Білцарева Русска, Моє Родне Село — Ярослав Кобан, Yaroslav Koban

Село Білцарева лежит близко рікы Біла, повіт Грибов, в заходкьой части Галичины, 3 милі на полноч от Крыниці.

Ярослав Кобан, Yaroslav Koban

ЯРОСЛАВ КОБАН

Село Білцарева было куплене в 1531 року от польского короля Жыгмонта Першого, при помочи Грибовского війта, именем Пєньонжка, село купил Иван Троханович, сегодня Трохановский, бо в 1684 король Иоан Третий титулувал Трохановича Трохановский, и грамоту Трохановскому, при чом потвердил покупку сего села, котра голосит слідовательно:

“Joannes tertius, Dei gratia Rex Poloniae.... significamus praesentibus litteris Nostris... reproductas coram Nobis esse litteras popireas ex actis castrensibus Sandetensibus, continentes in se privilеgium Sigismundi primi, Regis Poloniae, praedecessoris Nostri... suplicatumque Nobis est, ut easdеm litteras autoritate Nostra regia opprobare dignaremur, quarum litterarum tenor est talis: In Nomine Domini Amen. Ad perpetuаm Dei memoriam... ego Stanislaus Pieniązek de Iwanowice, tenutarius et advocatus hareditarius bonorum Regalium Grybow in terra Cracoviensi sitorum... ex consensu et admissione Serenissimi principis et Domini Sigismundi primi, Dei gratia Regi... vendidi venditione vera scultetiam in villa Regia Bielczarowa.... provido Iwan Truchanowicz cum uno laneo agri, in quo idem Iwan residet...

Дальше приведены свободны права (вольность):

... Tum in silvis, quae sunt intra limites villae Bielczarowa praedicta, quam etiam in silvis Bielczady et Jaworze dictis ad Piwniczna Schia pertinentes juxta Literas Simae olim Reginae Helisabet desuper emanatas.

В 1820 году купил Білцареву от камеры якийсий Гош, а по смерти його в 1886 году купили єй жители Білцаревы при діятельной помощи свойого приходника о. Феофила Качмарчика.

Село Білцарева славилося надзвычайным уроджайом овочов. Причина была така, як я ходил до школы 6 клясы, то в тот час в селі был учительом наш лемко Алексий Милянич, надзвычай он был добрым учительом. Тот человік причинился до того, што селяне выпістували прекрасны овочовы сады. Учитель Милянич высылал хлопців школяров по полю за дикыма грушками, або яблонками, а потом як хлопці назберали такых малых деревец, то учил садити, а як ся така дичка прияла, то учил щепити тоты деревцята, котры, як выросли, давали смачны овочы.

С поводу надзвычайных овочовых урожайов в нашом селі, оно звернуло увагу не лем сусідным селам, але каждому, кто переходил через село в сезоні, як овочы дозріли на дорогах, то каждого человіка удивлял такий прекрасный урожай овочов яблок, грушок, сливок и черешен. Газдове мусіли давати подпоры под голузя, бо в противном разі тягар овочей ламал дерева.

Як сказано высше, што такий урожай овочей каждого удивлял, кто переходил через село, бо приходили зо Львова из Общества Качковского агрономы до села узнати, што єст поводом до такого богатого уроджаю. В селі Білцарева тоты львовскы агрономы пришли к тому переконанню, што село Білцарева огороджене горами от заходу, полночы и полудня, так тоты горы охороняли овочовы дерева, овочовый цвіт от проятых вітров. Дальше село Білцарева славилося своим лісом, котрый громада купила от якого то пана именем Гош в 1886 року. Тот ліс приносил великы доходы жителям села Білцаревы, як дерева на будовлю, опаль, ягоды, малины, черниці и грибы и полювание охотникам за дикыма звірями.

Гранция Білцаревы дотыкат польского села так зване Концльова с полночной стороны, с полудневой стороны граничит з русскыми селами — Камяна и Котов; зо всходу с Фльоринком, а зо заходу с Богушом, а дале с Королевом Русском.

Моє село Білцарева складалося из 15 ріль, с долины села, або як называли білцаровяне — c нижнього конца. Перша ріля называлося Нижнє шолтыство, а так Стухляновка, Иванівка, Вышнє шолтыство, Куземчаківка, Гаврелівка, Редівка, Федорівна, Хыляківка, Греорівка, Шкрилівка.

Тоты рілі были с полночной стороны сельской річкы, а с полудньовой стороны річкы, котру называли Білцарка на половині села была плебания, а от плебании была ріля Палешаківка, Костельняківка, Царівка, а на самом вышньом концу села рілю называли Лан. На середині села стояла мала деревяна церковця и школа, друга школа была в середині села перебудувана зо старой корчмы. В тот час село Білцарева зробило великий прогресс, бо не подписало пропинацию єврейови, а подписало селянину так званому Василию Галабурда, а зо старой корчмы зробили школу. Першым учительом в другой школі был мой братанец из Богушы Д. Кобан. Село Білцарева славилося своим патриотизмом, бо в селі была читальня Качковского, до котрой майже всі школяре належали и гдекотры старшы хлопы и жены. В селі был театральный кружок, котрый часто выступал на сцені не лем в селі, але и в сусідных селах, пару разы выступал в Новом Санчу, бо там была Русска Бурса. Хор выучил сельский учитель Пилипчук, а кружком руководили Качмарчикы, сынове настоятеля сельского прихода. В тот час в селі никто не чул за даяку Украину, всі называли себе русинами, або русскыми. Маєся розуміти, што то всьо ся діяло перед першом світовом войном, зато сельскы патриоты страшно потерпіли под час войны, бо украинскы посіпакы самостійникы доносили фальшивы скаргы на Білцаровянов и много были арендованы Габсбургскым австрийскым правительством, а то: свящ. Т. Качмарчик и його четырі сынове: Любомир, Ярослав, Теофиль и Владимир, а из селянов — Трохановский М., Трохановский Д. и Логаза, студент в бурсі в Новом Санчу. Трохановского Даниила гузар привязал до коня и так гнал до найблизшого міста Грибова, а оттамаль до Талергофу.

Зо женщин была арештована М. Трохановска с Лану, сестра Методия Трохановского, учителя в Крыници. Обоє разом были завезены до Талергофу.

Так само не можна забыти дуже важну историчну справу, котра была начата уроженцами села Білцаревы, а то проголошение независимой Лемковской Республикы. В комитет того важного историчного акту входили слідуючы енергичны мужы, рожденны в Білцареві, а именно: адвокат доктор прав Ярослав Качмарчик, адвокатска кантора в Мушині, повіт Новый Санч, Методий Трохановский, учитель в Крыници, о. прот. Хиляк, настоятель парафии в Избах. Всі три тоты патриоты были рождены в Білцареві, всі три были арештованы польскым правительством и суджены в Новом Санчу, яко державны “здрадникы” польского славянского правительства. Так ту маш брате “славянство” и свободу!

Так, дорогы братья лемкы-карпатороссы, я не пишу тых пару строчок для славы або даякого гонору, але я зато пишу, бо наскілько мні знано село Білцарева и єдно-сельчане, за их важны события, труд, патриотизм на народном полю, а дуже мало о том важном акті споминатся в нашой прессі. Так, яко єдносельчан Білцаревы, я клоню свою сиву голову перед такыма патриотами, як ту высше спомянуты. Честь Вам, дорогы Білцаровяне за Ваш труд, страдания за свободу свого русского лемковского народа, може в будучности даколи прийде справедливый час, справедливший розсудок меже славянскыма народами, або ліпше сказати, меже всіми народами на той кулі земской.

Я не єм религийным або национальным фанатиком, може бым ся згодил с украинцями роботничого руху, але я николи ся не згоджу с украинцями самостійниками, роскольниками Совітского Союза. Як єст право дакому называтися поляком або украинцом, так и мі єст мило называти себе русином або русскым. Чом? Длятого, бо мене родила честна русска мати и выховала в таком духу. Я не буду — ище раз повторю — не буду доптати віру и обычаи моих родителей, мойой покойной мамусі и отца. До такого гріху я николи ся не допущу, то бы был народный неотпущенный для мене гріх.

Я не піду с той дорогы, на яку мене поставили мои покойны родиче, я не можу быти такым измінником, як єден канадский Блукач, котрый сблукал, скрутил с дорогы и пішол, як блудный сын, зневажал то, с чого повстал, зневажал своих родителей и свой народ.

Такого учинку я зробити не можу.

В заключение залучаю всім читателям и взагалі всім карпаторуссам лемкам найсердечнійше пожелание!

С почтением остаюся,


Ярослав Кобан,

Rt. 3. Box 243
Hibiscus Park
Stuart, Florida, 33494.



[BACK]