Бортнянска Родина — Фецко Дутканич, Dutkanich
Раз на Яна на Купава,
Пришла дівка з Ярослава,
А красненька, хоц біденька,
Сирота молоденька.

И на ділом світі
Не мала никого,
Зато она пришла
До села Бортного.

Я вам ту принесла
Таку то новину,
Же я маю в Бортном
Велику родину.

От Воробля по Собина,
То єст моя вся родина,
Хоц вас не знам по Адамі,
Але чула о Хаимі, Лейбі и Абрамі.

Ту сут Доклі, Дутканиче (и Борошовиче).
Деці, Неді и Мадзікы,
Што носили взіпак керпці,
А нарожно черевикы.

Богачикы, Перуны, Старикы,
Єдны вчили, другы шили
Чугы, холошні, гуні
И женам фарбанкы.

Годі, Копчы и Цапы,
Феленчакы и Кобасы,
Што любили обнимати
Дівкы през поясы.

Гнатовиче, Горбале, Кузякы,
Варяне, Тузикы и Гбуры,
Єдны пекли, другы іли
Компери и смачны бандуры.

Грацоні, Гливы, Журавы,
Циркоте и Співакы,
Што робили млинці, кресты
И річы вшелякы.

Баволякы, Студанты, Бодакы,
Поливкы, Козакы и Квочкы,
Што носили, (як дружбили) в капелюхах
Перка и квіточкы.

Старанковичы, Підбережнякы,
Оріщакы, Ожинскы и Тузы,
Єдны пряли, другы плели
Крайкы и мотузы.

Быканиче, Пелешы, Гоньчакы,
Шкурате и Дзямбы,
Што читали псалтыри,
А и рвали людям зубы з гамбы.

Завіднякы, Хомковичы, Качмары,
Блащакы и Пашкы,
Што стріляли дикы свині,
А часом и пташкы,

Калужняцкий и Крыницкы,
Хваликы, Кобаны и Щуры,
Што наганяли грішных в небо,
А праведных до дзюры.

Налисникы и Решетары,
Лизакы, Ківкы и Шпакы,
Што зберали на Ваткові
Грибы, смаржы и соснякы.


* * *

Так на Яна на Купала
Я ся з вами роспознала.


* * *

Буду вам знайома,
Уж не буду чужа,
Бо я нашла в Бортном
Богатого мужа.

Зробиме гостину,
Велике весіля!
Придут люде зо вшиткых сторон,
А навет з Розділя.

То буде весіля,
Велика гостина,
Не бракне нам пива,
Горілкы, ни вина.

Про мене то буде
Счастлива година,
Же буде весела
Бортнянска родина.

Буду я співала,
3 радости плакала,
И николи уж не верну
До міста Ярослава.

Фецко Дутканич,
Чикаго, Илл.



[BACK]