Василий В. Чепа
Василий В. Чепа, Vasyl Chepa

В Канаді в місті Гамильтон, Онт., 6 марта 1963 помер извістный всей нашой карпаторусской емиграции Василий В. Чепа.

Покойный Василий родился 1902 року в селі Малом Березном Ужгородского округа в Карпатской Руси в фамилии с трьома хлопцями и двоими дівчатами. В 1927 году он приіхал в Канаду, где в 1934 женился с Мариом Пырч, родом из Устья Русского, на Лемковщині.

Хоц Василий Чепа не належал до группы тых першых пионеров основателей Лемко-Союза, но його по всьой справедливости слідує прилучити до них, бо он такой в початковых роках познал ціли Лемко-Союза и причинился в громадной мірі до його розвития. Он любил правду от початку и ненавиділ неправду до гробовой дошкы.

Василий Чепа был остатным из тых, так як бы апостолов Лемко-Союза, котры створили центр организации в Торонто, Онт., и уж всі одышли на другий світ. Як долго жил Чепа, то никто не сміл унижати честь лемка, ани жадного карпаторусса. В том, што организация наша была честна, як єй люде познали, крыєся величие Василя Чепы, котрый был всіми, кто го знал высоко уважаный, ціненый и любимый.

О важности Василия Чепы можна судити и с того, што под його руководством, при горсткі краянов, якы жиют в Гамильтон, он потрафил заохотити и урядити так, што там был купленый свой Карпаторусский Народный Дом для общественных и фамилийных потреб своих членов.

Покойный Василий оставил в живых смутком прибиту жену Марию, высоко образованого сына Стефана и три донькы, а в Торонто сестру Юлию и швагра Михаила Капко зо сыном.

Коли бы кто не прочитувал историю карпаторусской емиграции в Канаді, теперь ци в далеком будущом, имя Василия Чепы найде на каждом місци, яко честного борца за свободу, счастье и мир свого карпаторусского лемковского народа.






[BACK]