Жичу Счастья и Спокою — Яков Дудра
С Новым Роком, братья лемкы,
В нове житья приступайте,
Старому подяку зложте,
А с новым ся запознайте.

Здравья, счастья и спокою,
В цілом світі мы прагнеме,
Не позволь на войны смуткы,
Зато вдячны ти будеме.

Мы ся зато обіцяме,
Цілый тот рок честно жити,
Слабым людям помагати,
Прихильными для них быти.

На здоровью и на майні,
Навет и на людской чести
Не хочеме зашкодити,
Ни до ганьбы тыж привести.

А ты дай нам. Новый Рочку,
Што маш для нас найліпшого,
Же бы тебе пережити —
Знов до того наступного.

Но зо свойой я стороны
Складам для Вас желание,
Мои братья, лемкы, милы,
Вшиткым, где кто кады жиє.

Не выключам украинцов,
Хоц лем лемков мам на гадці,
Бо то єден тот сам квіток,
Бо на русской вырос грядці.

Жичу вшиткым в Новом Року
Вшиткого, што лем сами
Пожадате и прагнете
Вы и жены с діточками.

Напевно лем до здоровья.
Бо го треба до роботы.
Бо кто здоров и працує,
Не зна біды ни згрызоты.

Веце нам дай світового
Спокою в том Новом Року,
Вшиткым людям гет на світі,
Ци ту в Польші, ци в Марокку

Всяды згоду, всяды спокой,
Зроб на світі. Новый Року,
Згодне житья и добробыт
Дай людям на каждом кроку.

Воз цілый світ. Новый Року,
В справедливы охороны,
Сердечно я прошу Тебе
3 мойой жичливой стороны.


ЯКОВ ДУДРА, Лосья, Лемковина



[BACK]