперь и буде належати до важнійшых событий того рока. Они издали книгу “Военные Преступления Габсбургской Монархии 1914-1917 гг,” коштом, накотрый ани жадна из нашых организаций ани никто с отдільных личностей не рішилися бы. В 50 годовщину Талергофа они рішили пожертвовати громаднійшу сумму на издательство книжкы, приход с роспродажы котрой буде увашатися, яко издательский фонд дальшых изданий карпаторусскых писателей. Подробности о том можно найти в объявлеиях газеты “Карпатска Русь”, а и в нашом Календарю. 

Слідує отмітити для тых, котры того не знают, што материал в упомянутой книжкі не новый. Материал переведеный в єдну книгу из четырьох томов так зв. “Талергофского Альманаха”, изданных во Львові меже 1920 и 1930 роками, существующым там тогда Талергофскым Комитетом. Но переиздание той книгы тым не тратит вартости, бо ограничене количество Талергофского Альманаха днеска представлят собом выключну рідкость. Книга буквально была уничтожена в II Світовой войні.

Сут там спискы многых талергофцов из интеллигенции и селянства, их воспоминания о Талергофі, фотостаты роспоряжений властей о розстрілах и фальшивых доносах зо стороны чужых ненавистников не нашого роду и нашых кровных выродков украинскых самостійников, котры были на службі чужым властям. Сут фотографии и статьи, в котрых авторы пробуют, хоц с легка пояснити взрыв страшного урагану, котрый взорвался над нашым спокойным, безборонным народом.

Книга тота не для удовольства, а для глубокого розмышления о прошлом, в котром заклята тінь прошлого. Книга добра для наукы и студий. Она буде находитися в домі каждой русской родины, в каждой народной и публичной библиотеку в каждом архиві, най знают о Талергофі всі, цілый світ.

На том місци мы вспомнеме слова директора ассоциации национальностей в Кливланді Теодора Андрейкы, котрый не єст ани нашого русского ани славянского роду. В газеті “Кливланд Пресс” от дня 24 октября 1964. В статьи “Карпаторуссы вспоминают мучеников 1914 р.” — он просится читателей:

— Освєнцім, Бухенвальд, Дахав и другы концентрацийны таборы стали обрыднеными названиями кругом цивилизованого світа. Выгубление мирного народа в Лидицах в Чехии має подобну историю. Но кто из нас слышал даколи за Талергоф и Терезин таборы смерти, где австро-венгерске правительство арештовало и убило тысячы людей подчас I Світовой войны.

Он сам, яко сотрудник газеты може не знал бы о том, як бы не съізд Кливландского благочину, котрый поминал рочницу Талергофа 25 октября 1964 року в Кливланді.

Так світ не знал, и в великой мірі ище и днеска не знат о Талергофі и Терезині и дуже довідатся именно теперь из книгы “Военных Преступлений Габсбургской Монархии 1914-1917 гг.”.


[BACK]